Ужась муртлы даур но ӧжыт

Ангелина Снигирева
By Ангелина Снигирева Октябрь 31, 2019 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ужась муртлы даур но ӧжыт

Туннэ нуналлы шаерамы 100 ареслэсь ортчем мӧйыос 12 кузя. Таос пӧлысь одӥгез — Пичи Пурга черкогуртын улӥсь Александра КУЗНЕЦОВА. Но арлыдыз ласянь гинэ пусйымон ӧвӧл та кышномурт: со пыриськемын Быдӟым оже. 1942-тӥ арысен 1945-тӥ арозь зенитчица луыса ожмаськиз Карельской фронтлэн 361-тӥ зенитно-артиллерийской полказ. Кышкасьтэм луэмез понна Александра Александровна пусъемын Отечественной войналэн 2-тӥ степенё орденэныз, «За оборону Советского Заполярья» пусэн, Быдӟым ожлы сӥзем юбилейной медальёсын.

А. Кузнецова
Туспуктӥз Светлана Сырыгина

Арлыдзэ вунэтэмын

Шура апаез дорысьтыз котьку ик уд шедьты: со доры куное вуыкумы но, азьвыл ужан интыяз — Пичи Пурга черкогуртысь молокозаводэ — кошкем. Отчы сое, дано ужасьсэс, дауръем юбилееныз ӟечкыланы ӧтиллям. Паймод но бырод солэн 100 аресаз вуыса но такем мыло-кыдо луэмезлы!

— Со милям интыяз пукыны чик уг чида: я черке кошке, я кыӵе ке ужрадэ ӧтизы ай шуэ но ӝыны нуналлы ыше, — вера Шура апайлэн агаезлэн Татьяна нылыз. (Ӵапак солэн семьяез бордын улэ-вылэ Александра Александровна.) — Ужтэк но пукемез уг луы ук солэн. Синъёсыз ляб адӟо ни ке но, мае-мае но, ужез со синйылтытэк уз кельты. Тани туэ но сугонме чисто ваньзэ ачиз пунӥз. Ми солы шуиськом: мын ни, ӵыдэтскы, жадёд. Нош со пумитамы вазе: кылльыса золгес жадисько. Йырвизез но сайкыт ай солэн. Эшъёсызлэсь нимтулъёссэс, улонысьтыз учыръёссэ, урам нимъёсты тодаз возе. Нош кыӵе со пиналъёсты яратэ! Соос но! Внукъёсынымы пегаса-уйиськыса но шудэ. Ачиз пичи мурт луэ, кожалод. Ачим ик паймисько: 98 аресозяз велик вылын ворттылӥз ай! Малпасько, задор луэменыз ик висёнъёслы уг сётскы.

Коркасьтызы вань ӝӧкъёс вылын — бадӟым керттэтъёсын сяськаос, шуяны вуттӥллямтэ на ай: озьы Шура апаез котрес лыдпусэныз ӟечкыланы вуылӥзы Удмурт Республикалэн Тӧроез Александр Бречалов но мукет нимо-дано куноос.

— Тани тазьы сяськаос пӧлын улӥсько! — олокытӥ-мар юртэ пыриз ни ачиз Шура апай. — Туж сӥлы каро ни ай монэ, куддыр кепыр но потӥсько. Туж бадӟым тау карисько вань калыклы. Ма, мылкыд ӟеч дыръя малы бон уд улы ай?! Инмар кӧня сётэм — ваньзэ улоно, ваньзэ чидано.

Пиос пӧлын — ныл

— Вордӥськи мон 1919-тӥ арын татын ик, Пичи Пурга черкогуртын, — улон сюрессэ тодаз вае Шура апай. — Али Пургалэсь пумзэ-йылзэ уд шедьты, пасьтана вӧлскемын ни. Нош мон пичи дыръя 4 урам гинэ вал ай: Советской, Октябрьской, Колхозной но Лунин нимо. Арнянуналлы быдэ базар усьтӥськылӥз. Пӧртэм интыосысь вузаськисьёс но басьяськисьёс валэн-уробоен вуылӥзы. Тодам лыктэ 8 арес дыры. Вазь ӵукна ик султыса, бызисько вал черкогуртлэн пумаз — базаре валэн лыктӥсьёслы капка усьяны. Соку котькуд гуртэ пыронын капкаос вал ук ай. Одӥгъёсызлы ӧсъёсты вӧлъясько, кыкетӥосызлы, куинетӥосызлы — ваньзы мыным быдэн кампетэн сёто. Дыльдые шыр! вия ке но, соосты сиыны уг дӥсьтӥськы, кисыям пыдлогес ватӥсько. Собере, кукъёсы музъем вылэ йӧтылытэк, бызьыса дорам бертӥсько. Нэнэен-дядяйлы ушъяськоно ук, ачим ужаса, кӧттырон шедьтӥ шуыса. Кӧня ке озьы «ужаны» бызьылӥ но, нэнэен-дядяй шуизы: умой ӧвӧл озьы, тырмоз капка усьяны.

Нылпи садын ужакуз

Нэнэе Анна Григорьевна сирота вал. Айызэ-мумызэ адӟылэмез ик ӧвӧл. Нош дядяе Александр Ильич Октябрь революцилэсь азьвыл Пургалан вузчиын ужам. Вуз каремзэ нимаз журналэ гожъяса келля вылэм, сое та дырозь утьыны быгатӥ — мынэсьтым сое Пургалась музее куризы. Ма, мед ойдо, егитъёс но мед тодозы со вакытэ кызьы улэммес…

Семьяямы ми 5 кузя нылпиос вал: шальтыр-шальтыр пиос пӧлын мон огнам ныл. Агайёсы монэ нуныяса кадь возизы. Но ужаку котькудмылы огкадь йӧтылӥз. Колхоз кылдон вакытлэсь азьвыл дядяй бадӟым хозяйство возиз: бусымы, пудо-животмы, 2 валмы вал. Бадӟымъёсын артэ султыса, арай но, турнай но, ю-нянь но октӥ-калтӥ.

Туж яратылӥ буш вал вылын ворттылыны. Али кадь ик син азям пуксе одӥгез валмы — туж азьтэм вал со. Бусые, пыдъёссэ мырдэм ӝуткаса, коскам кадь мынэ, нош отысь доре лобӟыса кадь бертэ. Со вылын бертаны мон гинэ дӥсьтылӥ. Ма, малэсь ке кышкан тодам ик ӧй вал. Огполаз та азьтэммы монэ уськытӥз, эшшо ке ӵыжыса кельтӥз на. Зол вӧсь луи соку, но улэп кыли.

Дышетски мон Пургалась школаын. Семилеткаез йылпумъяй но, дышетскыны тырмоз ни шуыса, интыяськи черкогуртысь нылпи садэ. Нянькалэн юрттӥсез луыса ужай. Ма, кема дышетскыны возьыт вал ни: улӥмы куанер, ужаса коть кӧня ке уксё поттыны луэ вал. Но визьнодасьёс шедизы: мын, пе, дышетскондэ азьланьты, ужаса вуттод ай. Нэнэен-дядяй пумит ӧз луэ. Ма, асьсэос но соос шумпотыса дышетскысалзы, дыр, но луонлыксы ӧй вал…

Озьы мон выльысь школае вуи, эшшо 2 арлэсь ятыр дышетски на. Ма, ӵапак со аре Пургалась школамес шор ёзо каризы. 10-тӥ классэз йылпумъясьёс пӧлын ми нырысетӥ выпуск луим. Тодмо писателен Владимир Голубевен ӵош одӥг классын дышетскимы.

Шудзы куспетӥ луиз

Школазэ йылпумъяса, Шура апай выльысь интыяськиз нылпи садэ. Таяз радэ — воспитатель луыса. Ваньзэ куспетӥ кариз Быдӟым ож. Шуралы соку 21 арес вал. Со вакытэз али но нуналэн-нуналэн тодэ.

Война дыръя

— Война кутскемлэсь азьвыл военной сборъёсы басьтӥзы 1911-тӥ арын вордскем Андрей агайме. Отын со 2 толэзь ӵоже вал. Ивортӥзы: дорады эн возьмалэ ни, сборъёсысь пидэс пырак фронтэ келялозы. Со Агрызысь чугун станция пыр ортчоз шуыса тодӥмы но кышноеныз отчы мынӥмы. Малпаськом, коть дӥськут, пичи-пичи кӧттырон сьӧраз келялом. Какой! Поезд одӥг минутлы но ӧз дугдылы, ныр ултӥмы шултыса кадь чаляк ортчиз. 1941-тӥ арын 16-тӥ июне вал со. Али ке но син азям пуксё поездысь воргоронъёслэн мур малпаськонэ усем тусъёссы. Кытчы нуо, улэпкын бертозы-а, адӟозы на-а вордскем палъёссэс? Озьы 22-тӥ июне война кутскон сярысь быдэс страналы ивортыку, мон тодӥсько ни вал: Совето Союзысь калыкез шимес адӟон вите.

Андрей агае ожмаськиз 1942-тӥ арозь: киыз сӧсырмыны шедьыса, доре бертыны лэзиллям. Мукетыз агае, Гриша нимоез, со аре ик ивортэк ышиз. Нэнэе 102 ар улэмын, быдэс даурзэ солэсь вуэмзэ возьмаз. 1907-тӥ арын вордскем Ануфрий агае Ижысь заводын фронтлы кулэ луись арбериос лэсьтӥз. Степан нимоез но война пыр ортчиз, 1946-тӥ арын фронтысь луло бертӥз.

1942-тӥ арын ноябрь пумын фронтэ басьтӥзы монэ но. Чисто мон кадь егит нылъёсты Пургалась клубе люказы. Лыктэм, пе, Уральской военной округысь комиссар. Фронтлы, пе, доброволецъёс кулэ, кин соглаш? Мон шуисько: кызьы анайме огназ кельтом, со синтэм кылемын. Пумитам вазизы: тушмонэн нюръяськыны адямиос кулэ, ӧд мыны ке, пытсэт сьӧры но сюрыны кема ӧвӧл…

Кӧня ке нунал ортчыса, мыным повестка вуиз. Пургалась эшшо 3 нылэз басьтӥзы на, нош быдэс ёросысь — 24 муртэ. 2-тӥ декабре милемыз машинаосы пуктӥзы но Агрызозь нуизы. Отысен поездэн Сарапулозь мынӥмы. Нош отын быдэс шаерысьтымы 480 нылъёс люкаськемын ни. Милемыз поездэ пуктӥзы. Мон шеди Магнитогорске (Челябинск улос) мынӥсь товарняке — кунянъёсты нуллыны чаклам вагонэ. Куазь туж кезьыт, дӥськутмы начар. Поезд кыӵе ке станцие дугдэ ке, кытысь но отысь пу шедьтыса, тылскыны но шунскыны выриськом вал.

Бадӟым арлыдаз но липетысь лымы сузяны тубалляз

Ярам, кызьы но озьы Магнитогорске вуим. Отын рос-прос военной улон кутскиз ни. Йырсиме ӵышкизы, военной дӥськут сётӥзы. Улӥмы ми пу баракъёсын, кӧлаллямы пырак выж вылын, куро вӧлдыса. Сюдӥзы туж урод, нуналлы 200 грамм гинэ сиён сётъязы. Толъёс соку ӟырт кезьытэсь вал — 40 градус котыр. 6 часын ӵукна сайкатъяса, бер ӝытозь военной ужлы дышетӥзы. Монэ прибор (зенитной орудиен цель шоры мертаськонъя но ыбылонъя прибор — авт.) сьӧры пуктӥзы. Кезьыт но сютэм улон пумысен нокин ӧз ӝожтӥськылы. Ваньмы угось валамы: курадӟе вань калык, ваньзэ чидано, сотэк вормон уз вуы.

Тазьы дышетскимы 1943-тӥ арын мартозь. Собере поездэн келязы Мурманске — ожмаськоды, пе, Карельской фронтын. Мурмансклэсь кыдёкын ик ӧвӧл сопкаос вань. Нуизы отчы Кольской залив пыр, тём-тём пеймыт. Сопкаозь мырдэм вуимы, дугдылыса-дугдылыса, тушмон угось инмысен бомбаоссэ куямысь ӧз дугдылы. Нырысь нуналъёсаз палаткаосын улӥм. Тушмон бомбаоссэ куямысь дугдэ ке, усьтыр-табыр землянка гудӥськом вал. Отын ик мон присяга сётӥ ни. Али но уйин сайкатӥзы ке, солэсь вань кылъёссэ янгышатэк верало: «Я, гражданин Союза Советских Социалистических Республик, вступая в ряды Рабоче-крестьянской Красной Армии, принимаю присягу и торжественно клянусь быть честным, храбрым, дисциплинированным, бойцом…»

Отын но мон прибор сьӧрын сылӥ: тушмон самолётъёс шоры мертаськылӥ. Туж сак луоно вал, вань лыдпусъёсты рос-прос чаклано. Пушкаослы снарядъёсты милемлы вуттылӥзы Кольской залив пыр. Караван вуэ ке, соосты боевой позициозь ваён понна келяло вал ни милемыз, егит нылъёсты. Воргоронъёс угось пушкаос сьӧрын ыбылӥсько, кошкыны уг быгато. Нош ящикын быдэн 4 снарядэн, одӥгезлэн секталаез 16 килограмм. Кӧня ӝуткано, нуллоно луиз соосты. Эшшо ке, часте вуыса, соосты пушкаос дорозь вуттылӥмы.

Кнопка

Шуралэн ӝуждалаез метр но 48 сантиметр гинэ вал ке но, вормонтэм-быдэстонтэм ужез ӧй вал. Лапег но шаплы луэмез понна полказ сое Кнопка нимазы.

— Огпол монэ снарядъёсты чакланы пуктӥзы. Сылӥсько склад дорын урамын, олокытысь-мар пыд ултӥм комакъёс бызьылыны кутскизы. Сютэм макеос пыд бордам ӝабырскизы. Куалектӥ. Пыдъёсыным тапыртӥсько, «кыш, кыш» шуисько. Но со нуналэ частямы генерал вуыны кулэ вал. Комакъёсты уллянъям ӧй ик синйылты — со, монэ чакласа, вӧзам сылэ ни вылэм. Нош мыным команда сётӥзы вал: генераллэсь вуэмзэ адӟид ке, соку ик ивортоно карауллэн командирезлы. Озьы командаез быдэстыны ӧй вутты. Берло ини командирмы мыным вазе: «Эх, Кнопка, Кнопка! Мон тонэ гауптвахтае келяло!» Уд вера ук солы, комакъёслэсь куалектӥ шуыса. Нош нылъёслэн верамзы вал: гауптвахта ожмаськонлэсь но шимесгес. Я, командирмы монэ жаляз: кӧня ке нунал, пе, кухняын ужалод. Бӧрысь валатски ни: оло, гауптвахтаын ик капчигес луысал. Картошка из кадь кынмемын, сое сузяса, чиньыостэ шӧдэмысь ик дугдӥськод. Пулы нюлэскы ветлоно аслыд — усьылӥсь бомбаос ултӥ. Тушёнкаез ми ӧм адӟылэ, нуналлы быдэ заливысь кутэм чорыген кӧтмес тырылӥм.

Уг вунэтӥськы ни 1943-тӥ арын 5-тӥ мае ожмаськеммес. Тушмон урмемын: вылысьтыз вылаз ми вылэ бомбаоссэ лэзья. Мон прибор сьӧрын сылӥсько, висказ снарядъёсты пушкаос дорозь нуллӥсько. Соку нырысьсэ адӟи, кызьы мынам мертаськемея тушмон самолётэз пазьгимы. Собере мукетсэ, 3-тӥзэ. 2 нылашмес ыштӥмы соку: осколокъёс мугоразы мертчизы…

Фронтын дисциплина туж юн вал. Одӥгзэ эшме, винтовкаен кышкатыса, командир доры нуоно луиз. Кин ке солы верам: сопкалэн йылаз тубид ке, Финляндиез адӟод. Со, разрешение курытэк, гурезь йылэ тубем. Та сярысь тодыса, взводлэн командирез урмиз, укылтэмез дораз вайыны косӥз. Нош со уг мыны. Мон дежурной. Мар карод, приказэз быдэстоно, винтовкаен кышкатоно луиз. Война бере ми та нылашен кусыпмес ӧм ыштэ, ог-огмылы гожтэт гожъямы. Ленинград улосысь Волхов городысь вал со. Улонысь кошкиз 5 ар талэсь азьло. Монэн ожмаськемъёс пӧлын нокин но улэп ӧвӧл ни…

Вормон сярысь тодӥмы 8-тӥ мае. Старшинамы ми доры пыриз но шуэ: «Девочки, капитуляция!» Милям со кылэз кылэммы ик ӧй вал. Мар со сыӵе, юаськомы. Со вазе: «Война быриз!» Ну, ми лӧптэм мылкыдмес кытчы карыны ум валаське ни. Ог-огмес ӝутэм карыса, ӟыгыръяськиськом, чупаськиськом, эктӥськом! Всё, малпасько, тани-тани вордскем палъёсам берто. Но кӧня ке толэзь сопкаын улӥмы, инмез чакласа возимы на.

Озьы август пумын Агрызэ вуи, Пургаозь валэн-уробоен вайизы. Урам кузя тубисько но, пумитам векчи нылпиос бызё, котыртӥм бергало. Мынам киям чемодан, но со буш: кӧня ке ул дӥсе сяна, номыриз ӧвӧл. Нылпиосты куноятыны ӧй быгаты шуыса, али ке но кӧты пӧсь…

Война бере кӧня ке дасо ар ортчыса, Шура апай вуылӥз на Мурманск палъёсы. Однополчанъёсыныз пумиськылӥз, сопкаосы вуылӥз. Война чылкак ӧй вал, кожалод. Пушкаос сылон интыын турын будэ…

Малпанэз зэмаз

Аслыз Александра Александровналы Инмар нылпи ӧз сёты, ӧз но бызьылы со.

— Юасьёс-курасьёс вал. Ӧй мыны но тӥни, — шуэ нылкышно. — Фронтын кузям Москваысь пияш ветлӥз: мон, пе, бадӟым квартираын анаеным гинэ улӥсько, тонэ сьӧрам нуо. Эн ветлы, шуисько, котыртӥм — ӧз ёрты ни. Фронтын мон честно служитьтӥ, лӧптылонъёстэк. Олокыӵе но учыръёс вал угось. 2 нылашмес тӥни берлань доразы келяно луиз…

Москвае Вормон парадэ вуылыкуз
Фото: udmurt.ru

Быдэс улонзэ Шура апай ортчытӥз Степан агаезлэн семьяез бордын. Улӥзы бадӟым семьяен Пургалась атай юртазы. Пиналтэк кылемез пумысен жаляны Шура апайлэн дырыз ӧй вал — агаезлэсь нылпиоссэ аслэсьтызъёссэ кадь будэтӥз, утялтӥз. Бордазы уло ини внукъёссы, правнукъёссы.

— Табере соос монэ утялто, — шуэ песянай. — Тани ог 2 ар талэсь азьло, сюрес вамен выжыкум, монэ машина шуккиз — пыды чигиз. Агаелэн Таня нылыз монэ, вань сюлэмзэ сётыса, чаклаз-утиз. Пыд вылам султытӥз ведь! 1980-тӥ аръёсы но аварие шедьылэме вань: руль сьӧрын пукись бырыны шедиз, нош мон улэп кыли. Куддыр паймисько: ожын усьылӥсь бомбаос улын улӥмы, нош туала улонын кышкытлык тросгес вылэм. Инмар ожын но, со бере но эзельлы ӧз сёты, утиз…

— Мыным 7 арес дыръя Шура апаймы монэ Москваез возьматыны нуллӥз, — вераськон борды итӥське Таня племянницаезлэн Елена нылыз. — Горд площадетӥ поръям, чеберезлы паймим. Шуылоз вал: огпол ке но ас синмыным адӟыны мед кылдысал Вормонлы сӥзем парадэз. Шумпотӥськом, элькунмылэн Тӧроез Александр Бречалов сюлмаськемъя песянаймылэн малпанэз улонэ пыӵаз. Пичи дыръям со монэ шоркаре нуллӥз, нош 2017-тӥ арын 9-тӥ мае мон сое Москваозь келяй, парадэз ас синмынымы адӟимы.

— Туж паймытӥз военной техника, — мылкыдзэ вера Шура апай. — Таӵеосыз ож дыръя луысалзы ке, война, оло, аръёсын ӧй кыстӥськысал. Туж синмаськи маршен ортчись солдатъёслы. Кускысьтызы тӧдьы еоссы, эсьмаса, кузь тӧдьы гож лэзем кадь адӟисько ук!

Быдӟым ож бере Александра Кузнецова ужаз Пичи Пурга черкогуртысь молокозаводын. Отын 25 ар ӵоже, пенсие потытозяз, счетовод-бухгалтер луыса тыршиз. Нимаз дышетскемез ӧй вал ке но, удыссэ валаса-быгатыса нуиз. Быдэс Пичи Пурга черкогуртын Шура апай — данолэсь дано ветеран.

Кызьы 100 аресозь улоно шуыса юанлы Шура апай пальышаса вазе: пӧсекъяно ӧвӧл, ужано лулысь-сюлмысь, туж секыт луыку но — улонэз яратоно. 

Елена Никитина

Ангелина Снигирева
By Ангелина Снигирева Октябрь 31, 2019 13:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<