Удмурт кибашлыослэн муш мумызы

Ангелина Снигирева
By Ангелина Снигирева 28 октября, 2019 13:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

9-тӥ октябре Ижысь Культура удысын ужасьёслэсь тодон-валанзэс будэтонъя центрын усьтӥськиз «Дышетӥсь — дышетскисьёсызлы» адӟытон. Выставка сӥземын Альбина Ядыгаровалэн — шаерысьтымы тодмо куиськисьлэн — 70 арес тырмонэзлы. Отчы люкамын А. Ядыгаровалэн но солэн дышетскисьёсызлэн киужъёссы: ӵушконъёс, шобретъёс, гобеленъёс, панноос, дӥсьёс, кус-керттонъёс…

А. Ядыгарова куиськонэз искусствоозь ӝутӥз
Фото басьтэмын «Народное творчество Удмуртии» огинлэн «ВКонтакте» бамысьтыз

Мытэм уж уз быры

1991-тӥ арын Ижын усьтӥськиз Калык киужъёсъя элькун центр. Центрын зол методической уж радъямын вал, соин валче ёросъёсын киужъёсъя юртъёс усьтӥськыны ӧдъязы. 1993-тӥ арын Альбина Вениаминовнаез центрысь пужыятскон-куиськон отделэ ужаны ӧтизы (1975-тӥ-1993-тӥ аръёсы А. Ядыгарова Ижысь чеберлыко ужъёс поттӥсь фабрикаын ковёръёс куиз, нош со дырозь кирпич поттон заводын но автозаводын ужаз). Нырысь А. Ядыгарова валтӥсь мастерын но методистын ужаз, 1997-тӥ арын отделлэн кивалтӥсез луиз.

Та секыт аръёсы вакчи дыр ӵоже А. Ядыгарова кивалтэм улсын Удмуртиын куиськон выльысен ӝужаз. Элькунамы 16 мастерской но куиськонъя лабораториос усьтэмын вал. Альбина Вениаминовна ёросъёсысь киужъёсъя юртъёсысь специалистъёсын, студентъёсын, кибашлыосын ужаз — литератураысь, музейёсысь люкам тодон-валанзэ озьы вӧлмытӥз.

А. Ядыгаровалэн куиськон школаез ялан паськыта. Али Альбина Вениаминовналэн дышетэм адямиосыз кутскись кибашлыосты визьнодало ини. Удмурт куиськон амалъёсын тодматскыны вуыло Россиысь мукет улосъёсысь но кунгож сьӧрысь кибашлыос.

Калык культураез утемез но азинтэмез понна А. Ядыгарова 2008-тӥ арын Удмуртиысь Правительстволэн «Признание» премиеныз пусъемын вал, нош 2009-тӥ арын солы кичабизы Москваын, Россиысь Правительстволэсь «Душа России» премизэ «Народный мастер» номинациын басьтыкуз.

Адӟытонэз усьтонын А. Ядыгароваез ӟечкылазы солэн дышетскисьёсыз, ёросъёсысь калык киужъёсъя юртъёсысь кибашлыос, ӵош ужам эшъёсыз. Культурая министр Владимир Соловьёв шуиз:

— Альбина Вениаминовналэн лэсьтэм уженыз элькунмы гинэ уг данъяськы, быдэс Россия солы синмаське. «Душа России» премиез солы сётыса, соин ӵош дунъязы шаерысьтымы вань кибашлыосты. Али элькунамы бадӟым фестивальёс ортчыло, кибашлыосмес премиосын пусйыло — А. Ядыгароватэк таӵе вылӥе ӝутскыны ӧй быгатысалмы. Солэн ужез пӧртэм калыкъёслы культуразэс азинтыны юрттӥз но юрттоз. Мон оскисько: Удмуртиын куиськон ноку уз ни быры.

Завод дисциплиналы дышетӥз

А. Ядыгарова шуэ: номыр ӧз пӧрмысал, юрттӥськисьёс ӧз ке луысалзы. Нош соос трос вал: культурая азьвыл министр Анетта Сидорова, Калык киужъёсъя центрлэн 1996-тӥ-2013-тӥ аръёсы кивалтӥсез Рафхат Каримов, Удмурт кун университетысь дышетӥсьёс но профессоръёс, Историяя, кылъя но литературая Удмурт институтысь тодосчиос, шаерысьтымы суредаськисьёс. Нокин палэнэ ӧз кыльы, пусйиз Альбина Вениаминовна. Аслаз дышетскисьёсызлы со нимысьтыз тау шуэ:

— Дышетскисьёсылэн мынэсьтым тодон-валанме басьтэмзы ӧз ке потысалыз, уг тодӥськы, кызьы улысал. Оло, дорам ас поннам куиськысал. Куке фабрикаын уждун тыремысь дугдӥзы, мон проводнике ужаны мыныны ӧдъясько ини вал. Соку ӵектӥсьёс луизы: мын киужъёсъя центре, соос куиськонэз улӟытыны выро. Ӧд ке мыны, номыр уз пӧрмы, кӧня ке адями утчаз ини. Озьы мон, фабрикаын, заводын ужам мурт, центре сюри, кивалтӥсьмы Рафхат Мухаметович но производствоысь вуиз. Ми дисциплинаез гажам, асьмелы шуим: ужаны кулэ, мукет малпанъёсмы ӧй вал.

Центрлэн азьвыл кивал-тӥсез Р. Каримов но тодаз вае Альбина Вениаминовналэсь калык куиськонэз улӟытонын нырысетӥ вамышъёссэ. Азямы бадӟым ужпумъёс пуктӥм, шуэ Рафхат Мухаметович: секыт уж борды басьтӥським, вылӥ чеберлыко ужъёс кылдытъяны кутским. Кӧня ке дыр ортчыса, 2012-тӥ арын Бакуын «Евровидение» ортчыку, Брангуртысь песянайёсты кӧня калык адӟиз, кӧня соослы кичабиз! Нош дӥсьсэс вуризы Пичи Пурга ёросысь Вуж Мӧнья гуртысь калык киужъёсъя юртын — ӵапак А. Ядыгаровалэн дышетскисьёсыз.

— Ужаны кутскыкуз, Альбина Вениаминовна ветлӥз Суредаськон искусствоосъя музее, Национальной музее. Отын киужъёсын тодматскиз, сӥньысэн-сӥньысэн пужыосты эскериз. Бӧрысь калыкез соосын тодматӥз. Альбина Вениаминовна — паймымон дышетӥсь: котькуд дышетскисезлы со сётэ сомында, кӧня соизлы кулэ. Адямилэн дышетскемез потэ ке — Альбина Вениаминовна уй но нунал соин выроз, ушъялоз но, чурыт но вазёз, — вера Р. Каримов.

Киужъёсъя центрлэн кылдэмез сярысь, Альбина Вениаминовналэн историын бадӟым интыез сярысь вера культурая азьвыл министр Анетта Сидорова но.

— Туж секыт аръёсы бадӟым уж лэсьтэмын вал Альбина Вениаминовналэн кивалтэмез улсын, — вера Анетта Петровна. — Ми быгатӥм калык киужъёсты утьыны но азинтыны. Альбина Вениаминовналы ми ваньмы синмаськиськом, сое Россиысь кибашлыос гажало. Оскисько: калык киужъёсъя удысын Удмуртия азьланяз но азьпал радъёсын луоз. Мон малпасько, асьмелэн туж быгатӥсь кибашлыосмы, суредаськисьёсмы — соос уз сётэ бырыны калык киужлы.

Кырӟало-верало, куисько

Альбина Вениаминовнаез ӟечкыланы вуылӥз Дэри ёросысь Подшивал гуртысь «Дэлет» ансамбль. Сьӧразы бадӟым сандык вайиллям: отын кыӵе гинэ чебер куиськемъёс ӧвӧл! Кивалтӥсьсы Нина Петрова шуэ: потэ вал ансамбльмес аспӧртэм кареммы. Али ансамбле ветлӥсьёс, кырӟам-верам сяна, куисько но.

— Куке но киужъёсъя центре вуи но паймымон чебер арбериосты адӟи, — вера Нина Даниловна. — Мон юасько: кытын таӵе чебер киужъёсты лэсьто? Возьматӥзы, пыри мастерское, адӟисько — кышномуртъёс куисько, огез муш мумылы кельше. Соку Альбина Вениаминовнаен тодматским. Бӧрысь гуртысьтымы шутэтскон центре куиськон станок пуктӥм, али милям 7 станокмы сылэ ини. Альбина Вениаминовна ми доры вуылӥз, мастер-классъёс ортчытъяз. Паймисько солэн ваньзэ вакчияк но ӝотак вераны быгатэмезлы. Туж шумпотӥсько, пенсие потэме бере аслым сюлмыя уж шедьтӥ шуыса — куиськон монэ буйгатэ.

Дунне писпу кадь

Елена Ковычева, УдГУ-ысь Искусствоосъя но дизайнъя институтысь доцент, искусствоведениея доктор, А. Ядыгаровалэн котькытысь чеберзэ синйылтыны быгатэмезлы паймемзэ вера.

— Альбина Вениаминовнаен тодматскыкум, солэн мастерскоез гуртысь пичи коркалы тупа вал, — маде Елена Ивановна. — Комната шорын бадӟым ӝӧк сылэ, котыраз нылкышноос ужало. Ӝӧк вылын удмурт дӥсен туж чебер пу мунё пуке. Мон калык шудонъёслы синмаськемын бере, юалляськи Альбина Вениаминовналэсь: кытысь-мар мунё та? Со мыным вераз, кызьы кыӵе ке гуртын пыд улын костаськись вашкала удмурт ӵушконэз шедьтэм. Сое миськем-утялтэм но солэсь пичи дэрем вурем. Нош мунёез вӧлэм туж быгатӥсь кибашлы. Озьы мунё мастерскойын улыны кутскем, соин Альбина Вениаминовналэн нунокъёсыз но шудылэмын. Курмем ӵушконэз шедьтыса, солэсь чеберзэ адӟыса, А. Ядыгарова солы выль улон сётӥз. Озьы ик со векась куиськонэз калыклэн данъяськонэзлы пӧрмытӥз. Мон туж шумпотӥсько, институтысьтымы нылъёс куиськонэн вырыны кутско ке. Одӥг нылаш песянаезлэн станокеныз ӵушкон куиз. Песянаез бӧрдыса шуэм: кыӵе мон шумпотӥсько, станоке уз кулы шуыса. Озьы кышномуртъёс ужан тӥрлыксэс — улэп макеез кадь — дунъяло вал. Оскисько — куиськон табере уз быры, выль мастеръёсмы луозы, егитъёс та ужез уз вунэтэ.

Выставкаен тодматскыса, тросэз пусйизы: котькуд киужлэн аслаз лулыз, мылкыдыз, кузёезлэн сямыз но шӧдӥське. Котькудӥз киуж шунтэ кадь. Урод мылкыдын станок сьӧры ум пуксиське, валэктӥз А. Ядыгарова, соин ик киужъёс но ӟеч мылкыд гинэ кузьмало.

Ужрадэ люкаськемъёс пӧлысь тросэз асьсэ киосынызы куэм дӥсьёсын лыктэмын вал. Асьме вакытэ туж ик паймоно ӧвӧл ини, туала куэм дэремъёсын, сумкаосын, кускерттонъёсын адямиосты адӟыса. Соин зэм но осконо: куиськон, А. Ядыгаровалэн куэм шобретысьтыз дунне писпу кадь, удмуртъёслэн улоназы юн выжыоссэ лэзиз — соосты нокин, номыр порыны уз ни быгаты.

Анастасия Шумилова

Ангелина Снигирева
By Ангелина Снигирева 28 октября, 2019 13:51