Соослэн пӧрмиз

Ангелина Снигирева
By Ангелина Снигирева 29 октября, 2019 11:50

«Лэсьтэмын Удмуртиын» форум улсын радъяськиз «Бизнес-успех» национальной премиез сётонлэн улос этапез. Отчы пыриськон вылысь 120 ужбергатӥсьёслэсь но муниципалитетъёслэсь куриськон вуиз. 22-ез шедизы финалэ.

Эгра ёросысь Мувырысь А. Корепанов «Бизнес-Успех» премилэн лауреатэз луиз
Фото: udmurt.ru

2011-тӥ арысен кутскыса, та вожвылъяськон Россиысь 70 сюрслэсь ятыр ужбергатӥсьёсты, кивалтӥсьёсты огазеяз ни. Кылем арын гинэ 300 предпринимательёслэн проектъёссы адӟем карымонэн лыдъямын но коньдон премиен пусъемын вал. Талы оглом 60 миллион манет висъямын.

— Та вожвылъяськонэ шедё туж кужмо проектъёс, — пусйиз Удмуртилэн Тӧроез Александр Бречалов. — Та премиез кылдытонэ мон но пыриськи. Соку малпам: вожвылъяськон бизнеслы азьлань вамыштыны тубат выллем мед луоз. Озьы ик пӧрмиз. Кылсярысь, Удмуртиысь кыӵе ужбергатӥсьёс отчы пыриськизы, ваньзы сямен синмаськымон азинско. Шуом, «Вегенсы» компаниез кылдытӥсьлэн Евгений Соковиковлэн проектэз «Бизнес-успехлэн» Москваын ортчем финалаз тужгес устоен лыдъямын вал. Талы луыса «Синергия» университет солы Лондонын дышетскыны луонлык сётӥз. Михаил Пасынков «Ходико» проектэныз «Таза улон» номинациын вормиз, со сярысь Россиысь туж тодмо Rusbase изданиын гожъязы.

Та рад жюри вормисьёсты 10 номинацияя бырйиз. Котькудаз ик номинациын огезлэсь золгес мукетыз проектъёс чузъяськизы. Зэм, одӥгъёсыз вормон мылкыдын лыктӥллям ни ке, мукетъёсыз — дышетскыны, асьсэ сярысь вераны. Кылсярысь, «Устоез муниципалитет» номинацие мыло-кыдо пыриськизы дэбесъёс. Ижкарлы палэнын ке но, сюресъёсынызы ушъяськыны уг быгато ке но, районазы пичи но шоро-куспо ужбергатонэн вырисьёс вань гинэ. Бюджетазы 75 процентэз коньдон соослы луыса люкаське.

— Бен, палэнысь ужберга­тӥсьёсты милемлы гочатыны капчи ик ӧвӧл, — вераз ёрос администрациысь экономикая ёзэн кивалтӥсь Елена Ложкина. — Но будэтӥськом асьмелэсьёссэ. Кылсярысь, одӥгезлы ужбергатӥсьмылы арендае висъям районлэн ваньбураз пырись юртэз, ужзэ мытыны 50 сюрс манет пунэмен сётӥм. Милемлы но умой, ужбергатӥсьлы но капчигес. Угось милям юртмы табере буш уг сылы, кылдӥзы ватсаса ужан интыос но, бюджетэ выт но тросгес лыктэ.

Синмаськымон ужало воткаос но. Карлэн йырыз Алексей Заметаев пыр-поч мадиз, кызьы город администрациын ужасьёс но ужбергатӥсьёс пӧртэм ужрадъёсты уртче ортчытъяло. Кылсярысь, соос спектакльёс возьматъяло, нош отын поттэм уксёзэс кылем арын инвалид нылпиослы сётӥзы, туэ П. Чайковскийлы сӥзем «Арлэн вакытъёсыз» парксэс лэсьтонэ висъязы. Со сяна, ужбергатӥсьёс но городысь кивалтэт усьтӥзы Тазалыкен эшъяськон сюрес, утялтӥзы-шулдыртӥзы Кызьпу арамазэс но мукет.

Зэм, жюри лыдъяз: воткаос ӧжыт бере кылё на сарапулъёслэсь. Таосызлэн «Камский берег» кластерзы Кам дурысь городлэсь улонзэ тодмантэм воштӥз ни, шуыны луоз. Тупатъямын 7 юртъёс, соос пӧлын — Башенинлэн дачаез, «Озон» санаторий, «Порт» гриль-бар но мукетъёсыз. Тодмантэм воштӥськиз ярдур, выльдэмын ву гумыос, тыл юбоос-езъёс но трос мукетыз. 2 ар ӵоже проектэз пыӵатыны 1 миллиард манет пала быдтэмын, 75 процентсэ висъязы ужбергатӥсьёс.

Озьы «Устоез муниципалитет» номинациын вормисен лыдъямын Сарапул. Табере со Удмуртилэсь данзэ утёз «Бизнес-успех» вожвылъяськонлэн Россиысь финалаз. Вормиз ке, городэз азинтыны 1 миллион манет басьтоз. Удмуртилэсь данзэ Москваын озьы ик утёзы вожвылъяськонлэн мукет номинациосызъя вормисе потэмъёс но. Соос пӧлын — Сьӧлта ёросысь «Муш» кооперативлэн кивалтӥсез Сергей Эшмаков, Ижысь «Бобровая долина» этнокомплекслэн кивалтӥсез Екатерина Меркушева, Эгра ёросысь Мувырысь фермер Александр Корепанов но мукетъёсыз. Ваньзы соос «Синергия» университетлэсь дышетскон сертификатъёссэ но мукет кузьымъёс басьтӥзы.

— Мон туж шумпотӥсько, Эгра ёросысь Мувыр гуртмес улӟытонлы сӥзем проектмы дунъямын шуыса, — вераз Александр Корепанов. — 2020-тӥ ар пумын ортчытом Удмуртиысь улӟытэм гуртъёслэсь фестивальзэс. Оскисько: пӧрмоз!

Элина Кумачёва

Ангелина Снигирева
By Ангелина Снигирева 29 октября, 2019 11:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<