Роботъёс улӟо школаын

Удмурт Дунне
By Удмурт Дунне Октябрь 7, 2019 14:22

2024-тӥ арозь Россиысь огъя дышетон радлык дуннеысь 10 устоез пӧлы пырыны кулэ. Со ужпумез быдэстыны юрттоз «Дышетон» нацпроект.

Выльдӥськонлэн огез шумпоттытӥсь люкетэз — дышетон удысэ выль технологиос пыӵатон. Тани Ижын 2 ар талэсь азьло ужаны кутскиз «Кванториум» нылпи технопарк. Отын дышетскыны мылкыд карись пиналъёс туж трос. Таӵе югдурез чакласа, та выллем ик технопаркъёс Удмуртиысь эшшо 3 городъёсын — Глазовын, Сарапулын но Воткинскын — усьтӥськозы.

Палэнэ уг кылё таӵе воштӥськонъёслэсь ёросъёс но. «Калашников» концерн юрттэмъя робототехникая 2 класс усьтэмын Гракысь но Балезиноысь школаосын. Грак шор ёзо школаын табере вань мылкыд карись нылпиос быгато таӵе кружоке ветлыны.

Грак школаысь А. Тимофеев пиналъёсты дышетэ робот бичаны.
Туспуктӥз Елена Скворцова.

Пиналъёсты выль удыслы дышето егит педагогъёс, удмурт пиос Вадим Батырев но Александр Тимофеев. Вадим Васильевич Грак ёросысь Вылӥ Эгра гуртын вордскемын. Казаньысь федерал университетлэн Елабугаысь филиалаз дышетскыса, 2015-тӥ арын вордскем палъёсаз бертӥз. Гракын солы ӵектӥзы математика но информатика урокъёсты нуыны. Со аре ик нылпиос «IT-марафонын» вормизы но, школае вуиз робототехникая 2 комплект. Вадим Васильевич таӵе югдурлы уката шумпотӥз, уго университетын ӝыны ар ӵоже робототехникая курсъёсы ачиз ветлӥз вал. Табере тодэм-валамзэ пиналъёслы но сётыны быгатоз.

Нылпиос выль кружоке вожмаськыса лыктӥзы. Дышетскизы но черодэн: уго мылкыд карисьёс трос, нош комплектсы 2 гинэ. Озьы ке но та ӧз люкеты соослы ӵошатсконъёсы пыриськыны. Республикаысь огаз конкурсын 5-тӥ интые потӥзы, ёросъёс куспын ӵошатскыса, 2-тӥ но 3-тӥ луизы.

Соин Гракысь пиналъёслы эшшо «зориз». Соослэсь мылкыдзэс адӟыса, «Калашников» концерн кузьмаз 16 выль комплект. «Лего» конструктор сяна, отчы пыро ноутбукъёс но. Вылаз ик, концерн кабинетэз но быдэсак выльдӥз. Нялтас вераса, покчи классъёслы чаклам 1-ез комплект 25 сюрс манет котыр сылэ, нош шоро-куспо классъёсын дышетскисьёс понна комплектлэн дуныз ог 45 сюрс манет.

Таин валлин Грак школаысь пиналъёс, 3-тӥ классысен кутскыса, 8-тӥ классозь быгато роботъёс кылдытъяны. Уж тросгес луиз бере, Вадим Батырев Гракысь школае ӵош дышетскем эшсэ но ужаны ӧтиз.

— Мон Киров улосын ужаны кутски вал. Армие кошкылыса вуттӥ. Но Вадим Васильевич таӵе ивор вераз но — соку ик бурдъяськи. Гракысь школае куриськи — басьтӥзы. Табере тани пиналъёслы визь-нод сётӥськом, асьмелэсь роботъёсмес кылдытъяськом, — шуэ Александр Тимофеев.

Нялтас вераса, Александр Владиславовичез аслаз дышетскем школаяз но — Татарстанысь Кукмор ёросэ — ӧтё вал. Но егит дышетӥсь Гракысь уз вырӟы — табере роботъёсын ужаны солы туж тунсыко.

Робот кылдытон понна пиналъёс нырысь сое «Лего» конструкторлэсь бичало. Котькуд конструктор бордын вань механизмез. Сое ужатон понна кылдытоно на программа. Тазэ гожтыны нылпиослы юрттӥсько дышетӥсьёс. Бӧрысь со программаез флешкаен яке USB-порт пыр роботлы пукто. Озьы пиналъёслэн кылдытэм пластмасс арберизы улӟе: ветлэ, командаосты быдэсъя.

6-тӥ классын дышетскисьёс Илья Белов но Артём Лисин робот лэсьтыны 3-тӥ арзэ ветло ни. Покчи классъёсын робототехникая кружоксы вал, нош табере арняяз 1 час урок пуктэмын. Соослы дышетскыны туж кельше — уго педагогзы Александр Владиславович инструкцияя гинэ ужаны уг косы, асьсэлэсь роботсэс но кылдытыны лэзе.

Пиос шуо: 1 урок куспын ваньзэ лэсьтыса вуоно ӧвӧл. Соин нылпиос занятиос бере но кылё, бичало, ужало. Дышетӥсьёссы но соослэсь мылкыдзэс дунъяло: котьку юрттыны дасесь.

Грак школаысь директорлэн дышетон ужъя воштӥсез Татьяна Петрова верамъя, кылем дышетскон аре робототехника удысэн тодматскыны вуылӥзы ни ёросысь мукет школаосысь пиналъёс но. Соослэн синъёссы ик ӝуатско, таӵе тунсыко урокъёсты адӟыса. Но Гракысь школаын луонлыксы ӧвӧл вань мылкыд карисьёсты кутыны. Уго юртсы пичи, классъёс уг тырмо, 638 пиналъёс сотэк но 2 сменаен дышетско.

Елена Скворцова

Удмурт Дунне
By Удмурт Дунне Октябрь 7, 2019 14:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<