Нимыз — пул вылын, кырӟанъёсыз — калыкын

Удмурт Дунне
By Удмурт Дунне Октябрь 16, 2019 15:11

Г. Корепанов-Камский композиторлэн вордскемез дырысен 90 ар тырмемен валче Ижысь крезьгуръя элькун колледжлэн юртэз вылэ тодэ ваён пул шуккизы. Геннадий Михайлович колледжын кӧня ке аръёс ӵоже дышетӥсь но директор луыса ужаз.

Крезьгуръя элькун колледжлэн борддораз усьтӥськиз Г.Корепанов-Камскиез буре ваён пул.
Туспуктӥз Максим Егоров

Тодэ ваён пулэз усьтыны люкаськизы колледжын дышетскисьёс, композиторлэн ӵыжы-выжыосыз, дор палъёсысьтыз, Дэбесысь, калык, соин ӵош ужам муртъёс, шаерысьтымы дано крезьгурчиос но культура удысын тыршисьёс.

Удмуртиысь культурая министр Владимир Соловьёв тау кариз Удмуртиысь Правительстволы, Дэбес ёросысь администрацилы, Дэбесысь землячестволы, Ижкарлэн администрациезлы, крезьгуръя колледжлы. Валче тыршеменызы, Г. Корепанов-Камскийлы сӥзем ужрадъёс шаерамы 2-тӥ арзэ ортчо ини.

— Геннадий Михайлович возьматӥз асьмелы, кызьы ужано быръем удысад, — вераз Владимир Михайлович. — Со, Москваысь консерваториез йылпумъяса, тодон-валан, профессия басьтӥз, Удмуртиын тодмо луиз, но таин ӧз буйга, дышетсконзэ азьланьтӥз: Казаньысь консерваториын композиторлы дышетскиз на. Мон Геннадий Михайловичлэн быгатонэзлы котьку паймылӥ. Солэсь адӟем карыса, нылпиосты, егитъёсты будэтоно-дышетоно. Г. Корепанов-Камскийлэсь кырӟанъёссэ кырӟало, озьыен, со улэп.

Г. Корепанов-Камскиен ӵош ужамын солэн ас пал муртэз, Удмуртиысь культурая азьвыл министр Анетта Сидорова. Со крезьгурчилэн удмурт культура понна трос тыршемез, сюлмаськемез сярысь тодаз вайиз.

— Геннадий Михайлович малпам ужзэ котьку но йылозяз-пумозяз вуттылӥз, — шуиз Анетта Петровна. — Крезьгур удысын тыршем сяна, со депутат вал, общественной ужен выриз. Сюлмаськиз, тросгес профессионалъёс мед луозы шуыса. Солэн тыршеменыз, гуртъёсысь быгатӥсь пиналъёс понна Ижын усьтӥськиз Искусствоосъя элькун нылпи школа. Со сюлмаськиз, шоркарын Композиторъёслэн юртсы мед усьтӥськоз шуыса.

Шуныт кылъёсын люкаськемъёслы вазиськизы дэбесъёс: ёросысь администрацилэн йырыз Андрей Иванов, Ижысь «Байгурезь» землячестволэн тӧроез Валерий Сунцов. Валерий Юрьевич верамъя, композитор землячестволэн одӥгез кылдытӥсез вылэм. В. Сунцов вазиськиз егит крезьгурчиослы: та дано муртлэсь адӟем каре, солэсь крезьгурзэ кылзӥське но шудэ, али будӥсь нылпиос но Геннадий Михайловичлэсь нимзэ мед тодозы, солэсь творчествозэ медаз вунэтэ.

Геннадий Михайловичлы сӥзем эшшо одӥг буре ваён пул шуккемын луоз Пушкинской ульчаысь огаз юрт вылэ. Пулэз усьтозы 18-тӥ октябре. Та нуналэ ик композиторлы сӥзем бадӟым ужрад ортчоз Ижысь филармониын. Со сяна, шоркарысь огезлы ульчалы Г. Корепанов-Камскийлэсь нимзэ сётозы — та пумысен карлэн администрациеныз огкылэ вуэмын ини.

Анастасия Шумилова

Удмурт Дунне
By Удмурт Дунне Октябрь 16, 2019 15:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<