Мӧйымонлэн мылкыдыз яркыт

Удмурт Дунне
By Удмурт Дунне Октябрь 7, 2019 09:12

Арлыдоослэн нуналзылы сӥзьыса, шаерысьтымы вань городъёсын но ёросъёсын, черкогуртъёсын но пичи гуртъёсын ортчизы уно ужрадъёс.

Ветеранъёсты доразы ӧтчазы заводъёс, предприятиос, гурт хозяйствоос… Нош Ижын 3 нуналъем «Сӥзьыллэн яркыт буёлъёсыз» фестиваль радъяськиз.

Можга ёросысь Пазялысь кенакъёс зоопарке вуылӥзы.
Туспуктӥз Элина Кумачёва

Азьло аръёсы шаерысьтымы песянай-песятайёслы бадӟым ужрад ортчылӥз циркын. Но отчы вань мылкыд карисьёс сюрыны ӧз быгатылэ. Соин ик туэ ужрадъёслы вӧл-вӧл инты быръемын вал — зоопарк. 3 нунал ӵоже со калыкен пачылаз. Уно тунсыко пумиськонъёс,
мастер-классъёс, флешмобъёс, лекциос, концертъёс… Котькудӥз ас сюлэмызъя пайдаё шутэтскыны быгатӥз. 55 арессэс ортчытэм кенакъёс но 60 арессэс тырмытэм воргоронъёс отчы, дун тырытэк, пыриськыны быгатӥзы.

— Фестивальмылэн 1-тӥ нуналаз ик ог 1 сюрс 700 мурт вуылӥз, — вераз Калыкез улон-вылонын утён политикая но ужъя министерствоысь кун гарантиосъя ёзэн кивалтӥсь Мария Сандалова. — 2-тӥ нуналаз ог 6 сюрс мурт луиз ни, 3-тӥяз — ог 3 сюрс мурт. Зэмзэ вераса, ми асьмеос но ӧм малпалэ вал, сомында лыктӥсьёс луозы шуыса. Гуртъёсысь быдэс автобусъёсын вуылӥзы — гурт администрациос, гурт хозяйствоос ветеранъёссылы сыӵе кузьым лэсьтылӥзы. Нош куд-огъёсыз, уката но Ижын улӥсьёс, котькуд нунал но лыктылӥзы. Нуналлы быдэ 50 волонтёръёс ужазы. Песянай-песятайёслы соос пыр-поч валэктылӥзы, кытын кыӵе площадкаос ужало…

Кин фестивале 3 нунал ик пыриськиз — соослы вожъяськыны луэ! Угось котькуд нунал пӧртэм ужрадъёс чакламын вал. 1-тӥ нуналаз, кылсярысь, уката бадӟым саклык висъяськиз таза улонэн эшъяськонлы. Скандинав амалэн поръянъя, йогая, зумба эктонъя мастер-классъёс ортчизы, арлыдоос тодмо тренеръёсын ӵош зарядка лэсьтӥзы, эмъясьёс таза улон сярысь кенешонъёс ортчытӥзы. 2-тӥ нунал сӥземын вал тунсыко адямиосын, экспертъёсын пумиськонлы, нош 3-тӥ нунал уката тунсыко луиз киужен вырисьёслы. Пенсионеръёсты туала гаджетъёсты валаны, чеберъяськон арбериос лэсьтыны дышетӥзы, сцена вылысен ас кылбуръёссэс лыдӟыны луонлык сётӥзы.

Та сяна, котькуд нунал зоопаркысь валтӥсь сцена вылысь ӧз васькалэ кырӟась-верась коллективъёс. Сомында кунолы паймемын кадь вал зоопаркысь пӧйшуръёс но. Но соос ӧз кышкатске — асьсэлэсь вань чеберзэс возьматыса, йӧн-йӧн поръязы вольеръёсазы — песянай-песятайёслэсь мылкыдзэс уката яркыт каризы.

Ижысь Анна но Михаил Ивановъёс кемалась дырысен Ижын уло ни. Но выжыоссы кыстӥсько гуртысь удмурт семьяосысь. Михаил — Сьӧлта ёросысь Эшмедысь, Анна — Дэри ёросысь Кионгуртысь. Шоркарын уртче улэмзылы ӝоген 50 ар тырмоз. Но куспазы удмурт кылын верасько.

Ижысь удмурт Иванов кузпалъёс одӥг ужрадэз но уг кельто.
Туспуктӥз Элина Кумачёва.

— Ма кызьы удмурт кылдэ вунэтод? — шуэ Михаил Иванович. — Удмурт радиоез ӵем кылзӥсько но абдрасько: куд-ог удмуртъёслэн удмурт сямен вераськемзы уг луы. Вань мынам сыӵе тодмое, шуэ: улӥсько сыӵе-сыӵе урамысь сорок второй номеро коркан. Ма ньыльдон кык, дыр, — пумитаз чабкиськисько.

Михаил Иванович армия бере 8 арзэ электромеханикая заводын электрик луыса ужам, собере — дорожникъёс дорын: нырысь механик вал, собере инженер, валтӥсь механик, автоколонналэн кивалтӥсез… Пенсие потыса но, тэк улыны кема ӧз чида на. Нуназезэ азбар ӵужиз, ӝытъёссэ училищеын дышетӥз.

— Кузпалы шуэ вал: Миша, оло, тон уйлы стороже интыяськод на, гуртэ чик уд бертылы ни, — серекъя воргорон.

Анна Иванова 48 арзэ сӥзиз «Куполлы». Пенсие потэмез бере но заводысь кема ӧз ӵыды на. Табере тани ял карыны малпазы ини.

— Тазалыкмы пичияк вань на ай но, пӧртэм ужрадъёсы ялан ветлӥськом, — шуо кузпалъёс. — Удмурт концертъёсты, спектакльёсты ум кельтылӥське. Арлыдоослы сӥзем ужрадъёс берло дыре туж трос радъяськыло — тросаз ветлӥськом. Ма нош коркан тэк пукод! Татын калыкез адӟиськод, мылкыд басьтӥськод. Зоопаркын но тани кыӵе шулдыр. Коть вань ужрадъёсы пыриськы — туж тунсыко!

Мылкыдзы туж капчи Можга ёросысь Пазялысь кенакъёслэн но. Иже быдэс автобусэн 18 кузя вуиллям. Гуртысь вань мылкыд карисьёсты тазьы огазе люкаллям гурт администрация но нылкышноослэн огазеяськонзы.

— Бен, автобус дунэз асьсэос ик тыризы, — вераз нылкышноослэн огазеяськонэнызы кивалтӥсь, библиотекарь Надежда Кузнецова. — Быдэн 450 манет — трос ӧвӧл ни со. Со понна автобус быдэс нуналлы сётӥськиз. Соин ик, зоопарке сяна, «Лудорвай» музей-заповеднике но пыраны мылкыд карим на. Пӧламы 2 воргоронъёсты кутӥмы — ӧтиськом вал мукетъёссэ но. Но воргоронъёс интыысьтызы секытэнгес ӝутско уга. Нош нылкышноослы мылкыд сёт гинэ.

ваньзы соос пенсиын ни. Нош ас вакытаз Тамара Попова школаын математикалы дышетӥз, Марина Вагинова ветеринар вал, Александра Пудова — ветфельдшер, Алевтина Чувашова — бухгалтер, Любовь Чувашова кунян сюдӥз, Ольга Чувашова пенсие ог ар талэсь азьло потӥз ке но, дояркаысьтыз уг ӵыды на. Шуо: зоопаркысь пудо-животъёс но туж мусоесь, пе. Но со дыре ик гуртсэс городлы воштыны пумит.

— Городэ кылим ке, ужмы гуртын ук, кин сое ми интые лэсьтоз?! Скалъёсмы но обезянъёслэсь мусоесьгес, — серекто нылкышноос. — Ваньмы ик пудо вордӥськом ай, кызьы гуртын скалтэк улод?

— Ваньмылэн нунокъёсмы вань ини, — вера Тамара Попова. — Мынам, кылсярысь, соос 14 кузя ни. 2-ез нылъёсы но 5-ез нунокъёсы гуртамы ик уло…

Нош Пичи Пурга ёросысь Шор Кечолысь Михаил Матвиенко Ираида кузпалыныз но Елизавета Глухова бускеленыз ӵош кариськыса Иже таксиен юри лыктӥллям — таксист, пе, сюрес огпала 470 манет куриз, трос ик ӧвӧл. Татысь басьтэм мылкыдэз уксёен уд мерта..

Элина Кумачёва

Удмурт Дунне
By Удмурт Дунне Октябрь 7, 2019 09:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<