Мар яратэ шундымульы

Удмурт Дунне
By Удмурт Дунне Октябрь 1, 2019 15:00

Ува ёросысь Бадӟым Ӝужгес гуртысь Валерий Дмитриевлэн бакчаысьтыз паймымон суредэз адӟыны луэ: кубистаен но ӵужкушманэн артэ ӝужыт борддоръёс кузя пушъе… виноград. Али отын ог 30 пумо шундымульы будэ ини.

В. Дмитриев
Туспуктӥз Валентина СЕМЁНОВА

— Сад-бакчаен кемалась тунсыкъяськыны кутски. Кызьы ке но 1980-тӥ аръёслэн пумаз — 1990-тӥ аръёслэн кутсконаз Ижысь одӥг кышномуртлэсь Прибалтикаысь ваем розазэ басьтӥ. Пионерской галстуклэн буёлэзлы укшась сяська туж синмаськымон потӥз. Ӝоген мынам сои сяськаяськиз. Калык дунъяз. Угось гуртын со вакытэ розаен вырись адямиос чиньыен лыдъямон вал. Озьы мынам мылкыды ӝутскиз будосъёсын вырыны, — вера Валерий Дмитриевич.

В. Дмитриев сяська удъёс будэтыны пумен-пумен кутскиз. Али садаз даслэсь ятыр пумо роза будэ ини, семьязэ шулдыртэ, гуртооссэ паймытэ. Таин валче воргорон улмопуосты, грушаосты но бурмытыны кутскиз.

— Сад-бакчаен вырыса, Россилэн пӧртэм улосъёсаз улӥсь адямиосын тодматски ни. Гожтэтъёс соослы ысъяй, жингыртылӥ. Озьы тодон-валанме муромытӥ но аслам опытэ сярысь мадьылӥ. Ог-огмылы удъёс но келяллям. 2007-тӥ арын Жуковский городысь тодмое мыным «Изабелла» но «Башкирский» виноград удъёс но соосты будэтон инструкция келяз. Мон вань куронъёсты быдэстыны тырши. Кыкетӥ араз виноградэ емыш сётӥз ини. Виноградэн вырем дыры, иське, юнме быдтэмын ӧй вал.

Озьы ке но садэн вырыны кутскись адямилы одӥг инструкция тырмыт ӧвӧл. Соин ик Валерий Дмитриев ӵемысь почтае пыраз, журналъёсын бугыръяськиз, тупась статьяос утчаз, сад но бакча сярысь передачаос учкылӥз. Озьы со пырыен-пырыен виноград сярысь тодон-валанзэ люказ.

Тросэз гуртоосыз солэсь табере визь-кенеш юало, кызьы но кытын виноград мерттоно, пе. Бакча возись валэктэ: сое мерттон мукет будосъёслэсь сокем уг висъяськы.

Нырысь ик виноградлы умой инты быръёно. Солы трос шунды кулэ. Туж умой, шунды ӝужам дырысеныз пуксён дорозяз отчы пиштӥз ке. Но тупалоз, виноград шунды шорын ӵукна 10 часысен 17 час ӝытозь луиз ке.

Интыез ышыг луыны кулэ. Виноград тӧлъёслэсь кышка, тужгес но уйпалась пельтӥсезлэсь.

Виноград липет но борддор дорысь 1-1,5 метрлы палэнын мед будоз. Угось со уг яраты туж зол саюлэз, нош липет йылысь виясь ву йырин бырон калэ но шедьыны сюроз.

Сюй сярысь сюлмаськоно: виноградлы гудэм интые сьӧд сюй но удобрение тыроно.

Виноградэз вазь тулыс мерттыны умойгес. Бергес мерттоно ке, лозаез кисьманы (курень луыны) уг вутты, малы ке шуоно асьмелэн гужеммы вакчи. Бӧрысь умой уз буды ни. Вуоно аре кыӵе ке выль пушъетэз потӥз ке но, со но кисьмаса уз вутты. Соин ик таӵе будослэсь емышез возьмано ӧвӧл ни.

Вазь мерттыса, сое шобыртыса возёно пленкаен, со пыр шунды сиос мед пырозы. Куазь шуныт кариськиз ке, пумъёссэ толатон вылысь нуназезэ усьтыны луэ, нош уйлы выльысь пытсано.

Толалтэлы кыз вайёсын шобыртыса кельтоно. Но кулэ виноградлэсь сортсэ чотэ басьтыны — куд-огъёсыз шобыртытэк но умой толъё. Соин ик тодоно, кыӵе виноград мерттэмын садады.

Виноградлэсь мултэс пушъетъёссэ но куаръёссэ вандылоно.

Кин виноградэн вырыны кутске гинэ, умой луоз «Изабелла» но «Башкирской» сортъёсты бырйыса. Виноград мед удалтоз шуыса, туж трос куронъёсты санэ басьтоно, нош та сортъёс тужгес но арсыз лыдъясько. Соос вылын умой дышетскыны. Толалтэлы но та сортъёсты шобыртытэк кельтыны луэ.

В. Дмитриев верамъя, виноградлы, мушъёслы сямен ик, сюлэмез, лулэз сётоно. Со асьме палъёсын «куно», соин ик сое туж чакласа будэтоно. Куазь но арысь аре пӧртэм луэ, котьку солы тупась кӧс но шундыё уг улы.

Валентина Семёнова

Удмурт Дунне
By Удмурт Дунне Октябрь 1, 2019 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<