Маин узыр Россия

Ангелина Снигирева
By Ангелина Снигирева 31 октября, 2019 14:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Маргарита Лянге — Россилэн Президентэз бордын ужась Калык кусыпъёсъя кенешлэн ёзчиез, Россиысь Национальностьёстэн ужпумъёссыя федерал агентстволэн общественной советэзлэн ёзчиез, Телевиденилэн но радиолэн Евразийской академиезлэн академикез, Россиысь калыкъёслэн ассамблеязылэн кивалтӥсезлэн воштӥсез, «Национальный акцент» порталлэн валтӥсь редакторез. 30 арлэсь кема ини лыдӟе калык кусыпъёс сярысь лекциос, та ужпумъёсъя трос научной ужъёсыз.

М. Лянге пӧртэм калыкъёслэсь культуразэс, сям-йылолъёссэс гажа
Туспуктӥз: Константин Ижболдин

— «Национальный акцент» ним туж матын но мусо кылӥське…

— Куке но со журнал вал, но али бумагаын потӥсь изданилэн кулэлыкез быриз, соин ми быдэсак выжим Интернетэ. Но лыдӟисьёсмес ыштӥм уд шуы — тунсыкъяськисьёс трос.

Национальной акцент — со калыкъёслэн сюлэмшугъяськытӥсь ужпумъёссылы саклык висъян сярысь. Порталысь шедьытыны луэ котьмае: пӧртэм улосъёсысь калыкъёс сярысь ивор, разговорник, афиша — ваньзэ, мар сярысь этносъёс сярысь тодэмды потэ. Милемлы куд-огез паймо — кытысь-кызьы та темая ялан ивор шедьтод кадь, но иворъёс зэмзэ но нуналлы быдэ выльдӥсько — выжы калыкъёслэн улонзы туж тунсыко, соос ялан кыӵе ке ужрадъёс ортчытъяло, улонэ выль проектъёссэс пыӵато.

Маргарита Арвитовна, тӥ Москваын быдэ вуэмын, МГУ-ын дышетскемын… Шоркарын тунсыкъяськылӥзы шат пичи калыкъёслэн улэм-вылэменызы, кызьы тӥ та удысэ вуиды?

— Ачим но валаса ӧй вутты, университетын дышетскыкум, этнополитикая курс туж кельшиз, диплом ужме но сӥзи ӟуч сям-йылолъёслы. Нош диплом басьтэме бере монэ ужаны ӧтизы «Комсомольская правда» газетэ. Али со нокыӵе ик ӧвӧл кадь — уж но уж, газет но газет, нош со вакытъёсы 22 аресъем выпускниклы кунысьтымы огаз валтӥсь газетэ шедьыны — со туж бадӟым дан вал, ӧйтӧд, кыӵе удалтонлык монэ отчы кыскиз. Но кивалтӥсен кенешонын мон шуи: мон ужало тӥ дорын, калык кусыпъёс сярысь гожъяськыны лэзиды ке. Со копак паймиз: кинлы, пе, со тунсыко? Соку берытски но кошки. Али озьы ӧй дӥсьтысал, дыр, ӟеч уж интыез ыштыны.

— Жаляса верано луэ, мон чакламъя, со тема зэмзэ но тунсыко пичи калыкъёсысь потэмъёслы гинэ, улонын шугъяськонъёсты адӟылымтэ муртлэн сюлмыз та пумысен ноку уз висьы — со вире пыӵамын луыны кулэ. Вождэс эн вае, тӥ кыӵе выжыысь?

— Мугорам пӧртэм виръёс бызё. Атаея — Россиысь немец, анаея — Сибирьысь ӟуч. Но та ӟучъёслэн вирзы сураськемын кровисибырлыосын (сибир бигеръёсын). Куке монэ пыкылыны кутско, мае тӥ ӟучъёс валаськоды шуыса, верам потылэ, конешно, тӥ коть мурт музъемын уд улӥське шуыса… Мынам немец ӵыжы-выжыосы ас вакытаз Казахстанэ келямын вал. Мон отын вордски. Тодӥсько, мар со — калыкъёсты сортъёслы люкон. Анае-атае но журналистъёс вал. Атае 3 кылэз ӟеч тодӥз: ӟуч. немец, казах, но сое ӧз кутылэ казах кылын потӥсь изданиосы.

Мон туж ӟеч тодӥсько, мар со висъян, вӧсь карыны турттон… 4-тӥ-5-тӥ классъёсын дышетскисько вал, дыр, урокын маке война яке 9-тӥ Май сярысь вераськон мынӥз, огез пияш, мон шоры дол-дол учкыса, «фашистка» шуиз. Мон мар вазьыны пайми. Туж ӝож луиз. Классысь бызьыса потӥ но кытчы ке тубатъёс улэ ватски. Кема утчазы. Но сюриз мукетыз пияш, кудӥз юлтошсэ извиниться кариськыны косӥз. Валасьтэмъёс та улонын вань ке но, котьку сюрозы тыныд юрттӥсьёс. Со учыр бере мон ӧй йыркуръяськыса ӧй улы, ваньмыныз ӵош ветлӥ казах кылъя урокъёсы, кӧня ке кыл али но тодӥсько.

— Та удысын сомында ужаса, тӥляд Россиын котыръямтэ интыды ӧвӧл ни, дыр — кӧня улосъёсы вуылӥды ни? Калыкъёсты, кылъёсты но соку ик тодмаськоды, луоз.

— О, тунсыко, юри лыдъяме ӧвӧл, но зэмзэ но ваньмаз сямен улосъёсы вуылӥ ни, кадь, ог 10-аз ке шат ӧй на. Россия — паймымон кун: огдыре татын кунлэн огпалаз лымы, кезьыт, нош мукет палаз — шунды, зарезь… Но со гинэ ӧвӧл — дунне вылын асьме дорын гинэ сомында пӧртэм калык улэ. Котькудӥзлэн — аслаз культураез, кылыз. Ваньмыз со туж тунсыко. Со асьмелэн зэмос узырлыкмы.

Бен, уже мынам туж тунсыко — калыкъёсты тодон, тодман туж юрттэ огкыл шедьтыны. Тани али тодам лыктӥз, кызьы Камчаткае алеутъёс доры ветлӥм. Али соос туж ӧжыт кузя кылемын на. Тодматским одӥг семьяен. Кышноез зэмзэ но алеут тусо — сьӧдкысъем, сюбег синмо, картэз бадӟым мугоро, сайкыт тусбуё, чагыр синмо. Пиналъёссы но атайзы тус. Паймыса воргоронлэсь юасько, кыӵе выжыысь тӥ? Алеут, пе. А мон малы ке эрзя кожай, шуисько. Воргоронэ лӧптӥз: кытысь,пе, эрзяос сярысь тодӥськоды. Собере аслэсьтыз быдэс улон сюрессэ мадьыны кутскиз, милемлы экспедициын ужаны туж юрттӥз. Со зэмзэ но мордва выжысь эрзя вылэм, но пинал дыръяз кыӵе ке муген кошкем Камчатка, кылем, кышнояськем. Табере со ассэ алеут шуэ.

— Россиын данакез улӥсьёс — ӟучъёс, но берло дыре ӵемгес кылыны луэ ӟучъёслэн но культуразы пумысен сюлмаськонъёсты…

— Ӟуч кульутра, конешно, уз быры, но сыӵе сюлмаськонъёс токма ӧвӧл. Куддыр адямиос, асьсэлы асьсэос укыр оскемысь, кышкытлыкез уг адӟо. Кылсярысь, тросэз -а пиналъёс тодо ӟуч калык кырӟанъёсты, ӟуч калык шудонъёсты, вашкала сямъёсты-йылолъёсты. Табере сюанъёс но сюан кадь ӧвӧл ни. Нош национальной культура — со ӵапак сямъёс-йылолъёс ук! Отын ваньмыз вань — кызьы шонер кузпалъяськоно, кызьы нылпи будэтоно, кызьы астэ ӵыжы-выжыосын возёно, арлыдоосты гажано…

— Тӥ Удмуртие ӵем вуылӥськоды. Мар тӥледлы татын кельше? Маин висъясько удмуртъёс мукет калыкъёслэсь — кыӵеесь ми?

— Лачмытэсь. Малпаськисесь. Удмуртъёслэн трос тунсыко малпанъёссы, но мыным потэ, соос усьтӥськыны уг дырто.

Удмуртия мыным туж кельше. Туэ вуылӥ удмуртъёслэн Гербер праздниказы — туж синмаськымон. Татын концерт гинэ уг пукто, кин ке понна уг лэсьто, юмшанэ калык дэмен пыриське. Возь вылын ужало трос пӧртэм площадкаос, мастер-классъёс — отчы пыриськыны быгатэ котькудӥз мылкыд карись. Кырӟамед потэ — пожалуйста! Ӵошатскемед — котькӧня! Эшшо сюдозы но дунтэк. Адямиослы мӧзмыны маза ӧвӧл. Нош кӧня калык киужъёс — мон кудзэ басьтыны пайми — ваньмыз туж чебер но сюлэмез поныса лэсьтэмын.

Котькудӥз улос ас сяменыз тунсыко, чебер. Кытчы гинэ уг мынӥськы, мон нырысь ик тодматскисько калык культураен. Асьмелэн ваньмаз сямен улосъёсын трос выжыысь калыкъёс уло. Со кунмылэн аспӧртэмлыкез но ваньбурез! Соин данъяськыны кулэ — дунне вылысь одӥг кун но уз быгаты асьмемын ӵошатскыны. Индиын, Китайын — 50-60 пӧртэм, асьмелэн — 170! Зэм, национальностез али лыдъяло переписья, нош отын олокинэз но вань — адямиос куддыр шоккето, но соосъя кариськытэк уг луы, соин зэмос лыдпус, конешно, ичигес.

Но йӧскалык политика — со праздникъёс гинэ ӧвӧл. Тӥ пыриськоды Россилэн Президентэз бордын ужась кенеше. Маин выре кенеш, кылӟиське-а Президент тӥлесьтыд?

— Кенеш араз 2 пол люкаськылэ, отчы пыро общественной огазеяськонъёслэн азьветлӥсьёссы, национальной ужпумъёсын вырись экспертъёс но та удыс понна кыл кутӥсь кивалтӥсьёс. Кенешын, кылсярысь, эскеремын вал «Реализация государственной национальной политики» кун программаез быдэсъян, Национальной политикая стратегиез кутон но мукет. Конешно, отын нокин но эчешыса уг улы, ваньзэ азьлапал пыр-поч дасяса мынӥськом, Президент кылзӥське, ӵектонъёсмес санэ басьтэ.

Маргарита Арвитовна, тӥлесьтыд вань ужъёстэс вераса уд быдты. Тросэз соос герӟаськемын общественной ужен. Нош кинэн тӥ асьтэды золгес шӧдӥськоды?

— Мон журналист! Калык кусыпъёсты но осконъёсты эскерись специалист. Мон малпасько, номыр паймымонэз ӧвӧл, куке общественной ужын журналистъёс адскымон ке луо — угось та адямиослэн вань улон югдур шоры асьсэлэн учконзы-валанзы.Тросэз тодмо, азинлыко журналистъёс быдэсак общественной уже яке политикае выжо. Мынам но улонам общественной уж туж бадӟым инты басьтэ, но мон уг быгатӥськы отчы быдэсак выжыны, малы ке шуоно мон кивалтӥсько Калык кусыпъёс сярысь гожъясь журналистъёслэн гильдиенызы. Со арысь аре паськыта, улонэ тросгес проектъёс пыӵало. Соос пӧлысь одӥгез тодмоез но тунсыкоез проект — «СМИротворец» конкурс. Туэ со 11-тӥзэ ортче ни. Кемалась ӧвӧл Ижын йылпумъянъёс лэсьтӥм Приволжск федерал округъя этаплы, Удмуртиысь журналистъёс паймытӥзы — 5 СМИ дунъямын. Со сяна, журналистъёс понна дышетонъёс ортчытъяськом, угось национальной политика сярысь гожъяны кулэ, туж валаса. Вань сыӵе веран: гурезьын огпол ыбо ке, куараез даур ӵоже чузъяське…

Мукет улосъёсысь журналистъёс но паймизы тӥляд шаердылы, выжы калыкъёсын ужаны быгатэмлы. Ми вуылӥм К. Герд нимо гимназие, Брангурт песянайёс доры, кенешим котрес ӝӧк сьӧрын, адӟим, кызьы ужало национально-культурной огазеяськонъёс. Тросэз доразы бертӥзы выль малпанъёсын, ас доразы лэсьтыны озьы, кызьы Удмуртиын.

Зинаида Рябинина

Ангелина Снигирева
By Ангелина Снигирева 31 октября, 2019 14:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<