Кӧтэз шумпоттэ «Гастрит»

Ангелина Снигирева
By Ангелина Снигирева 30 октября, 2019 14:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Лэсьтэмын Удмуртиын» форумын гастротуризмлы но саклык висъяськиз. Адямиос мукет городъёсы но кунъёсы синпелетъёс, музейёс но инкуазь понна гинэ уг вуыло. Пӧраськонлы, сиён-юон веръянлы сӥзем фестивальёс туала туризмын бадӟым инты басьто.

Сарапулын вордӥськем Евгения Суфиянова Сочиын Gastrееt фестивальзэ ортчытъя
Фото: udmurt.ru

Евгения Суфиянова вордӥськиз но будӥз Сарапулын. Пӧртэм ӧръёсын ассэ утчаз, собере Сочиын аслэсьтыз ресторанъёссэ усьтӥз. Собере вордӥськиз Gastrееt («Гастрит») фестивалез. Россиын та выллем ужрадъёсты нокин уг ортчытъя. 5 нунал ӵоже Сочиысь 12 отельёс аспӧртэм городлы пӧрмо: урамын сиён-юон веръян интыос, мастер-классъёс, юртъёсын — дышетсконъёс, площадьын — концертъёс. Арысь аре пыриськисьёслэн лыдзы будэ: азьло 500 турист лыктэ вал ке, туэ 5 сюрс адямиез витё ини. Кунгож сьӧрысь шеф-поваръёс но татчы вуон понна черодэ султо.

— Улонамы туала технологиос мур пыро ни ке но, — вера Евгения, — адямиос соослэсь акыльто, соослэн огшоры вераськемзы, ческыт сиён-юон веръямзы, шулдыръяськемзы но дышетскемзы потэ. Ӵапак со фестивальмес аспӧртэмлыко каре, уно адямилы со тунсыко потэ.

Ачиз ужрад 5 нунал гинэ кыстӥське, нош солы дасяськон быдэс ар ӵоже мынэ. Котькыӵе ӟеч уж юн командалэн тыршеменыз гинэ пӧрме. Адямиос ужзэс сюлмысь яратӥзы ке гинэ, ӟеч емыш кисьмалоз.

— Монэным визьтэм адямиос гинэ ужало, — серекъя Евгения, — угось визьтэм адями гинэ уен-нуналэн ужаны быгатоз. ма веранэз, милям кенешонъёсамы выж миськисьёсмы но пуко, куддыр соослэн малпанъёссы ик улонэ пыӵало. Ужасьёсы отпуск басьто но асэнызы ик радъям Gastrееt фестивале ас коньдонэнызы шутэтскыны вуо, сокем ужзы пӧлы выемын.

— Малы тросэз егитъёс дорамы волонтёръёс сямен лыктыны мылкыд каро? — шуэ ужбергатӥсь. — Фестивалямы билетъёс дуноесь, дорамы вуон но улон понна трос тыроно. Соин ик кожало, волонтёръёсты ми дунтэк вайиськомы, интыяськомы шуыса. Соос шулдыръяськонэз адӟыны лыкто. Сыӵеоссэ ӝог синйылтӥськомы но ужаны ум басьтӥське. Малпасько, нокинлы сыӵе ужасьёс кулэ ӧвӧл.

Евгения вераз, гастротуризмын кыӵе амалъёс ӟеч ужало. Ӧвӧл тыршоно, пе, бадӟым ужрад пӧрмытыны, быдэс дуннеысь калыкез огазеяны. Нырысь ик ваньзэ пичи аудиторилы чакласа лэсьтоно, собере валамон луоз ини, кулэ-а сое паськытатыны яке ӧвӧл. Но нырысь ик валано: тӥляд фестивальды мукетъёсыз пӧлын уз-а ышы? Котькыӵе пичи ужрадлэн но аслаз шӧмыз луыны кулэ.

Асьмелэн но, Удмуртиын, сиён-юонлы сӥзем «Быг-быг» фестиваль радъяське. «Быг-быгез» но Gastrееt-эз ӵошатӥд ке, пӧртэмлыксэ быдӟалаысьтызы гинэ адӟод, дыр. Евгения Суфиянова оске, азьланяз удмурт пӧраськисьёс араз одӥг пол гинэ уз люкаськылэ шуыса.

Мария Емельянова

Ангелина Снигирева
By Ангелина Снигирева 30 октября, 2019 14:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<