Кылзэс волятыны мылкыд карисьёслы «Кубо» клуб усьтӥськиз

Удмурт Дунне
By Удмурт Дунне Октябрь 10, 2019 15:00

Ижысь Национальной библиотекаын 1-тӥ октябре ужзэ мытӥз удмурт кылын вераськонъя «Кубо» клуб. Со радъяське «Удмурт Кенеш» огазеяськонэн валче но сӥземын Удмуртилэн кунлыкезлы 100 ар тырмонлы. Удмурт кылын тунсыкъяськисьёс клублэн нырысетӥ пумиськоназ ик удмурт культурае зымизы.

Удмурт шудонъёс калыкен тодматскыны юртто.
Туспуктӥз Максим Егоров.

Азьло дыръя удмуртъёс кусыпъёссэс юнматъяллям шудыса-эктыса. «Кубо» ӝытын но нырысетӥзэ пумиськемъёс ог-огенызы тодматскизы, удмурт шудонъёсын шудыса. «Ӟазег уя, ӵӧж уя», «Чебер чача» но мукет шудонъёсын калыкез тодматӥзы Ижысь Искусствоосъя элькун нылпи школаысь «Шудон» ансамбле ветлӥсь нылъёс но соослэн кивалтӥсьсы Юлия Павлова. Ужрад ӵоже соос люкаськемъёсты кырӟанъёсын шулдыртӥзы: куно пумитан гур кырӟазы, эктӥзы. Нылъёслы, арганэн шудыса, юрттӥз Удмуртиысь дано артист Олег Бимаков. Пермь улосысь удмуртъёслэсь такмакъёссэс быдэстӥзы на — озьы возьматӥзы, удмурт кыллэн пӧртэм диалектъёсыз вань шуыса.

Ӝытэз нуиз «Кубо» клублэн ужез понна кыл кутӥсь Елена Кутасова, библиотекаысь ужась. Со вераз: азьланяз но ӝытъёсы тунсыко куноос вуылозы.

— Та клуб кылэз волятон инты гинэ медаз луы, — вера Елена Анатольевна. — Дорамы ветлӥсьёс чебер удмурт кылэз мед кылозы, зэмос удмурт культураез пыӵатозы. Мон ачим, книга кутыса, удмуртлыклэсь узырлыксэ возьматыны уг быгаты. Нош тунсыко, кырӟаны-вераны быгатӥсь, кибашлы куноосын пумиськыса, адямиослэн удмурт кылзэс волятыны мылкыдзы уката пурӟоз. Со сяна, потэ, ужмылэн одно ик кыӵе ке емышез мед луоз. Мар со луоз — али малпаськиськомы на. Нырысь учкомы, кыӵе калык ми доры ветлоз, одно ик мылкыдзэс лыдэ басьтом.

«Кубо» клубез усьтыны ӵектӥз Национальной библиотекалэн директорезлэн воштӥсез Анна Семёнова. Кӧня ке ар талэсь азьло Анна Леонидовна удмурт кылъя дунтэк курсъёсын дышетӥсь вылэм. Со чаклам: курсъёсты йылпумъяса, адямиос ӵемысь ӟудо кинэн удмурт кылын вераськыны, кылзэс азьланяз волятыны уг быгато. Вань на эшшо городын будэм нылпиос. Соос анай-атаенызы сяна удмурт кылын уг верасько: я учыр уг сюры, я вераськыны уг дӥсьто.

Национальной библиотека калыкез люказ «Кубо» клубе.
Туспуктӥз Максим Егоров.

— Клублэн ужез вераськон котырын бергалоз, — вера Анна Семёнова. — Татын ми грамматикаез но пичияк сётом, но со валтӥсез уз лу. Елена Анатольевналэн трос чебересь малпанъёсыз клублэн ужез пумысен. Курсъёсы пӧртэм арлыдо, пӧртэм ужен вырись адямиосты витиськом. Озьы вераськонъёс эшшо но тунсыкоесьгес луозы, угось котькудӥзлэн пӧртэм малпанэз. Оскисько, ваньмыз шуныт но лякыт ортчоз. Татын нокин медаз кышка шонертэм вераськыны — янгышъёс понна ум пыкылэ.

Анна Леонидовна шумпотыса пусъе: туннэ нуналлы мукет каръёсын но ёросъёсын вераськон клуб усьтыны мылкыд карисьёс вань. Матысь дыре «Кубо» клуб ужзэ мытоз Глазовысь библиотекалэн юртаз. Та уж борды басьтӥськемез кинлэн ке потэ ке, Национальной библиотека дась юрттӥськыны, кенеш сётыны.

* * *

«Кубо» клубе вуэм Расим Закиров, дыг-мог, каллен ке но, удмурт кылын вераськыны тырше. Со удмурт кылэз ас кожаз кӧня ке дышетэм.

— Мон ачим бигер, Ижын вордски но будӥ, — вера Р. Закиров. — Удмурт кылэз умойгес тодыны мылкыды вань. Мон сое, курсъёсы ветлытэк, книгаостэк кӧня ке дышетӥ ини, калыкен вераськыса. Ульчаын кылӥсько ке, адямиос удмурт кылын верасько шуыса, соослы вазисько. Адямиос кыло ке, тон удмурт кылын валаськод шуыса, капчиенгес усьтӥсько тыныд, оско. Озьы выль кылъёс но тодӥсько, адямиосын кусып возьыны но капчигес луэ, мар ке выльзэ но усьтӥсько. Мон выль кылъёсты дышетыны яратӥсько. Немец кылын умой вераськисько, англи но испан кылъёсын тунсыкъяськисько. Кылэз дышетон ас понназ куанытэ ини.

Р. Закировлэн аслэсьтыз дорзэ, татын улӥсь калыкъёсты умойгес тодэмез потэ. Озьы, пе, нокин тынэсьтыд уз мурта.

* * *

Нош малы «Кубо»? Елена Кутасова тазьы валэктэ: азьло кышномуртъёс сӥзьылысен Вӧйдырозь, огазе люкаськыса, черсӥсько, куисько, киужен выро вылэм. Соин валче кенешо, ог-огзылы выжыкылъёс верало, мадисько, кырӟало. Черсӥськонэн валче кылбугор но узырме, кыл но воля.

Нырысетӥ пумиськонын ӵапак кубо сярысь ик вераськон мынӥз. Библиотекаын куболы сӥзем книгаосын адӟытон радъямын вал. Шара лыдӟизы Людмила Христолюбова тодосчилэсь, Семён Виноградов суредасьлэсь кубо сярысь статьяоссэс. Тунсыкоесь вылӥллям кубоен герӟаськем чакласьконъёс, осконъёс, сям-йылолъёс. Кылсярысь, нылъёс, пе, Вӧйдыре кубоен нискылало вал, пыш (конопля) мед удалтоз шуыса. Чебер вӧлэм кубоосты пиос дусымъёссылы кузьмало вылэм. Куболэн куд-ог люкетъёсыз кышномуртлы укшало, пе. Соин валче мадькылъёсын но кубо, черсӥськон уж кышномурт пыр возьматэмын: «суйыз пу, поскесэз — азвесь» яке «апоклэсь йырзэ корт сынэн сынало».

Черсӥськыса пуконъёс сярысь тунсыко гожтыса кельтэм Кияса ёросысь Уддяди гуртысь Екатерина Алексеевна Тукаева: «Тол ӵоже одӥг кышномурт одӥг пуд (16 килограмм) тыр кизем тысьысь будэтэм етӥнэз черсыса но куыса быдтэ, пе, вал».

Кыӵе бугор черсозы клубе ветлӥсьёс, тодмо луоз тулыс, Вӧйдыре — ӵапак соку кыӵе ке йылпумъян лэсьтыны ӧдъяло. Али клублэсь пумиськонзэ 3 арняяз огпол ортчытъяно медо. Но уж мынӥз ке, калыклэн мылкыдыз луиз ке, ӵемгес но пумиськылом, шуо библиотекаын ужасьёс. Е. Кутасова пусъе: ӵошен вераськонъёс, люкам тодон-валан калыкез одно ик мед шунтозы.

Анастасия Шумилова

Удмурт Дунне
By Удмурт Дунне Октябрь 10, 2019 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<