Кылдытэтъёсты воштыны быгатозы округъёс

Ангелина Снигирева
By Ангелина Снигирева Октябрь 28, 2019 12:27

Мар сётоз калыклы муниципал кылдытэтъёслэн округъёсы огазеяськемзы, кызьы ёросъёсын, гуртъёсын улон радъяськоз? Та ужпум пыр-поч сэрттэмын Муниципал кылдытэтъёслэн 14-тӥ съездазы.

Удмурт Правительстволэн таукаронэныз пусъё Алнаш ёрослэсь йырзэ А. Семёновез
Фото: udmurt.ru

Мар уг яра?

Бадӟым кенешон ортчиз Якшур-Бӧдья черкогуртын. Муниципал кылдытэтъёслэн йыръёсынызы ӵош отчы пыриськизы элькун кивалтӥсьёс, нимысьтыз ӧтемын вал Пермьысь делегация. Интыосысь аскивалтон ёзъёсын воштӥськонъёс сярысь кенешон быдэс нунал кыстӥськиз — янгышанъёс медаз луэ шуыса, кылзӥзы пӧртэм мылкыдъёсты, уно юанъёслы тыро-пыдо валэктонъёс чузъяськизы.

— Гурт администрациос уката матын луо калыклы, — вераз Тӧролэн но Правительстволэн администрациенызы кивалтӥсь Сергей Смирнов. — Та залэ люкаськемъёс ас ужзэс оскымон, тыро-пыдо быдэсъяло. Экономикаын югдур капчи ӧвӧл ке но, интыосын кылдӥсь ужпумъёсты быдэстон, калыклэсь улон-вылонзэ ӟечгес карон сярысь сюлмасько. Пусйыны кулэ, муниципалитетъёс тунсыкъяськыны кутскизы ни федерал но улос конкурсъёсын, кылсярысь 2017-тӥ — 2018-тӥ аръёсы вожвылъяськонъёслы но грантъёслы луыса гуртъёсы ог 1 миллиард манет кыскыны быгатӥзы. Уката бадӟымесь азинсконъёс, вормонъёс басьтыны луэ, кивалтӥсьёс борды огшоры калык итӥське ке — адямиос соку золгес данъясько ураменызы, азбаренызы, гуртэнызы, угось сое выльдон понна асьсэос но мылкыдзэс, сюлэмзэс понӥзы.

Тырмымтэосты но ад­ӟым­­тэ улсы кариськыны уг луы. 2003-тӥ арысен улонэ пыӵатӥськиз 131-тӥ федерал закон. Со дырысен депутатъёсты бырйиськом ёрос Кенешъёсы но, поселениосы но. Йыръёс вань ёрос, город администрациосын но, гурт администрациосын но. Кивалтон 2 полэс луыса кошке.

Мар умойтэмез та амалын — кушаса кадь сётӥз Тӧролэн но Правительстволэн администрациенызы кивалтӥсьлэн воштӥсез, интыосысь аскивалтон ёзъёсын кусып возёнъя управлениен кивалтӥсь Вероника Лекомцева. Ёрос но гурт поселениосты возьыны укыр трос уксё кошке — араз 540 миллион манет пала. Вань сыӵе поселениос, кудъёсаз бюджетысьтызы 90 процентэз коньдон аппаратэз возьыны быре. Дуно усе депутатъёсты быръён но: ЦИК-лэн ивортэмезъя, одӥг депутатэз быръёнлы ог 80-140 сюрс манет кошке. Нош депутатъёс шаерамы 3 сюрс 748.

— Ӵемысь озьы но луэ: одӥг ужез ик лэсьто ёрос, город администрациосын но, гурт администрациосын но, — ватсаз Вероника Анатольевна. — Адямиос сюлмаськытӥсь ужпумзэс сэрттон-пертчон вылысь куддыр уг но валало, кудаз администрацие вазиськыны. Со дыре ик гурт администрациын трос специалистъёс ӧвӧл, соин ик отысь кивалтӥсь валаны кулэ музъемен но, лэсьтӥськонэн но мукет удысъёсын но герӟаськем ужпумъёсты.

Мар кельше?

Интыосысь аскивалтон ёзъёсын кылдэм югдур быдэс Россиез сюлмаськытэ ни вал. Озьы туэ май толэзьысен улонэ пыӵаны кутскиз муниципал округъёс сярысь 87-тӥ федерал закон.

Куд-ог улосъёс ӝегат­скытэк та законэз пыӵатыны кутскизы. Кылсярысь, сое пӧсь табанез сямен возьмаллям Пермь улосын. Июне ик отын муниципал округъёс кылдытыны кутскиллям. Туннэ нуналлы 363 муниципал кылдытэтъёсты 133 муниципал округъёс воштӥллям ни.

Съездэ люкаськемъёслы пермьёс ӵектӥзы: выльдӥськонъёс борды, пе, дӥсьтыса басьтӥськоно. Угось солэсь пайдазэ соос кӧня ке толэзь ӵоже гинэ но валаса вуттӥлям ни. Нырысь ик, специалистъёслэсь лыдзэс кулэстыса, кылемъёсызлэсь уждунзэс йылэтыны луэ. Кыкетӥез, округъёслэн администрациосазы вылӥ тодон-валанъёсын пӧртэм специалистъёс вань — калык тыро-пыдо визь-кенеш басьтыны быгатэ. Со сяна, ужъёсты но радъяны капчигес — округъёсын огъя генпланъёс кылдытӥсько, кудаз гуртын кыӵе ужъёсты быдэстоно — ваньмыз чаклаське.

— Одӥг округе пырыны быгато городъёс но, гуртъёс но, — пусйиз Пермь улосэз азинтонъя министрлэн воштӥсез Светлана Усачёва. — Со дыре ик гуртын улӥсьёслэн льготаоссы уг быро, кылсярысь, фермеръёслы льготаос вань ке, соос озьы ик кылёзы.

Пермьёс озьы ик ӵектӥзы: туала гурт администрациосты воксё быдтонлэн кулэлыкез ӧвӧл — соос интые кельтоно округъёслэсь ёзъёссэс. Отын куд-ог специалистъёс мед луозы, калык, юан кылдыку, отчы вазиськыны мед быгатоз.

— Но округъёс кылдытон азьын умой-умой юано калыклэсь мылкыдзэ, — шуизы пермьёс. — Солы пумит та уж лэсьтӥськыны кулэ ӧвӧл. Тыро-пыдо валэктоно, выль системалэн мар умоез.

Мар луоз?

Элькун Правительство, Кун Кенеш выль амалъя ужаны дась луэмзэс верало.

— Муниципал округъёс сярысь законэз Россиын юнматэмлэсь азьло Кун Кенешын но та ужпумез одӥг пол гинэ ӧм ӝутъялэ, муниципалитетъёслэсь мылкыдзэс юам — солы пумит луисьёс ӧй вал, — шуиз Кун Кенешлэн Тӧроезлэн воштӥсез Владимир Невоструев. — Бен, округъёсты кылдытыку, пермьёслэсь визь-кенешсэс одно лыдэ басьтом, малы выльзэ малпаны выронэз на. Кун Кенеш дась ини котькуд округъя законъёс юнматыны — отын лыдэ басьтом округлэсь аспӧртэмлыкъёссэ, юнматом солэсь полномочиоссэ но мукет.

Нялтас вераса, муниципал округъёсты кылдытон шаерамы мытэмын ни. 11 ёросъёсысь поселениос округе огазеяськыны дась луэмзэс веразы. Пӧлазы Пичи Пурга ёрос но.

— Ар пумозь поселениосын калык кылзонъёс ортчытом, адямиослэсь мылкыдзэс кылзом, — вераз Пичи Пурга ёрослэн йырыз Сергей Юрин. — Угось ваньмыз лэсьтӥське ёросын улон-вылонэз ӟечгес карон вылысь. Али ёросамы бергась ог 75 процентэз уксё лыктэ республикаысь — асьмемыз асьмеос сюдыны ум быгатӥське. Вань сыӵе поселениосмы, кудъёсызлэн бюджетъёссы туж начаресь — отын ӧвӧл предприятиос, ужбергатӥсьёс. Соин ик 15 поселениосмылэсь кужымзэс огазеяса, умойгес луоз, малпасько. Чакласьком ёросысь депутатъёслэсь но лыдзэс 30-ысь 20-озь кулэстыны. Туж оскисько, кема ик дыр уз ортчы, калык ас вылаз шӧдоз воштӥськонъёслэсь пайдазэс.

Съездлы йылпумъянъёс лэсьтыса, вераськиз Правительстволэн Тӧроез Ярослав Семёнов.

— Муниципал кылдытэтъёсты огазеяса шыръям коньдон кылёз интыосы ик, — вераз со. — Со сяна, выль кылдэм округъёслы сюресъёс лэсьтыны, калык кичӧлтонъёсты улонэ пыӵатыны но мукет ужпумъёсты быдэстыны нимысьтыз луонлыкъёс кылдытӥськозы — ужъёс ӝоггес радъяськыны быгатозы. Кылсярысь, гуртэ выль ФАП пуктон понна нырысь ик со улэ музъем висъяно, документъёсъя со поселенилэн ваньбурез мед луоз. Талы дыр быре, соин ӵош ӝега фельдшер-акушер пунктэз пуктон но, иське, калык шугъяське, В. Путинэн дэмлам нацпроектъёс дыраз уг быдэсмо. Нош кужыммес огазеям ке, ужпумъёс капчиенгес сэрттӥськоз.

* * *

Съездын данъян грамотаосын, таукаронъёсын сӥлы каремын устоосызлэн муниципал кылдытэтъёслэн йыръёссы. Кылсярысь, огъя ужпумез быдэстон вылысь гуртоосты огазеяны, калык кичӧлтонъёслы сӥзем программае пыриськыны быгатэмзы понна пусъемын Можга ёросысь «Горняк», Кез ёросысь «Кузьма» но Сарапул ёросысь «Мазунино» муниципал кылдытэтъёслэн йыръёссы Надежда Байкова, Галина Осотова но Егор Рассомахин. Гуртын улон-вылонэз ӟечгес карон понна ӧжыт уг лэсьто старостаос но, сӥлы каремъёс пӧлын — Пичи Пурга ёросысь Баграш-Бигра гуртысь но Глазов ёросысь Пышкизь гуртъёсысь Анатолий Матвеев но Ирина Антонова азьветлӥсьёс.

Элькунысьтымы муниципал кылдытэтъёслэн кенешсылэн тӧроез луиз Алнаш ёрослэн йырыз Алексей Семенов.

Элина Кумачёва

Ангелина Снигирева
By Ангелина Снигирева Октябрь 28, 2019 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<