Кызьы таркаськиз Арчакар: Леонтий Кривошеев книга поттӥз

Удмурт Дунне
By Удмурт Дунне Октябрь 21, 2019 15:48

«Удмуртия» издательствоын потӥз Леонтий Кривошеевлэн «Удмурт калык. Дауръёс пыр» книгаез. Со сӥземын Удмурт автономилэн 100 ар тырмонэзлы.

Грак ёросысь Лолошур-Возжи гуртысь Л. Кривошеев 9 книга поттӥз ини.
Туспуктӥз Зинаида Рябинина.

Малпанэз быдэсмиз

Леонтий Кривошеев милям лыдӟисьёсмылы кемалась тодмо. Грак ёросысь Лолошур-Возжи гуртысь автормылы 83 арес. Азьвыл дышетӥсь но партийной ужась, пенсие потыса, книга гожъяны кутскиз. Нырысь — шаертодонъя очеркъёс, веросъёс, кылбуръёс… Табере тани — «Удмурт калык. Дауръёс пыр» роман. Книга мышказ издательёс гожто, со научно-популярной издание, шаерчилэн гожъямъёсыз (записки краеведа) шуыса. Мон таин соглаш ӧвӧл. Та книга — исторической роман! Бен, архивысь документъёс вылэ пыкъяськыса гожтэмын, книга мышкын, эсьма, источникъёс но пусъемын, но со ик дуно: озьыен, автор гижысь-пиньысь ужаз, выжыкыл ӧз гожты — удмуртъёслэн историзылы сӥзем кема возьмам зэмлыко роман! (Презентация дыръя автор вераз, зэмзэ но, пе, кемалась потэ вал ваньзэ пыр-поч тодэме, сое калыклы вуттэме, соин 10 ар пала архивъёсын, библиотекаосын пуки. Эшшо 2-3 ар гожтыны выри.) Писатель — нош таиз ужез бере мон Леонтий Николаевичез зэмос писателен лыдъясько — книгаяз возьматэ удмурт калыклэсь адӟонзэ: кызьы 15-тӥ-16-тӥ дауръёсы сӥялскиз но кысӥз калыкмылэн лулпуш тылыз, шунытэз.

Булгар кун лымшор удмуртъёсты аслаз ляльчиосызлы пӧрмытӥз. 16-тӥ даурозь удмуртъёслэн улонзы ортчиз жугиськыса, нюръяськыса, вирен пыласькыса, тылпу пӧлын сурымен но ӵынэн ӝокаса. Секыт зӥбетлэсь мозмытскыны тыршыса, Арча котырысь удмуртъёс уно пол ӝутскылӥзы ханъёслы пумит. Уно батыръёссэ, визьмо, дано адямиоссэ ыштӥз но кир-пазь луыса бырон калэ вуиз. Бигер кунлэн бадӟым карез — Кузон — пазьгемын вал ӟуч кунлэн эксэеныз, соку тӥни сутӥзы удмуртъёслэсь Арчакарзэс но кемалы-кемалы лапкатӥзы калыкмылэсь кун кылдытон мылкыдзэ, вера азькылаз автор. Но берло но, Ӟуч кунэ пырыса, удмуртлэн улонэз ӧз воштӥськы — одӥг зӥбетэз воштӥз мукетыз, эшшо но секытэз…

Богоданлэн выжыосыз

Автор ваньзэ тае возьматэ Арчакарлэн йырызлэн — Богоданлэн (Багаутдинлэн) — выжыез вылын. Богодан кулэм бере солэсь ужзэ азинтэ нылызлэн пиез — ӵужатаезъя сое но Богдан нимазы. Кызьы улонэз радъяно, кудпала — бигеръёс пала-а, ӟучъёсъя-а — кариськыса умойгес луоз? Уно аръёс ӵоже бигеръёсын артэ улыса, калык ӟечсэ ӧз адӟы — удмуртъёсты арысь аре юнгес шымыртылӥзы. Но кин вералоз, сётоз-а ӟуч калык удмуртъёслы каньыл улон?

1551-тӥ-1552-тӥ аръёсы ӟучъёс Волга тупалэз басьтэм но ханствоез котыртэм бере улон-вылон уката уродмиз. Богдан, Арча улосвыллэн эльйырыз, шуг югдурын, угось со вала: ханство ӟучъёсын киултэмын ни, шуыны луоз, озьыен, бигеръёсын кызьы ке тэрытскыны луэ ик ай ке, ӟучъёсын кызьы артэ улонэз тодмо ӧвӧл. Богдан, калыксэ быронлэсь утёно шуыса, малпаське ӟуч кунэн огазеяськон вылысь соглаш кариськыны. Но азьпалан ай туж трос вир кисьтонъёс, ултӥянъёс, вылысьтыз вылаз ыштонъёс… Богдан ыштэ, шуыны луоз, аслэсьтыз Бекташ пизэ но — Шах-Али хан сое вӧзаз вордос пилы басьтэ, аслыз юрттӥсь каре. Бӧрысь Шах-Али ачиз но ӟучъёсъя кариське, Бекташез наместнике сётэ. Бекташ осконзэ но, нимзэ но воштэ…

3-4 ар куспын Арча улосвылысь быризы удмуртъёс. Кошкылӥзы соос шундыӝужан пала, Ватка но Кам шуръёслэн вадесазы, Кам шурлэн паллян палаз потыса, вуылӥзы башкиръёслэн музъем вылазы. 1570-тӥ аръёсы Арча котырысь удмуртъёсты нокыӵе лыдъянъёсын-чотанъёсын ӧз ни пусйылэ, улэп кылем удмуртъёс ваньмыз кӧчизы мукет интыосы…

Одӥг книгае тэронтэм

Собере автор туж дыртӥд-вуттӥд, дауръёс вылтӥ тэтчаса, вуэ 20-тӥ даурысь коллективизациозь! Бадӟым текстлэсь эн кышкалэ — историысь учыръёс, бигер шӧмо нимтулъёс, ожмаськонъёсысь суредъёс сяна, книгаын тырмыт яратонэз но, семья кусыпъёсыз но. Макем ог-огзэс гажаса, жаляса улыны быгато вылэм удмурт семьяосын.

Книга гожтэмын 3 люкетэн: удмуртъёслэн 15-тӥ даурысен 20-тӥ даурозь улэм-вылэмзы. Озьы автор вормонтэмзэ вормыны выре. Укыр бадӟым вакыт — одӥг книгае тэронтэм. Соин, дыр, 3-тӥ люкет вылтӥзгес лэсьтэмын — 150 баме тэрытыны выремын ни ханство куашкам дырысен кылем даурозь историез. Та люкетлэн шорысеныз жанр но чутрак воштӥське — художественнойысь публицистикае тэтче — со лыдӟись понна возьмантэм луэ но саклыкез (материал туж узыр, туж тунсыко ке но) шӧдскымон кулэстэ.

Арлыдо егит писатель

Авторез валаны луэ, конешно — со дыртэ: арлыд кошке, ваньзэ вераса кельтэм потэ. Собере, сюроз на-а выльысь книга поттыны луонлык, таиз но, спонсор утчаса, поттэмын ке? Соин синмес кынём книга радъян манерез шоры. Но произведенилы зуч-зучгес ним шедьысал на ке, со уката бордаз кыскысал. Нош тазьы, ачиз автор дэмлатэк, мон, оло, лыдӟыны но ӧй кутскысал, малпасал, та бичет — шаерчилэн ас гуртэзлэн кылдэмез сярысь очеркъёсыз…

Мыным ӧжытак валантэм потӥзы книга шоры тэчем туспуктэмъёс но — романын вераськон мынэ лымшор удмуртъёс сярысь, нош туспуктэмъёс вылын Арчакарен артэ адӟиськом уйпал Иднакарез — художник, луонлык сюрыку, ваньзэ огазе тырыны тыршем кадь. Синмез вандо мултэс трос янгышъёс но. Но сыӵе шекъёс шоры учконо ӧвӧл ке, та произведение мынам одӥгез кельышлыез луоз. Ас поннам Леонтий Кривошеевлэсь «Удмурт калык. Дауръёс пыр» книгазэ ӵошатӥ тодмо туала ӟуч писательлэн Алексей Ивановлэн «Сердце Пармы» романэныз.

Нялтас вераса, кылем арын элькунысьтымы
Печатья но ивор вӧл-мытонъя агентствоен но «Кенеш» журналэн радъям устоез литературной произведенилы конкурсын та уж «Проза» номинациын вормисен лыдъямын. Туж шонер быръем жюри! Потэ вылэм, удмурт романэз тросгес калык мед тодоз, со понна книгаез ӟуч кылэ но берыктыны умой луысал. Темаез — висьытӥсь, кужекъятӥсь, но уг яра ук улон шоры ялан «паськыт пытсам» синъёсын учкыны. Соку, оло, капчигес сюрысалзы трос дауръёс ӵоже висьытӥсь юанъёсмылы валэктонъёс.

Нош шаерысьтымы Писательёслэн огазеяськонзылы дыртоно вылэм Леонтий Кривошеевез ас радазы пыртыны. Сыӵе дэмлан чузъяськиз писательлэн Грак ёросысь вордӥськем гуртаз ортчем презентациын но. Ёросысь Депутатъёслэн Кенешсылэн кивалтӥсез Михаил Крестьянинов но «Удмурт Кенеш» огазеяськонлэн ёросысь ёзэзлэн кивалтӥсез Александр Аблаев ас пал адямиоссэс туж дунъяны быгато, котькуд презентацие вуыло. Ӝож, сыӵе ужрадэз ёросаз сяна синйылтӥсь ӧвӧл — угось удмуртлэн даурез сярысь книга зэмзэ но дауръёслы гожтэмын.

Зинаида Рябинина

Удмурт Дунне
By Удмурт Дунне Октябрь 21, 2019 15:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<