Кинлэсь умзэ лушказ Алина Антонова?

Ангелина Снигирева
By Ангелина Снигирева 30 октября, 2019 09:23

Гужемысен «Мынам Удмуртие» радио пыр чузъяське «Магнит синъёс» кырӟан. Быдэсто сое егит кырӟасьёс Алина Антонова но Игорь Уткин. Кылзӥсьёс выльысь но выльысь куро «Магнит синъёсты» эфире сётыны. Маиныз та кырӟан сокем пыриз калыклэн сюлэмаз?

А. Антонова но И. Уткин «Магнит синъёс» кырӟанэз быдэсто
Туспуктӥз: Марк Антонов

Крезьгур

Кырӟан гожтэмын ни 1990-тӥ аръёсы. Кылъёсыз тодмо удмурт кылбурчилэн Сергей Матвеевлэн, крезьгурзэ кылдытӥз Кияса ёросысь крезьгурчи Николай Уткин. Кырӟанлэн кылдэмез сярысь умой тодэ крезьгурчилэн кышноез Ольга Уткина.

— Сергей Матвеев огаз пумиськонын Колялы «Лул» сборниксэ кузьмаз. Вань кылбуръёс пӧлысь картэлы тужгес кельшиз «Уйёсы изёнме тон лушкад» чуръёсыз. Озьы вордскиз выль кырӟанэз. Коля со вакытэ трос кырӟанъёс кылдытъяз. Тросэз калыке вӧлмылӥзы. Нош тазэ, «Уйёсы изёнме тон лушкад» кырӟанзэ, трос пол быдэсъяса но ӧз вуы. Коля улонысь кошкиз 2000-тӥ арын. 2 ар ортчыса, поттӥмы солэсь «Ӵош кырӟано асьмелы» сборниксэ. Та кырӟан но отчы пыремын вал. Нош пичиез пимы — Игорьмы — сое калык пӧлы выльысь поттыны малпаз, — вера Кияса ёросысь Уддяди гуртын улӥсь Ольга Уткина.

Кылъёс

Кылбурчи Сергей Матвеев радиоез кылзыны котьку уг тупа. «Мынам Удмуртиелэн» тулкымъёсыз вылын чузъяськись «Магнит синъёс» кырӟанэз со алигес гинэ кылӥз.

— Маке тодмо кадь. Кылъёсыз мынам. Та кылбуре 1994-тӥ арын потэм «Лул» сборнике пыриз вал. Огаз пумиськонын дорам лыктӥз Николай Уткин. Шуэ: мон кылбуредъя кырӟан гожтӥ. Баянэн шудыса, кырӟаз. Табере радиоын со мукет сяменгес чузъяське, — шуэ Сергей Матвеев.

— Кинлы сӥземын вал та кылбур? Кыӵе синъёслы синмаськемын вал поэт? — выжыятӥсько кылбурчилэсь.

— Со дырысен кӧня вуос кошкемын ни, уг ни тодӥськы, — пальпотэ со пумитам.

Кырӟасьёс

Кырӟанэз калыке выльысь вӧлмытон пумысен сюлмаськиз крезьгурчилэн пиез Игорь Уткин. Дима агаеныз ӵош со «Италмас» ансамбльын ужа. Агай-вынъёс озьы ик асьсэлэсь творчествозэс но азинто, кырӟанъёс кылдытъяло.

— Тазэ кырӟанэз Димаен ӵош кырӟаны кутским вал. Мамамы шуэ: со тупа нылын-пиен кырӟанлы. Мон кемалась тодмо ни Алина Антоноваен. Соин ӵектӥ солы ӵошен кырӟаны. Алина дэмлаз кырӟанлэсь нимзэ вакчиятыны — озьы со «Магнит синъёс» луиз, — вера Игорь Уткин.

Зэмзэ вераса, Алина доры нырысетӥ вамыш лэсьтыны Игорь дасяськиз… 2 ар пала.

— Игорен огаз концертын тодматским. Кӧня ке нунал ортчыса, со мыным вера: ойдо ӵош кырӟалом. Мон, шонерзэ вераса, шумпотыса ӧй тэтча. Малы ке шуоно кырӟанзэс ӵектӥсьёс но, ӵошен кырӟаны ӧтисьёс но ӵем луо. Игорь, 2 ар ортчыса гинэ, мыным та кырӟанэз лэзиз. Малпай, ӧз кельшы ке, котыръяса уг улы — шонерак верало, — шуэ Алина Антонова.

Но фонограммаез кылэмез бере Алиналэн мылкыдыз соку ик уртчиз: та кырӟан солы туж матын, сыӵе капчи мылкыд кельтэ, огъя творчествоезлы но сыӵе тупа. Озьы вордскиз выль кырӟан.

Кин тодэ, оло, кыр-ӟасьёслэн куспазы синмаськон тылгизьы но кенжемын? Алина уг танӥськы: творческой синмаськон вань. Сцена вылын артэ сылэмед но уз поты, адями ӧз кельшы ке. Нош татын егит артистъёслэн кырӟанзы но пӧрме, огъя дуэтсы но учкисьлы кельшымон луэ.

— Шумпотӥсько, вуоно концертам Игорен та кырӟанэз учкисьёслы ӵошен кузьмаломы, — вера Алина.

Оло, егитъёс синпӧрт-манэн выро? Мед, ойдо, уго яратон сярысь котькуд сэрегын уг кесясько. Яратон сярысь шыпыт верало но кырӟало…

Елена Скворцова

Ангелина Снигирева
By Ангелина Снигирева 30 октября, 2019 09:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<