«Италмас» ансамбльлы сётэмын А. Мамонтовлэн нимыз

Удмурт Дунне
By Удмурт Дунне Октябрь 8, 2019 14:21

5 толэзьлэсь кема асьме пӧлын ӧвӧл ни огез яркытэз удмурт кизили — Анатолий Мамонтов. Анатолий Васильевичлэн нимыз люконтэм герӟаськемын «Италмас» ансамблен. Та коллективен со кивалтӥз ӝыны даурлэсь ятыр. «Италмасысь» артистъёс куремъя ансамбльлы А. Мамонтовлэн нимзэ сётэмын.

А. Мамонтов вуытозь, «Италмаслэн» нимыз но ӧй вал на. 1936-тӥ арысен со Удмурт кун хор но эктонъя ансамбль вал, собере Кырӟанъя но эктонъя кун ансамбль нимаськиз.
Анатолий Васильевич коллективе вуиз 1962-тӥ арын. 1968-тӥ арын ансамбльлэн удмурт нимыз но кылдӥз, пуштросэз но удмуртомиз. Сцена вылын пуктоно номеръёсы пыризы удмурт юмор, пӧртэм калык сямъёс, обрядъёс.

«Италмаслэн» тужгес ворекъян вакытэз тупаз 1970-тӥ-1980-тӥ аръёсы. Соку со быдэс Совето Союзлы тодмо луиз. Артистъёс вуылӥзы кунгож сьӧры — Финляндие, Германие, Кореяе, Японие, США-е, Францие но мукет кунъёсы. Кырӟась эктӥсьёслэн ял карыны дырзы ӧжыт вал — гастрольёсы гинэ араз 200 пол поталлязы.

Озьы ке но нунал бӧрсьы ортче арня, толэзь, ар. Туннэ «Италмасын» трос ӧвӧл ни А. Мамонтовен будэтэм но бурдъям артистъёс. Соос тодо на, кыӵе вылӥ куронъёс пуктылӥз кивалтӥсь ас азяз но, ужасьёсыз азе но. Ансамбльлэн туала кивалтӥсьёсыз но сюлмасько А. Мамонтовлэсь крезьгуро шыкыссэ утён понна, дано адямилэсь нимзэ дауръёслы историе кельтон понна.

Соин валче 25-тӥ октябре Удмурт филармониын ортчоз «Ум люкиське» концерт. Татын быдэстозы Анатолий Мамонтовлэсь аслэсьтыз произведениоссэ но обработкаоссэ, «Италмаслэн» зарни фондысьтыз номеръёсты но, возьматозы выль кырӟан-эктонъёсты но. Уго адями улонысь кошке ке но, со калык пӧлын улэ сомында ар ӵоже, кӧня сое тодазы возё.

И. Русских

Иван Русских, Удмуртиысь калык артист:

— Нырысетӥ репетициын ик зэмос искусствое зыми. Артистъёс «Иван гыре, Иван дуре» номер бордын ужало вал. Кыӵе ке выжыкылын выллем: кырӟаны кутско сопраноос, соос борды итӥсько альтъёс, собере мыто теноръёс. Со дырысен мон пумтэм синмаськи но яратӥ «Италмасэз».

Анатолий Васильевич ми понна Инмар интыын вал. Со шуылоз вал: уг яра учкисьлэсь куронъёссэ гинэ быдэсъяны, калыкез визьноданы кулэ. Соин ми гуртысь клубъёсын но классикаез быдэсъямы, милемыз кылзӥзы.

Анатолий Васильевич туж гажано адями вал. Солэсь кышкаллязы, куронъёссэ быдэсъязы. Огпол бадӟым концерт луыны кулэ вал. Одӥг вакытлы ӧтемын огез ансамбль, собере мукетыз, куинетӥез… Ми вуиськом тупатэм дырлы, нош сцена вылын репетиция мынэ. А. Мамонтов сыӵе дыръя ӧз возьмалля: «Бушатэ сценаез, али милям дырмы» шуылӥз, солы пумит вераны ӧз дӥсьтылэ.

Л. Ахтариева

Людмила Ахтариева, Удмуртиысь дано артистка:

— Анатолий Васильевич шӧдылӥз, кыӵе артистлы кудӥз кырӟан тупалоз: та тынад кырӟанэд, тон быгатод тазэ нотаез басьтыны, тон пӧрмытӥськод. Но ӧз сюлворылы.

Со дыре ик Анатолий Васильевич быгатылӥз адямиез кылзыны, валаны, сое ӧз куасалтылы. Тани мон культурая училищеез йылпумъян азьын «Италмасэ» шедён понна конкурсэ пыриськи. Кӧня ке дыр ортчыса, Анатолий Васильевич ӧтиз: артистъёс уг тырмо. Быгатод-а ужаны лыктыны? Нош мынам 3 толэзь дышетскыны кылемын. Уг, шуисько, уг лыкты, нырысь училищеме йылпумъяло. Анатолий Васильевичлэн вожез потӥз, иське, гуртад берт но клубад кырӟа, шуиз. Экзаменъёсы ортчизы, распределение мынэ, ваньзы тодо ни кытын ужанзэс, мон гинэ вень йылын кадь пукисько. Вуиз ведь «Италмасысь» ӧтён…

А. Хитрин

Алексей Хитрин, Удмуртиысь калык артист:

— Ансамбльлы А. Мамонтовлэсь нимзэ сётоно шуыса вераськонъёс ог 3 ар талэсь азьло кутскизы вал. Со шонер, малпасько. Тани Комиысь «Асъя кыа» ансамбльлы В. Морозовлэсь нимзэ сётӥзы, «Донской казакъёс» А. Квасов ним басьтӥзы, Москваысь Калык эктонъя кун ансамбль И. Моисеев нимо луиз.

Анатолий Васильевичез берпуметӥ сюресаз келяны тросэз артистъёсмы ӧз тупалэ — соос Новороссийскын гастрольын вал. Мон ӵапак Иже учырай. Соин келяськонын шуи: ансамбльлы сётоно А. Мамонтовлэсь нимзэ. Куронмес кылӥзы: Удмуртиысь Культурая министерство сыӵе приказ юнматӥз.

Анатолий Васильевич удмурт гений вал. Кылсярысь, хор кыӵе ке огшоры кырӟанэз дышетэ. Ма, мар сое кырӟалод, куспазы ӟургето артистъёс. Нош номерез сцена вылын быдэсто но — учкисьёс сылыса чабо, «браво!» кесясько. А. Мамонтовлэн туж бадӟым шӧдонэз вал, сыӵе талант Инмарен сётӥське.

Елена Скворцова

Удмурт Дунне
By Удмурт Дунне Октябрь 8, 2019 14:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<