Инбам. Самолёт. Кичабон

Ангелина Снигирева
By Ангелина Снигирева 30 октября, 2019 15:20

38 ар ӵоже ини «Ижавиа» огазеяськонын тырше пилот-инструктор Сергей Сальников. 19 сюрс 500 час ӵоже со инмын лобамын. Одӥг пол но кышкыт учыре шедьылытэк. Та удысын сюлмо тыршемез понна со пыртэмын Удмурт Республикалэн Данъян пул вылаз.

С. Сальников 38 ар самолётэз нуллэ
Фото: басьтэмын «Ижавиа» предприятилэн сайтысьтыз

Тӧролэн резиденцияз ортчем сӥлы карон ужрадэ Сергей Михайлович вуэм пилотлэн кителеныз: йӧнолэсь йӧно, лад-лад воргорон. Такем данъянлы мон дышемын ӧвӧл, эсьмаса, самолётам ик асме гань-гань, ас интыям шӧдӥсько, пальпотыса вера пилот.

Сергей Сальников вордӥськемын Татарстанысь Старая Александровка гуртын. 7 арес тырмыкуз, анай-атаез улыны выжизы Иже. Сергей 8-тӥ классозь тодон-валан люказ 50 номеро школаын, нош дышетсконзэ йылпумъяз 71 номеро школаын.

— Пичи дыръям ик тунсыкъяськыны кутски самолётъёсын. Кӧня соосты суредалляй, кӧня соос сярысь книга-журнал лыдӟи! Самолётъёс но инбам сяна, мукет номыр но ӧй вал ни, кожалод. Зол эшъяськи спортэн. Тодӥсько вал угось, мугор ёзвиостэ кыдатытэк, уз пӧрмы тынэсьтыд нокыӵе лётчик. Школаез йылпумъятозям, малпанэ ӧз воштӥськы: дышетскыны пыри Оренбург улосысь Бугуруслан городысь лётной училищее, — шуэ С. Сальников.

Соин ӵош дышетскыны пыремъёс пӧлысь уноезлы училищеысь кошконо луиз — ӧз чидалэ. Тазалык но, техникаез тодон-валан ласянь но угось чурытэсь куронъёс пуктэмын вал. Туж зол эскеризы психиказэс: макем кышкалозы, инмын секыт учыр кылдыку, пӧрмытозы-а куалектэм кабенызы самолётэз пуктыны…

— Психоотбор пыр мон капчиен потылӥ. Ма, дышетсконэлэсь ортчемзэ валаса ик ӧй вуы — сокем сюлмыя вал быръем удысэ. Тренировкаос дыръя самолётэн пӧртэм сямен лобаны дышетскимы: Нестеровлэсь петлязэ лэсьтылӥмы — авиациын тужгес секыт фигураен лыдъяське. Озьы ик быдэстылӥмы «бочка» но «штопор» нимаськись фигураосты. Соку угось нокыӵе компьютеръёс, спутникъёс ӧй вал: самолётын вал ручной управление, — вера пилот.

Бугурусланысь училищеез йылпумъяса, Сергей Сальников берытскиз Иже. Распределение пыр сое, оло, мукет улосэ келясалзы, но солы удалтӥз: Ижысь аэропорт, пе, кулэяське пилотъёслы.

— Зэмзэ вераса, мукет улосэ кошкеме уг поты вал. Мон сямен, кытын будӥд — отын ик ярад. Нырысетӥ аръёсаз тырши кыкетӥ пилот луыса, опыт люкай. Бӧрысь нырысетӥ пилот луи. Кема аръёс ӵоже лобасько ни ЯК-42 самолётэн.

Сергей Михайловичлы оско пӧйшуръёсты но пӧртэм интые вуттыны. Ӵапак со 9 ар талэсь азьло самолётэн Иже вайиз Ямалысь шедьтэм морж пиез: уллёезлэсь кылем пӧйшур бырыны шедьысал. Сергей Сальниковлы ик оскемын вал Южно-Сахалинскысь дельфинъёсты Анапае вуттыны.

— Соос интыямын вал вуэн тырмытэм мур ваннаосы. Тырши, самолётэ омыретӥ нялмыт мед лобоз шуыса, ву медаз пальккаськы. Вутэк дельфинъёс Анапаозь ӧй чидасалзы.

Ӟеч сямлы пыӵаз ни: самолёт музъем вылэ пуксе ке, пассажиръёс тау карыса кизэс чабо. Жаляса верано, пилотъёс та кичабонъёсты уг кыло. Но калыклэн тазьы тау каремез сярысь соос тодытэк уг уло:

— Бортпроводницаос милемлы та пумысен верало. Талэсь вылӥгес дунъет вань меда? Куке тодӥськод, сомында адямилэн улонэз тынад кияд вал шуыса. Куд-ог дыръя синкыли ик быльыраны ӧдъя. Но пилотлы юн луоно, мылкыдлы эрказъяськыны сётоно ӧвӧл, — шуэ С. Сальников.

Туала вакытэ авиациын паськыт кутӥсько туала технологиос. Одӥг ласянь, пилотлэн ужез капчия: самолётэз валтэ но вань кулэ луись параметръёссэ чакла нимысьтыз система, лобан сюрес возьмато спутникъёс.

— Нош мукет ласянь, туала технологиосын йырин быгатонлыкъёссэ ыштыны ӧдъя пилот, — вера Сергей Михайлович. — Кышкыт учыръёс кылдыку, техника вылэ оскиськыны уг луы ни, самолёт аслыд пуктоно луэ. Тани Шереметьево аэропортын но туэ май толэзе кышкыт учыр вал: самолётын маиз ке тӥяськиз, пилотъёс самолётэз пуктыны быгатӥзы кыкетӥ полаз гинэ. Музъемен шуккиськыса, со ӝуаны кутскиз. Соин ик техникалы гинэ оскиськоно ӧвӧл, пилотлы котькыӵе учырлы дась луоно. Матысь дыре «Ижавие» вуттозы «Боинг» самолётъёсты. Соосын уг лоба ни, малпасько, инбамен люкиськоно луоз. Ма, музъем вылын но уж лачак: пилотъёсты дышетоно.

Елена Никитина

Ангелина Снигирева
By Ангелина Снигирева 30 октября, 2019 15:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<