«Зарни шеп» ансамблез кылдытӥсьлы Федосья Тубыловалы — 85 арес

Удмурт Дунне
By Удмурт Дунне Октябрь 10, 2019 15:47

Шаерысьтымы одӥгез кужмоез фольклор коллектив — Пичи Пургалась «Зарни шеп» ансамбль. 40 ар талэсь азьло сое кылдытӥз но 35 ар ӵоже, вань сюлэмзэ сётыса, валтӥз Федосья Тубылова. Та нуналъёсы Федосья Михайловналы 85 арес тырме.

Пичи Пурга черкогуртысь Ф. Тубылова.
Туспуктэм Федосья Тубыловалэн архивысьтыз.

Уже — кырӟаса

Федосья Михайловна Тубылова вордӥськиз 1934-тӥ арын 14-тӥ октябре Пичи Пурга ёросысь Гужношур гуртын. Семьяязы пиналъёс пӧлысь со 4-тӥез вылэм, но сютэм улэмен, пӧртэм висёнъёс алямен, апайёсыз пичи дыръязы ик кулылӥллям. Быдэ вуэм Федосья гинэ. Анай-атаез сое туж яратыса будэтӥллям, удмурт кырӟан-веранъёс, мадёсъёс пыр визьмаллям. Озьы удмурт сям-йылолъёс, аслэсьтыд шаердэ гажан, яратон нылашлэн сюлэмаз пичиысен пыӵаллям. Зэм, будон, быдэ вуон дырыз туж секыт вакытъёслы тупазы.

Федосьялы 7 арес тырмыса ӧз вутты, кутскиз Быдӟым война. Ӝоген нылашлэсь атайзэ фронтэ басьто. Ачиз Федосья 8 аресказ колхозын анайзэ воштыса ужаны быгатӥз ни: турназ, пудо утялтӥз. Нош ӝытъёсы нылкышноос кин ке доры люкаськылӥзы но, ыж гон черсыса, фронтовикъёслы носки-пӧзьы керттыса пукизы, ӝож гуръёссэс кырӟазы. Та гуръёс но Федосьялэн сюлэмаз пыраклы кылизы.

Нылашлы удалтӥз: атаез, Михаил Петрович, фронтысь луло бертӥз, 3 медален пусъемын вал. Анайзэ но фронт мышкын ӟеч ужамез понна медален пусйизы. Война бере Федосьялэн атаез колхозын бригадир вал. Калыкен ужаны быгатэмез пыӵаз нылызлы но. Федосья колхозын звеноен кивалтӥз, ужын но, шулдыръяськонын но азьветлӥсь вал. Нош сюлмаз нуллӥз чагыр малпанзэ — куиськись луоно. Но война бере кыӵе куиськон луоз ай? Сютэм улӥсь странаез пыд йылаз ӝутоно. Соин ик тодон-валанзэ будэтон сярысь Федосьялы вунэтоно луиз. Мыло-кыдо нылашез Пичи Пурга ёросысь ик Бобья-Уча гуртысь клубе ужаны кутӥзы. Татын со агитбригадаен поталляз колхоз бусыосы но фермаосы, кыстӥськиз комсомол уже. Ӝоген Федосьяез партилэн Пичи Пурга ёросысь комитетаз машинисткае кутӥзы. Татын нылаш профсоюз уже но кыстӥськиз на.

«Тросэз егит пиос синъёссэс вошъятэк учкылӥзы чебер, ужез яратӥсь, кырӟаны быгатӥсь нылмурт шоры, — аслаз анаезлы сӥзем «Зарни мемие» книгаяз гожтэ Федосья Михайловналэн пичиез нылыз — Светлана. — Но солэн сюлэмыз аслэсьтыззэ бырйиз. Вуоно кузпалыныз, Валентин Кузьмич Тубыловен, соос одӥг вакытэ дышетскиллям Пычас школаысь бадӟым классъёсын. Валентин Кузьмич али но пальпотыса тодаз вае: нырысь пумиськыкузы ик, нылмуртлэн пуштрес суд йырси пунэтъёсыз пыд йылысьтыз погырто ни вылэм сое, соин ик пиосмурт ачиз аслыз шуэм: та мынам кышное луоз! Федосьялэн но синмаз йӧтэм капчи мылкыдо гармонист…»

Кык яратӥсь сюлэмъёс огазеяськыку, азьланез яркыт буёлъёсын гинэ адӟиськиз. Но котькуд семьялы та улонтӥ ог-огдэ гажаса, шуг-секытъёслы сётскытэк вамышъян понна трос чидан но валаны быгатон кулэ на. Тубыловъёслэн семьязы котьку калык син азьын вал. Угось Валентин Кузьмич Пичи Пурга ёросысь «Молния» колхозын бригадир, агроном, председательлэн воштӥсез вал, ӝоген сое партилэн райкомаз 2-тӥ секретаре бырйизы, нош собере, тубат бӧрсьы тубат, Валентин Кузьмич Удмурт Республикалэн Вылӥ Кенешезлэн нырысетӥ тӧроез луиз. Та биньгозыез политик кияз возиз тужгес секыт 1990-тӥ — 1995-тӥ аръёсы.

Зарни шеп

Калыклэн азьпалаз вамышъясь, ассэ быдэсак ужезлы сӥзись воргорон вӧзын кышномуртлы капчи ӧвӧл. Но Федосья Михайловна котьку висъяськылӥз эсэпсэ валаменыз, сабырлы луэменыз. 1970-тӥ аръёсысен со Пичи Пурга ёросысь «Маяк» газетын ужаз, семья котыраз бергаз, 3 нылзэс будэтӥз. Сюлэмаз гыбдась дартэз ӧз сёты солы картэзлэн ышыгаз гинэ улыны. 1979-тӥ арын, ас котыраз эшъёссэ люкаса, со пичигес фольклор коллектив кылдытӥз. Зэм, соку коллективзылэн нимыз но ӧй вал ай, сцена вылысен яратоно удмурт кырӟанъёссэс быдэстылӥзы. Но Федосья Михайловна ӵемгес тодаз вайылӥз пичи дыръяз пересьёслэсь кырӟамъёссэс, сцена вылын улӟытоно кариськиз удмурт сям-йылолъёсты.

Ёросысь одӥг бадӟым ужрад но «Зарни шептэк» уг ортчы вал. Куэм дэремъёсын, кускозязы уксё тӥрлыкъёсын удмурт нылкышноос, йыг-йыг воргоронъёс сцена вылэ пото ке, историысь суредъёс улӟо кадь. Кырӟам-верам сяна, коллектив сюлмаськиз вашкала удмурт культураез егитъёслы, будӥсь пиналъёслы пыӵатыны — «Зарни шепе» трос гинэ егитъёс ветлӥзы. Мынам али но тодам 1990-тӥ аръёсы Пичи Пурга ёрос библиотекаын «Пурга гуръёс» литобъединениын «зарни шепъёсын» пумиськон. Коллектив соку гинэ бертӥз Финляндиысь. Асдунзэс, чеберзэс тодӥсь но со дыре ик дан поттӥсьтэм удмурт нылкышноос пыраклы тодэ кылизы. Нош пушкын ас выжыостэ гажан выль сямен пуромиз.

Кунгож сьӧры вуылэм удмурт фольклор коллективъёс пӧлын «Зарни шеп» нырысетӥез вал, дыр. Та ласянь со мукет фольклор коллективъёслы но сюрес усьтӥз. Пусйыны кулэ, «Зарни шеплэн» репертуарезлэн бадӟым люкетэз — Федосья Тубыловалэн аслаз малпам кырӟанъёсыз. Пуштроссыя, мылкыдзыя соос озьы ик туж матын калык кырӟанъёслы.

35 ар ӵоже «Зарни шеп» туж трос дипломъёсын но данъян грамотаосын пусъемын вал. Нош ассэ Федосья Михайловнаез калык творчествоез азинтэмез понна дунъязы кунысьтымы бадӟым данъетэн — «Душа России» медален.

Берло аръёссэ Федосья Михайловна калык пӧлы шергес пота ни.

— Но со азьвыл сямен ик туж яратэ кырӟаны, — шуэ нылыз Светлана Валентиновна. — Тани али гинэ вераськон сямен кинлэсь ке сюанзэ тодамы вайимы. Анаймы юа: нош тодӥськоды-а, азьвыл сюан дыръя кыӵе кырӟанъёс кырӟало вал 1-тӥ, 2-тӥ нуналъёсы? Тани таӵеоссэ, шуэ но кырӟа…

Нялтас вераса, «зарни шепъёс» кылдытӥсьсэс уг вунэто, дораз вуыло, кенешо, ӝӧк котыре пуксьыса, кырӟало. Вӧзазы куддыръя итӥське Валентин Кузьмич но. Кузпалыз сярысь со туж шунытэн вера:

— Со сыӵе адями: азяз кыӵе ке ужпум пуктӥз ке, одно быдэстоз. Туж тыршиз удмуртлыкез вылӥе ӝутыны, со понна сюлэмзэ ӧз жаля. Котькудӥз ӧй быгатысал сыӵе коллектив люканы, калыклэсь мылкыдзэ ӝутыны, репетициосы поттаны. Дась коллективез но возьыны быгатэм кулэ ай. Куд-огез вераны выриз: вот, пе, коллектив ӝутскиз Тубылов юрттэмен. Шуисько: юрттӥ. Юало: маин? Ӧй люкеты… Одӥг учырез гинэ верало. Мон соку Удмурт Элькунысь Вылӥ Кенешлэн тӧроез вал ни. Ӝыт бер бертылӥ, 9 час котырын. Огпол бертӥсько, дорын нокин ӧвӧл, ӝӧк вылын записка: «Мон — клубын, пельнянь — холодильникын, ву — плита вылын. Пӧзьты но си…» Ма карод? Пӧзьтӥ но сии… Семьяын ог-огдэ валаны тыршытэк уг луы. Со но монэн трос чидаз, оломае но адӟоно луиз. Но ми валаськом вал ог-огмес…

Яратон берытске калыклы

85 аръем юбилейзэ Федосья Михайловна матысь ӵыжы-выжыосыныз пусйыны малпа. Но, валамон ини, дораз одно вуылозы эшъёсыз, одно чузъяськозы кырӟанъёс. Пӧлазы луозы аслаз кылбуръёсызъя гожтэмъёсыз но. Зэм, Федосья Михайловналэсь кырӟанъёссэ мукет фольклор коллективъёс но быдэсъяло ни. Куддыръя калык кырӟан шуыса. Озьы Федосья Михайловналэн ас калыксэ, шаерзэ яратэмез, сюлэмыз пыр потыса, выльысь калыклы берытске:

…Нош аръёс ортчизы,

мӧйыми тани мон,

Пужмерен шобырскиз

йырсие.

Сюлэмам нош ялан

выльдӥське яратон,

Яратон ас удмурт

шаерме…

Елена Миннигараева

Удмурт Дунне
By Удмурт Дунне Октябрь 10, 2019 15:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<