Ворттыло вольыт сюресэтӥ!

Удмурт Дунне
By Удмурт Дунне Октябрь 8, 2019 11:22

Сьӧлта ёросысь Выль Мӧнья гуртысь калык шумпотэмын — табере вольыт асфальт сюрес вылтӥ ветло-ворттыло. Гуртэ таӵе выльдӥськон вуиз инициативной бюджетированилы луыса.

Сьӧлта — Ува сюрес дорысен гуртазы вуттӥсь сюрес гопо-гопо вал ини, кемалась рос-прос тупатъямез ӧз адӟылы.

Туспуктэм Сьӧлта ёросысь Выль Мӧнья муниципал кылдытэтлэн «ВКонтакте» бамысьтыз.

— Арлы быдэ гопъёсты ӵошкытатылӥм ке но, пайдаез трос ӧй вал, — вера поселенилэн йырыз Виктор Лимонов. — Нош та сюрес — гуртэ капка, шуыны луоз, татӥ вань калык ветлэ, автобус нылпиосты школае нуэ-вае, лавкаосы вуз вутто. Калык мылкыдзэ вераз вал на, гуртэ конькиен нискыланы, хоккеен шудыны спортивной площадка кулэ шуыса, но тросэз дурбасьтӥзы сюресэз выльдонлы.

Бадӟым ужез выль мӧньяос берыктыны, оло, кематэк ӧй быгатысалзы на, ӧй луысал ке инициативной бюджетированиея проект. Озьы гуртоос быдэстоно ужъёслы кошкись коньдонлэсь оглюкетсэ асьсэос бичало, юрттӥсько на спонсоръёс, коньдонлэсь бадӟым люкетсэ висъя элькун. Бадӟым сюрес дорысен гурт шорозь 650 метрез асфальтэн шобыртон понна ог 1 миллион 900 сюрс манет кошкиз: 1 миллионзэ висъяз элькун, 400 сюрс сётӥз гурт хозяйство, 150 сюрссэ — ёрос бюджет.

— Выль Мӧньяын 152 хозяйство лыдъяське, котькуд семьяысь 1 сюрс манетэн бичамы. Гуртоосмы понна та пичи уксё ӧвӧл ке но, со асьсэлы ик ӟеч уж лэсьтыны кошке шуыса, ваньзы соглаш луизы, озьы калык 150 сюрс манет бичаз. Эшшо 198 сюрс манет тыр ачиз ик калык ужаз на: кин ке аслаз трактореныз щебень, сюй ворттӥз, мукетыз, кияз лопат, тӥр кутыса, сюрес дуръёсты ӵошкытатӥз, эрказ будэм писпуосты кораз, жуг-жагез аслаз техникаеныз ворттӥз. Та ужъёсты быдэстонэ 30 пала мыло-кыдоос пыриськизы.

Сюресэз лэсьтон та нуналъёсы йылпумъяськиз ни, калык шумпотэмын. Табере поселенилэн кивалтӥсез оске: гурт калык уксёеныз гинэ ӧвӧл, ас уженыз но лэсьтӥськонэ пыриськиз бере, ачиз но сюрессэс утьыса возёз.

Выль мӧньяослэсь адӟем каро мукет гуртоос но. Вуоно арын та поселениысь ик Гобгуртэ нуись сюресэз выльдыны малпанзы вань.

Ангелина Снигирёва

Удмурт Дунне
By Удмурт Дунне Октябрь 8, 2019 11:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<