Адӟем каро Брангурт песянайёслэсь

Ангелина Снигирева
By Ангелина Снигирева 28 октября, 2019 12:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

19-тӥ октябре Ижысь «Аксион» культурая дворецын ортчиз «Элькуновидение» конкурслэн 2-тӥ люкетэз. Туэ вожвылъяськонэ 15 ёрос пыриськиз. Конкурслэн финалэз ортчоз 2-тӥ ноябре 18 часын «Мынам Удмуртие» телеканаллэн меӵак эфираз.

Вожвылъяськонэ 15 ёрос пыриськиз
Фото: Григорий Степанов

Иже — мотикен но мотоблокен

«Элькуновидение» — удмурт эстрадаез узырмытыны, выль кизилиосты ӝуатыны чаклам вожвылъяськон. «Аксионын» конкурсэз усьтыса, тае пусйиз культурая министр Владимир Соловьёв. Конкурсын тодмо луэм кырӟанъёс радио пыр чузъясько, соосты сцена вылын самодеятельной коллективъёс быдэсъяло. Радио пыр кылзэм шулдыр кырӟан ӟеч мылкыд кузьма, улонэз праздниклы пӧрмытэ. Кырӟанлэн сыӵе бадӟым кужмыз вань бере — озьыен, та конкурс но кулэ. «Удмурт Кенеш» огазеяськонлэн тӧроез Татьяна Ишматова пусйиз: удмурт эстрадае пыраклы кыльыны быгатӥсь выль кырӟанъёсты возьмаськом.

Шаркан ёросысь «Инвожо» ансамбльлэн кивалтӥсез Ольга Широбокова верамъя, та вожвылъяськон возьматэ ёросъёслэсь коллективъёсын ужаны быгатэмзэс.

— Ёросамы «Элькуновидение» азьын арлы быдэ вожвылъяськон ортчыто. Кин вормисе потэ, со ик элькун конкурсэ пыриське, — шуэ Ольга Юрьевна. — Туж умой мылкыдын конкурсэ вуим. Ёрос ужрадъёсы ӵем пыриськиськом, республикае кемаласьгес поталляммы вал ини.

Пичи Пурга ёросысь «Акцент» триоысь Сергей Соснов кылбурчи но кырӟась вера: «Элькуновидениез» одно ик азьланяз но ортчытъяно. Но дунъян амалъёсты кызьы ке но воштоно, пе: кужмоосыз кырӟасьёс ӵемысь вормытэк кылё, озьы кырӟасьёслэн мылкыдзы куашка, пыриськисьёс ӧжытгес луо. Со дыре ик «Элькуновидение» — нырысь ик шоу. Вормон понна ум сюлмаськиське, шуэ С. Соснов, сцена вылын ӟеч мылкыд, дарт басьтэммы потэ.

Пичи Пурга ёросысь «Акцент» группа
Фото: Григорий Степанов

Туэ «Аксионэ» концертэз учкыны трос калык люкаськиз, учкисьёс кырӟась­ёслы зол чабизы, ас пал муртъёссэс сцена вылысь адӟыса, юр-яр каризы. Удмурт кырӟанъёсты туж яратӥськом, шуэ Ижын улӥсь Нина Лекомцева. Ачиз Можга ёросын вордскемын, соин, пе, можгаос понна висисько.

— Котькуд ар «Элькуновидение» вуылӥсько. Выль кыр­ӟанъёсты кыл­зӥсь­ко, выль артистъёсын тодматскисько. Удмурт кырӟанъёслэсь сюлэм оломар луэ ук! Радио пыр но кылзӥсько, концертъёсы ветлӥсько, дискъёсы но вань, — вера Н. Лекомцева.

Таяз арын учкисьёслэсь мылкыдзэс пурӟытӥз конкурс азьын ялэм флешмоб но. Концертэз нуисьёс Пётр Пушкин но Вероника Ваулина ӵектӥзы видео лэсьтыны, возьматыны, кызьы калык «Элькуновидение» мынэ. П. Пушкин но В. Ваулина, флешмобез кутскыса, Иже мотоблокен ширтэмзэс возьматӥзы. Бӧрысь котькуд ёрос тунсыко видео дасяз. Кылсярысь, Балезино ёросысь Юнда гуртысь песянайёс, мотик вылэ трос кузя пуксьыса, Иже мыныны ӵектӥзы.

Кызьы учкисьлы кельшоно?

Туэ выль нимъёс сокем трос но ӧй вал, шуыны луоз. Куд-ог кырӟасьёс та конкурсэ 2-тӥзэ пыриськизы — кылсярысь, Алнаш ёросысь Ирина Бурдина но Елена Никонова, Эгра ёросысь Елизавета Лекомцева, Глазов ёросысь Юрий Князев.

Ижысь Ленин ёрослэсь данзэ утиз Катерина Кенӟали
Фото: Григорий Степанов

Вожвылъяськонын кыр­ӟа­зы тодмо артистъёс но, кылсярысь, Ижысь Ленин ёрослэсь данзэ утиз Катерина Кенӟали. Та кыр­ӟась ас­пӧр­тэлыко кырӟан манереныз но, вылтусэныз но, куараеныз но висъяське. Конкурсын но солэн номерез аспӧртэм вал — пичи спектакль выллем. Концертын вӧзам пукисьёс шуизы: туж концептуально, пе. Яраз-а жюрилы таӵе «концептуализм»? Жаляса верано, кырӟанзэ вылӥ ӧз дунъялэ ёросъёсысь жюри но, залысь учкисьёс но.

Кырӟаменызы сяна, вожвылъяськисьёс мукет амалъёсын но учкисьлэсь сюлэмзэ вырӟытыны тыршизы. Кин ке тунсыко заставка дасям — кылсярысь, Глазов ёросысь Ю. Князев кырӟаку, экран вылын луолэсь анимациез адӟыны луэ вал. Эгра ёросысь Е. Лекомцева но вӧзаз эктӥсь нылашъёс чебер дӥсьёсын висъяськизы — ёросысьтызы тодмо дизайнер Надежда Касаткина конкурслы дасяськыны юрттэм. Шарканъёс шулдыр тыпыртонэн, арган куараен мылкыдэз ӝутӥзы.

Брангуртысь песянайёслэн «Евровидение» конкурсэ 2012-тӥ арын пыриськемзы удмурт культураын пытьы кельтӥз. Песянайёс бадӟым сцена вылын вашкала калык культураез поп-культураен суразы. Али, соослэсь адӟем карыса, та амалэз тросэз куто, «Элькуновидение» но сотэк ӧз ортчы.

Тани Можга ёросысь «Алача» ансамбльысь кыр­ӟасьёс, крезен но кубызэн шудыса, номерзэс кутскизы. Но бӧрысь, инструментъёссэс палэнтыса, огшоры кырӟан быдэстӥзы. Фольклорен вырись ансамбльлы та кырӟан чик тупасьтэм вал кадь. Балезино ёрос понна кырӟасьлэн Надежда Сидоровалэн но номерез та выллемгес ик амалъя радъямын вал. Сцена вылэ эктӥсьёсын ӵош потэмез бере малпай: али кыӵе ке тунсыко шоу луоз! Но бӧрысь мылкыд куашказ. Эктӥсьёсыз, кӧня ке улыса, сцена вылысь гылӟизы, Н. Сидорова огшоры эстрадной кырӟан быдэстӥз. Висказ бесерман крезь мытӥз — вот таиз усто, синмаськымон вал. Но оглом кырӟанэз фольклор люкетэн нокызьы герӟаськемын ӧй вал.

Ижысь Индустриальной ёрос понна кырӟаз Виталий Белков — медициная академиысь студент
Фото: Григорий Степанов

Кырӟало фермер но студент

Туэ конкурсэ уно егитъёс пыриськизы. Тросэз кыр­ӟанъёссэс асьсэос гожтӥллям. Кылсярысь, Ижысь Индустриальной ёрос понна кырӟаз Виталий Белков — медициная академиысь студент. «Мон тонэ малпай» кырӟанзэ, гитараен шудыса, быдэстӥз. Ваньмыз огшоры но лякыт вал, со дыре ик сюлме пырись. Ачиз Виталий Кизнер ёросысь потэмын. Татын ик вордскемын но будэмын Алина Егорова — со Ижысь Октябрь ёрослэсь данзэ утиз. Алина но медакадемиын дышетске — вуоно эмчиосмы усто кырӟало вылэм! Нылашлэн куараез кужмо, сцена вылын со зэмос артистка кадь адскиз. «Берытскы» кырӟанзэ кылзыку, юзыр-кезьыр ик луоно вал. Алина пичи дырысеныз кырӟа, пе, сценалы дышемын ини.

Сьӧлта ёросысь кырӟась Василий Иванов фермер луыса тырше
Фото: Григорий Степанов

Сьӧлта ёрос понна фермер Василий Иванов кырӟаз. Егит воргорон бадӟым сцена вылэ нырысьсэ потэм. Номерез дыг-могъёстэк ӧз ортчы, но учкисьёслы со яраз — ӵапак калыклы матын луэменыз-а, мар-а.

Концертлэн 2-тӥ люкетаз учкисьёсты шулдыртӥз Удмуртиысь симфонической кун оркестр. Чузъяськизы Пётр Чайковскийлэн произведениосысьтыз люкетъёс, Александр Зацепинлэн «Гайдай-сюитаез».

Кызьы дунъяно?

Вормисез (со 40 сюрс манет басьтоз) быръёзы, ёросъёсысь ыстэм жюрилэн баллъёсыз борды профессиональной жюрилэсь дунъямзэ ватсаса. Учкисьёслы тужгес кельшымон кырӟасьлы яке ансамбльлы сётозы 15 сюрс манет — сое быръёзы, «Аксионысь» учкисьёслэсь куараоссэс но 2-тӥ ноябре меӵак эфир дыръя лэзем смс-ёсты лыдъяса. Дунъямын луозы на устоез кылбур но крезьгур. Авторъёсты быдэн 5 сюрс манетэн пусъёзы.

Нимысьтыз приз дасяз Культурая министерство — 100 сюрс манет тыр сертификатэз сётозы ёросысь культурая юртэз азинтонлы. Сое быръёзы, вань куараосты — жюриослэсь но учкисьёслэсь — ватсаса.

Финалэ потэмъёс пӧлын тужгес трос балл люказ Балезино ёросысь Надежда Сидорова
Фото: Григорий Степанов

«Аксионын» кырӟасьёсты дунъяз ёросъёсысь ыстэм жюри, куараоссэс сётӥзы учкисьёс но. Ёрос жюри кырӟасьёсты дунъяз 2, 4, 6, 8, 10 но 12 баллъёсын. 12 баллэз сцена вылын ялӥзы. Учкисьёс тулкымъяськыса учкизы баллъёсын таблицалэсь вошъяськемзэ.

Ёрос жюрилэн дунъямезлы амалтэк юанъёс кылдо. Ижысь ёросъёс понна потам куд-ог жюриос вылӥ баллъёссэс вордскем ёросъёссылы сётъязы. Макем шонер луэ таӵе дунъян? Концертэз учкисьёс пӧлын тросэз гуртъёсысь вуэмъёс вал — валамон, соос ёросысьтызы кырӟасьёс понна куараоссэс сётӥзы.

Вуоно арын конкурс мукет сямен радъяськоз — отчы пыриськозы «Элькуновидениын» азьвыл аръёсы вормем кырӟасьёс но коллективъёс.

Анастасия Шумилова

Ангелина Снигирева
By Ангелина Снигирева 28 октября, 2019 12:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<