7 корка, 13 улӥсь

Ангелина Снигирева
By Ангелина Снигирева Сентябрь 4, 2019 09:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яр ёросысь Чуривыл (Нижняя Чура) гуртын 13 улӥсез. Укан черкогуртлэсь 4 иськеме, нош асфальт сюреслэсь 3 иськеме интыяськемын. Гурт сик пушкы ышемын кадь, котыраз куштӥськем бусыос. Пыдлось гуртын кыӵе ке улон вань шуыса, валаны луэ ӟеч лёгем сюресъя гинэ.

Шутӥськыны трос пу дасяно

Ичи ке но, уг мӧзмо

Одӥг документъёсъя учконо ке, та гуртэз 1899-тӥ арын Уканской гуртысь выжемъёс кылдытӥллям. Нош мукет веранъёсъя, гурт кылдэм 18-тӥ дауре. 1906-тӥ арын татын 100-лэсь ятыр корка, 2 сюрслэсь трос улӥсез вылэм ни. Гуртоос музъем но пудо вордон бордын ужаллям. Туала гурт сярысь верано ке, Ираида Веретенниковатэк сое син азе пуктыны уг луы. Фермер хозяйствоен кивалтӥсь, ас ужзэ быдэсъям сяна, гуртлэн ӵуказе нуналэзлы оскон пыӵатэ.

— Гуртмы пичи гинэ, арлыдъя пенсионеръёс но пенсие потыны дасяськисьёс уло, — веранзэ мытӥз гуртысь фермер. — Но одӥгмы но арлыдмы шоры ум учкиське, огкылысь ужаськомы, пудо вордӥськомы, сюро таза пудолэн лыдыз 30 пала люкаське. 2 скал возё Людмила Веретенникова, Валентина Потёмкина, Августа Назарова, Октябрина Потёмкина.

Гуртын 7 корка кылемын: 3-ез гуртэ пырон дорын сылэ, одӥгез — гурт шорын, мукетъёсыз — гурт пумын. Калык ичи ке но, уг мӧзмо, ваньмон дыръязы ог-огзы доры куное ветло, кулэ дыръяз — юрттӥсько но.

Сюдӥсьсы — пудо

И. Веретенникова

— Пудо вордӥськомы бере, туэ клевер кизимы. Пудо сиён дасяны нимысьтыз техника басьтӥмы, — шуэ Ираида Веретенникова. — Асьме пудоослы сиён дасям сяна, гуртоос сярысь но сюлмаськытэк уг луы. Турынзэс рулонэ бинялтыны юрттӥськомы. Сенаж дасян укыр дуно усе бере, туэ нырысьсэ гуэ 120 тонна силос согимы.

Ираида Ивановна вордскемын артысь Куатьчиньыгуртын (Шестопёровоын). Владимир кузпалыз Добрино гуртысь (таиз быремын ни), ӵош дышетскемын Укан школаын. Егит нылашлэн городэ кылемез потэ вал, ас вакытаз Ижысь радиозаводын но ужамын, нош Владимир Григорьевич, армиысь бертыса, кышнояськем но Чуривыл гуртэ юрт пуктэм.

— Со аре гуртамы трос егитъёс кылизы, 30 пала коркан улӥсез вал, магазин, клуб, медпункт ужаз, скал сяна, кунян, ыж, вал но тылобурдо вордӥзы, вань мылкыд карисьёслы фермаын ужаны инты ӧз шедьылы, нош колхоз участокъёсты турнаны ветлӥмы 2 машинаен, — тодаз вае Ираида Веретенникова. — Бусыын ужасьёсты отын ик сюдӥзы, одно ик така яке атас сӥлен шыд пӧзьтыса. Табере ваньмыз куашкамын, ферма но 10 арлэсь ятыр уг ужа ни.

Ас вакытаз Ираида Веретенникова но колхозын ужаз, скал кыскиз, кладовщицаын ужаз, собере магазинын вуз кариз, 2001-тӥ арын ужбергатон удысэ выжиз, аслэсьтыз магазинзэ усьтӥз. 2005-тӥ арын И. Веретенниковъёслэн нимаз хозяйствозы шаерысьтымы одӥгеныз устоеныз лыдъямын вал. Отӥяз ваньмыз воштӥськиз, гуртысь калык кошкыны ӧдъямен, кузпалъёс пудо вордон борды басьтӥськизы. 2006-тӥ арын, магазинзэс пытсаса, фермеръёслэн радазы султӥзы.

Гуртэ пырон сюрес

— Аслад музъемед вань ке, сое дунъяны кутсконо. 100 гектарлэсь ятыр муосты гыриськомы-кизиськомы: 22 гектар пала асьмелэн паймы, 86 гектарзэ арендае басьтӥмы, — веранзэ азьланьтэ кышномурт. — 16 гектар вылэ клевер кизимы, нош кылемаз тысё юос будо. Азьвыл картошка но мерттылӥмы, кырпарсьёсын ӧйлась, мерттэм емышмес бугыръяса сиылӥзы. Туэ кӧжыен сезьы кизимы вал, нош ик парсьёс сиизы. Музъеммы окме, егитгес луысалмы на ке, лудъёсмес но пудомес йылтысалмы на, дыр. Малпаськомы вал выль гид пуктыны, ужасьёс ӧм шедьтэ, нош асьме пиналъёсмы ёрос центре улыны интыяськемын. 3 пинал будэтӥм, табере 5 нунокъёсмы шумпотто ни.

Веретенниковъёслэн гуртсы

Гуртысь тужгес арлыдоез улӥсь — Ираида Назарова, туэ декабре 85 арессэ пусъёз, нош егитэз — 9 аресъем Аня Веретенникова. Огназ школаын дышетскись луэ, шулдыр нуналъёсы сое школа автобусэн нулло. Нӧд куазь дыръя Людмила анаез асфальт сюрес дорозь келя но пумита.

Гуртсы пичи ке но, Веретенниковъёссы лачак. Калыкын Чуривылэз Веретенниковъёслэн гуртсы гинэ шуо. Сестраен-братъёс Людмила но Дмитрий Веретенниковъёс пудо вордон удысын тыршо. Огвакытэ соос но фермер кариськылӥллям, зӧк налогъёс пачкатыны кутскемен, ужаны быгатӥллямтэ ни. Та дыре 2 скал, 8 кунян, парсьёс, кроликъёс но тылобурдоос вордо, техниказы асьсэлэн. Пудо сиён дасян вакытэ гуртооссы юрттӥсько.

— Тулыс-сӥзьыл гинэ мылкыдмы ӧжытак куашка: сюресъёсмы кисальӟо, бадӟым ГАЗ но «Нива» машинаосмы но нӧдэ выё, — шуэ Дмитрий Анатольевич. — Гурт шорын ик выжмы вань, ортчыны мед луоз шуыса, ас кужыменымы тупатъямы. Югыт сярысь веранэз ик ӧвӧл, лампочкаос уг пишто. Соин но, дыр, гуртамы кионъёс я гондыръёс ӵемысь вуыло. Ву ласянь но шуг-секытъёсмы кылдэмын. 1 колонка векаса ужа. Ӝожтӥськыса улыны дышемын ӧвӧл, ӵукнаысен ӝытозь юртъер котырын ужаськомы. Кытчы ке кыдёке куное дасяськиськомы ке, гидысьтымы пудомы юрттэ. Алигес тани Калининградэ сюанэ ветлӥмы. Сюрес вылэ потэммылэсь азьло 3 ошпимес вузамы.

В. Потёмкина

Валентина Потёмкина бакча котыраз берга, азьвыл скал кыскись вылэм, пенсие потыса но, тэк улонэз уг тоды. 2 скал, чипы-курегъёс вордэ.

Гуртоослэн верамзыя, пыдлось пичи гуртэ ветлӥсь-ёс туж ичи. Улӥсьёслэсь ӵыжы-выжыоссэс вератэк, нуналлы быдэ татчы вуылэ молоковоз, арняяз 2 пол — почтальон Леонид Поздеев. Вазенгес, пе, гуртоослэсь улэм-вылэмзэс эскерыны ӵемысь вуылэм ёрослэн йырыз Виктор Наймушин, туала кивалтӥсьёс соос сярысь уг но тодо, дыр. Нош Чуривыл улэ, ёрослэн историяз нуналысь нуналэ выль пытьы кельтэ.

Любовь Куртеева

Туспуктэмъёсыз Юрий Шаляпинлэн

Ангелина Снигирева
By Ангелина Снигирева Сентябрь 4, 2019 09:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<