3 сюрс манетэн люказы — урамзэс волятӥзы

Ангелина Снигирева
By Ангелина Снигирева Сентябрь 13, 2019 14:28

Можга ёросысь Пазял гуртын улӥсьёс 2 урамзэс тупатӥзы. Юрттӥськиз на «Родина» хозяйство но ёрос. Табере шумпотонзылэн пумыз ӧвӧл.

Пазялъёс 2 сюрессэс ас кужыменызы тупатӥзы
Туспуктэм: Гурт удысъя но сиён-юонъя министерстволэн пресс-службаез

— Нылпиосмы кыӵе вожъ­ясь­кылӥзы мукет урамъёсын улӥсьёслы, соослэн гужем велосипедэн ворттылэмзы луэ шуыса. Милям егит анайёсмы коляскаен ульчае потыны ӧз быгатылэ. Нош йӧлэз карнанэн мукет ульча пуме нуытозь, колоша но сапег кӧня пол, дэрие выйыса, кыльылӥзы. Малы тазьы курадӟод шуыса, гурт поселениын ужпум ӝутӥмы, — огымысь кадь верало гуртоос.

Фалалеев урамын — 34, Молодёжнойын — 15 корка. Соиз но, таиз но арысь аре паськытало. Пуктӥськисьёс угось гуртын трос.

— 2017-тӥ арын Гагарин нимо ульчаысь 400 метръем сюресэз гуртоосын дэмен лэсьтӥмы. Соку гурт поселенилэн бюджетысьтыз грейдерлы уксё висъямы, калык щебень басьтӥз, нош «Родина» техникаен юрттӥз, — шуэ Пазял гурт поселениен кивалтӥсь Надежда Кокарева. — Ваньзэ асьме кужымен но лэсьтыны луэ шуыса, пазял калык адӟиз. Соин ик Фалалеев но Молодёжной ульчаосын улӥсьёс но ӵектонэн потӥзы: ми уксё бичаны дась, ойдолэ милесьтым но урамъёсмес лэсьтомы. Зэм, кӧня ке пол быдэс гуртэн кенеше люкаськылӥмы. Ӟеч уж ӝог уг лэсьтӥськы угось. Куд-огезлэн осконъёсыз но, оло, ӧй вал, сюрес туэ ик лэсьтӥськоз шуыса. Начаргес улӥсез но вань. Кӧняен уксё бичанъя но юанъёссы кылдылӥзы. Но ӵапак сокугес ик ёросамы кутӥзы «Милям гуртъёсмы» программа. Соя ёросысь 7 сюресъёсты лэсьтозы шуыса веразы, калык сметалэсь 15 процентсэ тырыны быгатӥз ке. Лыдъямы-чотамы но, 3 сюрс манетэн потэ. Та вормымон, шуизы 2-аз ик ульчаын улӥсьёс.

Гуртоос асьсэос ик уксё бичазы. Котькуд коркась быдэн 3 сюрс манетэн люказы. Отӥяз ёрос администрацие вазиськизы. Район бюджетысь 1 миллион манет висъяз. Эшшо 1 миллион 400 сюрс манет сётӥз «Родина» хозяйство.

— Калыклэсь мылкыдзэ санэ басьтытэк уг луы, — шуэ «Родинаен» кивалтӥсь Пётр Санников. — Соос хозяйствоын ужало ук. Озьыен, предприятие сюлмаськыны кулэ улон-вылонзэс умоятон сярысь. Соин но нылпиослы шудон площадка, адямиослы люкаськон инты лэсьтыны, гуртысь объектъёсты тупатъяны котьку юрттыны тыршиськомы.

Озьы оглом 1 сюрс 700 иськем сюрес вылэ дэмен щебень вӧлдыны быгатӥзы. Зэм, зоръёсын йырин ужъёс кема кыстӥськизы. Ульчаосы тракторлэн пыремез кематэк ӧз луы угось. Вуж сюресэ сюй ворттон, сое лёгон ик секытэн ортчиз. Соин ик сюрес усьтонэз гуртоос пӧсь табанез кадь витизы. Быдэс ульчаосын люкаськизы. Нылпиос велосипедъёсын потӥзы. Ӝӧк пуктӥзы, шулдыръяськон ортчытӥзы.

— Вольытатэмзы бере сюресъёсмы ик вакчиесьгес кылизы кадь — капчиен вамышъяны луэ, — шуэ Надежда Кокарева.

Зэм, выль тупатэм урамъёс вискытӥ кошкись сюрес гуртоослэсь сюлэмзэс шугъяськытэ на. Со угось гуртэз герӟась, школае нуись луэ. Со туннэ лэсьтымтэ. Но «Родинаен» кивалтӥсь Пётр Санников оскытӥз, сое но лэсьтон борды басьтӥськозы шуыса. Хозяйство улосъёсты азинтонъя кун программае пыриськыны малпа. Мукет сюресъёссы но лэсьтоно угось. Со сяна, предприятие шурзы вамен выжъёсты туэ ик тупатыны медэ. Выжъёс угось куашкан калэ вуэмын.

— Тӥ возьматӥды, кызьы валче ужаны кулэ ёрос, бизнес но калык. Тӥлесьтыд адӟем кароно мукетъёсызлы но. Гурт калык, таӵе проектъёсы пыриськыса, ачиз тупатэ гуртысь улон-вылонэз. Со туж шумпотымон, — сюрес усьтонысен вераз гурт удысъя но сиён-юонъя министр Ольга Абрамова.

Пазял калык таин гинэ буйганы уг малпа. Суворов нимо ульчаысьтызы сюресэз выльдыны уксё бичало ни. Таиз тужгес кузь луэ — 1,5 иськем. Татын 54 корка. Озьы гуртоос асьсэ кужымен гуртсылэсь туссэ вошто, муртлэсь возьмаса уг уло.

Елена Сараматова

Ангелина Снигирева
By Ангелина Снигирева Сентябрь 13, 2019 14:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<