«Шундыкар» лагерьысь «Литература» отрядысь нылпиослэн чуръёссы

Ангелина Снигирева
By Ангелина Снигирева Сентябрь 17, 2019 12:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Ульна Архиповалэн суредэз
 Лена Аксареева.
Алнаш ёрос, Ӟатча гурт



***
Зор ултӥ лулы поръя,
Зор улын лулы эктэ,
Шумпотыса серекъя,
Вуюись пала дыртэ.


Тылъёс пишто синъёсаз,
Малпанэз но сураськиз,
Эрико ассэ кожаз,
Возьдаськонзэ но ватӥз.


Со эктэ бусы шорын,
Зор шапыкъёсты бича,
Нош соос пӧрмо шурлы
Но васько мугор кузя.


Суч котмем тӧдьы дэрем,
Биняськем зарни йырси.
Вакытаз шудо луэм -
Пушказ ӝуа тылгизьы...

Кемалы меда озьы?


***
Кырым тыр вишня бичай.
Шӧдтэк шорысь - паньгатӥ.
Бамам пазьгиськиз ук - ай!
Горд сюрес
ваське китӥм.

***
Куке жадёд малпаськыса,
Тон ву дорам. Мон чай пукто.
Ческыт шӧмен пыштурынэн
Йырдэ ӧжыт мон кудӟыто.

Уйин тон ву. Мон возьмало
Ненег изись сяська вӧзын.
Бубылиен ӵош кырӟало
Шыпыт гурез сюлэм пушкын.

Настя Иванова.
Можга ёрос, Ӵӧжйыл гурт

***
«Гуж-гуж-гуж», -
Шуо эшъёсы,
Мушъёсы.

Атае вера:
«Калтыртыны туннэ яра».
Ура!

Анае пыжиське, колбаса
Ыльнянь пушкы вурыса.
Мыня пучы выллем,
Шунытэз йӧтске ымныре.

«Юпитер-вить»
Но Исьтапан.
Мыным со вын,
«Юпитерлы» - братан.

Йырам -
Сузэре сярысь малпан:
Машимы - мандарин,
Чечы кадь.

Нош али
Эн шуэ: акыльтӥ.
Муръёысь ӵын потэ,
Скалъёс шумпотэмын…

Быдэс сюлэм котомкае
Таин тырмытэмын.
Мон дорын.
Дорын.
Ӵӧжйылын.

***
Ыши.
Бадӟым дунне,
Нош мон - пичи.
Ӵошен ортчем сюресмы
Синлысъёсы выллем
Вал вакчи.
Сьӧд тушен буяй соосты.
Кыӵе чебер!
Пӧрмиз-а кузь сюрес?
Ӧз. Сылэ сьӧд нюлэс.
Бышка мугорез
Пужым лыс.
Вӧзтӥм гожеръя -
Уг кышка нимыдлэсь -
Гондыр. Монэ сие кӧттыр.
Лулы кыле буш.
Синлысъёсы вылын гинэ -
Сьӧд тушь.

***
Кӧшкемыт.
Буёлъёс ке но котырам югыт.
Дунне сылэ ӝож изьверъёс вылын.
Кыйёс биниськемын -
Яратыса виёзы ог-огзэс.
Пилемъёс усьто синъёссэс,
Учко тылысь вордскись адямиос шоры.
Мон сылӥсько дунне шорын.
Буёлъёс ке но котырам югыт -
Кӧшкемыт.

Юля Архипова.
Алнаш ёрос, Сьӧд Ошмес гурт

***
Мон тодӥсько, кызьы шонер, нош лэсьтӥсько янгыш.
Быръем сюресэлэсь палэнтӥськи ке но, уг ыш.
Ышоз малпан, быроз кужым, кылёз эктон-кырӟан.
Нош кырӟаме уг лу вылэм, чидан мыным, чидан!
Ортчоз нунал, арня, толэзь но кошкозы аръёс -
Дышо куке но чирдыны, маке одно пӧрмоз!
Эше кутоз арган, нош мон экто но кырӟало,
Но кырӟанэ луоз юнме - монэ уз вала со.
Мылкыд пашмоз - со валамон - синмысь тылси кысоз.
Улон понна луо турын, кияз кутоз кусо.
Нош мон берпум кужымъёсме потто сандыкысьтым,
Ноку уг сётскы кусолы, луо туж юн турын.

***
Эше шуиз: котькуд адями - пӧйшур.
Нош мон тодӥсько: мон - чорыг,
Мынам улонэ - паськыт, мур, шуныт шур.
Кулэ ӧвӧл ӝог улон, мон - дыг.
Каллен гуръя мед бызёз шурмы,
Лэсьто янгышъёс, кызьы кариз Адам.
Синмасько.
Уг яра шат мыным? Ярам,
Мон аслэсьтымзэ карисько.
Утиськыны урод муртлэсь
Вутурын кизи котырам.
Тодмотэм ке тон - вӧзам ӝог уг лэзь.
Нош лэзи ке, тон дася чидан.
Тон дась-а сюрыны дуннеям?

Карина Сергеева.
Татарстан, Варклед-Бӧдья гурт


***
Ӟукыртӥсь лэчыран,
Юрт вылын - кучыран.
Лушкам улмоос,
Уйиськись агайёс.
Кылбуръёс верась
Васьян Коли,
Котьмае каргась
Микош Оли.
Паймымон калык татын,
Аспӧртэм улон татын -
Варклед-Бӧдья гуртын.

***
Уг чирдо ни
ӟольгыриос,
Сяська но ворсаськиз,
Ватӥськизы
бубылиос,
Кызьпу но чалмытскиз.

Шунды нюлэс сьӧры ватске,
Инмез лемлет буя,
Вылын тустэм толэзь
уя.
Пеймытаны кутске.

Настя Городилова.
Пичи Пурга ёрос, Баграш-Бигра гурт


Уй.
Инмын кизилиос.
Капчи тӧл йӧтскыса кошке.
Чылкыт омыр пушкам пыре.
Векчи майка уг уть салкым куазьлэсь.
Пуныос чалмизы.
Толэзь пельпумъёсме ӟыгыртэ.
Уйлэн эркыт зыныз вӧлъяське.
Лобась кибыос поръяны потӥзы.
Кот турын пыдъёсме бичатэ…

Котькуд нунал, котькыӵе куазь
Пырыен-пырыен люкало
Пазьгиськем сюлэмме.
Чалеп борды - чалеп.
Нош тон сярысь малпанъёсы
Выльысь пыргыто сое.

Юля Кабанова.
Пичи Пурга ёрос, Кӧтшур гурт

***
Гудырикошкон.
Ӝоген сӥзьыл.
Вуэ люкиськон дыр.
Ульчаын - сайкыт инбам.
Уен-нуналэн - тон йырам.
Висьыны усисько…
Зарезе выйисько…
Оскылӥ мон тыныд,
Малпалляй: пумиськом.
Но вуэ ни сӥзьыл,
Со дася ни мӧзмон.
Нош мынам мӧзмонэ,
Тынэсьтыд мӧзмытэк но,
Тырме.

***
Мыно нуналъёс,
Ортчизы ни аръёс,
Нош мон весь тодам возисько:
Тонэ вайизы -
Киям сётӥзы.
Али кадь тонэ адӟисько:
Кыӵе тон пичи,
Кыӵе тон капчи.
Табере нош шорад учкисько:
Бадӟым ни будӥд,
Шудондэ вунэтӥд.
Мон тонэн школае мынӥсько:
Тыбырад портфелед,
Нош кияд - сяськаед.
Мон туннэ но тонэ данъясько,
Тон - пичи сузэре,
Туж мусо сузэре,
Мон тонэ сюлмысьтым яратӥсько!

Анастасия Чайникова.
Можга ёрос, Куатчи гурт

***
Уйшор палан котьку югыт,
Пишто тылъёс ульчаосын.
Уйшор чирдэ куараосын,
Отын уз лу ноку пеймыт.

Нош ми палан - кышкыт сюрес
Горд тылъёсын югдытэмын.
Тодад тон вай шуныт дырез,
Кудӥз луиз пӧсьтолэзьын.

Юрттэт тыныд ӧй сёт соку,
Ог-огмылы луим шокан.
Эн кушты тон монэ ноку,
Тонтэк уг лу мынам шокам.

***
Песянаез ӟыгыртыса,
«Горд Москваез» мон шӧдӥсько.
Чурыт бамзэ нош чупаса,
Мон лудӟазег кадь луисько.

Пересь коркан котьку шуныт.
Мӧзмыт ке но, ческыт шӧмыз.
Горд флаконлэн зыныз пеймыт -
Тодэ лыктэ шуныт тулыс.

***
Кылбур гожъян секыт сётске,
Уг йылпумъя кык час куспын.
Депрессия куддыр кутске,
Куддыр изем уг лу уйин.

Кылбур гожъян сётскоз капчи,
Куке зэмос вань учыред,
Куке пушкад оскон пичи
Яке бадӟым кайгу улэ.

Ӧвӧл ке мылкыдыд гожъяськыны,
Тон пот уйин кизилиос улэ.
Омыр юрттоз визьдэ бушатыны,
Инсьӧр сётоз, мар кылбурлы кулэ.

Кристина Чернова.
Алнаш ёрос, Вуж Утчан гурт

Ӧй тод вылэм,
Пичи вылэм,
Чигем сюлэм али бӧрдэ.
Визь-нод ӧй кур.
Шат мон вуж кут?
Ыргалтэмын - нокин ӧз кут.
Кулэ ӧвӧл ини, пе, мон -
Кыӵе секыт вылэм улон.

***
Мон уйвӧтъёс шер адӟисько,
Но соос котьку - яркыт буёло,
Сьӧразы монэ кемалы лушкало,
Мон уйвӧтын котьку - луло.

Татын ваньмыз шулдыръяськон выллем,
Ӟечкыласько асме мон Выль арен!
Потӥз ке, концерт татын ортчыто,
«Е-е, рок!» - зол куараен кесько.

Мон сюрисько кадь мультфильме,
Татын угось котьку шулдыр.
Та дуннее - аслым гинэ,
Калык татчы лушкем уз пыр.


Мон мужик, пе

Одӥг пол атае шуэ:
- Ой, Кристина, бон мар та, мар та?
Паймыса юай:
- Бон мар луиз?
- Бон тон мужик ни, ныл ӧвӧл!
Та кылъёслэсь серем потӥз:
- Малы озьы малпаськод?
- Дак вань дӥськутме аслыд карид ни.
- А-а-а, валамон...
- Тонэн ни нош…
Ангелина Снигирева
By Ангелина Снигирева Сентябрь 17, 2019 12:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<