Шулдыр луэ гужем

Ангелина Снигирева
By Ангелина Снигирева 16 сентября, 2019 16:33

Глазов ёросысь Понино муниципал кылдытэт — одӥгез бадӟымез. Отчы 19 гурт пыре, пӧлысьтызы 16-яз 100-лэсь ичи улӥсь­ёсыз. Таяз учыре вуылӥмы Ляпагуртэ.

Гурт вырйылысен

Чупинъёс

Куке-соку Ляпагурт но бадӟым вылэм, тросэз улӥсьёс Чупин фамилия нуллӥллям. Гуртлэсь нимзэ но вераса улӥллямтэ, «Чупинъёс доры» шуылӥллям но, ваньмыз валамон вылэм.

— Деревняын али но вичак Чупинъёс, мынам гинэ фамилие Корепанова, — веранзэ мытӥз Ольга Алексеевна. — Кузёе тапала Дэбесысь педучилищеез йылпумъямез бере лыктэмын, сое Коршунгуртысь вспомогательной школае направлениея ыстӥллям — озьы ик тодматскимы. Нош ныл дыръям мынам но фамилие Чупина вал.

Ольга Алексеевна вордскем гуртэзлэсь кыдёке кошкылэмын ӧвӧл. Глазовысь пединститутын дышетскыса, нырысь артысь Коршунгуртын ужаз, собере Пониноысь нылпи юртын, школаын.

Ульчаын вераськеммес кылыса, артысь коркан улӥсь кышномурт — Наталья Чупина — дорамы вуиз.

Н. Чупина «Удмурт дуннеен» тодматске

— Ольга Алексеевнаен пичи дырысенымы артэ улӥськомы, мон 3 ареслы зӧкгес, но улонын ми вичак ӵош, — шуэ Наталья Михайловна. — Глазовын пӧрасьлы дышетски, специальностея уж инты шедьымтэен, школаын но интернатын ужай. Табере пенсиын, Пониноын улӥсько ке но, вордскем гуртам ялан бертылӥсько. Вазь тулысысен бер сӥзьылозь бакчаын бергасько, сылалтӥськемъёс дасясько. Сюрес умой дыръя яке кынтэм бере нылпиосы банкаосме Пониное васькытыны юртто ни. Гуртлэсь мӧзмоно, котькыӵе пичи мед луоз но.

Нылкышноос уг ӝожтӥсь­ко: тылзы вань, пу вортто, ву колодчаысь басьто, тэль артэ — губиез но, узы-борыез но тырмыт. Озьы ке но бадӟым но ас вакытаз шулдыр гуртсылэсь мӧзмон сюлэмзэс лушкем чепылля ик.

80 корка, 5 ульча вал…

Гуртсы куке-соку ӵапак та быдӟа вал. Пырон дорын ик колхоз гидъёс сылӥзы — скал, вал, ыж вордӥзы, бадӟым сушилкаоссы гуретӥзы. Нош табере?

Понино муниципал кылдытэтысь специалист Наталья Боталова верамъя, туннэ нуналлы Ляпагуртын прописать каремын 7 мурт. Но гужемлы татчы вуо сад-бакча возисьёс но муш вордӥсьёс — ваньмыз сямен юртъёс калыкен тырмо. 5 ульча пӧлысь туннэ нуналлы 3-яз улӥсез вань.

— Мама-папамы мачкемъя, зӧк ульчамы чашша дорозь кыстӥськем, — шуэ Наталья Чупина. — Табере коркаос но совхоз гидъёс интыын сад будэ, гурт котырез чашша басьтэмын. Егит дыр улонмы сярысь ке верано, магазинмы ноку ӧй вал, Коршунгуртысь я Пониноысь басьяськылӥзы. Пиналъёс котькуд коркан 4-5 кузя будӥзы. Егит дырмы туж шулдыр ортчиз. Великтэм дыръя гармошкаен шудӥзы, зӧк кызьпуэ ӟечыран юнматэмын вал. Клубмы ужаз, концертъёс дасяллямы. Нош зӧкгес будыса, Коршунгуртэ шулдыръяськыны ветлӥмы, клубзы йӧнгес вал.

— Толалтэлы калык вичак кошке, 7-8 мурт гинэ кылиськом, — шуэ Ольга Алексеевналэн кузёез Александр Егорович. — Пониноын коркамы вань ке но, мыным татын ик шулдыргес потэ. Вазь ик султӥськод но чылкыт инкуазь омырен шокаськод, юрт котырысь лымы сузяськод. Пелляськись нуналъёс дыръя снегоходэн ужаны ветлӥсько.

Мылкыдэз бурдъяло сяськаос

Пониноысен Ляпагуртозь ог 2 иськем. Нырысь ик ӝу­жыт гурезе тубоно, собере васьконо. Куазь зориз ке, огшоры машинаен уд ортчы. Ӧвӧлтэм сюрессэс сик ворттӥсь машинаос урод каро на. Но гуртоос вунэтэмын воксё ӧвӧл, угось та гурт пыр Коршунгуртэ сюрес нуэ на. Муниципал кылдытэтэн кивалтӥсь Нина Дзюина гуртоос сярысь сюлмаське. Кемалась ик ӧвӧл нӧд сюресъёсты грейдерен ӵошкытатӥзы, нош август толэзь пумын куашкан калэ вуэм выжзэс тупатъязы. Толалтэзэ но вольыт сюрес возьыны тыршо. Сыӵе сюлмаськисьёс вань дыръя гурт улоз на. Солы юн оско Ольга Корепанова но Наталья Чупина. Нылкышноос егит дырзы сярысь мадемзы бере туннэ нуналзы сярысь но веразы.

О. Корепанова бакча котыраз берганы яратэ

— Тани та коркамес музейной экспонатэ выжтыны луоз ни, сое прадедъёсмы ог 200 ар талэсь азьло пуктӥллям, — шуэ Ольга Алексеевна. — Песятайёсмы верамъя, юртэз пуктӥллям сыръясь интыысь поттам писпуослэсь. Бугро туннэ но юн сылэ, быгатэммыя утялтыса, эскерыса возиськомы, кулэ интызэ кышъяськомы. Одӥг аре сисьмыны кутскем коръёс борды дуринчиос каръяськизы вал. Чылкыт сузямы но гудронэн зырамы.

— Пыдлось гуртын улӥсько­мы ке но, юртъер котырмес шулдыр кареммы потэ, — шуэ Наталья Михайловна. — Куд-ог дыръя куное ветлӥсьёс но луо. Бакчаын ужаса жадиськомы ке, ог-огмы доры куное ветлӥськомы, ваньмон дыръя телевизор учкиськомы я радио кылзӥськомы, лыдӟиськыны яратӥськомы, сылалтӥськон амалъёсынымы вош­тӥсь­кись­ко­мы, керт­тӥськем арбериосмес возьма­тӥськомы. Мӧзмыны дырмы уг кыльы.

200 аресъем корка

Корепановъёслэн юртсы вашкала ке но, йӧн адске. Шӧдӥське, юрт кузёлэн Александр Егоровичлэн киыз котьмалы мынэ шуыса. Технологилы дышетӥсь юрт котыраз но котьма карыны вуэ. Мушъёс вордэ, кемалась ик ӧвӧл колодчазэ выльдэм. Табере отысь вузэ ведраен но поттыны луэ, насосэн но. Быдэс азбарзы турлы сяськаосын пушъе. Соос, пе, шумпотон кузьмало. Таиз понна кыл кутэ Ольга Алексеевна. Будосъёссы улын ас киын лэсьтэм юсьёс но парсьпиос интыямын. Гидазы чипы-курегъёс но аспӧртэм сьӧд парсьёс будэто. Вьетнам выжыысь парсьпиос, пе, сиёнлы уг тэргасько.

— Азьвыл аръёсы гуртлэсь нуналзэ ортчытъямы, отчы трос калык люкаськылӥз, — веранзэс азинто кышноос. — Сое радъясьмы Елизавета Чупина улонысь кошкиз но, сяме пыӵам ӟеч ужрадмы но чигиз. Кин тодэ, оло, вуоно арын выльысь люкаськыны кылдоз. Ми вань дыръя гурт улоз ай.

Валентина Емельянова

Туспуктэмъёсыз авторлэн

Ангелина Снигирева
By Ангелина Снигирева 16 сентября, 2019 16:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<