Хозяйствозэс дэмен утизы

Ангелина Снигирева
By Ангелина Снигирева 27 сентября, 2019 15:08

Кез ёросысь 14 хозяйство пӧлысь «Степанёнки» предприятие огез бадӟымез лыдъяське. Банкротысь сое поттыны быгатӥз Фёдор Першин.

«Степанёнкиые» 846 кысконо сказыл, эшшо ферма ӝуто на
Фото: Е. Сараматова

2000-тӥ аръёсы хозяйство пыд йылаз уз ни ӝутӥськы шуыса малпасьёс лачак вал. Пудоез сюдыны сиён гинэ но ӧй вал. Калык соку оскемзэ вераз гуртысьтызы йӧно воргоронлы Фёдор Першинлы: тон быгатод, кут хозяйствоез. Озьы Фёдор Дмитриевич калыкез люказ но юаз: гуждор потытозь, кин кунян ваёно скалъёсты ас дораз басьтыны дась? Сюдытэк скалъёсты но, кунянъёсты но ыштыны кема ӧвӧл угось. Калык валаз, ваньзы сямен гидазы эшшо быдэн сюро пыртыны дась луэмзэс веразы. Вордскем кунян но сётыны сӥзизы угось. Зэм, Фёдор Дмитриевич ваньзылы пудоез ӧз оскы — лапасазы сиён вань-а, ӧвӧл-а шуыса чаклаз. Пудоез начар сюдыны со ачиз но гидын быгатысал.

— Калык ачиз но хозяйствоез утён сярысь ӧй сюлмаськысалыз ке, выльысь пыд йылэ султыны туж секыт луысал. Кин тодэ, оло, троссэ пудоез вандоно луысалмы. Нош соку ваньмыз утиськиз. Кунянъёсты калыклы люкылоно луимы ке но, скалъёсты ӧм ыштэ, — шуэ Фёдор Дмитриевич.

Мукет нокытын ужан инты ӧвӧл шуыса но, калык хозяйствоез дэмен утёно кариськиз. Тросэз егит семьяос, кема малпаськытэк, соку кин кытчы пазьгиськизы. Степанёнки гуртэ юн выжы лэземъёсыз но выльдӥськонлы оскисьёсыз гинэ кылизы.

Хозяйствоын али 846 кысконо скалзы. Алигес вуж фермаоссэс огазеязы но быдэсак выльдӥзы. Табере отын пудо уг кынмы ни. Котыраз эшшо ог 250 йырлы скал ферма ӝуто. Бордаз 200 йырлы кунян возён гид лэсьто на. Муртлы уксё тыроно медам луы шуыса, Фёдор Першин пуктӥськонэ гуртоосты кутэ. Калыклы уждун тыри ке, ужлы уз ёрме, шуэ. Коньдон шыръян вылысь фермаосты асьсэ материалэн лэсьтыны выро. Озьы фермазы, ог 40 миллион интые, 10 миллион манет тыр усе.

Выль ферма ӝутӥське
Фото:. Е. Сараматова

Хозяйствоын ужасез туннэ 145 кузя. Шоро-куспо уждун ог 18 сюрс манет. Та лыдпус ёросын огез бадӟымез луэ. Пӧлазы пуктӥськисез но вань: егитъёс Гурт удысъя но сиён-юонъя министерстволэсь юрт лэсьтыны субсидия басьто. Зэм, огезлэсь чебер мукетыз кирпичлэсь йӧн-йӧн коркаос ӝутэмзы бере специалистъёс хозяйствоысь кошко — вахта амалэн ужаны кин кытчы кутске, озьы капчигес, пе. Соин ик туннэ татын зоотехниклы но, механиклы но, экономистлы но ёрмо — лыктӥсь ӧвӧл. Хозяйство ужасьёсызлы ачиз но коркаос пуктэ. Но палэнысь специалистъёслы та номыр кадь но ӧвӧл. Степанёнки — Кез ёросысь тужгес пыдло интыяськем гурт. Со туннэ районын огез бадӟымез луэ. Татысь школаын дышетскисез 110 пинал. Ваньмыз улӥсьёсыз 360 вылын. Но зор-кот дыръя гуртэ машинаен уд пыры — нӧд. Соин ик татчы рейсовой автобус но уг лэзьяло. Частник куддыр «Газелен» ворттылэ ик. Но со но дэрие выйылэ. Бадӟымесь машинаосын сяна уд ортчы бере, хозяйство магазинэ ачиз нянь, кеньыр вуттыны тырше — калык сиён-юонлы ёрмыса медам улы шуыса сюлмаське.

Со быдӟа гуртын газ но ӧвӧл — котыр артысь гуртъёсысь коркаосы шуныт пыртэмын ке но, Степанёнки палэнэ кылемын. Ялан пуэн эстӥсько.

— Азьвыл пу дасяны хозяйстволы но, гуртоослы но каньылгес вал. Нюлэс пӧлын улӥськомы бере, пилорама но усьтӥмы. Но табере сое ужатыны рос-прос уг луы — артысь сикъёсты заповедник каризы, писпуосты кораны алэмын, — шуэ Фёдор Дмитриевич.

Степанёнкиысь ульча
Фото: Е. Сараматова

Таин валче палэнысь 1 машина пу басьтон, гуртозь вуттон понна ичизэ 15 сюрс манет быдтоно луэ. Калыклэн, валамон ни, та сюлэмаз ик йӧтэ. Соин но кошкисез пумен гуртысь кошке. Нош хозяйствоысь объектъёсты пуэн шунтон понна чотантэм уксё быре. Тысь куасьтон но шертон комплекслы ик кӧня пу кулэ. Туэ урожай но, мукет аръёсын ӵошатыса, лачак люкаське. Котькуд гектарысь ог 20 центнер потэ. Кылем арын та лыдпус 16 центнер вал. Зэм, ваньзэ утялтэмзы уг луы — 1 сюрс 300 гектар пӧлысь ог 350 гектарез няньлы уз яра ни — пудо сиёнлы ке но дасяны быгатӥмы ке, шумпотомы, шуо гуртоос. Бусые кельтыны жаль, пе. Асьсэлэн утялтоно бусыоссы уг тырмо — пудозы трос, нош музъемзы ӧжыт. Артысь хозяйствоослэсь возьёссэс турнало-калто, соосызлы кулэ ӧвӧл угось. Школалэн но кӧня ке гектар бусыосыз вань. Азьвыл школаын трактористлы дышето вал бере, участок возьылӥзы. Табере дышетон организацилэн трактор возьыны моӵез уг тырмы ни. Калык но пудо вордэмысь дугдӥз. Азьвыл гуртын 150-лэсь ичи скал уг вордо вал — али ог 30 йыр люкаськоз.

Фёдор Першин одӥг малпанэн улэ: хозяйствоез юнматоно, гуртэз ӝутыны юрттоно, татын улэмзы мед потоз, шуэ.

Елена Сараматова

Ангелина Снигирева
By Ангелина Снигирева 27 сентября, 2019 15:08