Уж дурын пӧсялод, калык пӧлын данъяськод

Ангелина Снигирева
By Ангелина Снигирева Сентябрь 13, 2019 14:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Е. Сундукова

Удмурт Республикалэн Тӧ­роезлэн но Правительстволэн администрациенызы кивалтӥсьлэн юрттӥсез. Со кыл кутэ элькунамы, шоркарамы ортчись бадӟым ужрадъёсты радъян, калыкез люкан понна. Тыршемез пусъемын уно таукаронъёсын. Со сяна, Е. Сундукова — филология наукаосъя кандидат. Удмурт, ӟуч кылъёсын кадь ик вольыт вераське фин но англи сямен. Наукаез кун службаен воштэмез пумысен чик уг жаля: удысэ, пе, ӵапак сюлмыя.

Дэбес

— Евгения, кыӵе удысын тыршемдэс ӧй тодысал ке, одно малпасал: тӥ артистка, дыр. Котьку капчи мылкыдо но синэз кыскись, лад-лад вераськыны быгатӥсь, выросъёсты но йӧноесь — кытысь та ваньмыз?

— Зэм но, «тӥ артист, дыр» шуыса мыным ӵем вазисько, эшшо ке мылкыдзы ик куашка, «ӧвӧл ведь» шуисько ке. Уг тодӥськы, кытысь сыӵе выросъёсы. Вордскемын мон огшоры удмурт семьяын Дэбес черкогуртын. Мамае дышетскемезъя акушер-гинеколог, быдэс улонзэ сӥзиз тазалыкез утёнлы. Нош папае комбайнёр но, лэсьтӥськись но луыса тыршиз, киосыз зарни вал солэн. Жаляса верано, пӧламы кемалась ӧвӧл ни…

Нылпи садэ мынытозям, мон ӟуч кылын пал кыл но вераны уг быгатскы вылэм. Но черкогуртын ӟуч кыл ӵемгес чузъяськемен, бӧрысь мон но ӟучгес вераськыны ӧдъяй. Дэбес черкогуртын семьямы улӥз-вылӥз, мон 4-тӥ классэз йылпумъятозь. Мамае со вакытэ ёрос роддомын акушер луыса тыршиз: уен-нуналэн сямен уж дураз вал. Папае но озьы ик — ялан ужын. Мон бадӟымез вал бере, Андрей выны сярысь сюлмаськонэз ас вылам басьтоно луи: чаклай, сюдӥ-утялтӥ, лыдӟиськыны-лыдъяськыны дышетӥ. Со вакытэ ик, малпасько, сямам пыӵаз кин ке сярысь сюлмаськон, организатор луон мылкыд. Али кадь ик син азям пуксе эшъёсын шудэме: пӧлазы мон котьку азьветлӥсь вал. Школаын но кыӵе ке ужрад ортче ке — мон нош ик азьпал радын. Ужрадэз дасясько но, ачим ик отчы пыриськисько но вал. Сценалэсь, калык учкемлэсь кепыранэ чик ӧй вал. Но артист луон сярысь ӧй ик малпаськылы. Мамае доры роддоме вуылӥсько вал бере, отын синмаськыса учкылӥ эмъясьёслэн ужамзы шоры. Туж потэ вал хирург луэме. Мунёосылы «операция» лэсьтыса шудылӥ. Тужгес но кельше вал тазьы шудэмелэн пумыз: мон комнатаелэсь ӧсъёссэ вӧлак усьтӥсько но анай-атаелы ивортӥсько: «Операция ӟеч ортчиз, эн сюлмаське!»

4-тӥ класс бере мамаен-папаен Дэбес ёросысь Такагуртэ выжоно кариськизы. Мамае отчы фельдшере интыяськиз, папае гурт хозяйствое кариськиз. Но мон пумысен огкылэ вуизы: дышетсконме уретоно ӧвӧл, Дэбес черкогуртысь школае ик кельтоно. Озьы мон 5-тӥ классысен 11-тӥ классозь Дэбесын ик дышетски, школа-интернатын улӥ. Ваньмон дырме ортчытӥ Г. Корепанов-Камский нимо искусствоосъя школаын, бырйи крезьгуръя ёзэз — отын баянэн шудыны дышетски. Отын но вань ужрадъёсын азьветлӥсь вал. Шуныт мылкыдын тодам вайисько шутэтскон нуналъёсы анаелэсь вазь ӵукна ик дорам вуылэмзэ. Быдэс сумка тыр сиён-юонэн, сӥяны вуттымтэ шаньгиосын. Вань эшъёсыным огазе люкаськыса, лӧптыса ик кӧтмес тыриськомы вал! Зол мӧзмыку, Такагуртэ пыдын но бертылэме вань, со Дэбеслэсь 10 иськемлы палэнын.

Пичи Женя анаеныз

Г. Корепанов-Камский нимо ис­кус­ствоосъя школаын басьтэм быгатонлыкъёсы мыным табере юртто туала удысам. Угось пӧртэм ужрадъёслы дасяськыку, ваньзэ чаклано: кыӵе кырӟанъёс чузъяськозы, кызьы чузъяськозы, макем ӟеч ужалоз крезьгуръя техника но трос мукетсэ. Крезьгурез шӧдытэк-валатэк, вань шекъёсты синйылтыны уд быгаты угось.

Нялтас вераса, мон бӧрсьы ик та искусствоосъя школаын дышетскиз выны но, со но, мон кадь ик, баянэн шудыны быгатэ. Ас вакытаз кыкнамы но резь! баянэн шудӥмы, черкогуртамы ортчылӥсь ужрадъёсы дэмен пыриськылӥмы…

Шумпотӥсько, выныным кусыпъёсмы пичи дыръямы кадь: со мынам тужгес матысь адямие, солы мамалы кадь вань сюлэмме усьтыны быгатӥсько. Тодӥсько, со монэ котьку валалоз, мылкыдме ӝутоз. Туж яратӥсько Софья нылзэ, племянницаме. Ваньмон дыры сюре ке, соин ветлӥськомы нылпиослы чаклам ужрадъёсы, адӟытонъёсы. Котьку мылкыдзэ юасько: маиз кельшиз, нош мае со мукет сямен радъясал. Пичи муртлэн мылкыдыз но мыным тунсыко: Тӧролэн но Правительстволэн кичӧлтэмзыя ортчись ужрадъёсы угось уноез лыкто быдэс семьяосын, нылпиосын.

Ижкар

— Баянэн шудыны вис шедьтӥськоды на-а? Аръёс ортчемъя, оло, крезьгуро арбериен шудыны быгатонлык ыше-быре?

— Кыӵе ке инструментэн шудыны дышетскем мурт ноку но уг ышты ни та быгатонлыксэ. Со сиськыку пуньыез возем кадь: ӵем-а кутылӥськод инструментэз, шер-а — чиньыос асьсэос тодо, кыӵе кнопкаос вылэ зӥбылыны, кызьы баянэз кысканы. Зэм, яратоно инструментэ сьӧры пуксьылыны дыр уггес шедьылы. Но кытысь ке синйылтӥ ке тэк сылӥсь баянэз, монэ кутыса уд возьы ни: кӧня ке минут ке но шудо.

Али кадь ик тодӥсько на школаез йылпумъяме бере йырме тӥямме: дышетсконме, оло, крезьгуръя ик азинтоно, яке воксё мукет удысъя вылӥ образование басьтоно? Крезьгур дунне сяна, мар мыным тунсыко потэ на? Точно — кылъёс! Соослэсь кылдэмзэс эскерон, пӧртэм калыкъёслы, кылъёслы сӥзем книгаосты уез-нуналэз валатэк лыдӟон мыным туж тунсыко! Кема малпаса ӧй улы, кутӥ но Иже шонтӥ. Бырйи Удмурт кун университетысь удмурт-фин люкетсэ (али Удмурт филологияя, финно-угроведениея но журналистикая институт). Отчы капчиен дышетскыны пыри. Уг тодӥськы, мар пумысен ас бордаз кыскиз фин кыл. Но 5 ар ӵоже дышетскытозям, огпол но жаляме ӧвӧл та удысэз быръеме пумысен.

Удмурт кылмы агглютинативной ук: кыл борды суффикс ватсаськом но кыӵе ке действиез возьматӥськом. Одӥг ласянь, асьме кылмы, ӟуч кылын вераса, туж практичной. Нош ӟуч кыл флективной: одӥг суффикс ик пӧртэм значениен кутӥськыны быгатэ. Фин кыл удмуртэз кадь ик, соин ик сое дышетон мыным капчиен сётскиз. Соин удмуртэныз сямен ик вольыт вераськисько.

Турку

— Мон тодэмъя, тӥ кӧня ке ар ӵоже Финляндиын улӥды?

— Удмурт кун университетын дышетскыкум ик, ас азям ужпум пуктӥ: дышетсконме одно ик азинто аспирантураын. Но стипендиос соку пичиесь вал, кытын ке ужатэк, наукаен гинэ вырыны луонлыке ӧй вал. Ужаны куриськи Дышетон удысын национальной ужпумъёсты эскеронъя институтэ, отын ӵапак специалистлы кулэясько вылэм. Отын мон 3 ар ӵоже тырши, кылъёсты дышетонэн герӟаськем ужпумъёсын выри. Но диссертацие бордын рос-прос ужаны дыр ӧз шедьылы.

Таллинын

Уже сӥземын вал уйпал ёросъёсысь гуртъёслэсь нимъёссэс эскеронлы. Кӧня архивъёсын пуконо, кӧня гуртъёсы потано! Азьпалтыса верало: диссертацие 400 бамлэсь ятыр луиз. Сомында гуртъёс, архивъёсын гожъямъёс, калыклэн мадёнъёсыз — соосты ваньзэ ужам пыртэме потӥз. Шуизы: укыр трос — кулэстоно. Ярам, Москваысь диссертациосъя кенешлы вазиськон гожтыса, югдурез валэктыса, диссертациме тамында бамен ик утьыны лэзизы.

Озьы тӥни институтын тыршыкум, мыным ӵектонэн вазиськиз УдГУ-ысь дышетӥсе, филология наукаосъя доктор Валентин Кельмакович Кельмаков: диссертацидэ йылозяз-пумозяз уж вискын гинэ ноку уд вутты, умойгес, пе, луоз, одӥг арлы Финляндие выжид ке. Диссертацидэ но азьланьтод, финъёсты но удмурт кыллы дышетод, шуиз. Ӟеч стипендия ӵектӥзы. Озьы мон вуи Туркуысь университетэ. Отын со вакытлы финно-угроведениея курсъёс рос-прос радъямын вал ни. Басьтӥськи пӧртэм выжыысь студентъёсты удмурт кыллы дышетон борды. Пӧлазы, финъёс сяна, немецъёс, французъёс вал.

— Фин кылэз тодӥськод вал ни бере, Суомиын улон, егитъёсты дышетон капчиен сётскиз, дыр?

— Мон туж мӧзмись адями. Папае кадь патриот: улонме, Россиын но Удмуртиын сяна, нокытын но син азям пуктыны уг быгатӥськы. Папае луло луысал на ке, оло, Финляндие кошконэлы но пумит луысал…

Туркуэ вуыса, мон чалми. Фин кылэз тодӥсько, ваньзэ валасько, нош маке верано ке, ӟудӥсько. Бен, дыр ортчемъя ваньмыз ас интыяз пуксиз. Туж тунсыко ортчылӥзы удмурт кылъя занятиосмы. Турку университетысь студентъёс удмурт кылэз дышетӥзы, перепеч пӧраса, кылбуръёс малпаса, удмурт кырӟанъёслы видеоклипъёс лэсьтыса. Со вакытэ вӧлмемын вал егит кырӟасьлэн Анастасия Чушъяловалэн кырӟанъёсыз: кунгожсьӧр егитъёслы соос сюлэмзыя луизы, кӧня клип дасямы!

Озьы мон отын одӥг арзэ чидай, доре бертыны дасяськыны кутски. Соку ӵектӥзы на эшшо 2 арлы кыльыны. Мон воксё ӟудӥ — соглаш кариськоно меда? Валентин Кельмакович нош ик нодъяз: отчы ик кылёно, ужано. Гужемзэ Удмуртие бертаса, кужым басьтыса, мон нош ик Суоми шаере вуи. Но та 2 арзэ мӧзмонэ буйгамынгес вал ни. Студентъёсты дышетон вискам пӧртэм кунъёсы вуылӥ, пӧртэм калыкъёслэн улэм-вылэменызы тодматски. Тодӥсько вал угось: Финляндие номырись но уг кыльы, соин ик луонлык вань дыръя дуннеез котыръяно.

Бертыны дасяськон азям нош ик ӵектон вуиз: таяз радэ… бызьыны. Но мон уг быгатӥськы ни вал вордскем палъёсытэк. Кенешим, мон бертыло, сюлэмме буйгато но, бызьыны соглаш ке, выльысь Финляндие вуо. Удмуртие бертӥ но соку ик валай: уг быгаты мон мурт кунын улыны, эшшо ке семья кылдытыны…

Ижкар

— Татчы бертыса, кыӵе удыс борды басьтӥськиды?

— Удмурт шаер монэ, мурт кунын улонэ зымылэм муртэ, вӧлъям киосын ӧз пумита, шуыны луоз. Уж интые но, уксёе но ӧвӧл, улон инты но утчано. Соку юрттӥзы Финляндиысь эшъёсы. Отысь М. Кастрен нимо обществолэн кивалтӥсез Ильдико Лехтинен жингыртӥз: Женя, уг-а поты К. Герд нимо Национальной музейын ужамед? Соос, пе, ӵапак али кулэясько наукая сотрудниклы. Мон та ӵектонлы шумпотӥ, соглаш кариськи. Ма, малпасько, музей — ӵапак мынам удысэ ук! Татын ик история но, этнография но, археология но.

К. Герд нимо музейын нылпиослы экскурсия ортчытэ

Озьы К. Герд нимо Национальной музейын мон 2 ар ӵоже экскурсовод, озьы ик пӧртэм ужрадъёсты дасясь но нуись луыса тырши. Вунонтэм кылизы отын К. Гердлы сӥзем лыдӟонъёсты, пӧртэм тунсыко адӟытонъёсты радъяммы.

Музейын ужан вискам мыным вазиськиз Николай Николаевич Мусалимов — со вакытэ со Правительстволэн Тӧроезлэн воштӥсез луыса тырше вал. Со мыным Тӧролэн но Правительстволэн администрациязы уж инты ӵектӥз. Озьы 7 ар ӵоже ини администрациен кивалтӥсьлэн юрттӥсез луыса ужасько.

— Кун служба мӧзмыт уг поты-а?

— Мынам уже туж тунсыко, татын сяна, асме нокытын уг адӟиськы. Уж дурам кылдэмын кужмо, визьмо команда: я кинэн ке пумиськон гинэ радъяно-а, я бадӟым ужрад ортчытоно-а — ваньмыз борды капчиен басьтӥськиськом. Малпасько, ваньмыз та потэ кивалтӥсьмылэн, Тӧролэн но Правительстволэн администрациенызы кивалтӥсьлэн Сергей Смирновлэн рос-прос ужаны быгатэмез бордысь.

Дмитрий Япаров куасчиен

Та удысын нырысетӥ арзэ уг ужаськы ни бере, ӵошатыны быгатӥсько азьвыл вакытъёсын. Берло аръёсы туж капчи луиз ужрадъёслы дасяськыны: кинлы гинэ уд вазиськиськы, ваньзы куронъёсты ӝог быдэсто. Шаеренымы А. Бречалов кивалтыны кутскем бере та ласянь рос-прос система кылдӥз, шуыны луоз. Нялтас вераса, бадӟым ужрадъёслы дасяськыку, кусып тупатоно луэ 100-лэсь ятыр адямиосын — кышкытлыклэсь утиськонъя службаосын, калык огазеяськонъёсын, техника понна кыл кутӥсьёсын но трос-трос мукетъёсыныз. Ваньзылэсь ужзэс чаклано, ваньзэ йырын возёно. Тани кылем арын Оружейниклэсь нуналзэ усьтонэ вуылӥз «Любэ» группа. Соос сцена вылэ потӥзы но, тыл тёпак кысӥз, тём-тём пеймыт луиз. Но артистъёс таӵе учыръёслы дышемын ни вылэм: асьсэлэсь генераторзэс поттӥзы. Калык но ӧз ыштӥськы: ваньзы телефонъёсысьтызы фонарикъёссэс лэзизы но котыр улосэз дэмен югдытӥзы. Нош мар вал милемын, организаторъёсын: мар муген тыл кысӥз, малы та ужез ас вылазы басьтэм адямиос сое ӧз чаклалэ? Бӧрысь тодмо луиз: одӥгаз ТЭЦ-ын шуг-секытъёс кылдӥллям, милямъёс янгыш ӧвӧл. Яке туэ Городлэсь нуналзэ пусъён дыръя кужмо тӧл ӝутскиз, сценаез кырыжтӥз, нош Иж тымет вылысен фейерверк тани-тани ӝуатскыны кулэ. Инженеръёс кышкато: баржаез тӧл бекыртӥз ке, нокыӵе салют уз луы. Соку но вень йылын кадь вал. Угось нырысь ик малпаськод калык сярысь: со ужрадэз вите, нош маке ӧз пӧрмы ке, кӧтыз пӧсь кылёз ук. Ужрад ортчем бере гинэ организаторъёслэн сюлэмъёсазы нясь-нясь луэ. Котьку сямен командаенымы одӥг ӝӧк сьӧры люкаськиськом но ваньмыз сярысь кенешиськом — кыӵе шекъёслы азьланяз саклык висъяно, мае син азьын возёно.

Тодам кылиз кылем арын Ижын Нырысетӥ каналэн ӵош ортчытэм «Стань первым!» ужрадлы дасяськеммы. Вуттӥзы та каналлэсь «1» гожтэмен пуссэ, солэн секталаез 500 килограмм. Каналлэн кивалтӥсьёсыз куризы: сое ошоно сцена йылэ, сотэк, пе, концертмес ум ортчытэ. Нош инженеръёсмы чутрак пумит луизы: сыӵе секталаез сценалэн каркасэз уз чида, шудтэм учыре но вуыны кема ӧвӧл. Мар кароно? Пӧсекъяно луиз соку. Но инженеръёсмы та ужпумез асьсэ сямен сэрттӥзы-пертчизы: уйзэс ӧз кӧлэ, но та пуслэсь сыӵе ик макетсэ дасязы — таиз кӧня ке кило гинэ луиз, дуръёсаз тылъёс-гирляндаос кыскизы. Ужрад калык понна вунонтэм ортчиз.

Роза Сябитова телеведущиен Ижкаре Нырысетӥ каналысь кизилиос вуылон вакытэ

Тодам кылиз на та ужрадэ вуэм кизилиосын пумиськеме но. Ужрадэ лыктэм калык мыным вазиське: туж потэ, пе, Ф. Киркоров кырӟасен туспуктэм лэсьтэммы. Я, со пумит ӧз луы, мыло-кыдоос соин фотое пуксьылӥзы. Та бӧрсьы Ф. Киркоров дорам лыктӥз но шуэ: «Женя, ваньзы монэн фотое пуксизы, нош тынад уг поты шат?» Шуисько: мон ужасько ук! Со киоссэ вӧлъяз но пальышаса шуиз: о-о, вот та понна мон тонэ туж гажасько — тыныд кыӵе ке уж оскемын ке, сое пумозяз лэсьтоно. Отын ик Роза Сябитова, та каналысь ик передачаез нуись, мыным шуэ: адӟисько, быземын ӧвӧл на тон, ойдо ӟыгырском! Кин, пе, монэн ӟыгыръяське, со бызьытэк уг кыльы!

— Быдэсмиз-а та веранэз?

— Синмаськымон адямие вань, но семья кылдытон пумысен йырме уг висьытӥськы. Котькуд муртлэн аслаз улонэз, семья шоры аслаз учконъёсыз. Мыным умой али, татын, та дыре. Зэм, ӵыжы-выжыос но та юанъёсын огвакыт ёртылӥзы: дыр ортче ук, Женя! Но та юан пумысен пӧсекъяса улӥд ке, дыртӥд ке, малпасько, ӟечез уз лу. Кызьы шуо, адямилы мар ке сётэмын ке, со одно луоз-кылдоз.

— Вуоно арняе шаерамы ортчоз бадӟым ужрад — Оружейниклэн нуналыз. Нош кыӵе ужрадъёс чакламын азьланезлы?

Оружениклэн нуналызлы дасяськыку

— Зэм, Пыӵал тӥрлык поттӥсьлэн нуналыз туэ но туж тунсыко, яркыт ортчоз. Вылез — Шор карлудысь фонтан. Крезьгур чузъяськем улсын вулэсь борддор вылын возьматэмын луоз шаермылы, шоркармылы сӥзем фильм. Со сяна но пӧртэм-пӧртэм ужрадъёс чакламын. Нош азьланьын — Удмуртилэн кунлык басьтэмезлы 100 ар тырмонэз пусъён. Со улсын но трос ужрадъёс чакламын: ми соослы дасяськон борды кутскимы ни. Озьы ик мытэмын ни Быдӟым Вормонлы 75 ар тырмонэз пусъёнлы дасяськон но. Уен-нуналэн командаенымы йырмес бергатӥськомы та ужрадъёсты эшшо но тунсыкогес карон вылысь. Угось таӵе ужрадъёс калыклэсь шаеренымы, быдэс странаен данъяськон мылкыдзэ ӝуто.

Елена Никитина

Ангелина Снигирева
By Ангелина Снигирева Сентябрь 13, 2019 14:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<