Удмуртиысь депутатъёсты кылӥзы Кун Думаын

Ангелина Снигирева
By Ангелина Снигирева Сентябрь 27, 2019 14:39

Гужем вис каремзы бере выль кужымен ужзэс мытӥзы Кун Кенешысь депутатъёс. 16-тӥ сессиын эскероно ужпумъёс трос люкаськизы: ваньмыз 29 юан, соос пӧлысь 11-ез — выль законъёслы проектъёс.

Ю. Тюрин бюджет сярысь вера
Туспуктэм: Кун Кенешлэн пресс-службаез

Дан понна гинэ ӧвӧл

Депутатъёслы нырысь ик вазиськиз Удмуртилэн Тӧроез Александр Бречалов. Со Оружейниклэсь нуналзэ пусъёнлы йылпумъянъёс лэсьтӥз.

М. Калашниковлэн 100 ар тырмонэзлы сӥзем ужрадъёс уг йылпумъясько на. 31-тӥ октябре Удмуртилэн нуналъёсыз радъяськозы Россиысь МИД-ын. Конструкторлэн вордскем нуналыз котырын адӟытон усьтӥськоз Россиысь Общественной палатаын. Озьы ик Удмуртилэн нуналъёсыз ортчозы Кун Думаын но Федерация Кенешын.

— Форумез ортчытон — со пыӵал тӥрлык поттӥсьёсты гинэ данъян ӧвӧл, экономикаез азинтон понна но туж кулэ. Ми ӧтчамы ОПК удысысь вань кивалтӥсьёсты но трос мукет предприятиосты — соосын азьланяз производствомес валче азинтыны быгатомы, — шуиз Александр Бречалов.

Ёросъёсты витё воштӥськонъёс

Озьы ик Тӧро ивортӥз, кун структураын воштӥсь-конъёс кисьмало шуыса. Кылсярысь, 2 ар ӵоже республикаысь кун кивалтон ёзъёсысь 314 ужась мозмытэмын. Та чотын 223 миллион манет шыръяськиз. Та амалэз, пе, выжтыны луэ муниципал кылдытэтъёс вылэ но. Ёрос но поселение йыръёс 333 кузя луо. Эшшо администрациосын 5 сюрс 831 ужасьёс но 3 сюрс 748 депутатъёс лыдъясько. ЦИК чотамъя, 1 депутатэз быръён ик 80-140 сюрс манет тыр усе. Нош быръёнъёс 5 арлы быдэ ортчо, эшшо арлы 2 пол ватсаса быръёнъёс радъясько. Кивалтӥсь ёрос йыръёслы бускель улосъёслэсь ужамзэс чакланы ӵектӥз. Кылсярысь, Пермь крайын кемалась огазеяло ни муниципал кылдытэтъёссэс.

Уж люкылэмын

Кун Кенешын но кивалтон удысын кадръёсъя воштӥськонъёс ортчизы. Елена Дербиловаез азьвылгес бырйизы парламентысь 
«Огъя Россия» фракцилы кивалтӥсе. Соин валче Елена Анатольевна мозмытӥз Кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн тӧроезлэсь интызэ. Лушкем куара сётыса, та должносте депутатъёс бырйизы Владимир Невоструевез. Табере Владимир Петрович быдэсъялоз Кун Кенешлэн Тӧроезлэсь нырысетӥ воштӥсезлэсь ужзэ но, кивалтоз ялан ужась комиссиен но.

Озьы ик выль ужзэс кутскизы выль быръем депутатъёс: Николай Кокорин луиз Экономикаын политикая, промышленностья но инвестициосъя комиссилэн ёзчиез, Надежда Онищенко бырйиз Ужъя, калыкез улон-вылонын утён политикая но ветеранъёслэн ужъёссыя комиссиез.

Бюджет ватсамын

Депутатъёс воштонъёс пыртӥзы Удмуртилэн туэлы бюджетаз. Элькун кисылэн доход люкетаз ватсамын 2,78 миллиард манет. Та уксё вуэмын вытъёс чотын но, федерал бюджетысь висъям юрттэт 
чотын но (кыӵе удысъёсы бадӟымгес юрттэт висъяськоз, учке таблицаысь).

Озьы 2019-тӥ ар понна элькун бюджетлэн табыш люкетэз 82,9 миллиард манет луиз. Нош вань чаклам ужъёсты быдэстыны 84,7 миллиард манет кулэ. Казналэн дефицитэз 1,77 миллиард манет луиз.

Шыпыт!

Удмуртиын нырысьсэ кутэмын шыпыт вакытэз чакланлы сӥзем закон. Соя ужан нуналъёсы аляктыны уг яра 22 часысен 8 часозь, шутэтскон нуналъёсы — 23 часысен 9 часозь. Нимысьтыз часъёс тупатэмын праздник нуналъёсы.

Озьы та пусъем вакытэ бускельёслы люкетонтэм вылысь уг яра улон интыын кесяськыны, шуланы, йыгаськыны, крезьгуро инструментъёсын шудыны, пиротехникаез пуштытъяны. Трос квартираем юртъёсын лэземын ӧвӧл шыпытэз чаклан вакытэ тупатъян ужъёсты нуыны. Озьы ик законын ӵектон вань гостиницаосын, общежитиосын но трос квартираем улон юртъёсын нуназе но — 13 часысен 15 часозь — шыпыт вакыт радъяны.

— Та закон 2 ласянь юрттоз. Нырысь ик, трос квартираем юртъёсын но бордысьтыз пристройёсын пичи юонниос ворсаськозы, мукет ласянь адямиос асьсэос но шутэтскыны быгатозы, нылпиоссэс дыраз кӧлыны выдтозы, — шуиз Кун Кенешлэн Тӧроез Алексей Прасолов.

Вераны кулэ: Удмуртиысь депутатъёслэн таӵе ӵектонзы, федерал законлы проект дасяса, келямын вал Кун Думае. Отын радъяськизы ни 1-тӥ лыдӟонъёс. Та вакытлы Россиысь 36 улосын кутэмын шыпыт вакытэз чакланъя закон. Удмуртиын со ужаны кутскоз, 60 нунал ортчыса.

Висъяны уг яра!

Депутатъёслэсь сюлмаськемзэс шӧдозы трос нылпиё семьяос но. Воштонъёс пыртэмын «Удмурт Республикаын транспортлы выт сярысь» законэ. Соя ваньмызлы трос нылпиё анай-атайёслы 50 процентъем льгота сётӥське. Со чакламын семьяысь 1 транспортлы, машиналэн двигателез 150 вал кужымлэсь бадӟымгес ӧвӧл ке.

— Али таӵе капчиятонъёссы вал ёрмыса улӥсь трос нылпиё семьяослэн гинэ. Соос шаерамы 17 сюрс 504 лыдъясько. Нош 4 сюрс 287 семьялы льгота чакламын ӧй вал, уго соос начар улӥсьёс пӧлы уг пыро. Ми лыдъяськом, трос нылпиё семьяослэсь правозэс огкадь кароно, тазьы висъяны уг яра. Уката ик элькун бюджет понна лыдпус но бадӟым ӧвӧл — ватсам расходъёс 4,3 миллион манет луозы, — ивортӥз Тазалыкез утёнъя, демографияя но семья ужпумъёсъя комиссилэн ёзчиез Зоя Степнова.

Елена Скворцова

Ангелина Снигирева
By Ангелина Снигирева Сентябрь 27, 2019 14:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<