Удмуртиысь архивъёсъя служба «Оружейник мира» мультимедийной бичет поттӥз

Ангелина Снигирева
By Ангелина Снигирева 18 сентября, 2019 17:26

Ижын тодматӥзы Михаил Калашников конструкторлы 100 ар тырмонлы дасям «Оружейник мира» мультимедийной бичетэн. Отчы пыртэмын 350 пала аудио, видео документъёс, интервьюос, гожтэтъёс. Уноез соос пӧлысь азьвыл нокытын печатламын, поттэмын ӧй вал на.

Таӵе флешкае К. Калашников контруктор сярысь трос документъёс гожтэмын

Таӵе аспӧртэм бичетэз поттон бордын ужаз Удмурт Правительство бордысь архивъёсъя комитет. Бичет лэсьтэмын, Удмуртиысь архивъёсын, Санкт-Петербургысь артиллерияя, инженерной но связья войскоосъя военно-исторической музейын, Алтайысь шаертодонъя музейын, Ижысь М. Калашниковлэн музейын, «Аксион-холдингысь» экспоцентрын утиськись документъёсты уже кутыса. Изданиез нырысетӥ дунъясьёс пӧлын вал Кун Кенешысь ялан ужась комиссиен кивалтӥсь Елена Дербилова, Удмурт Тӧролэн но Правительстволэн администрациенызы кивалтӥсьлэн воштӥсез Владислав Поджаров, журналистъёс но историкъёс.
Конструктор сярысь трос гожъямын ни, но таяз бичет азьвыл гожъямъёссэ но тодмотэмзэ огазеямын, пусйизы люкаськемъёс.

— Бичетэз поттон понна 600 документъёсты учкыса потэмын, электронной книгае 350-эз пыртэмын, — вераз сборникез одӥгез кылдытӥсь Сергей Чучалов. — Вераны луоз: та уж Совето Союз дыръя кунамы вӧлмем «Жизнь замечательных людей» сериен потӥсь книгаос выллем луэ, отын М. Калашниковлэн улэм-вылэмез, ужамез котыр ласянь возьматыны тыршемын.

— Мыным шуд усиз Михаил Тимофеевичен ӵош кӧня ке ужаны, — вераз В. Поджаров. — Со туж огшоры вал, но со вакытэ ик тодон-валанэз, малпанъёсыз туж мурезь вал. Со котьку вералляз: автоматэз жугиськон понна ӧвӧл, кунмес утён понна лэсьтэмын шуыса.
Сборникез дунъяз палэнысь вуэм куно но, Санкт-Петербургысь артиллерияя, инженерной но связья войскоосъя военно-исторической музейысь ужась Руслан Чумак.

— Дуннеын тодмо ож тӥрлык поттӥсьёс ичи ӧвӧл, но быдӟым шуыны луоз одӥгзэ-кыксэ гинэ, — вераз со. — Совето Союз, Россия понна одӥгез сыӵе адями — Михаил Калашников. Солэн автоматэз зор-кот, кезьыт, пӧсь дыръя оскымон луэменыз быдэс дуннее вӧлмемын. М. Калашниковлэн улэм-вылэмез сярысь трос гожъямын ке но, эшшо унозэ калыкмы уг тоды на. Малпасько, та бичет быдэс кунамы улӥсьёс понна трос выльзэ но тунсыкозэ усьтоз.
Электронной бичет нимысьтыз чебер флешкае гожтыса но поттэмын. Таӵе флешкаос 200 пала дасямын. Соосты матысь дыре шаерысьтымы библиотекаосы но музейёсы келялозы. Нош октябрь толэзе бичетлэн веб-версиез Удмуртиысь архивъёсъя службалэн сайтаз поттэмын луоз.

Ангелина Снигирёва

Ангелина Снигирева
By Ангелина Снигирева 18 сентября, 2019 17:26