Театрез Интернет но уз вормы

Ангелина Снигирева
By Ангелина Снигирева 27 сентября, 2019 16:06

Россиысь Президентлэн Приволжск федерал округъя оскем муртэзлэн Игорь Комаровлэн ӵектэмезъя ортчись «Театральной Приволжье» фестивале элькунысьтымы егитъёслэн но нылпиослэн 55 театральной коллективъёссы пыриськизы — ог 950 мурт. Фестивальлэн Удмуртиысь люкетэзлы йылпумъянъёс лэсьтӥзы 24-тӥ куарусёнэ Удмурт театрын.

Воткаысь «Юбилейный» культурая дворецысь калык театр «Театральное Приволжье» фестивальын Гран-при басьтӥз
Туспуктэм басьтэмын «Народное творчество Удмуртии» огинлэн «ВКонтакте» бамысьтыз

Киноысь герой янгышаз

Сӥё-дано ужрадэ люкаськизы элькунамы любительской театрез азинтӥсьёс: артистъёс, режиссёръёс, суредасьёс, хореографъёс, театръёслэн кивалтӥсьёссы. Ужрадэз усьтыса, соослы тау кариз Удмуртилэн Тӧроез Александр Бречалов.

— 40 ар талэсь азьло потэм «Москва слезам не верит» киноын герой вера, ӝоген ваньмыз: кино, театр, литература — ышоз, телевидение гинэ кылёз шуыса. Дыр ортчемен, улон, зэм но, воштӥськиз, али егитъёс понна бадӟым инты басьтэ Интернет. Со висгожъёсты ӵушылӥз но адямиослы асьсэдыз возьматыны выль луонлыкъёс сётӥз. Озьы ке но тӥледлы луыса адӟиськом: театр улэ но ялан паймытэ, быгатӥсь но яркыт егитъёсты бордаз кыске, — вазиськиз кутскись артистъёслы А. Бречалов. — Асьмелэн элькунамы трос адӟымон театръёсмы, соослэсь спектакльёссэс учкыса, провинциальной театр сярысь стереотипъёс куашкало. Та фестиваль трос выль нимъёсты усьтӥз. Шумпотоно, вуоно специалистъёс — студентъёс — ужрадэ мылысь-кыдысь пыриськизы шуыса. Тӥ элькунмылэн но кунмылэн азьланез, лулчеберетлэн вуоно ымнырыз. Театрен тунсыкъяськемдэс адӟыса, малпам вуоно арын «Театральной Удмуртия» фестиваль радъяны.

А. Бречалов нимысьтыз тау кариз инклюзивной театръёслы — соос, сӧсыр нылпиосты театре кыскыса, ваньмынызы огкадь луонлыкъёс кылдытыны юртто. А. Бречалов Удмуртилэн Тӧроезлэн премиеныз нимысьтыз пусйиз «Непринятый» постановкаез. Сое пуктӥзы Ижысь воспитательной колониысь «Хулиганы» коллектив но нылпиослэн «Надежда» инклюзивной мунё театрзы. Сергей Есенинлэн кылбуръёсызъя пуктэм спектакльлэн режиссёрез — удмурт драматург но режиссёр Сергей Антонов. Солы но «Надежда» театрлэн кивалтӥсезлы Константин Мехряковлы Тӧро тау кариз, осконзэ вераз, соослэн творчествозы быдэс элькунмылы тодмо луоз шуыса. Та коллективъёслы выль постановка дасяны сертификат кузьмазы.

Сцена вылысь — телевизоре

1-тӥ, 2-тӥ но 3-тӥ степенё лауреатъёслы дипломъёс сётъяз жюри. Отчы пыризы Удмуртиысь Театр удысын тыршисьёслэн огазеяськонзылэн кивалтӥсез Александр Мустаев, Нылпиослы ватсаса тодон-валан сётонъя элькун центрлэн кивалтӥсез Татьяна Якимова, та центрысь специалист Вадим Костылев. Нош Гран-при басьтӥсьёсты — Ижысь Калык творчествоя юртысь балетъя «Радуга» театрез но Воткаысь «Юбилейный» культурая дворецысь калык театрез — ӟечкылаз Удмуртиысь культурая министр Владимир Соловьёв. Со шумпотэмзэ вераз: «Театральной Приволжье» фестиваль кадь проектъёс улонэ пыӵамен, элькунамы любительской коллективъёс будо. Министр осконзэ вераз, Удмуртиын улӥсь калыкъёслэн кылъёсынызы тросгес постановкаос луозы шуыса.

Гран-приез вормисьёс «Золушка» но «Пётр и Феврония Муромские» постановкаосты дунтэк учкозы. Соос возьматэмын луозы «Зарни маска Ижкарын» фестиваль улсын.

Жюри сяна, устооссэ калык но бырйиз. Кельшымонэз спектакль понна куараез сётыны луэ вал «Мынам Удмуртие» телеканаллэн вотэс бамаз. Кӧня ке толэзь ӵоже куаразэ сётӥз 3 сюрс 800-лэсь ятыр адями. Студентъёслэн театръёссы пӧлын устоез луиз Ижысь Культурая элькун колледжысь «Петрович» театр, нош пиналъёс пӧлын эшшо одӥг вормон басьтӥз «Радуга» театр. Вормисьёслы Удмурт театрлэн «Алые паруса» спектакляз мыныны сертификат сётӥзы. Со сяна, соос быгатозы «Мынам Удмуртие» телеканаллэн «Стань звездой телеэкрана» программаяз пыриськыны.

Фестиваль улсын озьы ик ортчиз плакатъёсты но афишаосты суреданъя вожвылъяськон. Егит суредаськисьёсты дипломъёсын пусйизы. Соосты ӟечкыласа, дышетонъя но наукая министрлэн воштӥсез Ирина Крохина вераз: котькуд спектакль афиша бордысен кутске. Туж секыт вал устооссэ бырйыны, угось вань ужъёс яркытэсь, пӧртэм амалэн лэсьтэмын, пусйиз со.

Нимысьтыз номинациосын озьы ик пусйизы устооссэ артистъёсты, режиссёръёсты, артистъёслэсь дуэтсэс но ансамбльзэс, крезьгурчиез, суредасез, хореографез. Ужрадлэн пумаз Воткаысь театр возьматӥз вормем постановказэ. Табере вормисьёс «Театральной Приволжье» фестивальлэн финалаз пыриськыны дасясько. Со ноябре ортчоз, устооссэ спектакльёсты меӵак эфирын быръёзы. 

Анастасия Шумилова

Ангелина Снигирева
By Ангелина Снигирева 27 сентября, 2019 16:06