Тазалык утчаны — бодыен

Ангелина Снигирева
By Ангелина Снигирева Сентябрь 27, 2019 15:13

Грак ёросысь калыклы улон-вылонын юрттэт сётонъя центрлэн огез валтӥсь ужпумез — мӧйыослэсь тазалыксэс чаклан но юнматон. «Демография» нацпроектлэн «Арлыдоос» программаез улсын 65 арессэс ортчем нылкышноос но воргоронъёс понна радъяське диспансеризация.

Вынлудын улӥсьёс диспансеризацие вуылӥзы
Туспуктӥз: А. Медведев

Больницае — оп! шуытозь

Гужем ӵоже 21 ёросъёсы вуизы «ГАЗель» машинаос. Та огшоры транспорт ӧвӧл — нимысьтыз чакламын арлыдоосты больницае нуыны-вайыны. Автомобильын 8 интыез, со пӧлысь 1-ез чакламын инвалид коляскаен муртлы.

Грак ёрослэн таӵе машинаез ӧвӧл на — 4 районлы кӧня ке возьманы кылиз. Озьы ке но гракъёслы машина сёто Алнашысь калыклы улон-вылонын юрттонъя центрысь.

— Алнашъёсын кенешыса, кылдытӥмы асьмелэсь графикмес. Озьы котькуд четверге ми доры вуэ машина. 4 пол гурт калыкез диспансеризацие нуллӥмы ни, — шуэ Грак ёросысь калыклы улон-вылонын юрттэт сётонъя центрлэн кивалтӥсез Светлана Балобанова.

Адямиослы азьло ик иворто, машина луоз шуыса, люкало, нуо-ваё. Ёрос больницаын но уж радъямын — списокъёс кылдытэмын, карточкаоссы шедьтэмын. Гракысь поликлиникае таӵе рейсъёс арняяз 2 пол но мултэс ӧй луысалзы. Но гужем секытгес вал эмъясьёсын — тросэз отпускъёсы кошкылӥзы, соин больницаын ёрмылӥзы сюбег удысъя ужась специалистъёслы. Нош сӥзьыл вуэмен таӵе рейсъёсты арняяз 2 пол радъялляны чакламын.

Порым, Мамаево гуртъёсын улӥсьёс тазалыксэс эскеризы ни. Гуртоос уката шумпото, больницае дунтэк нуо-ваё шуыса. Уго райцентре мынон тапалан дунтэм ӧвӧл. Автобусъёс куд-ог гуртъёсы уг вуо. Нош таксиен огпала гинэ сюрес дун 300 манет мында усе.

— Арлыдоос шумпото, милемыз но тодазы вайизы шуыса, — вера Светлана Балобанова.

Мылкыд басьто, ӟеч сям пыӵатыса

«Демография» нацпроектлэн мукет проектэз — «Тазалыкъя школаос» кылдытон. Та ужез мытӥзы Гракын но. Со понна скандинав амалэн ветлонэз азинтыны чаклазы. Та удыслы дышетыны 4 специалист дасямын, бодыос басьтэмын, понедельникъёсы адямиосты ӧтё мастер-классъёсы. Озьы ке но калык трос уг люкаськы.

Мар кароно? Калыклы улон-вылонын юрттэт сётонъя центрын ужасьёс «Сӥзьыл марафон» ялӥзы. Арлыдоосты ӧтизы 
кызьпу арамае потыны. Ужрадэ пыриськон понна одӥг курон пуктӥзы — бодыосын лыктоно. 30 мурт 
люкаськиз. Нырысь вань калыкез кислородлэсь коктейлен куноятӥзы, собере скандинав амалэн ветлонъя мастер-класс возьматӥзы. Бӧрысь ваньзы ӵош кызьпу арамае вамыштӥзы. Арлыдоос шумпотӥзы: мынонэз кузь вылымтэ — 2 иськем гинэ. Нош макем трос мылкыд басьтӥзы! Со тырмиз ӵошатскыны но, губияны но. Кӧт сюманзэс буйгатӥзы на пӧсь шыд лымен, пыжем картошкаен, ческыт чаен.

Таӵе ӟеч кутскон калыклы улон-вылонын юрттонъя центрын ужасьёслэсь но мылкыдзэс ӝутӥз. Азьланяз, пе, эшшо тунсыко ужрадъёс малпано на. Арлыдоослы мылкыд сётон понна соцработникъёс пырисько ГТО-я куронъёсты быдэстонъя ужрадъёсы но. Кылсярысь, калыклы улон-вылонын юрттонъя центрлэн кивалтӥсез Светлана Балобанова кӧня ке ар талэсь азьло зарни значок басьтӥз. Табере та уже аслэсьтыз эшъёссэ но кыске. Асьсэ пӧлын ӟеч сям пыӵатыса, соос та мылкыдзэс арлыдоослы но палало.

Елена Скворцова

Ангелина Снигирева
By Ангелина Снигирева Сентябрь 27, 2019 15:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<