Сюанлэсь азьвыл чумер сиё

Ангелина Снигирева
By Ангелина Снигирева Сентябрь 11, 2019 11:49

Аръёс ортчемъя улон воштӥське, пересьёс кошкемъя сям-йылолъёс вуно. Но куд-ог гуртъёсын соосты выльысь улӟытыны, возьыны быгато фольклор коллективъёс, пӧлысьтызы одӥгез — Татарстанысь Кукмор ёросысь «Инвожо».

Кукмор ёросысь «Инвожо» ансамбль вуныны кутскем удумрт сям-йылолъёсты улӟытэ
Фото: Артём Шугаев

Радъясько экспедициос

Ӵапак сыӵе коллективъёсты шедьтон но вашкала сям-йылолъёсты улӟытон вылысь, пӧртэм калык культураосъя «Содружество» центр но пӧртэм выжы калъёс сярысь гожъясь журналистъёслэн гильдизылэн Самараысь ёзэз «Возвращение к истокам» аудиовизуальной энциклопедия дасяло. Та проектэнызы соос Россилэн Президентэзлэсь грантсэ утӥзы. Энциклопедие пӧртэм калыкъёслэн сям-йылолъёссы, лулчеберетсы сярысь 14 видеофильмъёс лэсьтэмын пырозы. Соосты улосвыл каналъёсын возьматозы но федерал ресурсъёсы пыртозы. Озьы Приволжск федерал округысь улосвылъёсын али этнографияя экспедициос ортчо ни.
22-тӥ — 24-тӥ гудырикошконэ съёмкаос ортчизы Татарстанын. Аудиовизуальной энциклопедиез кылдытонэ ӟуч, бигер, кряшен но чуваш коллективъёс, озьы ик калык киужъя кибашлыос пыриськизы.

Куноосты паймытъязы

Удмурт лулчеберетэз возьматыны Кукмор ёросысь «Инвожо» удмурт калык ансамбльлы оскизы. Угось «Инвожоослэн» шыкыссы туж бай, соос вуныны кутскем удмурт сям-йылолъёсты калыке берыктон вылысь бадӟым уж нуо.
«Инвожо» ансамбль кылдэмын 1981-тӥ арын. Кивалтӥсез — Геннадий Ахметов. Оло, вордскем ик ансамблен кивалтыны, шуэм потэ. Ачиз но кырӟа, эктыны но туж усто. Эсьма, артистъёслы костюмъёс но быдэсак ачиз малпа, вуре.

— Гильӟамал анаелэн куараез туж паймымон шулдыр вал. Оло, солэсь ик лулчеберетэз яратон мылкыдыз мыным но пыӵамын, — шуэ Геннадий Гафутдинович.
«Инвожо» ансамбльлы 1993-тӥ арын калык ним сётӥзы. Та нимез соос 26 ар ини данъяськыса нулло. Татарстанын но, Удмуртиын но ортчись ужрадъёсы мыло-кыдо мыно-ветло, улоскуспо но калыккуспо фестиваль-конкурсъёслэн лауреатъёссы трос пол луылэмын. Сочиын ортчись «Народные истоки» калыккуспо фестивале но «Инвожо» ансамбль 2 пол пыриськиз ни. Отысь фестивальлэн кубокеныз но I степенё лауреат луыса бертӥз. Коллектив арысь аре юнматэ аслэсьтыз усточи луэмзэ.
Самараысь вуэм куноосты но «инвожоос» паймытӥзы. Кукмор ёросысь Выль Каньсарын ортчись сюанэз возьматӥзы. Табере кылиз возьманы, куке сое телевизор пыр асьмеос но учкыны быгатомы.

Корка пыре выль кен

Ачим Каньсар кен луисько, соин ик отысь сюан ортчытом сям-йылолэз умой тодӥсько. Уката тунсыко потэ сюанлэсь азьвыл ортчись Чумер сиён йылол.
Нылаш егит пиен тодмо ке но, сое одно ик эмеспи доры лушкаса ваё. Ӵукна султэмзы бере ик выль кенэз ошмесысь ву вайыто. Солы, сюрес возьматыса, пилэн сузэрез яке выныз мынэ. Ву ваемез бере выль кенлы пилэн анаез кышет керттэ — табере ини со но коркалэн кузёез луэ.
Собере егит нылъёс люкаськыса чумер лэсьтыны кутско. Чумер — со пельнянь кадь лэсьтэм пичи колӟоос. Чумер пушкы пӧртэм сиёнъёс тыро — сугон, вӧй, кампет, пӧсьтурын, палэзь, шу, кубиста, ӵужкушман, кияр, сутэр, сылал но мукет. Со — егитъёслы сӥзёнъёс. Кылсярысь, кунолы чечыен чумер сюре ке, «улонды му кадь ческыт мед луоз!» шуэ.
Но пӧзьтэм чумерез нырысь ик выль кенлы сёто. Маин чумер солы сюре, сыӵе ик, пе, выль кен но луоз. Кылсярысь, пӧсьтурынэн ке — чырткем, лэчыт кыло, котьмае быгатӥсь луоз; вӧйын ке — небыт сямо, капчи мылкыдо.
Чумер лэсьтэм бере, пияшлэн сузэрез яке выныз чумер сиыны быдэс гуртэз ӧтчало. Выль кенэз адӟыны пичиез но, бадӟымез но вуэ. Чумерез выль кен котькуд пырисьлы сётэ, со вӧзын юрттыса бызьымтэ ныл сылэ. Ӧтчамъёс чумерез уксёен сиё.
Озьы ик люкаськем гурт калыкъёс пӧртэм шудонъёсын шудо. Егит пиос но нылъёс эчешон ортчыто. Соос споръясько, кинлэн, пе, табере черодэз выль кен вайыны яке бызьыны. Пиос курег лыен эчешо. Лылэн кык палтӥз кутӥськыса, сое чигто. Кинлэн лыез кузьгес кыле, со ик вормись луэ. Иське, со ик выль кен дораз ваёз. Нылашъёс нош курегпузэн споръясько. Котькудӥз ныл кияз курегпуз кутэ но огзэ борды огзэ шукко. Кинлэн курегпузэз пилиськоз, со ик бызёз.
Ужрад бер ӝытозь кырӟанъёсын но эктонъёсын кыстӥське.

Наталья Михайлова

Ангелина Снигирева
By Ангелина Снигирева Сентябрь 11, 2019 11:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<