Скалъёсты сюдэ робот

Ангелина Снигирева
By Ангелина Снигирева 12 сентября, 2019 09:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туэ шаерысьтымы хозяйствоосын 7 туала ферма усьтӥськиз ни. Кылем арня вискын выль комплекс ӧсъёссэ вӧлъяз Можга ёросысь «Родина» предприятиын.

Пудоез сюдэ туала робот
Туспуктӥз: Гурт удысъя но сиён-юонъя министерстволэн пресс-службаез

2004-тӥ арын Можга ёросысь «Родина» хозяйствоез банкрот кылёз ни кожало вал. Но сое ас кияз быгатыса кутӥз Пётр Анатольевич Санников. Со дырысен предприятие тодмантэм воштӥськиз. Гуртоос ӧз ик малпаллялэ, таӵе чебер ферма гуртсэс куке-соку шулдыртоз шуыса. Йӧл кыске робот. Выжез шунтӥськись. Вӧл-вӧл но югыт гидэ пудолы сиён пыртэ трактор, миксерысь сиён соку ик скалъёс азе чурен кисьтӥське. Сюроос сиемъязы сое пазяны шедьто ке, сиёнэз выж шорысь утялтэ, скалъёслы матэгес донге аспӧртэм робот. Шаерысьтымы Грак ёросысь «Вынлуд» хозяйствоын гинэ таӵе форма вал. «Родинаысь» специалистъёс отчы вуылӥзы. Со сяна, Башкирие но Татарстанэ туала фермаосы ветлӥзы на.
Фермаез усьтон нуналэ вуизы ёросъёсысь кужмо предприятиосысь кивалтӥсьёс но. Гуртоос абдраса ик учкизы: кызьы ай та роботъёс ужало.

— Таӵе фермаын ми но ужасалмы, только кудласянь кутскыны паймоно. Ми угось вуж амалъёсын ужаны дышемын. Роботъёсты нырысьсэ адӟиськомы. Выль фермаын уж трослы капчияз бере, оло, егитъёс дояркае лыктозы, татчыозь йырзэс урдыса, гид вӧзтӥ кошко вал, — шуо гуртысь скал кыскисьёс.
Туннэ хозяйствоын 170 ужась. Выль комплекс усьтӥськемен ватсаса 12 ужан инты кылдоз. Ферма 400 йырлы чакламын. 2 вуж гидысь пудоосты пыртӥзы ни. Ӝоген бордазы итӥськозы ӟеч выжыысь скалъёс. Зэм, азьвыл скалъёсты хозяйствоын думылыса возё вал ке, табере соос эркын улозы но роботъёсын кыскиськозы. Специалистъёс пусъемъя, 2 толэзь ӵоже пудо выль улонлы дышыны кулэ.
Вуж гидъёс но буш уз кыле — соосты кунян возён гидлы тупатозы. Али предприятиын 1 сюрс 900 йыр сюро таза пудозы. Та пӧлысь 808-эз кысконо скалъёс. Скал уллёзы йылоз эшшо 100 йырлы. Пётр Санников пусъемъя, кылем арын котькуд скаллэсь 6 сюрс 700 килограмм йӧл кыскизы. Туэ 8 толэзь ӵоже 4 сюрс 729 килограмм йӧл басьтӥзы ни, кылем арын сярысь котькуд скаллэсь 4 килограммлы уногес йӧл люкало. Шуныт но югыт гидын скалъёс эшшо но трос йӧл сётыны кулэ. Сиёнзы ӟеч. Куазь шоры учкытэк, туэ ю тысь но уно люкало — котькуд гектарысь 39 центнер урожай потто. Нош озимой 43 центнер сётэ. Пётр Санников верамъя, со ваньмыз валтӥсь агрономзылэн Михаил Пудовлэн тыршемезлы луыса.

— Кылем арын 152 миллион манет барыш поттыны быгатӥмы, — шуэ Пётр Анатольевич. — Азьланяз лыдпусъёсмес эшшо йылтэммы потэ. Со понна ик 2 ар талэсь азьвыл 400 йырлы чакласа ферма пуктыны кутскимы. Лэсьтӥськонэз ӝоггес йылпумъясалмы, но музъемен шуг-секытъёс кылдӥзы. Тыл юбоосты гинэ но интыысьтыз выжтоно луиз, та ужез зол ӝегатӥз.
Ферма «Родиналы» 52 миллион манет тыр усиз. Хозяйство сое быдэсак ачиз чотын пуктӥз. Кредитъёсы пырытэк. Котькуд копейказэс татын быгатыса кутыны тыршо. Кылсярысь, йӧл дунъёсты эгесан вылысь «Сарапул-молоко» заводэн быдэс арлы азьпала огкыл гожтӥзы, дунъёсты юнматӥзы — 1 литрзэ 23,5 манетэн, со НДС-эз лыдэ басьтытэк.

— Коллективе, командае оскымон. Гурт производстволэн азьланез бадӟым. Выль объектъёс пуктонъя проектъёсмы вань ни, — шуэ Пётр Санников.
Тазьы ужаны быгатэмзылы синмаськиз Гурт удысъя но сиён-юонъя министр Ольга Абрамова но.

— «Родина» кадь хозяйствоос тросгес луысалзы ке, гуртоослэсь улонзэс капчиятыны, шаермы понна тросгес лэсьтыны быгатысалмы. Юн хозяйствоосты маке лэсьтыны но ум куриське, соос асьсэос азинскыны туртто, калык понна сюлмасько, — шуэ министр.
Пуктӥськись хозяйствоослы лэсьтӥськонэ понэм уксёзылэсь оглюкетсэ берыктон вылысь министерство субсидия висъя. Туэ 94,2 миллион манет гуртоос дорозь вуиз ни. Миым 119,4 миллион манет висъяськиз. «Родина» пуктэм объектэз понна 8 миллион манет субсидия берыктыны малпа. Со уксё нош ик выльдӥськыны яралоз.
Нялтас вераса, туэ шаерамы 8 сюрс скал инты лэсьтыны чакламын. Можга ёросын гинэ ар пумозь 4 ферма усьтыны чакламын, оглом со — 1 сюрс 350 йырлы.

Елена Сараматова

Ангелина Снигирева
By Ангелина Снигирева 12 сентября, 2019 09:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<