Синпелетсэс выльдӥзы

Ангелина Снигирева
By Ангелина Снигирева Сентябрь 13, 2019 09:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Можга ёросысь Баль­ӟяшур гуртын кылем арняе сӥё-дано усьтэмын Быдӟым оже быремъёслы сӥзем синпелет. Гуртоослэсь малпанзэс быдэстыны луиз «Наша инициатива» кун проект улсын.

Синпелет — интыосысь ки­чӧл­тонъёсты улонэ пыӵатон­лы сӥзем проектъя Удмуртиын нырысетӥез быдэстэм уж. Сое дунъяны но калыкен пумиськыны вуылӥзы Удмуртиысь Правительстволэн Тӧроезлэн воштӥсез Анатолий Строков но Можга ёрослэн йырыз Александр Васильев. Ужрадэ быдэс гурт калык люкаськиз, анай-атайёссы доры нылпиоссы бертӥзы, палэнэ улыны кошкемъёс но юри лыктӥзы.

— Туэ тулыс калык кӧня ке мылкыдъёссэ усьтӥз вал: нылпи площадка кулэ, шур вамен тыметэз тупатоно, — шуиз Горняк муниципал кылдытэтысь специалист Любовь Михайлова. — Но тросэз дурбасьтӥзы Быдӟым оже бырем гуртоослы синпелетэз выльдонлы. Вужез синпелет 1968-тӥ арын лэсьтэмын вал, со кытӥ-отӥ пилиськылӥз ни, арлы быдэ сямен буяно, утялтоно луылӥз.

Лэсьтӥськон ужъёс 184 сюрс 534 манет тыр усизы, со пӧлысь 126 сюрс 934 манетсэ висъяз элькун. Кылемзэ люказ гурт калык но муниципал кылдытэт. Бальӟашурын 180 пала адями улэ, 40 хозяйство. Озьы котькуд хозяйствоысь быдэн 400 манет бичазы, трос нылпиё семьяос но огназы улӥсьёс кӧня быгатӥзы сомында сётӥзы. Озьы гуртоос 19 сюрс 200 манет люканы пӧрмытӥзы, сомындагес ик коньдонэн юрттӥзы гуртысь 4 ужбергатӥсьёс.

— Лэсь­тӥськисьёс туж шаплы ужазы, — вераз Бальӟа­шурысь ветеран огазеяськонлэн кивалтӥсез Евдокия Мигуцкая. — Кыӵе шумпотӥм, выль синпелетэз адӟыса. Куд-огез синвуаськиз но, угось ожмаськон вань семьяос вылтӥ ортчиз, котькудӥзлы кайгу вайиз. Быд­ӟым оже Бальӟа­шурысь ог 50 мурт кошкиз, 29-эз ӧз берытскы. Ваньзылэн нимтулъёссы выль синпелетын гожтэмын. Гуртын вань на ож мышкын тыршемъёс, ӧжыт ӧвӧл ож вакытэ вордӥсь­кемъёс. Озьы та синпелет вань калыкмылы бадӟым кузьым луиз.

Вужез синпелет

Ужрад ортчиз кыр­ӟанъёс­ын, сюлмысь потӥсь тау карон кылъёсын, инкуазьын пӧзьтэм ӝукен утялтскыса. Табере бальӟа­шуръёс­лэн выль ужъёс борды бась­тӥськыны мылкыдзы эшшо но бурдъяськемын.

Выль синпелет

— Гуртамы трос калык улэ ке но, клубмы ӧвӧл, люкаськылыны нокытчы, — веранзэ азинтэ Е. Мигуцкая. — Кылем арын дорамы выль ФАП усьтӥзы. Медпунктлэн азьвыл юртэз буш сылэ, сое тупатоно шуиськомы. Малпанмылы дурбасьтӥз Анатолий Строков но.

Бальӟашуръёслэсь адӟем каризы ни Можга ёросысь мукет гуртъёс но. Синпелетъёссэс выльдыны курыса, 80 пала куриськон люкаськиз ни, пе.

Тодэ вайытон вылысь: «Наша инициатива» кун проект чотын пӧр­тэм ужъёсты лэсьтыны луэ — сюрес тупатыны, нылпи площадка ӝуты­ны, юртъёсты выльдыны. Со понна ӟеч проект гожтоно, ужъёсты быдэстыны чаклам коньдонлэсь оглюкетсэ калык ачиз бичаны кулэ.

Ангелина Снигирёва

Туспуктэмъёс басьтэмын Можга ёрослэн «ВКонтакте» бамысьтыз

Ангелина Снигирева
By Ангелина Снигирева Сентябрь 13, 2019 09:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<