Пероез ненег но лэчыт вал

Ангелина Снигирева
By Ангелина Снигирева Сентябрь 20, 2019 13:25

23-тӥ куарусёнэ 50 ар талэсь азьло Дэри ёросысь Куштошур (Симанки) гуртын вордскиз Эрик (Валерий) Батуев (1969-2002) — кылбурчи, прозаик, журналист, туспуктӥсь, крезьгурчи… Кин меда эшшо луысал со, кытын воректысал на нимыз, 32 аресказ улонэз кӧшкемыт учырын уретэмын ӧй луысал ке?

Э. Батуев
Басьтэмын «Удмурт дуннелэн» архивысьтыз

Эрик Батуевлэсь нимзэ утьыса возё вордӥськем Дэрияз. 2005-тӥ арысен ёрос администрация адӟем карымон, калык понна пайдаё уж нуись адямиосты Э. Батуев нимо премиен пусъе. Туэ та премиен пусъем муртлэн нимыз тодмо луоз 24-тӥ коньывуонэ. Та кичӧлтонлы дурбасьтыса, Э. Батуев нимо премия кылдытӥз «Удмурт Кенеш» огазеяськон — сое арлы быдэ сётъяло усто журналистъёслы.

Со сяна, котькуд сӥзьыл Дэри ёросын ортчо Э. Батуевлы сӥзем лыдӟонъёс. Туэ кылбурчилы сӥзем ужрадъёс коньывуонэ но шуркынмонэ радъяськозы — соку Дэри ёросын ортчытӥськоз удмурт культуралы сӥзем толэзь.

Нош та вакытэ ёросысь школаосын пӧртэм ужрадъёс ортчо, библиотекаосын адӟытонъёс радъясько.

Пиезлэсь творчествозэ калыке вӧлмытыса кема аръёс ӵоже улӥз кылбурчилэн анаез. Анна Филипповна Э. Батуевлэсь рукописьёссэ, туспуктэмъёссэ люказ, газетъёсын печатлам материалъёссэ огазе бичаз. Со тыршемъя ик потӥзы Э. Батуевлэн произведениосыныз
«Уйшор вуюись» но «Сюлэмлэн сэрего яръёсыз» книгаос. А. Батуева ик вал Э. Батуев нимо ёрос премилэн нырысетӥ лауреатэз. Жаляса верано, кылем арын со улонысь кошкиз.

— Анна Филипповна Э. Батуев сярысь урокъёсын Пичи Пурга ёросысь школаосы ӵем вуылӥз, — тодаз вае Пичи Пурга ёрос библиотекалэн кивалтӥсез Людмила Шумилова. — Со, секыт висьыса но, ужзэ ӧз кушты. Угось Валерий улонысь кошкем бере Анна Филипповна пиезлэн улонэныз улӥз, шуыны луоз, озьы солэсь улонзэ кузёмытӥз кадь.

«Удмурт Кенеш» огазеяськонлэн Дэри ёросысь ёзэныз кивалтӥсь Лидия Биянова верамъя, кылбурчилэсь но солэн анаезлэсь, Анна Батуевалэсь, шайгуоссэс туэ но утялтӥзы ни,
котыразы плитаос вӧлдӥзы, выль кенерен котыртӥзы.

Э. Батуев котькинэн вераськон кыл шедьтылӥз. Ачиз быгатӥз Москваысь кун университетысь журналистикая факультетэ пырыны. Дышетскыкуз дворникын но ужалляз, трос вераськылӥз начар улӥсь муртъёсын. Номырлэсь кышкатэк, пӧсь интыосын ивор люкалляз — командировкаосы со вуылэмын Чечняе, Таджикистанэ, Турцие, Афганистанэ, Югославие, Иранэ, Палестинае, Израиле. Статьяосыз печатласькизы Россиысь трос тиражен потӥсь газетъёсын — «Аргументы и факты», «Московский комсомолец», «Московские новости», «Новое время» но мукет изданиосын. Ӵош ужась эшъёсыз огкылысь пусъё: Валерий Батуев котьку, пуляослэсь
кышкатэк, югдурез котыр ласянь возьматыса, зэмлыкез усьтыны тыршиз. Кыӵе гинэ адямиосын ӧз пумиськылы та востэм удмурт пияш — нокинлэсь ӧз кӧбера.

Лэчыт визьмо журналист гожъяз на яратон, улон, котыр адямиос сярысь сюлмез бугыртӥсь кылбуръёс, пичи веросъёс. Солэн чеберлыко произведениосаз но ваньзэ котыр ласянь адӟыны быгатэмез шӧдӥське. Сое шырыт поэт ниманы луоз — мылкыдэз возьматон понна кӧня ке чур гинэ но окме вал. Удмурт кылын гожтэм зарни моностихез — «Басьты киостэ но ӟыгырты астэ» — ӵапак Э. Батуев гожтыса кельтӥз, одӥг ненег чурен возьматӥз адямилэсь пуш дуннезэ, шӧдонзэ, кусыпъёсты.

Анастасия Шумилова

Ангелина Снигирева
By Ангелина Снигирева Сентябрь 20, 2019 13:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<