Нылпи садэ — 16 иськеме?!

Ангелина Снигирева
By Ангелина Снигирева Сентябрь 27, 2019 14:58

Редакцие, юрттэт курыса, жингыртӥз Балезино ёросысь Миктапи (Нововолково) гуртысь лыдӟисьмы Галина Корепанова — нылпи садмес пытсаны медо, юрттэ бӧрдонмес бадӟым кивалтӥсьёс дорозь вуттыны, вазиськиз со.

Миктапиысь нылпи сад аварийной лыдъямын
Фото: Е. Сараматова

Мылкыдэз уг юало

2013-тӥ арысен Миктапи гуртысь калык вень йылын кадь улэ. Со аре татысь школазэс пытсазы, юртсэ аварийной карыса. Озьы 36 пиналэз кӧня ке рейсэн табере 6 иськеме, Вӧёгурт школае, нулло. Школа пытсаськемен, мукет гуртэ улыны кошкиз трос нылпиё 5 семья. Табере, нылпи садэз пытсамен, 12 пинал кин ӵыжы-выжыосыз дорын, кин эшъёссы дорын нуназезэ улэ. Гужем нокин ӧз малпалля ай, шуак садтэк кылёзы шуыса. Сӥзьыл татчы эшшо 5 пиналэз кутыны медо вал. Эшшо 4-ез пумен будо.

Воспитательёс тулыс садзэс буязы, гужем приёмка пыр потӥзы вал.

— Котельнойысь трубамы пилиськемын, сое воштыны кулэ шуыса, ёрос администрацие вазиським. Труба но шедьтӥмы ни вал. Пуктонэз гинэ кылиз. Лэсьтэм интые, ужмес дугдытӥзы, — шуэ садэн кивалтӥсь Марина Сычугова.

Ёрос администрациысь дышетонъя управление юртлы экспертиза лэсьтоно кариськиз. Соя 1990-тӥ арын коръёслэсь ӝутэм сад 73 процентлы уродмемын шуыса пусъемын. Управлениен кивалтӥсь Валентина Скобкарёва верамъя, коръёсыз мычисько ни, пе. Соин ик 3-тӥ сентябрьысен ужзэс дугдытӥз. Нош гурт калык верамъя, пуктэмез ик сыӵе вал — коръёс огъёсыз зӧкесьгес, мукетъёсыз кырыжесьгес.

— Азьвыл аръёсы коръёс шоры малы ке нокин ӧз учкы, — огымысь вазё садэ люкаськем анай-атайёс, воспитательёс, арлыдоос. — Кылем арын но Роспотребнадзор нокыӵе предписание ӧз гожты вал. Экспертизалы ум оскиське. 2011-тӥ арын гинэ юртэз рос-прос эскеризы, техпланэ соку гожтӥзы, 30 процентэз юрт ярантэм луэмын шуыса. 8 ар куспын 73 процентозь быроз шат? Эстытэк, утялтытэк возьысалмы ке. Липетэз но уг вия. Юртын котьку шуныт. Фундаментэз юн, пилиськем, езам местаез ӧвӧл. Экспертизаын соиз но вань: документъёсын воксё но милям садмы пусъемын ӧвӧл — Кипрята гуртысь садлэн нимыз кӧня ке интыын гожтэмын. Соослы но сад 73 процент ярантэм шуо, соослэсь но туэ пытсаны медо.

Экспертизаен соглаш кариськытэк, анай-атайёс уксё люказы но Ижысь экспертъёсты ӧтизы. Таосыз чакламъя, юрт 40 процентлы гинэ быремын — ужаны со быгатэ. Но таиз экспертиза шоры ёрос администрациын кизэс шонто. Садзылэсь ужзэ дугдытонъя постановление но гожтӥзы ни.

— Гурт калыкез сходэ ӧз люкалэ, малпанмес ӧз юалэ. Ӝыныез калыкты вахтаын, пе. Колхозмес быдтӥзы, фермаосты, тысь куасьтон но шертон комплексъёсты металлоломе кесяса нуизы бере, калыклы кытын ке ужаны кулэ ук! 106 коркан 275 кузя улӥськомы на. (Кемалась ӧвӧл 157 корка лыдъяськиз ай.) Прописать карем адямиос ог 400 кузя. Кызьы сомында адямилэсь мылкыдзэ юатэк? Сад ворсаськиз ке, гуртмы воксё быроз ук, — шуо гуртоос.

Миктапиысь Быдыпие Вӧёгуртысь автобусэн

Постановлениын пусъемын: дышетонъя управление лэзиз ке, садэз выльысь усьтозы. Но управлениен кивалтӥсь Валентина Скобкарёва туннэ нылпиосты Миктапи гуртлэсь 16 иськемлы палэнэ интыяськем Быдыпи гуртэ нуллыны амал утча.

Гуртоос нылпи садэз утён понна нюръясько
Фото: Е. Сараматова

— Вӧёгурт школа-сад матынгес, отчы но нылпиосты интыяны луысал, но отчы асьсэлэн пиналъёссы уг тэро. Соин ик Вӧёгуртэ 50 интылы нылпи сад пуктыны чакласькомы. Со дырозь Миктапиысь нылпиос Быдыпие ветлозы. Соосты отчы Вӧёгурт школалэн автобусэз нуллоз. Али тендер ялэмын пичиосты нуллонъя кресло басьтон понна.

Быдыпи гуртысь сад 35 интылы чакламын, нош ветлэ 23 пинал. Сюрес начар, зор-котэн пыремзы-потэмзы куддыр уг луы, эшшо ке трасса вылтӥ ортчоно. Автобуслы 10 ар, ӵемысь тӥяськылэ, пыдэсыз сисьмемын. Вань пичиос одӥг рейсэ уз но тэре. Одӥг автобус садэ но, школае но мед вуттӥськоз шуыса, гуртысь тэшкылиосты со 7 часын ӵукна басьтыны но гуртэ берен 16 часын вуттыны кулэ ни. Куд-ог анай-атайёс палэнын ужало, соос 16 часлы нылпизы дуре лыктыны уз быгатэ.

Нылпиосты клубысь кутозы шуыса верасько, отын возьманы шуныт луоз. Но туннэ клубенызы но бадӟым йыр висён кылдэмын. Угось со азьвыл черклэн юртаз интыяськемын. Садэн ӵош эстӥське вал. Табере сое но ворсаны медо, котырзэ азьвыл конторалэн юртаз поттыны но ужез отын азинтыны куро. Но контораын сценаез но, калыклы люкаськон интыез но ӧвӧл. Клубен кивалтӥсь Надежда Князева верамъя, конторалэсь но юртсэ тупатъяны кулэ. Ремонт асьтэос ик лэсьтэ, шуо, пе. Контора туннэ уг шунтӥськы. Соин ик куд-огез сад котыртӥ гожеръя ни, татысь трубаоссэ конторае нуыны уз луы-а меда шуыса.

— Ми садмес утьыны выриськомы, нош кин ке кесяны медэ ни! Ми выль сад но ум куриське ук. Тазэ утьыны мед юрттозы шуыса, бӧрдӥськомы. Малы нокин уг кылы? Школамес пытсакузы, ёрос администрация оскытӥз, выль школа пуктозы шуыса. Со туннэ ке но ӧвӧл. Садлэн юртэз толалтэ эстӥськытэк кынмиз ке, сисьмоз, — синвуэн воньдылыса, шуэ калык.

Ужтэк кылёз 2 мурт

Нылпи садын ужасьёс клубез но асьсэ липет улазы пыртыны дасесь. Инты ваньзылы тырмоз, шуо. Ас вакытаз угось сад 50 интылы чакламын вал. Котельноез возён туж дуно усе ке, тылын но шунтӥськом, пе. Газ гумыос но 15 метр кемын гинэ — шуныт котькуд корка пыртэмын ни. Клубтэк но кылемзы уг поты. Нылпиос угось кружокъёсы ветло. Арлыдоос концертъёс пукто, репетициос ортчытъяло, ёрос конкурсъёсын «Купанча» ансамбленызы вормыло. Берпум шумпотонмес талалозы ни шат, шуо.

— Пуштытъям гуртын кадь улӥськомы: ферма, школа бервылъёс гурт шорын ик. Сад но клуб пытсаськизы ке, та юртъёсты ур-вар кесялозы. Деревня сыӵе жаль потэ! — ӝожомо гуртоос.

Нылпи садэз воспитательёс утялтыса возё
Фото: Е. Сараматова

Сад ворсаськиз ке, воспитательёс но шуге-леке вуозы. Туннэ гуртын 8 муртлы уж вал ай. Валентина Скобкарёва верамъя, ужасьёс пӧлысь 2-ез пенсиын ни, 2-ез гинэ, пе, ужтэк кылёзы. 4 муртлы уж сюроз. Но соослы но Быдыпи гуртысь садын быдэс ставка нокин сётыны уг малпа. Кылсярысь, 3 нылпиен анайлы, воспитательлы Надежда Чирковалы 0,4 ставка гинэ ӵекто. Маин мон пиналъёсме сюдыны кулэ, пайме со.

Туннэ дышетонъя управление анай-атайёслэсь нылпиоссэс автобусэн нуллыны соглаш луэмзэс верась кагазъёс бича ни. Куд-огез чутрак пумит луэ. Калык прокуратурае но, ёрос администрацие но, Москвае но гожтэтъёс ысъя, садзэс утьыны курыса.

— Садын 8 ужась, соос вань калык шат? Кызьы гурт быроз? Милям вань гуртъёсмы, кытын дышетонъя учреждение но ӧвӧл, но калык улэ, — аслэсьтыз вера Валентина Скобкарёва. — Садэз МЧС усьтыны уз лэзьы. Нылпиос понна кыл кутӥськомы. Липетэз коръёс вылэ зӥбе — куашканы быгатоз. Соин ик решение кутэмын вал, нылпиосты кутэмысь дугдоно шуыса. Трос гуртъёсысь 500-лэсь ятыр нылпиосты 18 автобус дышетонъя учреждениосы нуллэ. Вӧёгуртысь путёвкалы черод возьмась анай-атайёс но мукет садэ ветлыны дасесь. Нош Миктапи гуртысь демографиез учконо ке, 2024-тӥ арозь отчы 1 пинал кыле.

Гуртоос лыдъямъя, вуоно арын садэ 20 пинал ветлыны кулэ. Кылем арын вордскемъёсыз 5 кузя. Туэ 2-ез вордскизы ни. Эшшо 3 семья нылпиосын татчы пуктӥськыны кутскиз. Анай-атайёслэн сётскемзы уг поты. Садзэс утён вылысь судэ вазиськыны мед.

Елена Сараматова

Ангелина Снигирева
By Ангелина Снигирева Сентябрь 27, 2019 14:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<