Нылпиослы шудон инты кулэ

Ангелина Снигирева
By Ангелина Снигирева Сентябрь 20, 2019 15:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаркан ёросысь Кыква палъёс быдэс гуртэн пырисько «Интыосысь кичӧлтонъёс» («Наша инициатива») кун проектэ. Кичӧлтонзы быдэсмиз ке, вуоно арын детсадзылэн азбараз туала нылпи площадка кылдоз.

Кыкваысь нылпи садын шудон площадказы урод ни
Фото: Ольга Малышева

— Туж шумпотӥськомы та проектлэн пыӵаны кутскемезлы, — веранзэ мытӥз Кыква поселенилэн йырыз Яков Батаногов. — Со луонлык сётэ калыклэсь кичӧлтонъёссэ быдэстыны, гуртлэсь туссэ воштыны, чебертыны. Калык ачиз тодэ ук, малы гурт уката кулэяське. Озьы гуртоос асьсэос пырисько улонзэс ӟечомытонэ, палэнысь бадӟым кивалтӥсьёсты курытэк-ӧтьытэк. Кылсярысь, нылпи садмылэн азбараз шудон интыос вужмемын ни, соосты выльдыны-тупатъяны луонлык та дырозь ӧм шедьтылэ. Гурт калыкен кенешыса, огкылэ вуимы: дасялом детсадлэсь азбарзэ выльдонъя проект, соин пыриськом конкурсэ. Отын кичӧлтонмы вормисе потӥз ке, вуоно арын март толэзьысен гужем пумозь детсадамы туала куронъёслы тупась площадка кылдоз, — шуиз поселенилэн йырыз.

Нылпи площадкаез ӝутыны ваньзэ-ӧвӧлзэ ог 290 сюрс манет уксё кулэ луоз. «Интыосысь кичӧлтонъёс» кун проектлэн куронъёссэ лыдэ басьтоно ке, коньдон висъяны кулэ интыосысь аскивалтонъя ёзъёс но, ужбергатӥсьёс но, гуртоос но. Но тужгес бадӟым юрттэт висъяське кунлэсь. Озьы Кыкваын нылпи площадкаез ӝутыны кун ласянь 195 сюрс манетлэсь ятыр висъяны чакламын. Я. Батаногов ивортэмъя, кылемез но уксё капчиен люкаськоз: 30 сюрс манетсэ висъялоз гурт поселение, тамында ик бичалозы калыклэсь (гуртолы быдэ 181 манет). Озьы ик юрттыны дась луэмзэс веразы поселениысьтызы ужбергатӥсьёс: уксёзэс но сётозы, лэсьтӥськон ужъёсты быдэстыны но юрттозы, кулэ луись техника но висъялозы.

Зэм, гуртоос пӧлысь куд-огез мылкыдзэс шараязы: площадкаез нылпи садлэн азбараз пуктоно ке, отын шудыны быгатозы-а, шуом, детсадэ ветлӥсьтэм, бадӟымъёсызгес пиналъёс? Детсадлэн азбарез котькинлы усьтэмын уз лу ук.

— Калык пӧлын валэктон уж нуимы: пумиськонъёс ортчытӥмы школаын но, детсадын но, поселениысьтымы ветеранъёслэн огазеяськоназы но, — пусъе Кыква поселенилэн йырыз Я. Ба-
таногов. — Та нырысетӥез кичӧлтонмы, со улонэ пыӵаз ке, туж умой луоз ни. Угось дыр вуэмын нылпи садлэсь азбарзэ выльдыны. Нош азьланяз «Интыосысь кичӧлтонъёс» кун проектэ пыриськыны быгатомы ни мукет кичӧлтонъёсынымы, шуом, гуртын спортъя площадка кулэ но трос мукет. Гуртоос валазы, пумит ӧз луэ уксёзэс висъяны. Пиналъёс но, анай-атайёс но чидатэк витё ни та кичӧлтонмылэсь пыӵамзэ. Оскисько: ужмы пӧрмоз.

Елена Никитина

Ангелина Снигирева
By Ангелина Снигирева Сентябрь 20, 2019 15:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<