Нимыз улоз котьку

Ангелина Снигирева
By Ангелина Снигирева Сентябрь 13, 2019 10:23

Ижысь «Олимпиец» йӧ дворецын 2-тӥзэ ортчиз следж-хоккеен шудонъя ӵошат­скон. Со сӥземын вал Виктор Кузнецовез буре ваёнлы.

Шаерысьтымы слежд-хоккеистъёс Россиын кужмоосыз луо
Туспуктэм: басьтэмын «Удмуртия» следж-хоккей огинлэн «Вконтакте» бамысьтыз

Виктор Кузнецов — калыккуспо классъем мастер, Удмуртиысь Паралимпийской комитетлэн кивалтӥсез, бадӟым пытьы кельтӥз Россиысь параспортэз азинтонын. Удмуртиысь но Россиысь следж-хоккейлы кутскон сётӥсь луэ. Со сюлмаськемен арлы быдэ Ижын ортчылӥз Удмурт Республикалэн кубокез понна нюръяськон, бӧрысь сое буре ваён ужрадлы сӥзизы. 2017-тӥ арын Виктор Николаевич улонысь кошкиз.

3 нунал ӵоже йӧ вылын кужмо нюръяськон мынӥз. Шудӥзы элькунысьтымы «Удмуртия», Ханты-Мансийскысь «Югра», Оренбург улосысь «Ястребы» но Москваысь «Белые медведи» командаос. Спортсменъёслы вормонъёс но капчи мылкыд сӥзизы Правительстволэн Тӧроезлэн воштӥсез Александр Свинин, шаерысьтымы нимо-дано паралимпиец Владислав Лекомцев, Пичи Пурга ёросысь Брангуртысь песянайёс.

— Туэ 10 ар тырме Удмуртиын следж-хоккей кылдэмлы, — шуиз Александр Свинин. — В. Кузнецовлэн мытэм ужез азьланяз но азинтэмын луоз. Таӵе ӵошатсконъёс шаерысьтымы но Россилэн сборной командаослы юнгес кариськыны юртто. Асьме шаерын ик нырысьсэ кылдытэмын следж-хоккеен шудонъя нылпи команда, мукет улосъёслы со адӟем карымон луэ. 11 пинал пӧлысь 5-ез — гуртысь. Пӧлазы одӥг ныл но вань.

— Та ӵошатскон Россилэн чемпионатэзлы дасяськон выллем луэ, — шуиз следж-хокееен шудонъя «Удмуртия» клублэн президентэз Павел Вечтомов. — Основной командаын шудӥсьёс октябрь толэзе Тула улосысь Алексин городэ Россилэн чемпионатаз мынозы. Сюрес вылэ потыны дасясько пиналъёс но: октябре соос Казаньын шудозы, декабре — Сочиын.

Шудон 3 люкетлэсь, котькудӥз 15 минутэн кыстӥськиз. Бадӟым хоккейын сямен ик следж-хоккейын но спортсменъёс 6 кузя шудо, одӥгез капка возьма. Нырысь нуналаз «Удмуртия» команда «Юграен» пумиськылӥз. Шудон 4:0 лыдын йылпумъяськиз.

— Ӵошатскон Удмуртиын ортче бере, вормон понна нюръяськем потэ, — шуэ командалэн валтӥсь тренерез Александр Чужанов. — Вазенгес командаямы бадӟым воштӥськонъёс ортчизы, 4 валтӥсь шудӥсьёсмы мукет улосэ кошкизы. 2014-тӥ арын Паралимпиадаын азвесь медаль басьтыса, бертэмъёс пӧлысь капка возьмасьмы гинэ — Владимир Каманцев — кылемын. Кошкемъёс интые егитъёс вуизы, соос но шудыны быгатэмзэс, юн сямзэс возьмато. Кылем арын дуннелэн чемпионатаз 2 мурт пыриськиз. Команда егитоме, Россиысь следж-хоккеистъёс пӧлын вылӥ интыосты возьыны тыршиськомы. Та спортсменъёс улонын котькыӵе шуг-секытэн пумисько ке но, йӧ вылын кужмо луо, синъёссы чиляло.

Шаерысьтымы спортсменъёс та ӵошатсконын малпанзэс быдэстыны ӧзгес быгатэ. «Белые медведи», «Ястребы» командаосты вормыса, финалэ шедизы. Жаляса верано, «Югра» командалы 2:0 лыдын келязы но 2-тӥ инты басьтӥзы. Озьы В. Кузнецовлы сӥзем ӵошатсконын вормиз Ханты-Мансийскысь «Югра» команда, нош 3-тӥ инты басьтӥз Москваысь «Белые медведи» команда.

«Удмуртия» командалэн туж потэ вал вормемез, со ик люкетӥз но, дыр, зарнияськыны, шуэ валтӥсь тренер. Одӥгез шумпоттӥз: ӵошатсконэ пыриськисьёс но пинал следж-хоккеистъёс ваньзы ӟеч тодо Виктор Кузнецов сярысь. Озьыен, шаерысьтымы дано спортсменлэн нимыз уз вуны.

Валентина Емельнова

Ангелина Снигирева
By Ангелина Снигирева Сентябрь 13, 2019 10:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<