Мылкыд ке вань, гурезез берыктод

Ангелина Снигирева
By Ангелина Снигирева Сентябрь 9, 2019 16:59

«Удмурт Кенеш» огазеяськонлэн паськытатэм кенешез ортчиз «Лудорвай» музей-заповедникын. Тросэз кенешчиос тазэ пумиськонэз аспӧртэм «перезагурзка» шуизы . Малы сыӵе малпанэ вуизы?

Кенешчиос удмуртлыкез азинтон пумысен ужпумъёс сярысь верасько
Фото: Наталья Михайлова

Кытчы мыноно?

«Удмурт Кенеш» огазеяськон бурд улаз огазея быдэс Россиысь удмуртъёсты. Зэм, удмурт диаспораослэн азьветлӥсьёссылы котрес ӝӧк сьӧрын ӵем пумиськылыны уг кылды. Но таяз соос но вуизы. Угось трос сюлпмаськонъёс, эскероно ужпумъёс люкаськиллям.
Пумиськон кутскиз Глазовысь «Иднакар» музейлэн «Лудорвайын» усьтэм адӟытонэз бордысен. Со сярысь вакчияк мадиз «Иднакар» музейлэн кивалтӥсез Ольга Арекеева. Люкаськемъёслы паймымон мылкыд кузьмазы на вашкала удмурт кырӟанъёс. Кылсярысь, одӥгзэ (пӧйшуран гурез) 1937-тӥ арын экспедиция дыръя гожтӥллям вылэм ай. Вашкала гуръёсты кылзон кенешчиослэсь мылкыдзэс бугыртӥз, огъя ужпумъёс бордын ужаны бурдъяз.

Удмуртилэн кунлык басьтэмез дырысен 100 ар тырмонлы сӥзем ужрадъёслы старт туэ ноябре сётэмын луоз, — пусйиз «Удмурт Кенеш» огазеяськонлэн кивалтӥсез Татьяна Ишматова. — Соин валче асьмелы, нырысь ик, вань удмуртъёслэсь ӧтчамзэс радъяно луоз. Малпаськоно: мар асьмеды, анай кылмы но культурамы сяна, огазея? Мар уг тырмы? Кыӵе зол но ляб интыосмы?
Но люкаськемъёс нырысь ик Кун Думаысь депутатэз Алексей Загребинэз кылзоно криськизы. Алексей Егорович мадиз, кызьы Россилэн парламентаз шаерысьтымы калыклэсь кулэяськонъёссэ уте. Кенешчиос тужгес куректӥзы дышетон сярысь законэ воштонъёс пыртэм пумысен.

Законэ воштонъёс парламентэ нырысьсэ вуизы гинэ, валамон ни вал:соосты кутыны уг яра. Соин мон но ачим аслым шуи: та закон понна куараме уг сёты. Ма, вань национальной республикаосысь депутатъёс пумит луизы. Соин ик кылдытэмын вал нимысьтыз комиссия. Быдэс толэзь ӵоже ӝыт 10-11 часозь ужаллямы, споръяськимы, законэз быдэсак воштӥмы. Зэм, со ӟеч пӧрмиз шуэммы али но уг луы. Но кылдытэмын кабъёс. Со кабъёсъя асьмелы ужаны кулэ. Бен, табере 1-тӥ но 5-тӥ классэ пиналэз сётон азьын анай-атайёс заявление гожтоно луо, кыӵе анай кылэз пиналзы дышетоз. Ӟуч кыл но табере мукет кылъёсын оградын — анай кыл. Но мае быръёно — та пумысен нылпиос сюлмаськыны кулэ ӧвӧл, сюлмаськоно милемлы, азьветлӥсьёслы. Малпаськоно, кызьы законъя улоно, кызьы бергано. Но вунэтоно ӧвӧл К. Гердлэсь кылъёссэ: ассэ валаны тыршись калык гинэ азьлань вамышъя.
Алексей Егорович озьы ик Удмуртилэн кунлык басьтэмез дырысен 100 ар тырмон пумысен малпаськыны дэмлаз. Мар лэсьтэмын та 100 ар ӵоже? Нош мае ӧм пӧрмытэ? Кыӵе сюресъя мыноно?

Кужмо-а, ляб-а?

Удмурт движениен герӟаськем юанъёслы валэктонъёс «кенешчиос» , группаослы люкиськыса, утчазы. Татьяна Ишматова «Удмурт Кенешлы» SWOT-анализ лэсьтыны дэмлаз. Озьы люкаськемъёс «Удмурт Кенеш» огазеяськонлэн ужезлы анализ лэсьтӥзы. Шуом, кыӵе ужпум ас азяз пуктэ? Огазеяськонлэн уставаз гожтэмын: удмурт калыклэсь сям-йылолъёссэ, кылзэ утён но азинтоно, калыклэсь асваланзэ но лул-пуш дуннезэ ӝутоно, национальной кадръёсты будэтоно.
Быдэсъясько-а та ужпумъёс? Кыӵе кужмо но ляб палъёсыз «Удмурт Кенешлэн»? Мар юрттэ удмурт огазеяськонлы ужаны но мар люкетэ?
«Кенешчиос», 6 группалы люкиськыса, ужазы: уйпал, лымшор, шор ёросъёс, палэнын улӥсь удмуртъёс, Ижысь удмурт активистъёс, удмурт движениысь аксакалъёс — азьвыл кивалтӥсьёс. Нош бӧрысь котькуд группа аслаз ужезы йылпумъянъёс лэсьтӥз — азьланезлы ужпумъёс пуктӥз.
Тросэз кенешчиос сюлмаськемзэс веразы: калыкез удмурт движение кыскыны, мылкыдзэ ӝутыны капчи ӧвӧл. Огшоры калыклы удмурт огазеяськонъёслэн ужзы сокем тунсыко но ӧвӧл кадь, соос палэнысен учко, асьсэос маке лэсьтыны уг дырто. Нялтас вераса, тросэз «кенешиос» пусйизы: общественной уж, нырысь ик, мылкыд бордысь потэ. Мылкыд ке вань, нокыӵе коньдонтэк но гурезьёсты берыктыны луоно. Нош мылкыд ӧвӧл ке, коньдонэн но сюлме пырымон уж уд лэсьты.
«Удмурт Кенеш» — республикаясьтымы одӥгез тужгес бадӟым огазеяськон.
Солэн кужымез — ёросъёсын но городъёсын рос-прос радъям ёзъёсыз, пӧртэм удысъёсъя адӟем карымон азьветлӥсьёсыз, калыкен но интыосысь властен кусып воземез, азяз сылӥсь ужпумъёсты валамез но сое быдэстыны тыршемез. Та сярысь пусйизы тросэз «кенешчиос». Ӟеч уж радъямын палэнысь удмуртъёсын, диаспораосын.
Нялтас вераса, палэнын улӥсь удмуртъёслэсь малпанъёссэс кылзыны тужгес тунсыко вал. Татарстанысь удмуртъёслэн автономизылэн быдэсъясь дыректорез Марина Иванова пусйиз: туннэ нуналлы Татарстанысь, Башкортостанысь, Пермь улосысь удмуртъёслэн огазеяськонъёссы властьлэн ёзъёсаз пыремын. Соин ик отысь удмурт диаспораослы ужаны капчигес. Нош Свердловск улосысь удмуртъёс ас понназы ужало, соин соослы секытгес йӧтэ.

Группаосын кенешон
Фото: Наталья Михайлова

Марина Иванова пусйиз, умой луысал, Удмуртилэн палэназ улӥсь удмуртъёс понна но кыӵе ке грантъёс луысалзы ке. Татарстанлэн палэназ улӥсь бигеръёс понна сыӵе грантъёс вань, пе. Егит азьветлӥсь пусйиз на: Казане дышетскыны мынэм удмуртъёс асьсэ выжызэс зол шӧдо, ог-огзэс утчаны кутско, удмурт ужрадъёсы вуылыса, бурдъясько, шуо: «дорам бертӥ кадь». Егит азьветлӥсь Удмуртиысь эшъёсызлы дэмлаз на спонсоръёсты кыскон бордын тросгес ужаны. Татарстанысь удмурт огазеяськон та амалэз мыло-кыдо кутэ.
Кенешчиос «Удмурт Кенешлэсь» ляб интыоссэ но ӧжыт ӧз пусъе. Огласянь, калыкез вырӟытыны секыт, мукет ласянь, асьсэлы но интыосысь азьветлӥсьёслы чырмытгес кариськоно. Пусйизы созэ но: удмурт огазеяськон сярысь ӵемысь тодазы ваё быръёнъёс азьын гинэ. Огазеяськонлэн уйпал ёросъёсысь азьветлӥсьёсыз пусйизы: поколениос вискын герӟет ӧвӧл. Нош огазеяськонын мӧйыос гинэ ужазы ке, команда уз пӧрмы. Нош ик тодэ ваемын вал взносъёс сярысь. Оло, «Удмурт Кенешлэн» ёзчиосыз кыӵе ке пичи взносъёс тырысалзы ке, коньдон ласянь шугъяськонъёс ӧй луысалзы…

Мӧзмон… бурдъя?

«Удмурт Кенешлэн» кивалтӥсез Татьяна Ишматова ӧз ваты: огазеяськонэ тросэз вазисько ,коньдонэн юрттэт курыса. Но «Удмурт Кенеш» азьын воксё мукет ужпумъёс сыло, татын адямиос ас мылкыдзыя ужало, удмурт огазеяськонлэн ставкаосыз но ӧвӧл. Тросэз мероприятиос ортчо грантъёс чотын. Уноез лэсьтӥське нимаз адямиослэн мылкыдзы, улонэз ӟечгес но тунсыкогес карыны тыршемзы бордысь.
«Удмурт Кенеш» огазеяськонлэн бухгалтерез Алевтина Чиркова вакчияк ивортӥз ассоциацилэн берло аръёсы пыӵам проектъёсыз сярысь. Кылсярысь, 2014-тӥ арын Россилэн Президентэзлэсь грантсэ утӥз «Удмурт Кенешлэн» «Тангыра» проектэз. Со гуртысь шуге-леке вуэм удмурт семьяослы сӥзем вал. Проектлы 2 миллион манет висъяськиз. Собере нылпиез огдыре ик 2 кылын дышетонлы сӥзем «Билингва» но фин-угор эктонъёслы сӥзем «Мост» проектъёс грант утылӥзы, улонэ пыӵазы. Нош туэысен — «Чеберай» проект. Таиз сярысь пыр-поч мадиз ини проектлэн кивалтӥсез Ксения Широбокова.

— Умой проект висён бордысь потэ, — шуиз со, — Мон ачим республикаямы ортчем «Чеберина» конкурсын, фин-угор нылъёслэн «Уйпал кизили» конкурсазы вормылӥ. Мыным туж юрттӥз «Удмурт Кенеш» огазеяськон. Пермьын вормеме бере фин-угор нылъёслэн конкурссы Ижын ортчыны кулэ вал. Но… со ӧз ортчы.
Та пумысен Ксениялэн сюлмыз вӧсь луыса улэм. Та ик сое проект борды басьтӥськытэм. «Чеберай» проект республикаысьтымы вань 25 ёросъёс пыр потоз, 3 сюрслэсь трос нылкышноосты огазеялоз. «Удмурт Кенеш» огазеяськонлэн интыосысь ёзъёсыз конкурсэз бурдъяськем мылкыдын пумитазы. Унозэ бурдъяз Татарстанысь Набережные Челны городысь удмуртъёслэн азьветлӥсьсы Валентина Билык но. Бигер городын туэ со 3-тӥзэ ни фин-угор фестиваль ортчытэ. Доразы удмурт, пор, мордва коллективъёс люкасько. Туэ нырысьсэ Татарстанлэн палэнысьтыз коллективъёс вуозы, пе.
Валентина Михайловналы капчи ӧй вал вань та ужез бералтыны, но Удмуртилэн палэназ улыса, дорезлэсь мӧзмемез, бадӟым мылкыдыз юртто солы яркыт но калыкез бурдъясь ужрадъёс ортчытъяны.
Пумиськонэз йылпумъяса, «Удмурт Кенеш» огазеяськонлэн кивалтӥсез Татьяна Ишматова кенешчиослы дэмлаз интыосысь правлениосын но аспӧртэм SWOT-анализ лэсьтыны. Кужмо но ляб интыосты валаса, ужед шоры палэнысен учкыса гинэ, азьлань вамыштыны луоз.

Елена Миннигараева

Ангелина Снигирева
By Ангелина Снигирева Сентябрь 9, 2019 16:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<