Муртлэн вӧсез уг адӟиськы…

Ангелина Снигирева
By Ангелина Снигирева 30 сентября, 2019 15:10

Кылем арын Удмуртиын улонысь ас мылкыдызъя кошкиз 418 мурт. Туэ 7 толэзь ӵоже 271 луиз ни. Мар муген адямиос асьсэды быдто? Кызьы улыны мылкыдзэс ӝутоно?

Уг тырмы уж

Юзырес лыдпусъёсъя, Россия дуннеын 18-тӥ интыын. Удмурт шаер кунамы 12-тӥ-13-тӥ интыын возиське. Асьсэды быдтӥсьёс тужгес трос пусъемын Тыва, Алтай улосъёсын. Но Приволжск федерал округын элькунмы 1-тӥ интыын. Удмуртиысь психиатрияя больницаысь валтӥсь врачлэн воштӥсез Марат Багаутдинов пусъемъя, асьсэ мылкыдын улонысь кошкисьёслэн лыдзы авариын быремъёс яке виемъёс сярысь 2 поллы бадӟымгес. Удмуртиын берло 10 ар ӵоже кышкыт лыдпусэз 2 поллы кулэстыны луиз. Котьма ке но арлы быдэ ог 400 адямиез ыштон — со арлы быдэ быдэс бадӟым гуртэз ватон кадь луэ.

— Туэ асьсэды быдтэмъёс пӧлысь котькуд 5-тӥез — кышномурт, — вера М. Багаутдинов. — 67 процентэз — гуртын улӥсь нылкышноос. Уноез соос больницаостӥ эскериськыса, эмъяськыса ветлэмын ик ӧвӧл, учётын нокытын уг сыло. Тросэз — оген улӥсьёс, люкиськемъёс я картсэс ватэмъёс.

Марат Багаутдинов сюлэмыз шуген вера та улонэн тэрытӥськымтэ пиосмуртъёс сярысь но. Тужгес трос соослэн лыдзы гуртъёсын, эшшо но валантэмез — улонысь кошко 18-35 аресъемъёс.

— Гуртъёсын егит пиос куашкам мылкыдын уло, — вера Марат Багаутдинов. — Уж ӧвӧл, уждун пичи. Юисьёс но соосты уд шуы. Тросэз — дышетскем адямиос. Тани огаз районын, университетэз йылпумъяса, гуртаз берытскиз пияш. Тодмоосыз верало: туж, пе, куректэ вал, йӧнала уж нокытысь уг шедьты шуыса. Уж ӧвӧл бере, семья но уд кылдыты, астэ но сюдыны-дӥсяны уд пӧрмыты. Кытчы кариськыны валатэк ик, ассэ быдтэм. Йылэмын займ сётъясьёс. Гуртэ лыкто, калыклы уксё ӵекто, берыктоно уз луы шуыса, пӧяло. Арлыдоос оско, нош собере коллекторъёс соослы улыны маза уг сёто. Кредитсэс тырыны вормисьтэмъёс, мар 
карыны валатэк, улонэнызы люкисько.

Психиатрияя элькун больницаысь специалистъ-ёс эскеремъя, берло дыре куд-ог ёросъёсын калыклэн улон мылкыдыз кӧнялы ке ӝутӥськемын. Соин ик юзырес учыръёс кулэсмемын Ижын, Балезино, Вотка, Дэбес, Дэри, Каракулино, Камбарка, Красногорск, Ува, Якшур-Бӧдья но Яр ёросъёсын. Но со дыре ик Сарапул но Грак ёросъёсын лыдпус ялан йылэ. Асьсэды быдтӥсьёс трос шаермылэн уйпал ёросъёсаз.

Уг кыло школаын

Мар кароно таӵе югдурын? Кызьы адӟоно, адямилы туж секыт шуыса? Та юанъёслы валэктон утчазы Тазалыкез утёнъя министерствоын котырес ӝӧк сьӧрын кенешон дыръя. Правительстволэн Тӧроезлэн воштӥсез Анастасия Муталенко пусъемъя, министерство ас кожаз югдурез тупатыны нокызьы уз быгаты.

— Асьмеос мурт вӧсез адӟымтэ-кылымтэ улсы кариськиськомы, асьмемыз
асьмеос гинэ малпаса улӥськомы, — шуэ Анастасия Александровна. — Нылпиосмы сярысь гинэ но малпаны, 
сюлмаськыны дырмы уг сюры — ялан уж вылэ чӧлскиськомы. Жадеммес ум вормиське.

Школаын дышетскись нылпиос пӧлын гинэ туэ 6-ез ассэ быдтӥз. Улонэныз люкиськыны турттэ вал 100-эз. Удмуртиысь нылпиослэн правооссыя оскем мурт Ольга Авдеева верамъя, асьсэды быдтыны вырись нылпиос пӧлысь троссэ ум но тодӥське. Сыӵе учыръёс сярысь вераськонъёсты семьялэсь палэнэ уг потто. Анай-атайёс, ӵыжы-выжыос уг валало: нылпилы но, асьсэлы но али специалистъёслэн юрттэмзы кулэ. Асьсэды быдтэмъёс пӧлысь уноез — 17 аресъемъёс. Огзы но ёрмыса улӥсь семьяосысь ӧвӧл.

— Дышетскон ар кутсконын но ар пумын улонзылэсь уноез люкисько — школаысь секытэз уг чидало, — шуэ Ольга Авдеева. — Паймоно кадь: ӵапак школаын нылпиос ялан син азьын, дышетӥсьёс адӟыны кулэ кадь котькудӥзлэсь мылкыдзэ. Но уг адӟо. Школаын психологъёс мед луозы шуыса, ужпум нуиськомы. Но соос гинэ югдурысь потыны уз юрттэ. Котькуд школае келямын нылпилэсь секыт малпанъёссэ синйылтыны юрттӥсь пособие. Малпасько: унояз школаосы со вуттэмын ӧвӧл на. Эскеронъёс возьмато: нылпиос сыӵе вамыш лэсьто саклык но яратон тырмымтэысь, асьсэды кулэтэмен лыдъямысь.

Ваньмызлы янгыш выжы?

Астэ быдтон — со выжыысь выжые выжись ген. Но со уг вера на, кин ке ӵыжы-выжыосыз пӧлын кышкыт вамыш лэсьтӥз ке, мукетыз но озьы ик дауртоз шуыса. Генъёс сяна, бадӟым инты басьтэ, кызьы адями будӥз пичи дыръяз, макем солы тырмиз анай-атаезлэн шунытэз, оло сое ялан тышкаськыса, жугыса, ултӥяса возизы, оло ассэ дунъянэз туж улӥын, уг быгаты курыт малпанъёсыныз тэрытӥськыны, улонэз шоры капчи учкыны. Озьы ик ӵемысь асьсэды быдто шизофрениен, эпилепсиен висисьёс, йырзэс шуккылэмъёс, юисьёс.

Специалистъёс пусъемъя, улонэныз люкиськон азяз адями со сярысь асьмелы вераны турттэ.

— Кин ке кулон азяз ӝож чуръёс гожъяны, соосты 
Интернетысь соцсетьёсы выжтыны кутске, кин ке кулон числозэ пуктэ, — шуэ Психиатрияя элькун больницаысь валтӥсь врач, психиатр Юрий Каменщиков. — Огез тодмо: ваньмызлэн котыраз эшъёссы вань кадь, но огзы но кышкыт сигналъёсты уг адӟо. Секыт мылкыдэ усем адями кӧня ке секунд куспын гинэ ассэ быдтыны уг малпа. Со толэзьёс, аръёс ӵоже та малпанзэ пушказ ветта. Адями ӵемысь ӝожтӥське ке, улонэз секыт, туж жадиз ни шуыса, оло, курыт малпанъёссэ но кытӥ-отӥ поттылэ, кулыса умойгес луоз шуыса — та нырысетӥ тодмет ни. Эскеронъёс возьмато: соослы лулысь-сюлмысь вераськон уг тырмы, соос огпол но психологъёслы вазиськылэмын ӧвӧл. Асьсэос воксё но дась ӧвӧл та вамышлы. Соин ик уката кышкатыны уг яра. Уг яра чутрак, пумит вераськыны. Юано, маин солы юрттыны быгатӥськоды. Ӝегатскытэк вазиськоно родняосызлы, врачъёслы, фельдшерлы.

Пыкылыны уг яра утем муртэ но. Солы туж кулэ семьялэн шунытэз, врачъёслэн юрттэмзы. Юрттэт кулэ семьяезлы но, угось ӵыжы-выжыосыз асьсэлы кытчы пырон инты уг шедьто, асьсэды янгышен лыдъяло.

Котырес ӝок сьӧры люкаськемъёс огкылэ вуизы: кылдытоно нимысьтыз программа. Япониын, Швециын, Даниын национальной программа кутыса, югдурзэс тупатыны быгатӥзы. Дышетыны кулэ специалистъёсты, кин калыклэсь мылкыдзэ адӟыны быгатоз, соослы секыт мылкыдысь потыны юрттоз. Сак кариськоно калыклы улон-вылонын юрттэт сётонъя центръёсын ужасьёслы, соцработникъёслы. Соос адӟо утялтоно адямиоссылэсь, оген кылем муртъёслэсь мылкыдзэс. Сакгес луоно дышетӥсьёслы, врачъёслы. Соос та улонын аспӧртэм волонтёръёс луыны кулэ.

Психиатрияя больница гинэ угось та ужез огназ уз вормы. Нимысьтыз центръёс кылдытыса, трослы лякытгес луоз, кулэяськисьёс асьсэос но отчы вазиськыны быгатозы. 

8-800-100-09-06
— Тазалыкез утёнъя министерство бордысь уен-нуналэн ужась оскон телефон, татын психологъёс но психотерапевтъёс дунтэк юрттэт сёто.

8-499-216-50-50
— МЧС-лэн психологической юрттэт сётонъя центрез.

8-800-200-01-22
— нылпиослэн оскон телефонзы.

Елена Сараматова

Ангелина Снигирева
By Ангелина Снигирева 30 сентября, 2019 15:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<