Марафонэ — быдэс элькунэн

Ангелина Снигирева
By Ангелина Снигирева Сентябрь 11, 2019 10:56

Нылкышно творчестволы сӥзем «Чеберай» марафон азинтӥськоз. 20-тӥ сентябре солэн 2-тӥ люкетэзлы кутскон сётэмын луоз.

«Инстачеберай» конкурсын вормиз Наталия Романова

Марафон улонэ пыӵатӥське «Удмурт кенеш» огазеяськон кичӧлтэм улсын. Солэн авторез но кивалтӥсез — Ксения Широбокова. Проект 3 бадӟым этаплэсь кылдэ: «Инстачеберай» вожвылъяськон, ёросъёсын дышетон семинаръёс но «Чеберай 2020» ӵошатскон.

1-тӥ люкетаз 60-лэсь трос нылмуртъёс пыриськизы. Соос «Инстачеберай» вожвылъяськон улсын асьсэ мерлыко бамъёсазы дорзы, удмурт сям-йылолъёсты утемзы, быгатонлыкъёссы сярысь анай кылынызы гожъязы. Вормисе потӥз Башкириын вордӥськем Наталия Романова.

Нош али марафон вотэс бамысь улонэ выже. 20-тӥ куарусёнысен оштолэзёзь, со быдэс элькунмес котыртоз. Кутскоз Глаз ёросысь Штанигуртын.

Котькуд ёросын проектлэн ӧнерчиосыз «Нылкышно творчество. Бизнес но Блогерство. Стиль» форумъёс радъялозы. Отчы дышетскыны ёросысь вань мылкыд карисьёс лыктозы.

Блогер, копирайтер но «Удмурт концерт» проектлэн менеджерез Елена Ильина вералоз, кызьы блог азинскыны но коньдон поттыны луонлык сётэ. Семинаръёсы астролог Анна Титова но вуылоз, соин ӵош нылкышноос натальной карта — быдэс улонлы чаклам гороскоп — кылдытозы. Со валаны юрттоз, кыӵе ужен соизлы я таизлы нылкышнолы выроно, кыӵе быгатонлыкъёсыз пушказ ватӥсько но трос мукетсэ. «Чеберай» командаын воргоронъёссы но вань. Олег Ажгихин стилист, «Ажиотаж» модали школалэн кивалтӥсез, дышетоз, кызьы аслыд гардероб кылдытоно, кызьы огшоры дӥськуттэ аксессуаръёсын выльдоно, кызьы, трос коньдон быдтытэк, чебер дӥсяськоно. Александр Михайлов «Креативной капитал» движенилэн азьветлӥсез люкаськемъёсты бизнес удысэн тодматоз.

— Асьмелэн кышноосмы туж творческоесь, — шуэ проектлэн кивалтӥсез Ксения Широбокова. — Но жаляса верано, быгатонлыкъёссэ кыре-буре поттыны уг быгато Соин ик малпамы: пумиськонъёсмы гуртын улӥсьёслы туж пайдаё луозы, выль ужлы бурдъятозы.

Марафон бордын ужасьёс гуртоосты туала удмурт лулчеберетэн но тодматозы. Пайдаё дышетскон нуналъёсты Светлана Ручкиналэн концертэныз йылпумъялозы.

Озьы ик котькуд ёросын «Чеберай 2020» ӵошатсконэ пыриськыны мылкыд карисьёс пӧлын кастингъёс ортчозы. Со понна куриськонъёсты 1-тӥ коньывуонозь cheberai@bk.ru почтае келяно. Толэзь куспын радъясьёс доры уно вазиськонъёс Алнаш но Пичи Пурга, Шаркан но Дэбес, Кез, Эгра, Балезино ёросъёсысь вуизы ини.

Кастинглы нылъёслы визитка дасяно. 3-5 минут куспын асьсэос, быгатонлыкъёссы но тунсыкъяськонъёссы сярысь верано. Жюриос дасям постановкаез, вылтусэз, сцена вылын возьыны быгатэмез дунъялозы, киужъёссэс учкозы.

Озьы ик чеберайёслэсь визьзэс сыналозы — историез, лулчеберетэз но удмурт сям-йылолъёсты тодэмзэс эскерозы.

Вань ёросъёсын быдэн 3 вормисез шараям бере, вотэсын куара сётон ортчытӥськоз. Озьы элькун «Чеберай 2020» вожвылъяськонлэн финалаз пыриськон понна 10 адямиез быръёзы. Бадӟым концерт ортчем бере, тодмо луоз ини, кин «Чеберай» нимез утоз но корона дӥсялоз.

Мария Емельянова

Ангелина Снигирева
By Ангелина Снигирева Сентябрь 11, 2019 10:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<