Кызьы Чинда Славик луиз Цветной

Ангелина Снигирева
By Ангелина Снигирева Сентябрь 19, 2019 11:06

Маскарчи Вячеслав ЦВЕТНОЙ (ИВАНОВ) сцена вылын тодмо луиз ог 20 ар талэсь азьло, «Шулдыр ӝыт» коллективын ужакуз. Али яратоно артистмы культура удыслэсь палэнынгес ке но, сое тодо, возьмало, пӧртэм концертъёсы ӧтё. Берло 3 арзэ Вячеслав Цветной пыриське «Удмурт концерт» огазеяськонлэн ужрадъёсаз. Туннэ маскарчи валэктон сётэ лыдӟисьёсмылэн юанъёссылы.

Вячеслав Цветной «Удмурт концерт» ужрадын
Туспуктэм басьтэмын vk.com/udmurtconcert

— Малы Цветной аслыз сыӵе псевдоним бырйиз?

Анна Наговицына. Балезино ёрос

— Начальной школаын дышетскыкум, гуртысьтымы Иллёк Вася, 10-тӥ классысь пияш, ачиз но горд вал ке но, монэ адӟыкуз, котьку но йырме маялляз но «ой, цветной, цветной» шуылӥз. Вася школаысь кошкиз но, озьы исась ӧй вал ни.

«Шулдыр ӝытын» ужакум, тушме синкаш наштан буёлэн сьӧдманы кутски. Чеберъяськон вылысь ӧвӧл — ымныр куэ ненег луэмысь, мыным нокыӵе бритва ӧз тупалля. Тушме мычисько но, куэ виштыё-виштыё луэ. Озьы пичи туш лэзи. Собере сьӧдманы кутски.

Огполаз таӵе тусме адӟыса, Анатолий Ушаков шуэ: ма, Слава, тон цветной телевизор кадь луэмед. Озьы ик вал, дыр: уго ымныры лемлет, йырсие горд, туше сьӧд. Берлогес Анатолий Ушаков «чибориё маскарчи» шуыса но сцена вылысен вераны выриз на, ӧз пишмы — мыным Цветной ним лякиськиз.

— Гуртын тӥледыз Чинда Славик шуо-а? Кытысь со ним кылдэмын?

Валентина Кутузова. Алнаш ёрос

— Алнаш ёросысь Сырьезь гуртын атайме Чинда Володя шуо. Папаелы 73 арес, со туж чырткем, али но мамаен ӵош муш вордо, пудоен уло, скалзы вань. Нош пичи дыръяз папае уката шаплы вылэм. Школаын дышетскыкузы, историен дышетӥсьсы Чингисхан сярысь верам. Со, пе, сыӵе кышкасьтэм, чырткем, ваньзэс вормылӥз шуыса. Эшез, Кутас Толя, шуэ, пе: «Ма, со Чингисханзы Володя кадь ик вал, дыр». Со дырысен папаме школаын Чингис, отӥяз — Чиндӥ, Чинда шуыны кутскиллям. Ми семьяын 7 кузя пиналъёс — гуртоос понна ваньмы ик Чиндаос луим.

— Маскарчи ке ӧй луысалды, кыӵе профессия бырйысалды?

Елена Савельева. Пичи Пурга ёрос

— Врач луысал. Семьяын эмъясьёс одно ик луыны кулэ. Ярам, пие Можгалась медициная колледжын дышетске.

— Зэм-а военной институтэ пырид вал? Уд жаляськы-а, дышетскондэ куштӥд шуыса?

Ольга Поздеева. Яр ёрос

— Вал улонам сыӵе учыр. Школаын дышетскыкум, Алнашысь военкоматын вераны шедьтӥ: военное мынысал. Отын сокем кырмиськизы — школае выпускной ӝытэ вуизы, ӵукнаяз, поездэ пуктыса, Красноярск улосысь Ачинск городэ келязы. Алнашысь 7 пи пӧлысь курсант луимы 2 кузя гинэ. Сӥзьылозь валай, та дышетскон сюлэмыя ӧвӧл шуыса. Не сиён уг мыны, не эшъёс кулэ ӧвӧл — дорлэсь мӧзмыса, нокыӵе лётчик луон но тодын ӧвӧл ни. Рапорт гожъяса-гожъяса, бертыны лэзизы. Собере мукет улон вуиз: перестройка вакытэ военнойёс данын ӧй вал ни. Сокем уг жаляськы, лётчик ӧй луы шуыса.

— Шуо, Слава уг кепыра нылкышно ужез но быдэсъяны: мисьтаське но, пӧраське но. Зэм-а со?

Нина Шутова. Пичи Пурга ёрос

— Малы кепыралод солэсь? Мисьтаськисько но, пӧраськисько но. Уг яратӥськы утюгаськыны гинэ. Пинал дыръям джинс штанъёсме ачим миськылӥ: ӟус вылын щёткаен зырасько, гылъясько, курткыса ошисько. Ӝыт клубе потыны дась мед луоз, утюгаса выронэз ӧй вал.

Огшоры шыд гинэ пӧзьтыны уг кельшы, маке выльзэ кулэ. Тани Белоруссие вуылӥ но бертыса семьяме драникен куноятылӥ. Но картошкалэсь золгес мон яратӥсько сӥлез.

— Нылпиосыдлэн маскаръяськон мылкыдзы вань-а?

Евгения Иванова. Ижевск

— Лиана нылы но Ярослав пие бӧрсьысьгес вордскемын. Кыкназы но дышетскизы Можгалась искусствоосъя школаын театр люкетаз. Со вакытазы репетициоссэс но мыным возьмато вал, дӥськут но бырйыны визь-кенеш курылӥзы. Лиана азьланьтӥз та удысэз ик — Можгалась педколледжын ватсаса тодон-валан сётонъя педагоглы дышетске, сцена ужъя дышетӥсь луоз. Солэн сюресэзъя ик Ярослав но дасяськиз вал. Зэм, арысь аре та удысъя педколледжын набор вылымтэ. Соин ик пимы нырысь армие ветлӥз, собере медициная колледже пыриз, али 3-тӥ курсын дышетске.

— Юморескаосысьтыд варманаед — кӧттырмос-тэм кышномурт. Нош огшоры улонын со кыӵе?

Ольга Соловьёва. Ижевск

— Варманае пичи гинэ мугоро, лякыт, ужась, сабырлы удмурт кышномурт. Нимыз Алевтина Николаевна, улэ Алнаш ёросысь Туймыйыл гуртын. Юморескаосысь йӧспӧртэм варманайлы со пичи но уг тупа. Маскаръяськеме пумысен кӧтыз ӝож уг луы. Алнашын яке Можгалан концертъёс луо ке, отчы вуылэ, Иже уггес пота.

— Семон героед юылыны яратэ. Нош Вячеслав Иванов курытсэ веръялля-а?

Ольга Соловьёва. Ижевск

— Физикаез тодэ ваёно ке, аслаз свойствоосызъя вина — ву кадь ик кизер маке. Вань нормальной адямиос сямен ик, мон но веръяллясько. Вина чурыт луысал ке — йырйысал.

— Кытысь юморескаос шедьтӥськоды? Яке кин ке тӥледлы юромо гожъя-а?

Александра Перевощикова. Эгра ёрос

— Нырысетӥ юморескаосме мон «Молот» («Кенеш») журналысь шедьтылӥ. Гуртысь клубамы отын печатлам вань сценкаосты но, юморескаосты но возьматӥм кадь. Дасьёсыз быризы — мар кароно? Озьы ачим гожъяськон борды каллен-каллен басьтӥськи. Нырысетӥ серемес веранъёсме возьматъялляй… коргидын. Монэ нырысь ик дунъяллязы кисаль сиись парсьёсмы, тысь кокчась курегъёсмы. Собере ини гуртысь клубын калыклы лыдӟылӥ.

Табере, сцена вылэ потытозь, выль номерме нырысь ик дунъя Оля кышное. Со котькыӵе критиклэсь зол вералоз, маиз уггес тырмы, кытын шӧг интыез кылемын. Олялэн шӧдонэз котьку но зэма.

Юморескаос али но ачим гожъясько. Со понна гуртын луэм учыръёсты, калыклэсь верамъёссэ котьку йырам кельтӥсько, тетрадям гожтӥсько. Юморескаосы трос люкаськемын ни. Кин ке книга но поттыны ӵектэ.

Дасяз Алёна Ионина

Ангелина Снигирева
By Ангелина Снигирева Сентябрь 19, 2019 11:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<