Кызьы химик луиз писатель

Ангелина Снигирева
By Ангелина Снигирева Сентябрь 17, 2019 13:36

Януш Вишневский — тодмо поляк писатель. Дан вуиз нырысетӥ книгаеныз ик — 18 ар талэсь азьло со поттӥз “Одиночество в сети” романзэ. Со кӧня ке ар ӵоже тросаз кунъёсын топ-рейтингын вал, дасо кылъёсы берыктэмын. Ижкаре Януш Вишневский вуиз “Читай, Ижевск” фестивальлы луыса. Татысь лыдӟисьёсыныз со кык нунал ӵоже пумиськылӥз, литература но яратон сярысь малпанъёссэ усьтӥз, улэм-вылэмез сярысь мадиз.

Януш Вишневский
Фото: Павел Шрамковский

Книга сярысь

Мон — тодосчи, физикая но экономикая магистр, информатика наукая кандидат, химия наукая доктор. Ноку но ӧй малпалля писатель луыны. Гожъяськисьёс монтэк но туж уно уго. Но кызьы ке ваньмыз малпамтэ шорысь пӧрмиз. Кышноеным люкиськеме бере мыным туж секыт вал, кема дыр ӵоже аслым буйган ӧй шедьтылы. Сыӵе дыръя кин ке юон вылэ чӧлске, депрессие усе. Психотерапевт дорын эмъяськон укыр дуно, соин мон малпай асме ачим эмъяны — мылкыдъёсме нуналлы быдэ бумага вылэ кисьтылӥ. Одӥг эшелы возьматыны шедьтӥ. Со ик донгиз печатланы. Мыным соку 47 арес ни вал. Нырысетӥ книгае потӥз 2001-тӥ арын 5-тӥ сентябре, нимаськиз “Одиночество в сети”. Кызьы-озьы пӧрмиз, ачим но ӧй вала, но книга луиз бестселлер, со бӧрсьы мыным кык ар ӵоже 18 сюрс гожтэт вуиз! 75 процентэз — нылкышноослэсь. Соос асьсэлэн учыръёссы сярысь мадьылӥзы. Мон ноку но ӧй малпалля, мон кадь шудтэм муртъёс сомында шуыса… Нош табере та книга олокӧня кылъёсы берыктэмын, фильм пуктэмын. Зэм, киноез мыным ӧз яра. Ӟеч режиссёр, ӟеч актёръёс, ӟеч крезьгур — ваньмыз пӧрмыны кулэ кадь, но сюлэме ӧз лякиськы. Мон малпай, фильмез лэсьтыку, режиссёр ачиз нокинлы синмаськемын ӧй вал, соин, дыр…
Со бӧрсьы гожтӥ ни 25 книга. Но мон туннэ ке но асме рос-прос писателен уг шӧдӥськы. Нялтас вераса, мон 8 ар ӵоже ватыны выри, угось книга потӥз Польшаын. Нош мон улӥсько но ужасько Германиын. Медам гинэ немец кылын пот, медам гинэ тодосчи эшъёсы тодэ шуыса вӧсяськылӥ, угось мынам потылӥз азьло сямен гань-гань наукаен выреме. Но кивалтӥсе кытысь ке тодэм ик. Туж паймизы, мон тодмо адями шуыса.
Нош табере, 18 ар ортчыса, кисьмаз “Одиночество в сети” книгаелэн кыкетӥ люкетэз, отын сюжетэз азинтоз валтӥсь геройёслэн Якоб пизы, со синмаськоз ӟуч-украин выжысь Надя нимо ныллы. Ӟуч кылын книга потоз вуоно арлэн кутсконаз.

Кылъёс сярысь

Анай кылме сяна, ӟеч тодӥсько немец, англи, ӟуч кылъёсты. Мыным кельше произведениосты оригинал кылынызы лыдӟыны. Со берыктӥсьёслы оскымтэысь ӧвӧл — Ӟуч кылэз дышетыны секыт ӧй вал — со тупа ук поляклы. Одӥг славян группаысь. Но шугомисько ударениосын — сыӵе книгаос уг потто ук. Одӥгаз пумиськонын со сярысь вераны шедьтӥ но, выльысяз пумиськонэ огез лыдӟисе мыным туж ӟеч кузьым лэсьтӥз — кылъёс вылэ пуктылэм ударениосын ӟуч книга кузьмаз — юромо ачиз карандашен пусйылэм! Мон понна со туж дуно вал.
Пиналысен потылӥз ӟуч кылын лыдӟеме Л.Толстойлэсь “Война и мирзэ”, но лыдӟи но — ӧз кельшы. Со понна кельшиз М.Булгаковлэн “Мастер и Маргаритаез”. Туалаосыз пӧлысь кельше Людмила Улицкая.
Туж гажасько А.Чеховез — со кадь адями психологиез валась писательёс ӧвӧл кадь потэ, оло, психологъёс но…

Нош дунне вылысь тужгес яратоно писателе — Эрих Мария Ремарк. Мон сое арлы быдэ выльысен лыдӟисько, сотэк быдэс аре токма ортчиз кадь потэ.

Яратон сярысь

Мынэсьтым ӵем юало, кызьы тӥ нылкышноосты сокем ӟеч валаськоды, соослэсь мылкыдъёссэс-малпанъёссэс сокем оскымон возьматыны? Мон озьы уг лыдъяськы, кышномуртэз ноку но пумозяз уд вала. Бен, тыршисько кылзыны. Котькуд адямилэн кыӵе ке историез вань. Машинаын-а кинэн ке мынӥськод, аэропортын-а пукиськод — ваньмызлэн маке веранзы вань, мон кылзӥсько, собере гожъясько… Мынам вань книгаосы яратон сярысь, нош валтӥсь интыын — нылкышно. Али гожъясько выль книга. Со Быдӟым ож дыръя яратон сярысь. .
Мар со яратон? Та юанлы мынам котьку кык пӧртэм валэктонэ. Химик сямен верано ке, яратон — со йырвиымын ортчись аспӧртэм реакция. Сыӵе мылкыдъёс туж тупало наркотикен курадӟонлы — кылдэ аспӧртэм зависимость. Организмлы сыӵе дыръя туж секыт, соин со мылкыд пумтэм кыстӥськыны уг быгаты — пиосмуртъёслэн ар но ӝыны пала, нылкышноослэн — 4 ар котыр… Но со уг вера, яратӥсь муртъёс одно люкисько шуыса, яратон выже мукет стадие.
Огшоры адями сямен ке верано, со — ог-огдэ шӧдыны-валаны быгатон. Мынам адӟемея, шудо адямиос ог-огзылэсь уг жадё, соос 90 процентсэ дырзэс ортчыто сюлмысь вераськыса, 10 процентсэ — валесын яратыса. Пичи дыръямы анае картэныз, оло, уйбыт кухняын вераськыса пукылӥзы, милемлы выныным кӧлыны люкетылӥзы, нош али мон шумпотӥсько со понна — солы удалтӥз.

Зинаида Рябинина

Ангелина Снигирева
By Ангелина Снигирева Сентябрь 17, 2019 13:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<