Кызьы «пыже» книга?

Ангелина Снигирева
By Ангелина Снигирева 27 сентября, 2019 15:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерысьтымы «Удмуртия» издательство Россиысь устоосыз пӧлы пыре. Та нуналъёсы со 100 ар тырмонзэ пусъе.

Баграш-Бигра гуртысь кенакъёс «Удмуртия» издательствоын куноын
Туспуктӥз: Г. Грязев

Издательство интыяськемын Ижкарлэн шораз ик, Пастухов ульчаысь 13 номеро юртын. Нырысетӥ этажаз пырыса, тонэ охрана пумита. Гуртысь вуэмъёс, оло, сое адӟыса куалектозы. Но «Удмуртия» издательствое книга басьтыны лыктӥ шуиськод ке, пальышто но пырелэ, шуо, 3-тӥ этаже, пе, тубоно…

Издательстволэн коридоръёсаз шыпыт. Нырысь вакытаз малпан кылдэ: нуназеяны кошкиллям? Но кабинетъёсы пырыса гинэ валаськод: ваньзы уж пӧлы выемын. Директорлэн приёмнояз котькуд пырисез пумита секретарь Ирина Егорова. Капчи мылкыдо нылаш огдыре ик секретарьлэсь но ужзэ быдэсъя, дизайнер но, кадръёсъя специалист но луэ.

Директор Юрий Кузнецов интыяз вылымтэ, ӵапак юбилей ужрадъёсын бызьылэ, пе. Та вакытэ солы тужгес пӧсь йӧтэ. Со понна артысь кабинетын йырзэ ӝутъятэк пуке валтӥсь редактор Георгий Грязев. Вӧзаз ӝажы вылын туэ потэм выль книгаос, кӧняез ке соос пӧлысь Россиысь конкурсъёсын вормонъёс басьтэмын ни.

Туэ гинэ Москваын ортчись «Красная Площадь» фестивальын «Удмуртия» издательство 3 дипломен пусъемын вал. «Лучшее издание, вносящее вклад в диалог культур» номинациын вормисе потӥз Георгий Грязевен дасям «Удмурты: тайна тамги» книгаез. Та книга ик диплом басьтӥз Россиысь шаертодонлы сӥзем книгаослэн «Малая Родина» конкурсазы. Нош «Музей-заповедник «Лудорвай» издание пусъемын Россиысь нациосын ужанъя федерал агентстволэн данъян грамотаеныз.

Вань та книгаосты чебертӥзы издательствоысь дизайнерлэн Валентин Семёновлэн ужъёсыз. Ачиз со Эгралан улэ, ужъёссэ келя Интернет пыр. Али, пе, Валентин Юрьевич «Удмуртская народная кухня» книга бордын ужа. Ӟеч фотоос лэсьтон понна ачиз ик книгаын сётэм рецептъёсъя пӧраське, я чорыг пыже, я — табань. Али гинэ лэсьтэм пӧрамзэ туспуктэ — туж сиёно кадь адӟиське.

Издательствоын ужасьёс книгаосынызы тодмато

Георгий Грязевлэн верамезъя, туэ ар пумозь эшшо кӧня ке выль книгаос поттыны чакламын. Кылсярысь, издательстволы но элькунмылы 100 ар тырмонлы сӥзьыса, матысь дыре туала удмурт поэзилы но прозалы сӥзем антологиос потозы. Таосыз бордын сюлмысь ужа редактор но кылбурчи Сергей Матвеев.

— Туала удмурт кылбуретлы сӥзем антологие 40 пала автор пыриз, — шуэ Сергей Матвеев, — ваньзы соос туала вакытэ улӥсь но кылбурась адямиос. Кылбуретлы сӥзем антологиез печате сётӥмы ни. Ӝоген йылпумъяськоз прозалы сӥзем антология бордын ужмы. Та книгаосъя туала удмурт литературалэсь азинскемзэ чакланы быгатом.

Аспӧртэм творчество омыр кузёяське Юрий Лобанов суредасьлэн, чеберлыкъя редакторлэн кабинетаз. Борддоръёс кузя суредъёсыз ошылэмын, бур палась сэргын — вашкала удмурт арбериос. Зэмос музейын кадь.

— Туннэ мон Ува ёросысь Удугучин черкогуртлы сӥзем книгалэсь вылбамзэ малпасько, — шуэ Юрий Николаевич. — Книгалэсь бамзэ лэсьтон понна быдэсак выёно солэн пуштросаз, тодоно, мар сярысь книга, кыӵегес ужпумъёсты ӝутэ. Куд-ог книгаосъя кӧня ке вариантъёс лэсьтытэк уг луы, — шуэ Юрий Лобанов. — Юбилейлы шуыса поттомы нимысьтыз значок, наклейкаос, мукет кузьымъёс.

Зэмос «пӧсь» цех — учебникъёс бордын ужан. «Удмуртия» издательствоын та ныпъетэз кыске Татьяна Воронова. Нош янгышъёсты тупатъян бордын тырше Анна Татаркина.

— Уж трос али милям. 15 учебникез печате келяны дасяськом. Эшшо куинез бордын ужаськом на. Учебникъёс бордын ужаку, туж чакласьконо луэ, янгышъёс гинэ медаз кыле, — пусъе Татьяна Васильевна.

Ю. Кузнецов но В. Атеева
Фото: «Удмуртия» издательстволэн архивысьтыз

Потэм книгаосты адӟыны луэ ни издательстволэн юртаз ик интыяськем книга магазинысь. Татын котькуд пырисез капчи мылкыдын пумита Вероника Атеева.

— Книгаос басьтыны ӵемысь лыкто ёросъёсысь, гуртъёсысь дышетӥсьёс, нылпи садысь воспитательёс. Соос тодо ук, дорамы пиналлэсь дунневаланзэ узырмытӥсь методпособиос но, книгаос но, пӧртэм ӝӧк выл шудонъёс но вань. Ижысь но лыдӟисьёс ӵем пырало, удмурт историлы, шаертодонлы сӥзем книга басьто, — шуэ Вероника Петровна.

Издательстволэн ужез нокызьы но ӧй радъяськысал бухгалтер Людмила Поздеева сюлмаськытэк. Туала куронъёсъя, дась книгаез печате озьы гинэ уд сёты. Сое печатлан вылысь типографилы тендер (конкурс) ялоно. Бухгалтер та ласянь вань документъёсты дася, сюлмаське, ваньмыз интыяз но радызъя мед луоз…

Тазьы кабинетысь кабинетэ ветлон вискын издательстволэн директорез Юрий Кузнецов но вуиз. Но Юрий Васильевичен гань-гань вераськыны уг луы — телефонэз ӟырдамын.

— Милемыз ӟечкыланы Россилэн пӧртэм сэрегъёсысьтыз эшъёсмы вуозы, — пусъе директор. — Москваысь, Екатеринбургысь, Тюменьысь, Чебоксарыысь, Уфаысь, Казаньысь, Кировысь издательствоослэн но типографиослэн кивалтӥсьёссы, делегациоссы. Алигес туж бадӟым шумпотон вуиз: кыкез изданимы Россиысь 50 устоосыз книгаос пӧлы пыризы. Со сярысь верась дипломъёстэс, пе, юбилеяды ваёмы. Зэм, милям книгаосмы Россиын ӵем бадӟым вормонъёс басьто. Но со сяна, книгалэн кулэ луыны лыдӟисез. Шумпотӥськом, дорамы книга юаса жингыръяло, вуыло ке.

Елена Миннигараева

Ӟечкыланъёс:

«Удмуртия» издательстволэсь книгаоссэ лыдӟо Россиын но, кунсьӧрын но. Мылкыдзэс верало тужгес мыло-кыдо лыдӟисьёс.

И. Филимонова

Ирина Филимонова (Ури-Бери Орина), Пичи Пурга гимназиысь дышетӥсь, маскарчи:

— Издательствое мон ӵем жингыръясько. Ӟечбуресь, мар вылез вань шуыса, юасько ке, тодмало ни: о-о, Ури-Бери Орина, шуо… Мар ке вылез потэ ке, басьтыны тыршисько. Издательство туж юрттэ школаын ужея. Отысь яркыт наглядной пособиос, шудонъёс басьтыны луэ. Ваньмыз лэсьтэмын нылпиослэсь психологизэс валаса, туж яркыт. Ӵемысь маке кельше ке, классысьтым вань нылпиослы басьтӥсько. Эшшо кельшо удмурт кылбуръёсын бичетъёс, соос концертъёслы дасяськыку туж кулэ луо.

Д. Ефремов

Дмитрий Ефремов, Удмурт кун университетысь дышетӥсь, филология наукаосъя кандидат:

— Аслам ужея мыным ӵем гинэ кулэ луо удмурт книгаос. Кытысь соосты шедьтоно? Сюрес одӥг — «Удмуртия» издательство. Татысь мон кунсьӧры — Финляндие, Венгрие — куное мынон азьын книгаос басьтӥсько. Удмурт книгаос соослы тунсыко пото.

Кыкетӥез, УдГУ-ын ми арлы быдэ удмурт кылъя курсъёс ортчытъяськом. Анай кылмес дышетыны дорамы вуыло кунсьӧрысь студентъёс но. Соосты одно «Удмуртия» издательствое нуисько. Кыӵе соос шумпото! Удмуртия сярысь ӟуч но, удмурт но книгаос, шудонъёс басьто. Басьтэм шудонзэс «Фейсбуке» потто. Соку ик эшъёссы гожто ни: нош мон 2-3 ар талэсь азьло Удмуртиын вал, нош таӵе шудонзы соку ӧй вал на…

Л. Нянькина

Лидия Нянькина, кылбурчи но писатель:

— «Удмуртия» издательствое ӵем пырасько. Туж мусо потэ нылпиослы сӥзем книгаосын сэрегзы. Аслым тужгес матын шаертодонлы, историлы, литературоведениелы сӥзем книгаос. Учкисько удмурт прозаез но, жаль, берло дыре со ӧжытгес потэ. Куддыръя кыӵе ке ёросэ потон азьын пырасько, аслэсьтым, мукет авторъёслэсь книгаоссэс басьтӥсько, соосты гуртъёсы нуисько. Мед адӟозы, мед лыдӟозы кадь потэ.

Ангелина Снигирева
By Ангелина Снигирева 27 сентября, 2019 15:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<