Кызьы нюлэс ӝутоз экономикаез?

Ангелина Снигирева
By Ангелина Снигирева 16 сентября, 2019 15:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

15-тӥ сентябре удыс нуналзэс пусъё нюлэс хозяйствоосын ужасьёс. Кыӵе шуг-секытъёссы, вормонъёссы, воштӥськонъёссы вань соослэн — та пумысен вераз инкуазез утёнъя но инкуазь узырлыкъя министр Денис Удалов.

Д. Удалов
Туспуктэм: Инкуазез утёнъя но инкуазь узырлыкъя министерстволэн пресс-службаез

— Денис Николаевич, та вакытэ Удмуртия нюлэс промышленностья кластер кылдытон бордын ужа. Малы со кулэ?

— Ми Удмуртиысь Правительствоен, нюлэсэн вырись валтӥсь предприятиосын, арендаторъёсын валче промышленной кластерлэн пуштросэз, ужпумъёсыз пумысен кенешим. Элькунмы нюлэсэз огшоры гинэ медаз вуза шуыса, переработка бордын тыршоно. Зэм, 2015-тӥ арысен та ужен куд-ог предприятиос вырыны кутскизы ини, кылсярысь, Ува ёросысь «Увадрев-Холдинг» но «Орион», Можга ёросысь «Красная звезда» предприятиосын инвестиционной проектъёс быдэсъясько. Туэ шаерамы выль проектъёс ужаны кутскозы. Уваысь «Восток-ресурс» ужзэ паськытатон но биокотельной усьтон понна сюлмаське. Озьы пулэсь кылем-мылемъёс жаг пӧлы уз сюре ни — предприятиын ик эстӥськыны кутӥськозы. Та проектлы 901 миллион инвестициос кулэ, со 151 муртлы ватсаса выль ужан инты кылдытыны луонлык сётоз. Сюмси ёросысь «Промторгснаб» предприятие пӧртэм пумо вузъёс поттыны ӧдъя — корка коръёс, эгыр, тусьты-пуньы. Сюмси ёросын нюлэс сяна, мукет производствоос азинскемын ӧвӧл, соин та проект гуртоослы туж кулэ. Солы луыса 157 выль ужан инты кылдоз. Проектэз улонэ пыӵатыны 500 миллион манет кулэ.

— Удмуртия 47 процентлы нюлэсэн шобыртэмын. Но куд-ог адямиос ӝожтӥсько, эстӥськыны, лэсьтӥськыны пу басьтыны уг быгато шуыса.

— Арлы быдэ огшоры адямиослы шуыса 300 сюрс кубометр нюлэс висъяськом, сомындагес ик шоро-куспо но пичи ужбергатӥсьёслы сётӥське. Туэ юромо эскерон вылысь калыклы сётоно тэлез 40 процентлы ӧжытгес висъям. Нокыӵе сюлмаськонъёс, ӝожтӥськонъёс ӧй вал. Чагыр эстӥськон вӧлмемен калык тэле трос ик уг ветлы ни. Адямиос лэсьтӥськыны, эстӥськыны шуыса нюлэс куро. Но ӵемысь со пуэз асьсэос уг куто, ужбергатӥсьёслы сёто. Соосыз ини вандо но вузало. Соин ик шаерысьтымы вань пилорамаосты учётэ пуктыны кулэ вал. Кун Кенеш туэ июнь толэзе сыӵе законэз ку­тӥз ни. Но сое улонэ пыӵатон ужъёс мыно на. Но туэ декабре со ужаны кутскоз ни шуыса, оскиськом. Котькуд гуртын али пилорамаос усьтылэмын. Но кызьы соос ужало валамон ӧвӧл: адямиос юртъер котыразы лэсьтӥськонлы куто яке ужбергатонэн выро. Пилорамаосты учётэ пуктон понна кыл кутозы Инкуазез утёнъя но инкуазь узырлыкъя министерство но нюлэс хозяйствоя ёрос ёзъёс.

— Туэ нюлэс хозяйствоос выль техникаен узырмизы. Хозяйствоос понна со луиз кемалась витем кузьым.

— Министерство «Инкуазез утён» нацпроектэз кылдытонэ пыриськиз, милям малпанъёсмы кылэмын вал. Со чотын элькунэ ноку адӟымтэ юрттэт вуиз. 40 миллион манет лыктӥз выль нюлэс будэтонлы, 58 миллион — тылпуэз алонлы, нюлэсъёсты браконьеръёслэсь утёнлы. Берло 20 ар ӵоже нюлэс хозяйствоослэн техниказы ӧз выльдӥськы вал ни. Ужаммес дунъязы вылӥ кивалтӥсьёс, соин валче ватсаса эшшо 38 миллион манет сётӥзы на. Озьы туэ ар пумозь эшшо 21 пумо техника вуыны кулэ.

— Инкуазез, тэлез утён пумысен калыклэсь тодон-валанзэ будэтон понна кыӵе ужрадъёс ортчытъяны чакламын?

— Кылем арын Ижкарын ортчем нюлэсъёсъя Россиысь форумын инкуазьлы сӥзем нимысьтыз площадка ужаз. Отчы туж трос калык пыриськиз, пӧртэм малпанъёс, мылкыдъёс чузъяськизы. Калыклэсь инкуазез утён культуразэ ӝутонын нырысетӥ юрттӥсьёсмы — общественникъёс. Ми ӟеч кусып возиськом «Зелёный паровоз» огазеяськонэн, ӵошен пӧртэм ужрадъёс ортчытъяськом. Соос асьсэ ужзы вылын, инкуазь понна сюлмаськыса, улыны куро. Та вакытэ министерствоосын, бюджетной учреждениосын вераськиськом, бадӟым ужрадъёссэс одӥг пол кутӥськись пластиктэк мед ортчытъялозы шуыса. Туэ нырысьсэ Шарканысь «Табаньфест» пластик посудатэк ортчиз, та ӟеч кичӧлтонэз азинтыны ӵектӥськом Пельняньлэн нуналаз но. Дэмласьком предприятиослы асьсэ тусьты-пуньыоссэс поттыны.

Арлы быдэ кивалтӥсьёс­ты, мыло-кыдо калыкез бичало нюлэс мерттонъя ужрадъёс. «Ул, нюлэс!» акция ваньмаз сямен ёросъёсын ортче. Сентябрь пумын вань мылкыд карисьёсты ӧтиськом бадӟым мерттӥськон ужрадэ Пичи Пурга ёросэ. Отын 12 сюрс пужым но кыз мерттэмын луоз. Гуртоос асьсэос министерствое вазиськизы, таӵе ужрад доразы радъяны курыса.

Ангелина Снигирёва

Ангелина Снигирева
By Ангелина Снигирева 16 сентября, 2019 15:47