Культураез сэзъян

Ангелина Снигирева
By Ангелина Снигирева Сентябрь 13, 2019 10:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Культура» нацпроект чотын элькунамы 2024-тӥ арозь 1 миллиард 500 миллион манетлэсь трос коньдон вуоз. Мар воштӥськоз шаерамы культура удысын матысь аръёсы — та сярысь вера Удмуртиысь культурая министр Владимир СОЛОВЬЁВ.

«Культура» нацпроект улсын та удысысь ужасьёс тодон-валанзэс будэто
Туспуктэм басьтэмын minkultura.udmurt.ru

— Владимир Михайлович, адӟиське ёросъёсысь культурая юртъёсы но выльдӥськон вуиз.

— Мон аслым та вакытэ лэсьтӥськись кадь потӥсько. Малы ке шуоно берло аръёсы культура удысын трос юртъёс выльдӥсько, пуктӥськозы ӵыж-выль учреждениос но.

Вераны кулэ «Огъя Россия» партилэн «Пичи Дорлэн культураез» проектэз сярысь. Соя 3-тӥ арзэ ужаськом. Нырысь ик, проект юрттэ интыосысь театръёслы. Озьы Сарапулысь драмая театр но Глазовысь «Парафраз» выльдӥськыны быгатӥзы. Сарапулысь театрлы автобус вуиз — отысь артистъёс учкисьёс доры ӵемгес потаны быгатозы. Эшшо выль постановкаос кылдытыны, театрысь аппаратураез воштыны коньдон кылиз на. Глазовысь «Парафразын» та выллемгес ик воштӥськонъёссы.

Проектлэн 2-тӥ люкетэз — нылпиослы но егитъёслы театръёслы юрттон. Та чотын Мунё театр 3-тӥ арзэ ни ог 6 миллион манет басьтэ — туэ залысь креслоосты выльдо.

Юрттэтлэн 3-тӥ палыз — гуртысь клубъёсты выльдон. Та проектэ пыриськон вылысь вазиськизы 24 ёросъёс. Туэ 29 миллион манетлэсь ятыр коньдон чакламын. Бадӟым люкетэз кошке юртъёсты выльдыны-кышъяны. Уго липетэд вия ке, кыӵе пайдаез луоз дуно баян басьтыса? Нырысь ужан условиосты умоятоно, собере мукетсэ ужпумез вырӟытыны быгатом. Тани Пичи Пурга ёросысь Бобья-Учаысь культурая юртын нырысь укносты вошъямы, туэ залысь выжъёсты но пуконъёсты выльдӥськомы. Озьы тупен-тупен. Ужан тӥрлыксэс выльдон вылысь гуртысь клубъёслы сертификатъёс сётъяськом, но огшоры гинэ ум — чакласьком, кытын самодеятельной коллективъёс золгес ужало.

— «Культура» нацпроектъя кыӵе юртъёс рос-прос сэзъямын луозы?

— Туэ капитальной ремонт мынэ ёросъёсысь 9 клубъёсын.
Тросгес коньдон висъяське Вавож, Ува, Шаркан, Вотка ёросъёслы.

178 миллион манет вуиз Национальной библиотекаез выльдонлы. Солэн азьыз гинэ кылёз — мукетыз ваньмыз воштӥськоз. Али отын котлован гудӥське. Со интые 6 этажъем выль юрт ӝутскоз — отчы интыяськозы фондъёс но, инты шедёз вань отделъёслы но. Объектэз 3 ар куспын вуттыны чакламын.

Вуоно арын ужъёс кутскозы Егит учкисьёслэн театразы (ТЮЗ). Татчы 28 миллион манет вуоз. Театрын 100-лэсь трос пукон интыез.

Удмуртилэн Тӧроез ӵектэмъя республикаямы кутскиз «Бадӟым лэсьтӥськон — бадӟым выльдӥськон» проект пыӵаны кутскиз. Со чотын трос учреждениос тупатъямын луозы, пӧлазы — культурая юртъёс но. Нош 4 муниципал кылдытэт таӵе тупатоно объектъёс пӧлы культурая юртъёсты ӧз пыртэ. Мыным туж ӝож со пумысен.

«Бадӟым лэсьтӥськон — бадӟым выльдӥськон» проект чотын тупатъяськом Калашниковлэсь музейзэ но. Та юрт 11 ар талэсь азьло ӝутэмын, но липетэз вия ни. Эшшо 40 миллион
манет висъяське музейысь экспозициосты выльдыны.

Вуоно арын выльдӥськон вуоз Культурая колледже. Юрт кемалась вите тупатъямез. Культура удыслы специалистъёсты дасян интымы одӥг гинэ, нош югдурез ушъяськымон ӧвӧл. Сое тупатъямы ке, федерал бюджет чотын инструментъёсты но, дышетскон тӥрлыкез но выльдыны луонлык сюроз.

— Вуоно арын республикае 7 автоклуб вуоз. Мар со сыӵе? Кызьы соосты ёросъёс куспын люкоды?

Со огшоры автобус гинэ ӧвӧл. Огъя комплексын луоз сцена но, тыл но, крезьгур сётӥсь аппаратура но. Таӵе автоклубъёс поталозы пичи гуртъёсы, кытын ӧвӧл культурая учреждениос. Кыӵе ке одӥг ёрослы автоклубез сётыны пайдаез уз луы: одӥгез район бадӟымгес, мукетыз — пичигес. Вожмаськон но ӝожомон медаз луы шуыса, районъёсты зонаослы люкимы: озьы огъёсыз автоклубъёс лымшор ёросъёслы чакламын, мукетъёсыз — уйпалъёслы, куинетӥосыз — шор ёросъёслы. Оглом таӵе комплексъёсты басьтыны 32 миллион манет мыноз.

— Нош Камбаркаын культурая юрт воксё ӧвӧл. Сое пуктыны чакласькоды-а?

— Та милям йыр висёнмы. 200 учкисьлы залэн проектэз кутысалмы ке, сое федерал бюджет чотын пуктыны луысал. Нош город понна со ӝикыт луоз. Ичизэ 300 интыем зал кулэ. Али утчаськомы тупась проект.

Камбарка сяна, сюлмаськытэ Шарканын мытэм культурая юрт — сое быдэстыны уксё ӧвӧл. Озьы ик Ува ёросысь Нылга черкогуртысь клуб интыяськемын вал черкын. Сое али берыктӥськом епархилы, нош Нылгала выль юрт ӝутоно.

— Тырмо-а культура удысын ужасьёс?

— Республикаысьтымы культура удысын ужасьёс пӧлысь 38-40 процентэз гинэ — профессионалъёс. Тани мон йылпумъямын Культурая институтэз — асме профессионалэн лыдъясько.

Татчыозь Пермьысь культурая институтэ Удмуртиысь целевой направлениен дышетскыны ыстэм мурт 1 гинэ. Туэ 6 мурт целевой направлениен отчы дышетскыны пыриз.

Та ужез азьланьтыны малпаськом Казаньысь консерваториын. Нош Москваын но Санкт-Петербургын дышетскемъёс Удмуртие берытскыны уг ни дырто.

Мунё театрлы артистъёсты ик Санкт-Петербургын дышетӥськомы, вуоно арын студентъёсмы практикае вуозы ни. Драмая ӟуч театр 5 муртэ ыстӥз Москвае Райкинлэн студияз тодон-валан люканы.

— Озьыен, матысь аръёсы чеберскозы гуртысь клубъёс, нош вуозы-а отчы городысь артистъёс? «Айкай», «Италмас», «Шулдыр ӝыт» коллективъёс потало ик концертъёсын. Но удмурт гуртъёсын туж возьмало Удмурт театрез но. Ваньмызлэн городэ потыны луонлыкез ӧвӧл ук.

— Шонер вераськоды. Берло дыре Удмурт театр гастрольёсы мукет улосъёсы — Карелие, Алтай республикае — ӵемгес пота. Со «Бадӟым гастрольёс» проект чотын радъяське — улосъёс куспазы театръёсын вошъясько.

Кӧня ке ар талэсь азьло «Мынам Удмуртие» телеканалэн Удмурт театрысь спектаклез снимать карон сярысь кенешон нуимы. Туж кӧшкемыт дун пуктӥзы — ог 1 миллион манет пала. Али дунзэс кулэстӥзы: 1 спектаклез гожтон понна 200 сюрс манет мында кулэ, пе. Нош телеканал пыр трансляциез дунтэк луоз ни. Малпасько: та вормымон лыдпус. Араз 3-4 выль спектакльлы съёмка радъяны быгатысалмы ке, Удмуртилэн кунлык басьтэмез дырысен 100 ар тырмонлы со туж усто кузьым луысал.

Берло аръёсы культура удысэ выль шокчон вуиз, шуысал мон. Нацпроект чотын республикае культура удыслы 260 миллион манет. вуиз. Туэ ар пумозь ог 350 миллион манет висъяськоз. Озьы 6 ар ӵоже Удмуртиысь культура удысэ 1 миллиард 500 миллион манет вуоз. Та лыдпус монэ шумпоттэ. Коньдон вань ке, уж но вань, азинскон но вань.

Елена Скворцова

Ангелина Снигирева
By Ангелина Снигирева Сентябрь 13, 2019 10:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<