Котькуд ролез — дуно

Ангелина Снигирева
By Ангелина Снигирева Сентябрь 6, 2019 14:53

40 арлэсь кема улонзэ Александр Баймурзин сӥзиз ни сценалы. Кӧня рольёс шудэмын, кӧня гастрольёсы потамын — лыдъяны луонтэм.

Фото: Удмурт театрлэн архивысьтыз

Волшебник

Но аръёс уг вошто яратоно артистмес: сыӵе ик пыдэстэм сандык, пӧзись ошмес кадь. Котьку вӧл-вӧл усьтэм сюлэмо: серекъякуз но, маке ӝот-ӝот малпаськыкуз но. Артист шуэ: рольёс котькыӵеесь сюро, но кельше-а, уг-а — аслыд матын кароно, ачид пыр поттоно — сотэк образэз учкисьёс доры вуттыны уд быгаты.

Вордскиз Александр Дмитриевич Пичи Пурга ёросысь Аксакшур гуртысь бадӟым семьяын — анай-атайзылэн соос 6 кузя будӥзы. Анайзы школаын математикалы дышетӥз. Атайзы туж яратӥз суредаськыны — нылпиосыз вордскем бере ни Москвае суредасе дышетскыны ветлӥз на. Сашалы но со нимысьтыз альбом лэсьтыса сётӥз: суредаськы, пие, пе.

Нош Сашалэн аслаз мылкыдыз вал: гурт сьӧрысьтызы возь вылэ потылӥз но, чан-чан куараеныз кеськыса ик кырӟалляз. Нош кыӵе яратылӥз школае огназ ветлыны. Сюресэз вакчи ӧй вал, капка сьӧры потэ гинэ но — крибле-крабле-бумс, мон волшебник! Кутске выжыкылъёс мадьыны. Лыдӟиськиз Саша туж трос, уката но выжыкылъёсты. Соин ик «передачаяз» кыӵе выжыкылэз вералоз — ноку ӧз ёрмылы. Вераса уг вутты, школае вуэ ке, шуоз: туннэ передачамес йылпумъялом, кылемзэ ӵуказе лыдӟом…

«Пичи Коли»

— Асме театртэк син азям пуктыны уг быгатӥськы, — шуэ Александр Дмитриевич. — Кытын меда ужасал — ӧйтӧд… Сцена вылэ мон потӥ ни школаез йылпумъяме бере ик. Атае Удмурт драмая театре нуиз. Нош отын шуизы: басня, кылбур дасялод но кылзонэ лыктод. Кылзӥзы Россиысь калык артистка Вероника Садаева но Александр Блинов — валтӥсь режиссёр луыса ужа вал соку. Кутӥзы: мугоры пичи — киыз-пыдыз, пе, пичи пияшъёсты шудыны.

Ар ӵоже ужатозяз, Александр 3 спектакльын шудыса вуттӥз. «Вуж Мултанын» пичи Коли вал, «Эн ыбылэ тӧдьы юсьёсты» спектакльын нош ик пичи Коляез шудӥз. Собере театрын солы «Коли» шуыса гинэ вазисько на вал.

— Кизилияськон мылкыды ноку ӧз потылы шуэмысь, нырысетӥ спектакль бере малпай ик вал: табере монэ Ижысь ваньзы тодмалозы ук! — азинтэ веранзэ Александр Дмитриевич. — Но ураме потӥсько — шыпыт, транспортэ пуксисько — нокин шорам уг учкы. Малпасько ини: город бадӟым, ваньзы спектакле ветлыса ӧз вуттэ на, дыр.

1977-тӥ арын 13 егитъёсты келязы Уфаысь искусствоосъя институтэ. 1981-тӥ арозь соос отын дышетскизы: Андрей Ураськин, Геннадий Бекманов, Ольга Зорина, Екатерина Яковлева, Римма Николаева, Августа Лазарева… Ваньзы берытскизы, шаерамы тодмо артистъёс луизы. Александр Баймурзин туж шунытэн али но тодаз вайылэ отысь дышетӥсьёссэс Фардуна Касимоваез, Александр Корякинэз но трос мукетъёссэ. Кызьы, пе, соосты вунэтод — сюлэмзэс-лулзэс сётыса, дасязы вуоно артистъёсты. Уката но дипломной спектакль дасякузы, бер ӝытозь ужаллязы — асьсэос ик декорациос лэсьтылӥзы, репетициос орчытъязы. Со понна дышетӥсьёссы но туж яратӥллям удмурт группаез, дышетскыны выль лыктӥсь егитъёслы, пе, ӵемысь вераллязы: Удмуртиысь сыӵе группа вал — туж ужасесь, быгатӥсесь, адӟем карымонэсь.

Грим

Институтын ик дыше­тӥзы грим но лэсьтыны. Озьы Александр Баймурзин, сцена вылэ потон азьын берга синучкон азьын — героезлэн тусаз пырыны выре.

— Куддыр ог 5 минут но тырме грим лэсьтыны, — вера артист. — Но герое мӧйы ни ке, кемагес но пуконо луэ, кисыриос суредам сяна, йырсиез но ведь пудраен зырано…

Сцена вылын пичи пиосты шудон сяменыз, Александр Баймурзин, ачиз но валатэк, туж ӝог выжиз мӧйы образъёс вылэ но. Уфаысь институтысь бертэмез бере ик сётӥзы роль.

Огкадь усто шудэ кышномуртэз но, воргоронэз но

— «Исьток но Насьток» спектакльын Ерофеевез шудод, пе, — тодаз вае Александр Дмитриевич. — Пересь ни со, эшшо ке висись на. Грим лэсьтӥзы но, сцена вылэ поттӥзы. Со аре ик армие кошки — Германиын служить кари, танкист вал. Армиысь бертӥ но, нош ик «Гуртысь маскарчиос» спектакльын Гуръян, пе, луод. 70 арес ни солы, эшшо ик ведӥн. Кызьы шудоно — ачим но пайми вал. Та ролез озьы ик шудылӥзы тодмо артистъёс Василий Перевощиков но Борис Безумов, соосты учки. Ачим нырысь ик гастрольёсын шудыны кутски, собере ини бадӟым сцена вылэ потӥ. Со мынам одӥгез яратоно роле луиз.

А. Баймурзинлэн арлыдо рольёсыз пӧлын: А. Пушкинлэн «Капитанская дочкаысьтыз» кузёослэн слугазы Савельич, И. Тургеневлэн «Отцы и детиысьтыз» Базаровлэн атаез…

— Алексей Ложкин режиссёр «Исьток но Насьток» пьесаез выльысь пуктыны чаклаз, мыным нош ик Ерофеевез шудод, пе, — азинтэ веранзэ артист. — Но табере со чылкак мукет ни — туала манеръёсын.
А. Ложкин мынэсьтым нылъёс сьӧры бызьылӥсь воргоронэз лэсьтӥз — горд пиджакен, йырсиез вӧен маяллямын!

Мылкыд

А. Баймурзин уг ваты: пичи дыръяз туж потэ вал киноын но шудэмез. Соинтэк-а гурт сьӧрысьтызы возь вылэ кырӟаны потанъяз, ассэ киноысь герой но кожалляз. Кино учке но, кельшем геройзэ соку ик шудыны кутске. Ыбо ке сое, Александр но возь вылэ погра. Кылле, адӟе: кыӵе чебер инбам, турын-куаръёс…

Но удмурт кылын потэм «Узы-боры», «Пузкар» фильмъёсты учкемез бере, киное сюрон мылкыдыз чутрак быриз.

— Мон со киноосты учки но малпай: тау Инмарлы, мон отын ӧвӧл шуыса, — вера Александр Дмитриевич. — Угось учки мон соосты артист сямен, чаклай, кызьы рольёссэс шудо, кызьы снимать каро. Куддыр камера сокем матын басьтэ! Ымнырысь вань гожъёс адӟисько ук! Ой, мыным сыӵеез кулэ ӧвӧл. Егит дыръям, оло, мукет сямен малпасал.

Театре лыктэм егит артистъёс шоры Александр Баймурзин туж синмаськыса учке: сокем дӥсьтӥсесь, быгатӥсесь соос. Шоразы учкыса, ачид но егитомиськод кадь, пе. Нош уж ваньзылы тырме. Александр Дмитриевич но театрын рольёстэк уг кыльы. Эшшо нимаз концертъёсын юморескаос лыдӟе.

Оло, куке но кырӟась Баймурзинэз но адӟом ай? 50 арессэ тырмытыкуз, кырӟаз вал ук: ялан сюрес вылын, валаса ӧй вутты дырлэсь ортчемзэ…

— Куд-ог ӟуч кырӟанъёс но сюлмам пыро ке, соосты удмуртэ берыктыны вырыса али но ветлӥсько — йырысьтым уг пото ни, — шуэ Александр Дмитриевич. — Кин тодэ, оло, кырӟало но ай. Ваньмыз потэ мылкыд бордысь.

Нош мылкыд артист азьло кадь ик басьтэ Аксакысьтыз. Ӧжытак вис шеде ке, одно бертэ вордскем палъёсаз. Отын со гуртысь огшоры адями. Бакчаяз мерттӥз ни кедр, маньчжур мульы, каштан, черешня… Но туж каллен будо, пе, вазьгес мерттоно вылэм. Но котьмалэн аслаз дырыз, вылды…

60 арес — арлыд ӧвӧл на. Азьланьын луозы на пӧртэм рольёс. Яратоно артистсэс сцена вылысь чидатэк витё на уно учкисьёс! Соосты али ик пичияк шумпоттом ни: Александр Баймурзинэз юбилееныз ӟечкылан ужрад Удмурт драмая театрын ноябрь толэзе ортчоз.

Элина Кумачёва

Туспуктэмъёс басьтэмын Удмурт театрлэн архивысьтыз

Ангелина Снигирева
By Ангелина Снигирева Сентябрь 6, 2019 14:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<