Кортлэсь кылзэ тодэ

Ангелина Снигирева
By Ангелина Снигирева Сентябрь 19, 2019 12:00

Ижысь механикая завод бордын кылдытэм Пыӵал тӥрлыкез суреданъя Л. Васев нимо школаын 50 ар ӵоже тырше ни Александр ПЕРЕДВИГИН — 1-тӥ классъем художник-гравёр, та школаысь валтӥсь инструктор. Со суредаз тодмо адямиослы — кылсярысь, Россилэн Президентэзлы В. Путинлы, кунмылэн нырысетӥ президентэзлы Б. Ельцинлы, обороная министрлы С. Шойгулы, Венесуэлалэн азьвыл азьветлӥсезлы Уго Чавеслы — кузьмам пистолетъёсты. «Де люкс», «коллекционное, «эксклюзив» классъем пыӵал тӥрлыкез уно пол возьматъямын Россиын, озьы ик кунгож сьӧрын ортчись адӟытонъёсын. Александр Передвигин — «За заслуги перед Отечеством» орденлэн I но II степенё медальёсызлэн кавалерзы, Россиысь дизайнеръёслэн огазеяськонзылэн ёзчиез, М. Калашников нимо премилэн лауреатэз, Ижысь механикая заводысь дано суредась-гравёр.

А. Передвигин

Дышетскись

— Александр Алексеевич, быгатонлыктылы воксё паймоно: бумага вылэ кыӵе ке пужы суредам сяна, сое корт вылэ выжтоно на ук! Кытысь сыӵе быгатонлык?

— Суредаськонэн 1-тӥ классысен «висьыны» кутски. Адӟи бадӟымгес пиослэсь тетрадязы машина но самолёт суредаса пукемзэс. Тыро-пыдо бумага но соку шедьтыны секыт вал ай. Туж шумпотылӥ, тетрадям урок гожъяны бамъёсыз быро ке: всё, табере отчы суредаськыны но луоз. Но мон малы ке машина-самолёт суредаса ӧй пукылы. Туж яратӥ вить сэрего кизилиез суреданы. Эшъёсы урамез волято, нош мон, дырез валатэк, линейкаен-карандашен гожъёс лэсьтыса пукисько. Уд оске: 2-3 ар ӵоже ведь кизили гинэ суредаса пуки! Школаын но тужгес яратоно предметэ вал рисование. Озьы пичи дыръям ик малпай: одно суредась луо! Нош бӧрысьгес тодӥ гравёрлэн ужез сярысь. О-о, малпасько, корт вылтӥ суреданы эшшо но тунсыко ук! Со дырысен гравёр луыны малпанэ ӧз воштӥськылы ни.

Куд-ог дыръя малпаськонэ усён дыръёс луыло: кытын меда ужасал, та удысэ ӧй шедьысал ке? Асме нокытын но син азям пуктыны уг быгатӥськы. Котьма ке но шудо адями мон: сюлмыным быръем удысам 50 ар ӵоже тыршисько ни. Жадёнэз тодытэк, уез-нуналэз валатэк.

Шудо на мон соин но: киме волятыны вуттӥ зэмос мастеръёс — Л. Васев, А. Лекомцев, В. Голанов, Г. Макаров — бордын. Соослэн пыӵал тӥрлыкез суредан амалъёссы быдэс дуннелы тодмо луэмын. Таослэн дышетэмзы-нодъямзы вылын мон аслэсьтым стильме кылдытӥ. Пистолетъёсты, пыӵалъёсты чебертӥсько, дуно кортъёсты — зарниез, азвесез — кутыса. Нош тужгес валтӥсез мон понна — пыӵал тӥрлык вылэ Удмуртилэсь инкуазьзэ пуктон, шаермылэсь макем чебер луэмзэ возьматон.

— Нош кытын тӥ вордскемын-будэмын? Кызьы но ку улон сюресты вуттӥз Ижысь механикая заводэ?

— Вордӥськи мон Якшур-Бӧдья ёросысь 12-тӥ лесоучастокын. Анае Галина Андреевна но атае Алексей Иванович нюлэс дасянын, гурт удысын тыршизы. Та гуртын ми улӥмы, мон 2-тӥ классэ мынытозь. Анай-атае угось, ӟечгес улон утчаса, Иже выжоно кариськизы. Ижысь механикая заводэ ужаны интыяськизы: атае разнорабочийлэсь ужзэ быдэсъяз, анае кладовщикын тыршиз. Заводлэсь улланьынгес, чугун сюреслы матэгес, семьямылы улон инты висъязы. Отысь баракын ортчиз мынам но, вынылэн но пичи дырмы, быдэ вуон вакытмы. Озьы тӥни быдэс улонэ герӟаськемын Ижысь механикая заводэн. Нялтас вераса, Леонид выны но быдэс гумырзэ заводын тыршемын, жаляса верано, пӧламы ӧвӧл ни.

Пыӵал тӥрлыкез суреданъя школаын нырысетӥ вамышъёсыз

1969-тӥ арын йылпумъяй Ижысь 59 номеро школаез. Трос пол кылылӥ вал ни Ижысь механикая завод бордын кылдытэм Пыӵал тӥрлыкез суреданъя школа сярысь. Малпай отчы мыныны. Но ӵап со аре отчы набор ӧй вал. Кема ӧй малпаськы, ужаны куриськи та заводысь 36 номеро механосборочной цехе. Отын пыӵалъёслы ложаос лэсьтылӥ — со пыӵаллэн я автоматлэн пулэсь лэсьтэм люкетэз, со борды итӥське корт гумы. Мон понна та цехын тыршон зэмос школа выллем луиз. Угось тодӥ-адӟи, кызьы лэсьтӥське пыӵал тӥрлык, кыӵе люкетъёслэсь кылдэ.

Но та цехын кӧня ке толэзь гинэ ужай — армие басьтӥзы. Нырысь дышетыны келязы Свердловске (туала Екатеринбург), собере — Германие. Отын 2 ар ӵоже химияя-радиацияя войскоосын службаме нуи, лейтенантозь будӥ.

Армиын но суредаськонтэк улыны ӧй быгаты. Частьысьтымы горд сэрегез радъян-шулдыртон-а, плакат суредан-а — та уж борды шумпотыса басьтӥськылӥ. Эшшо ке эшъёсылэсь ӵыжы-выжыоссылы дасям гожтэтъёссэс пӧртэм пужыосын чебертылӥ на.

Армиысь бертӥ 1971-тӥ арын. Ижысь механикая заводэ сяна, мукет интыосын уж ӧй ик утча. Таяз радэ кутӥзы монэ 28 номеро экспериментальной цехе, гравёрлы юрттӥсе. Таиз удыс чылкак монъя вал ни. Ӵапак со вакытэ та цехысь рабочийёсты дышетӥз-нодъяз Леонард Васев. Солэн чакламез улсын ужаны вуттӥ ог 4 толэзь ӵоже. 1972-тӥ арын со, жаляса верано, улонысь кошкиз. Но дышетэмез-индылэмез али ке но пель сьӧрам. Кызьы карандашез вӧлоно, резецъёсты шероно, молотэз возёно — ваньзэ али ке но лэсьтӥсько озьы, кызьы со дышетӥз. Озьы 28 номеро цехын ог 3 ар ӵоже киме волятӥ, нош 1974-тӥ арын выжтӥзы Пыӵал тӥрлыкез суреданъя школае инструкторе.

Ужан вискам школамылэн комсомол огазеяськонэныз кивалтӥ. Мугорез кыдатонъя ӵошатсконъёс, пӧртэм пумиськонъёс — ма но ӧм радъяллялэ соку! Ма, заводын тыршисьёсты мон али но общественной ужен ёртэмысь уг дугдӥськы: арлы быдэ сямен ӝӧк выл теннисэн шудонъя турниръёс ортчытӥсько, отчы калыкез ӝуткасько, ачим ик валтӥсь судья но луисько. Со дырысен ужан интыме ӧй вошъялля ни.

— Технологиос азинтӥсько, пыӵал тӥрлыкез суреданын но туала амалъёс кылдэмын ни, вылды. Азьлоен ӵошатыса, ужды, оло, капчигес луиз?

— Кызьы ужаськомы вал уно дасо аръёс талэсь азьло, со амалъёсты ик кутӥськомы али но. Лазерен гравировкамы бен вань, но котьма ке но, вань ужез киосынымы лэсьтыны тыршиськомы. Та бордын угось школамылэн аспӧртэмлыкез. Пыӵал тӥрлыкез чебертӥськомы, вань сюлэммес-мылкыдмес сётыса. Таӵезэ уд вера кунгож сьӧрын суредам пистолетъёс-пыӵалъёс сярысь: отын кемалась уже куто ни туала техникаез. Соин ик милемлы заказъёс вуо сыӵе адямиослэсь, кудъёсыз дунъяны быгато киын лэсьтэм ужез. Таӵеосызлэн дунзы но бадӟымгес — 500 сюрс манетлэсь ятыр.

Егит гравёръёслэсь ужзэс эскерон

Туала технологиос сярысь азинтоно ке, басьтӥськи выль малпанме пыӵатон борды — киын быдэстоно ужез лазер гравировкаен пӧлэстыса утчаме потӥз.

Совето аръёсы ай пыӵал тӥрлык вылэ пуктыны чаклам суредэз нимысьтыз комиссия юнматылӥз. Туннэ югдур мукетгес: заказъёс вылын улӥськомы-ужаськомы бере, валтӥсь интые пото заказчиклэн куронъёсыз. Нимаз адямиос, кылсярысь, пӧйшуран пыӵал вылэ суреданы куро яратоно пунызэс яке кузпалзылэсь тусбуйзэ.

Но мыным тужгес но кельше инкуазез, пӧйшуръёсты суреданы. Бырйисько асьме нюлэсъёсысь пӧйшуръёсты гинэ. Пыӵал тӥрлыкез асьме дорын поттӥськомы ук, со вылысь суред но шаермылы тупась луыны кулэ. Тужгес но ӟеч пӧрмо кадь потэ ӟичыен но лудӵӧжен герӟаськем ужъёсы. Тани «Ӟичы» композициен пыӵалэ быдэс дуннеез котыртӥз ни, шуыны луоз. Пӧртэм кунъёсысь адӟытонъёсын возьматэмын, нош табере со утиське Ижысь М. Калашников нимо музейын. Со сяна, уноезлы кельшиз «Сайкан» композицие: пыӵал вылэ пуктэмын ӵукна сайкась инкуазь, пӧйшуръёс. Таиз но быдэстэмын, зарниез, азвесез уже кутыса, возьматэмын калыккуспо адӟытонъёсын. Нялтас вераса, суредъёсам ӵем пумиськыло чех школалы тупась пужыос: соос бабля кадесь, питыръяськисесь. Гравёрной искусствоын таиз амал тужгес секытэн лыдъяське. Нош мыным со капчиен сётске, эшшо ке таӵе пужыос вӧзы ватсасько на аслэсьтым кылдытэмъёссэ но. Быгатонлыкед Инмарен сётэмын ке, тэк пукыны уд чида ни: котькуд уждэ кылемезлэсь эшшо но ӟечгес, чебергес каремед потоз.

Нялтас вераса, огвакытэ монэ Италие ужаны ӧтё вал. Отын бадӟымгес уждун но сӥзизы. Но мон ӧй ӝуткаськы. Заводэлэсь люкиськыны ӧй быгаты.

— Кӧня дыр кошке одӥг пыӵалэз суреданы-чебертыны?

— Таиз герӟаськемын, кыӵе классъем луыны кулэ пыӵал тӥрлык. Нырысь йырдэ бергатӥськод, суред малпаськод, эскиз суредаськод. Пыӵалэз кыӵе ке адӟытонлы суредано ке, шорлыдын 2 толэзь кошке. Кыӵе ке коллекцилы ке — ӝыны арлэсь кема. Нош «эксклюзив» сериысьсэ чебертыны одӥг ар пала дыр кулэ. Тамында дыры кошкиз, кылсярысь, нырысетӥ президентлы Б. Ельцинлы, туала Президентмылы В. Путинлы кузьмам пистолетъёсты суреданы.

Та вакытэ басьтӥськи Л. Васевлы сӥзем пыӵалэз суредан борды: солы сӥзем адӟытон усьтӥськоз шуркынмонэ, отчыозь пыӵалэз йылозяз-пумозяз вуттоно. Соку ик ортчоз «Зарни штихель» (корт вылтӥ суредаськыны пичи пурт) вожвылъяськонмы. Сое заводамы радъян ӟеч сяме пыӵаз ни. Отчы пырисько элькунысьтымы пӧртэм предприятиосысь гравёръёс. Туэ но тужгес устозэ быръёмы.

— Инкуазез суреданы кельше бере, инкуазетӥ поръяны, пӧйшураны но яратӥськоды, дыр? Оло, чылкыт омыретӥ поръян вискады ик йырады выль композициосты кылдо?

— Туж яратӥсько инкуазе потаны. Соин ик чидатэк витисько шутэтскон нуналъёсты. Угось Ижлэсь палэнын коркамы, бакчамы вань — отчы дыртӥсько. Отын омыр чылкыт, котыр шыпыт, инкуазьлэсь вань чеберзэ, паймымонзэ синйылтӥськод. Озьы, зэм но, йырам кылдо выль сюжетъёс. Эшшо ке тыршисько пумитам шедись пӧйшуръёсты син азям кельтыны: озьы суредъёсам соос улэпесь кадь пӧрмо.

Арлы огпол ке но эшъёсыным пӧйшураны потаськомы. Я лудӵӧжез кутӥсько, я лудкечез. Мыным таосыныз но тырме — бадӟым пӧйшур вылэ уг ветлӥськы. Пыӵал вылэ пуктэм инкуазь суредъёсы пыр мон охотниклы вераны турттӥсько кадь: кияд пыӵал кутӥд ке но, эн вунэты инкуазь сярысь. Сое гажано, утёно.

Инкуазе потаку, выль суредъёс кылдо

Дышетӥсь

— Пыӵал тӥрлыкез суреданъя школаын тӥ табере асьтэос дышетӥсь: гравёрлэн удысэзлы дышетӥськоды егит специалистъёсты. Кыӵе куронъёс пуктӥськоды соос азе? Кыӵе луыны кулэ гравёрлэсь удыссэ быръем мурт?

— Школаын дышетӥсь луыса ужаны кутски 1984-тӥ арысен. 2 ар ортчыса, Чернобыльысь атом станция пуштӥз. Мыным дышетӥсьлэсь удыссэ уретоно луиз. Химической войскоосын службаме ортчи бере, пуштонлэсь бервылзэ утялтыны нырысь ик милемыз басьтӥзы. Отчы монэ ӝыны арлы кутӥзы вал. Но тазалыке 3 толэзьлы гинэ тырмиз. Приборъёсын учкизы но шуизы: басьтэм облучениед, пе, тырмыт ни, кемагес уд чида. Озьы мон выльысь заводам берытски. Чернобыль бере лейтенант звание сётӥзы.

Чернобыльын адӟемъёсы али ке но син азям. Кыӵе ке кӧшкемыт киноез учкем кадь. Припять городысь коркаосты, кенеръёсты сэрттылӥмы, соосты одӥг интые люкаллямы но нимысьтыз плёнкаосын шобыртылӥмы. Припять котырысь 30 иськеме пырись гуртъёсын но тазьы ик ужамы. Коркаоссылэн липетъёссы куролэсь, радиациен сутэмын — соосты но утялтылӥмы. Уен-нуналэн, валамон, ӧм ужалэ. Нунал ӵоже куддыр 5 минут гинэ тыршыса вуттылӥмы — сокем бадӟым вал радиация. Облучение медам басьтэ шуыса, нимысьтыз бункеръёсын пукылӥмы. Тазалыке вылын Чернобыль шӧдӥськытэк ӧз кыльы. Но мар карод: кинлы ке но ведь та ужез быдэстоно вал. Висёнъёслы мон уг сётскиськы: спортэн эшъяськисько. Туж яратӥсько волейболэн шудыны.

Нош дышетӥсьлэн удысэз сярысь ке верано, ар куспын мон визьнодасько ог 10 пала егитъёсты. Туж ӟеч, соос суредаськыны пӧрмыто ке. Эшшо но умой — суредаськонъя школаос пыр потэмын ке. Но туала вакытэ дышетыны кутӥськомы ни суредаськыны воксё быгатӥсьтэмъёссэ но, таос дышетскыны мылкыд каро угось, уксё тырыса. Элькунысьтымы гинэ ӧвӧл, палэнысь улосъёсысь но, кылсярысь, Самара, Вятские Поляны, Нытва, Артём городъёсысь лыкто. Зэмзэ вераса, мон егит дыръя таӵеез ӧй вал — нырысь ик лыдэ басьтылӥзы адямилэсь быгатонлыкъёссэ. Суредъёсъя нимысьтыз конкурс ортчылӥз. Мынам интыям но 5 адями куриське вал.

Дышетскисьёсы азе мон нырысь ик дисциплина ласянь чурытэсь куронъёс пуктӥсько. Таиз ӧз луы ке, заказдэ йылозяз-пумозяз вуттыны уд пӧрмыты. Кыкетӥез, гравёрлэсь ужзэ быръем мурт чидась луыны кулэ, мед яратоз пукыса быдэстоно ужез. Угось нунал лумбытэн, ӝӧк сьӧрысь султылытэк, ужано луэ. Куддыр пичи пужы пуктыны кӧня ке нунал кошке.

Котькуд дышетскисьме, вань сюлэмме сётыса, дышетӥсько. Уноез тыршо милям школаямы ик, кылемъёсыз — «Калашников» концернын. Туж шумпотӥсько, соос маке ласянь монэ азьпалто ке. Тани Кирилл Лекомцев дышетскисе МР-27 пыӵалэз сокем ӟеч суредаз, 2005-тӥ арын со тужгес устоен пусъемын вал Россиын ортчем адӟытонын. Вормонъёсынызы озьы ик шумпотто мукетъёсыз дышетскисьёсы. Кылсярысь, Александр Санников. Со вордскем дырысеныз сонгро, но аслэсьтыз удыссэ шедьтӥз — ки улысьтыз пото тузӥ суредъёсын пыӵалъёс. Огъя вераса, кӧня гравёръёс та вакытэ тыршо школаямы, ваньзэсты мон визьнодай. Соослэн вормонъёссы — мынам шумпотонэ. Ужам ужедлэсь пайдазэ адӟиськод ке, сюлэм нясь-нясь луэ ук. Дышетскисьёсылы мон котьку шуисько: кортлэн но вань сюлмыз, сое шӧдыны гинэ быгатоно.

— Уг паймы, кузпалды но заводын тырше шуиды ке. Оло, пиналъёстылы но пыӵаз суредаськыны быгатонлыкты? Оло, тӥ сямен ик азинтӥзы заводын ужасьёслэсь династизэс?

— Нина Фёдоровна кузпалэным милемыз тодматӥз комсомол. Мугорез кыдатонъя вожвылъяськонэ ӵош тупаськеммы. Тодматским, ог-огмылы синмаським. 1980-тӥ арын март толэзе сюан шудӥмы, декабрьлэн пумаз нылмы вордскиз. Кузпалы чылкак мукет удыслы дышетскемын — со нылпиослэсь синзэс эмъясь. Туж умой ук, семьяын кин ке эмъясь вань ке. Нош нылмы — со милям одӥг гинэ — зэм но, туж чебер суредаське. Школаын дышетскытозяз, кизэ волятӥз суредаськонъя школаын. Но удыс бырйыкуз, шуиз: папа, вождэ эн вай, но мон заводэ ужаны уг мыны. Юристлы дышетскиз, тырше Ижысь одӥгаз ёросысь вытъёсъя инспекциын. 2-тӥ классэ ветлӥсь внуке вань. Кин тодэ, оло, со азинтоз мынэсьтым удысме.

Елена Слащёва

Ангелина Снигирева
By Ангелина Снигирева Сентябрь 19, 2019 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<