Книгалы коньдон жаль ӧвӧл

Ангелина Снигирева
By Ангелина Снигирева 12 сентября, 2019 14:15

Ижкар — лыдӟиськись кар, тазьы малпай «Лыдӟиськы, Ижкар!» («ЧИЖ») фестивале вуылэме бере. Кылем шутэтскон нуналъёсы со 7-тӥзэ радъяськиз. Киров нимо паркысь Фан-зонаын 3 нунал ӵоже улон пӧзиз.

Януш Вишневскийлэсь афтографсэ басьтыны быдэс черод люкаськиз
Фото: «Читай, Ижевск!» «ВКонтакте» бамысь

Туала книга — со кыл но суред

6-тӥ сентябре валтӥсь ужрадъёс кутскемынэсь ӧй вал на ке но, адямиос мыло-кыдо поръязы ни лыдӟиськон дуннелэн урамъёстӥз: одӥгъёсыз фестивальлэн борддорез вылэ ки пытьыоссэс кельтӥзы, мукетъёсыз пӧртэм мастер-классъёсы пыриськизы.
Бадӟым палаткаосысь выль книгаослэн зынзы вӧлме — лыдӟиськыны яратӥсьёс отысь асьсэлы книга утчало ини.

— Мон фестивале котькуд ар вуылыны тыршисько, — вераз Анна Галанова. — Туэ но татчы лыктыса, сомында коньдонме книгаослы быдтӥ! Но мылкыды со сэрен уг усьы, уго та бамъёс пушкын сомында выль тодон-валан ватӥське!
Выль тодон-валан книгаын гинэ ӧй вал, фестивалез радъясьёс туж узыр программа дасяллям. Ижкарын улӥсьёслы но куноослы, нош соос паркын та нуналъёсы лачак вал, 3 нуналлэн котькуд часэз мар ке но тунсыкозэ кузьмаз.
Тани 1-тӥ нуналаз ик удмурт писателен Вячеслав Ар-Сергиен пумиськон ортчиз. Со аслаз «Перекрёстки» выль книгаеныз тодматӥз. Отчы веросъёс, киноповесть но эссе пыризы. Улонысь учыръёс, тунсыко тодэ-ваёнъёс, лыдӟиськисьёсын кенешонъёс — таин пыӵаз пумиськон.
Жаляса верано, удмурт литератураен герӟаськем ужрадъёс фестивальлэн программаяз трос ик ӧй вал. Озьы ке но соос сюлме пырисесь, мылкыдэз бугыртӥсесь пӧрмизы.
Кемалась ик ӧвӧл, удмурт калык выжыкылъёсын, мифъёсын но легендаосын книгалэн 3-тӥ изданиез потӥз. Соин фестивальысь калыкез тодматӥзы Флор Васильев нимо библиотекаын ужасьёс. «Удмуртия» издательстволэн дизайнереныз Юрий Лобановен ӵош дэмлазы удмурт фольклоре зымыны. Та книгалэн 2-тӥ изданиезлы суредъёсты дано удмурт художник Менсандык Гарипов быдэстӥз вал.
Книга выль ке но, со бордын тыршисьёс азьвыл туссэ утьыны тыршиллям. Бамъёсты азьло сямен ик Гариповлэн иллюстрациосыныз тырмытӥллям.

Лыдӟисьёсын пумиськылӥз Ар-Серги гожъяськись
Фото: «Читай, Ижевск!» «ВКонтакте» бамысь

— Менсадык Гарипов бадӟым данъяськонмы, — сюлмысь вераз Юрий Лобанов. — Со туж мур шӧдэ вал удмуртъёслэсь пуш дуннезэс, улонзэс, нош фольклорлэсь кылдытэм книгаослы ӵапак сыӵе вашкала дуннеез возьматӥсь суредъёс кулэ.
Та иллюстрациосты дасямез бере, Гарипов шуэм: «Быдэстӥ сое, мар мынам потэ вал, табере кошкыны но яра». Соку та кылъёслэсь мур пуштросэс валась ӧй вал. Но трос ик дыр ӧз ортчы, дано художник улонысь кошкиз. Солэн творчествоезлы али но вылӥ дунъет сёто, Москваысь Третьяковской галереялэн коллекцияз но ужъёссэ утё.
Книгаез учкыку, пуштроссэ сяна, вылтуссэ но дунъяськомы. Кыл но суред — тани мар со туала книга.
Ижкарысь библиотекаос огазеяськыса фествальын тыршизы. Азязы валтӥсь ужпум: калыкез лыдӟиськонлы матынгес кароно.

— Тазэ фестивальмес ми «Образцовый ЧИЖ» шуыса нимамы, — вераз фестивалез радъясь, Ижкарлэн библиотечной системаезлэн кивалтӥсез Светлана Гусева. — Площадкаосмылы нимъёс малпакумы, кылъёсын шудӥмы, соосты тусэн — образэн — герӟамы, кылсярысь «СоОБРАЗим сюжет», «ВоОБРАЗим библиотеку». Фестивальмы 7-тӥзэ ортче ни ке но, малпасько, со бадӟым ужлэн кутсконэз гинэ ай, азьланяз эшшо трос тунсыко уж возьма.

Гожтӥсько сое, мае шӧдӥсько

Лыдӟиськисьёсты шумпоттон понна библиотекаос котькуд ар быдэс Россилы но дуннелы тодмо гожъяськисьёсты ӧтё.
Фестивальлэн программаеныз тодматскыкум, адӟи: дорамы кылбурчи Анна Русс лыктэ. Солэн ужъёсыз уно журналъёсын печатласькемын, «Марежь», «Теперь всё изменится», «Sториз» книгаоссэ поттӥз. Но тужгес но данъяськыны быгатэ аслаз кылбуран слэмъёсыныз: быдэс Россиысь кылбурчиосты азьпалтылӥз, Берлинын но Парижын ортчись Слэмъёслэн финалазы потылӥз. Сое уно литературая премиосын но пусйылӥзы.
Вань вормонъёсыз сярысь лыдӟыса, малпаськод: макем йӧно адямиен пумиськонэ лыктӥськод. Но фестивале вуыса, егит шаплы нылашез адӟиськод.

— Анна аслаз вераськонъёсыныз серекъятӥз, — вера мылкыдзэ Мария Дмитриева. — Милемыным, огшоры учкисьёсын, кемалась тодмоосыныз кадь вераськиз. Туж кельшиз, кызьы со аслэсьтыз кылбуръёссэ шара лыдӟиз.
Тросэз возьмазы мукетсэ но писателез — Януш Вишневскиез. Ижкаре вуэмез бере ик сое пӧртэм радио-, телепрограммаосы нуллӥзы, фестиваль улсын гинэ 1 пумиськонэн ӧз тырмы, котыраз 2 нуналзэ ик уно адями бичаськылӥз.
Маин со сокем калыкез бордаз кыскиз? Али Януш Польшаысь тужгес но тодмоез писатель шуыны луоз. Университетэз йылпумъяса, информатикая но химияя докторлэсь степеньёссэ басьтӥз. Али Германиын Франкфурт-на-Майнеын улэ, молекулярной биологиен выре. Но со сокем тодмо ӧвӧл аслаз научной ужъёсыныз, со тодмо романъёсыныз. 2001-тӥ арын печатлаз «Одиночество в сети» ужзэ. Со быдэс дуннеын бестселлер луиз, соя лэсьтэм кино Польша прокатын Голливудысь киноосты трослы азьпалтӥз.

— Мон ӧвӧл писатель, мон — учёной, — вера ачиз Януш Вишневский. — Таӵе пумиськонъёсын ӵем кылӥсько, кызьы адямиос паймо, точной наукаосын вырись адями яратон сярысь романъёс гожъя шуыса. Ужаса мон валай: гожтӥсько сое, мае тодӥсько, нош мынам потӥз гожтэме сое, мае шӧдӥсько.
«Одиночество в сети» романзэ со улонэзлэн туж секыт вакытаз гожтыны кутскем. Ӵапак соку кышноеыныз люкиськем, зол куректэм.

Фестивальын пӧртэм площадкаос ужазы
Фото: «Читай, Ижевск!» «ВКонтакте» бамысь

— Мар таӵе вакытэ воргоронъёс каро? Юыны кутско, — шуиз писатель. — Яке психотерапевтъёс доры ветлыны ӧдъяло. Нош мон шӧдонъёсме романэ кисьтыны малпай, со трослы дунтэмгес ук, Франкфуртын псхитерапевтъёс туж трос коньдон куро.
Януш романзэ поттыны уг но малпа вал. 3 ар ӵоже пичиен пичиен ас малпанъёссэ кагаз вылэ кисьтӥз.

— Одӥг пол тросгес вина юиськем, лэся, — азьланьтӥз веранзэ писатель. — Эшелы ог люкетсэ келяй, со мынам литературной критик. Соку ик шуиз: «Печатла!» Озьы тӥни быдэс дунне романме адӟиз. Зэмзэ ке, ӧй но малпалля, со кинлы ке тунсыко потоз шуыса. Нош кышное романме татчыозь ӧз на лыдӟы, 18 ар ортчиз ни ке но.
Лыдӟисьёс писателез сак кылзӥзы, аслаз каньыл сямыныз со бордаз кыскиз. Залысь соку ик пӧртэм юанъёс чузъяськыны кутскизы. Тани, пе, ӵемысь шуо, ачиз книга соя лэсьтэм фильмлэсь трослы тунсыкогес шуыса, нош тӥледлы кельшиз-а «Одиночество в сети» фильм?

— Ӧз. — соку ик вераз Януш Вишневский. — Туж урод кино пӧрмиз. Мынам книгае шӧдонъёс сярысь, нош кинолы сомында коньдон быдтӥзы, усто актёръёсты ӧтизы, крезьгур гожтӥзы, но шӧдонъёс сярысь вунэтӥзы. Татын огшоры сюжет гинэ кылиз.
Писательлэсь творчествозэ дунъясьёс понна но, фестивале пыриськисьёс понна но та пумиськон кемалы йыразы кылёз на, дыр.
Адӟом, маин «Лыдӟиськы, Ижкар!» вуоно аре паймытоз.

Мария Емельянова

Ангелина Снигирева
By Ангелина Снигирева 12 сентября, 2019 14:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<