Калык пӧлы мыноно

Ангелина Снигирева
By Ангелина Снигирева 30 сентября, 2019 14:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нина Николаевна ДЗЮИНА — Глазов ёросысь Понино муниципал кылдытэтлэн кивалтӥсез. Азьвыл «Красное Знамя», «Иднакар» газетъёсын ужам журналист уг ваты: выль удыс борды туж кышкаса кутскиз. Кутскиз но — 19 гуртъем кылдытэтлэн сюлмаськонъёсыз пӧлы йырыныз выйиз…

Н. Дзюина
Туспуктӥз: М. Егоров

— Нина Николаевна, кызьы, уно аръёс ӵоже газетын ужаса, бадӟым муниципал кылдытэтэн кивалтыны выжиды?

— Мон ар пала ужасько ни вал «Иднакар» газетлэн валтӥсь редакторез луыса. Ёрос администрациысь вазиськизы, Понино муниципал кылдытэтлы тӧро луыны курыса. Кема малпаськи, угось берло дыре малы ке та муниципал кылдытэтлэн йыръёсыз ӵем вошъяськизы. Озьы депутатъёс ваньзы мон понна дурбасьтӥзы ке но, выль удыс борды туж кышкаса басьтӥськи.

— Кызьы тӥледыз калык пумитаз? Маиз тужгес секытэз вал?

— Нокин ӧз валэкты, кызьы ужано. Мон интыысь депутатъёслэсь сессизэс гинэ но кызьы ортчытъяны уг валаськы вал.

Валлё татчы администрациысь специалистъёс собраниосы ветлыны но кышкаллязы. Огез озьы ик шуиз: Нина Николаевна, коть куатаське, коть эн, но тӥ доры мон уг лыкты. Мон паймисько: малы? Тынад, пе, отын калыкед укыр визьмояськись, мукетъёслы вераны но уг сёто… Нырысь вакытаз мыным но туж секыт вал. Соку гинэ ужаны кутски, ваньмыз понна кыл кылоно луылӥз. Одӥг пиосмурт шорам матькетыса кесяське: сюресъёс ӧвӧл, лымы уг сузяськы, гумыос сисьмемын, выжъёс куашкамын! Коть бӧрд…

Каль дыши, шӧдӥсько, калык пумен-пумен палам берытске, дорам вераськыны пырало, дэмланъёссэс сёто. Ужъя капчигес, конечно, ӧз луы. Кылем арын ву кыскись гумыосын воксё ёрмим, ваньмыз сисьмемын, отын-татын пасяське, бызе. Та пумысен калыкен ялан пумиськылӥ, сьӧрам ремонт лэсьтӥсь огазеяськонлэсь кивалтӥсьсэ нуллӥ. Солэсь кенешын юаськом: гумыосты тупатъялоды-а? Ярам, пе… Ӧвӧл, тӥ вералэ, ку, кыӵе числоозь. Косыса-косыса, ялан жингыръяса, вераськыса, ужъёс гужем ӵоже быдэстэмын вал.

Туннэ тужгес бадӟым сюлмаськонмы — канализация. Со вужмемын. Татчы лыктытозям, мон мар со КНС уг но тодӥськы вал. Канализационно-насосной станция вылэм. Со уг ужа, вань жоб ву тыметэ кошке, отын камышъёс будо. Вылӥысь кивалтӥсьёс шуо: малы шурады сыӵе турын будэтӥськоды, сузялэ. Но, канализациез тупатытэк, тыметэз чылкыт уд кары.

Понино муниципал кылдытэтын ужаны соин но секыт — кылдытэт бадӟым, но одӥг колхоз но ӧвӧл. Нош фермер хозяйствоос ас понназыгес ужаны дышемын. Тау шуысал Иван Боговеев, Александр Баженов ужбергатӥсьёслы, Максим Лекомцев фермерлы, Александр Кунаев депутатлы. Тани Александр Васильевичлы вазиськи: Понино шайвыл котырысь жагез поттоно вал. Юрттӥз. Шайвылэ пыронэз но урод вал, отын ву пукиз. Созэ но тупатӥз. Собере гуртысь одӥгаз ураме тротуаръёс лэсьтыны пу висъяз, калык ачиз кортӵог-молот кутӥз ни.

Эшъёсыныз

Коньдонэн котькин лэсьтыны быгатоз, нош коньдон ӧвӧл ке — олокызьы но бергано, спонсоръёс утчано луэ.

— Озьыен, тӧрое пуксемды пумысен жаляськоды?

— Выльысь курысалзы-косысалзы ке, соглаш ӧй кариськысал ни. Картэ луло луысал ке, мон «Иднакар» газетэ валтӥсь редакторе но ӧй мынысал. Мужике шуысал: мар тон? Нош мон солэсь кылзысал. «Красное Знамяын» мон подписка, реклама понна кыл кутӥ, уже туж кельше вал. Мукет ласянь, глава луыса ужан — со туж бадӟым школа. Кытын сомында бумага ужез нуод, огкылъёс тупатод, калыкен кусып возёд на? Мон табере котькыӵе ужын, ЖКХ-ын гинэ но, ужаны пӧрмыто ни, дыр. Уже секыт ке но, тунсыко. Туж тунсыко.

— Тӥ — чебер, визьмо, туж тунсыко кышномурт, но ялан огнады…

— Мынам котьку трос эшъёсы, тодмоосы вал. Но мужике кулӥз но, котырам эшъёсы чиньыен лыдъямон но ӧз кыле ни. Оло, ачим воштӥськи…

Картэ кулэм дырысен 7 ар ортчиз ни. Со ӧжыт ӧвӧл кадь, но ваньмыз сыӵе ӝог… Мужикелэсь 45 арессэ семьяен, матысь ӵыжы-выжыосын ӵош туж умой пусйим. Нош кӧня ке нунал ортчыса, заводын ужан висказ со усем, вирзӥбетэз сокем тэтчем. Эскериськыны Иже келязы. Мон котьку сьӧраз ветлӥсько вал, но соку озьы пӧрмиз — ӧй мыны. Табере туж жалясько. Соку врачен вераськысал ке, тодысал ук, Андреез котькуд нуналэ инсульт шуккыны быгатоз шуыса, кыӵе эмъюм сётыны но валасал. Нош картэ номыр ӧз вера. 1-тӥ мае Москваын дышетскись нылпиосмы бертылӥзы, 9-тӥ мае кошкизы. Картэ туж куректӥз, висемез сэрен ужаны уз быгаты ни шуыса. Мон буйгатъяй: толэзь ӵоже тон больничнойын улыны кулэ, тонэ нокин улляны уг быгаты, мукетсэ, капчизэгес, уж ӵектозы. Со уж дураз, заводэ, ветлэм. Отын куаретӥллям, кыӵе, пе, тон ужась луод на, кошкон сярысь заявление гожты. Андрей со кылъёсты чидамтэ, гожтэм… Мужикъёс тросгес переживать каро ук — котькуд нунал пичи юылыны кутскиз, капчигес, пе, луэ.

Огпол уж дуре жингыртэ, сазь. Берт, пе, ӝоггес, мыным туж урод, йыры висе… Мон бертӥ. Пукиськом кырын скамья вылын. Шуисько: мар-о пукиськом, ойдо коть бакчамес гудом. Со номыр ӧз куареты. Пыриз, кыӵе ке эмъюм юиз, телевизор, пе, учко — йыры висе… Уйин кызэмезлэсь шӧдӥ. Ву вайи, нош со кружкаез кутыны уг быгаты ни. Скорой лыктӥз, врачъёс укол пуктӥзы. Томография каремзы бере веразы: обширной инсульт. Реанимацие нуизы. Ӵуказеяз кулӥз…

— Асьтэды янгыш кариськоды, дыр…

— Валлё весь малпай: ачим Иже ветлысал ке, ма кароно тодысал ке, оло, сое утьыны луысал на. Но тодмоосы жингыръяллязы: Нина, весь астэ виноват эн кар, ми, пе, врачъёсын вераськылӥм, сыӵе инсультэн адями луло уг кыльы ни…

Быдэс арлэсь кызьы ортчемзэ ӧй вала — машина-автомат кадь. Весь потэ вал, тани лыктоз, тани корка пыроз… Вот мон ӧс косякез лэсьтӥ, выль мунчо ӝутӥ, тани со бертоз но, шуо: учкы, мар мон тонтэк быгатӥ… Ар ортчыса, валай: адями ноку уз вуы ни. Собере атае кулӥз, 2-ез братъёсы, эшшо кӧня ке родняосы. Соку тодам вайылӥ Балезино ёросысь Каменное Заделье черкогуртысь монастырьысь Зосима батюшкалэсь верамзэ: вуоз сыӵе дыр, писпу вылысь куаръёс усем кадь кошкозы адямиос, кылёзы тужгес юнъёсыз гинэ. Мыным потэ вал, сыӵе вакыт вуиз…

— Нош тӥ асьтэды юн кышномуртэн, юн кивалтӥсен шӧдӥськоды-а?

— Туж бадӟым тау шуэме потэ Нина Кашиналы. Со Понино сельсоветэн 1990-тӥ аръёсы кивалтӥз, секыт аръёсы трос лэсьтӥз. Бӧрысь сое ёрос администрацие басьтӥзы. Нина Геннадьевна — зэмос нылкышно кивалтӥсь. Ӵемысь солы, визь-кенеш юаса, жингыръясько. Котьку лад-лад валэктэ, юрттэ.

Глазов ёросысь тодмо адямиосын: И. Волковен, В. Терскиен, Н. Васильевен

Куддыръя малпаськыса уйёссэ но иземе уг луы. Конечно, муниципал кылдытэтэн пиосмуртъёс ик кивалтыны кулэ, соослэн йырзы мукет сямен ужа ук.

Нылы шуэ: мама, тон — меӵ из гурезь кадь. Пыр мынӥськод. Но мон аслым сыӵе уг потӥськы. Нырысь вакытаз ай, туж секыт луэмысь, кошко шуисько вал. Но возьыт ук, кызьы озьы кошкод? Мар калык шуоз — тыныд оскизы ук. Али кин ке шуэ ке, тынад отын сыӵе-таӵе калыкед, тынад отын со-та, мон пумит вазисько: мынам умой калыке! Тодэ вал, кыӵе ӟеч мынам калыке, кыӵе визьмо но быгатӥсь адямиосмы милям вань! Со зэмзэ но озьы.

Тужгес ӟеч юрттӥсьёсы — гуртъёсысь старостаос. Соос сыӵе сюлмаськисесь, калык сярысь малпаськисесь.

Муниципал кылдытэтамы 19 гурт ке, ваньмаз котьку вутскыны но уг луы. Туэ тросгес саклык висъяськиз Понинолы. Но мукетъёссэ но вунэтэм уг поты. Тыршиськом «Инициативное бюджетирование», «Доступная городская среда» программаосы пыриськыны, кыӵе ке проектъёс борды но басьтӥськоно вал, но сюресъёсмы туж быремын — нырысь ик соосты тупатъяно.

Нылы та ужысьтым кошкыны куре вал, тазалыктэ, пе, быдтод. Нош та нуналъёсы шуиз: мама, тон со ужад ялан мургес но мургес пыриськод, мон валай ни: тон отысь ноку уд кошкы…

— Тӥледын быдэс нунал ӵоже гуртъёстӥ ветлыса, паймим: котькудзэ нимын-тулын тодӥськоды, лэся…

— Мон тапалан вордӥськи ук, Пудвай гуртын. Урамамы 5 бадӟым топольёс будо. Пересьёс соосты исаны уг лэзё вал — вераса, пе, мерттэмын. Оло, со огшоры кышкатон гинэ вал. Озьы ке но, топольёс укыр бадӟым будэмен, одӥг кышномуртлэн мужикез корка дорысьтызы писпулэсь вайёссэ кораны тубиз но усиз — кулӥз. Кӧня ке улыса, мукетыз пиосмурт тополь вайёсты кораз — висьыны кутскиз, ӝоген кулӥз. Та учыр бере со топольёсты калтыны огзэ-кыксэ ӧтё, ужасьёс учко но кошко. Нокин уг кора — кышкало, маке луоз шуыса. Тӥни сыӵе ульчаын мамаелэн коркаез али но сылэ, со топольёс туж ӝужытэсь, тӧласькыку туж кӧшкемыт куашето. Валасько: соосты но калтоно, но со понна трос коньдон кулэ. Ку гинэ ваньзэ лэсьтод, кытысь гинэ коньдон шедьтод.

Бакчазэ яратэ

Семьяямы ми 5 пиналъёс будӥмы. 4 пиос пӧлын мон огнам ныл. Мамае фермаын ужаз, папае — вал гидын. Пыр витимы, ку ини мамамы пенсие потоз, дорын луоз. Ӵукна 6 часын султӥськод, мама ӧвӧл ни, нош ӝыт изьыны гинэ бертылӥз. Ми бабушен будэмын.

Школае нырысьсэ мынон нуналэ эше висьыны усиз. Мон сотэк ӧй мыны. Нош ӵуказеяз, 2-тӥ сентябре, ӵошен вамыштӥм ни. Пӧжи гурт пумозь вуим но, шуисько: ойдо берытском, кышкасько… Эше но кышка вылэм. Берытским. Но бӧрсямы бадӟым классъёсын дышетскисьёс мыно вылэм. Соос милемыз школае нуизы. Нош отын дышетӥсьмы — Ангелина Николаевна Меньшикова — пумитаз. Сыӵе ӟеч дышетӥсь вал со! Классамы сомында пинал ке но вал, одӥг пол но кесяськемзэ ӧм кылэ. Бадӟым классъёсын дышетскыны Пониное мынӥ. Понедельнике ӵукна 15 иськемез пыдын ортчиськом, арня ӵоже интернатын улӥськом. Нош арня пумын 15 иськемез доре бертӥськом. Нош ик пыдын. Малы ке тодам кылиз одӥг учыр. Кезьыт тол куазь. Доре бертыны автобус тупаз. Ми отчы туйнаським. Нош одӥг нылкышно (со нуны ваёно вылэм) ӧз тэры. Соку милемлы, школьникъёслы, шуизы: потэ. Кӧня ке адями потӥз. Автобусын пукись братэ азяз пуксьыны косэ вал. Но мон ваньзы сьӧры пото шуи. Озьы кынмыса бертӥмы…

— Нош азьланезлы улон сюрестэс кызьы бырйиды? Малы удмурт филологие мынӥды?

— Мыным туж ярало вал ӟуч кылъя но удмурт кылъя, литературая урокъёс. Али но тодам на Олег Поскрёбышевлы сӥзем урок, солэсь кылбуръёссэ лыдӟеммы.

Москваысь Герберын

Школаын дышетсконме йылпумъяса, Глазовысь пединститутэ мынӥ. Заявление гожъяса пукисько, нош приёмной комиссиысь нылъёс кошкыны дырто ни. Оло, пе, тӥ ӵуказе лыктоды. Кӧня ке минут гинэ кылиз на, шуисько. Лыктэ, пе, ӵуказе. Мон кошки но ӧй лыкты ни. Глазовысь ӵыжы-выжыосы дорын улӥсько вал. Шуисько: Ижысь институтэ пыро. Ярам, пе. Вокзалэ мынӥсько, поездэ пуксьыны уг дӥсьтӥськы, берытскисько, билетъёс ӧй вал, шуисько. Ӵуказеяз эшшо маке малпасько. Но арня ӵоже озьы уд улы ук. Кызьы ке дӥсьтонэ тырмиз, поездэ пукси — Иже вуи. Нош отын — трамвай… Университетэз мырдэм шедьтӥ. Татын филологияя корпус но солэн азбарез мыным ӧз кельше — туж пурысь потӥзы. Ас поннам малпай: коть медам пыры-а, мар-а вал. Но пыри.

Университетын дышетскон аръёсы тужгес шудоесь вал! Туж тунсыко дышетӥсьёс, экспедициосы потанъёс. Куратормы — егит тодосчи Валентин Кельмаков. Малы ке озьы луэ вал, гуртъёсы экспедицие мынӥськом ке, ӝыт нылъёс поръяны пото, нош монэ дышетӥсьмы уг лэзьы. Нош тон, пе, книга лыдӟыса пук. Монэ весь малэсь ке утиз кадь.

Вуоно кузпалыным мон пумиськи эшелэн сюаназ. Со но, мон но свидетельёс вал. Со — Глазов городын будэм ӟуч пияш, мон — удмурт гуртын будэм нылаш. Синмаськи ассэ возьыны, чебер вераськыны быгатэмезлы, мыло-кыдо луэмезлы. Шутэтскон нуналъёсы гуртам бертӥсько но, дорам вуэ… Быземе бере, нырысь вакытаз, солэн ӟуч эшъёсызлэсь, соослэн кузпалъёссылэсь возьдаськисько вал. Но соос монэ туж умой пумитазы, туж шулдыр улӥмы.

— Нылкышнолэсь азинлыксэ нылпиосызъя но учко. Тӥ 2 туж йӧно, визьмо пиналъёс будэтӥды…

— Ма, мукетъёсызлэсь уг но висъясько кадь. Дышетскизы Глазовысь математикая лицейын. Со ик тодон-валан ласянь трос сётӥз. Али кыксы но Москваын уло. Нылы, отысь Д. Менделеев нимо химико-технологической университетэз йылпумъяса, Сколковоын ужа. Кемалась ӧвӧл семья кылдытӥз, пинал витё ни. Ми соин телефон пыр ӵем вераськиськом. Тодэ мынам сюлмаськонъёсы сярысь.

Нылыныз

Пие озьы ик Москваын улэ, конструктор фирмаын ужа. Йылпумъямын Москваысь Бауман нимо технической университетэз. Атаез кулыку, со 1-тӥ курсын вал ай. Шуиз: мама, кулэ ке, мон берто, Глазовын дышетско. Но мон ӧй лэзьы, быдэс улондэ собере малпаса улод, жалялод, шуи.

Бен, оген улыны капчи ӧй вал. Али дыши ни. Кык писэе, одӥг пуные вань, соосын вераськисько. Нылпиосы куарето, озьы уг яра шуыса. Марлы нош уз яра, со улэп лулъёс ук? Яратӥсько керттӥськыны, нылпиос пичи дыръя носки-пӧзь гинэ пӧрмытӥсько вал, али кофтаос, кардиганъёс керттӥсько. Аслым уг, нылылы. Бен, магазинысь но ваньзэ басьтыны луэ, но киын керттэмезлэн аслаз шунытэз. Собере, керттӥськыса буйгано ук, лулсэръёс шутэтско.

Глазовын нимаз юртын улӥсько бере, отысь бакчаме но утялтоно луэ, мамаелэн гуртысьтыз бакчаез но калтоно. Солэн тазалыкез воксё лябӟиз ни. Тужгес матысь эше «Красное Знамя» газетын ужа, ӵошен ми губияны ветлӥськом, нуналлы быдэ, дыр, телефонэн вераськиськом. Кин тодэ, оло, куке-соку выльысь берытско газет уже.

Азьвыл мон кытчы ке огнам поездэн, автобусэн ветлыны кышкасько вал. Маке луоз кадь. Нош табере нокыӵе но уг поты. Мар сокем кышкытэз луыны быгатоз? Азьвыл улонэ но ваньмыз планъя вал, тани туннэ тазэ лэсьтоно, ӵуказе — созэ, нунал ортчыса — куинетӥзэ. Али планъёс ужея гинэ тупатӥсько, ваньмыз мукетыз — кызьы пӧрмиз.

Котькуд ӵукна султӥсько: тау, Инмаре, улӥсько, озьыен, ужано но ужано, калык пӧлы мыноно… 

Елена Миннигараева

Туспуктэмъёс басьтэмын геройлэн архивысьтыз

Ангелина Снигирева
By Ангелина Снигирева 30 сентября, 2019 14:51