Йыр вандӥсьёсын ваче син

Ангелина Снигирева
By Ангелина Снигирева Сентябрь 5, 2019 17:18

Арлы быдэ 3-тӥ сентябре Россия пусъе Терроризмен нюръяськон нуналэз. Юнматэмын со Уйпал Осетиысь Беслан школаысь 2004-тӥ арын 1-тӥ-3-тӥ сентябре нылпиосты террористъёс заложнике кырмем бере. Соку быриз 334 мурт, уноез – нылпиос. Та учырез, юзыр-кезьыр луыса, котькуд учыре малпа отставкаысь генерал-майор, КГБ-ын ужам мурт, Удмуртиысь дано юрист Владимир ОРЕХОВ. 38 ар талэсь азьвыл со, егит капитан, мозмытӥз террористъёслэсь Сарапулысь школаез. Утиз 30 нылпиез. Со вал СССР-ысь нылпиослы пумит нырысетӥез теракт. Владимир Викторович улытозяз трос бандитъёсын нюръяськиз на, ассэ но быдтыны медо вал. Тани кызьы тодаз вае со ортчем сюрессэ.

В. Орехов
Фото: Е. Сараматова

Эзельлэсь пегӟон

— Нырысетӥ классэз йылпумъяса ӧй вутты — Сарапулысь нылпи госпитале келязы: сюрлые тӥяськем, — вера Владимир Орехов. — Быдэсак гипсын татын возизы арлэсь кема. Озьы монэ эзеле пичиысен эскериз, сямме юнматӥз, улонэз яратон мылкыд пыӵатӥз. Дорам, Иже, лэзьыкузы, нянечкаос бӧрдыса ик келязы — сокем ог-огмылы дышиськеммы.

Оля сузэре 8 толэзьскын кулӥз, ми Лариса сузэреным, висёнъёс, начар улон шоры учкытэк, Быдӟым ож ортчем бере секыт аръёсты чидамы. Шумпотон кузьмалляз Пионеръёслэн дворецсы. Татчы пӧртэм кружокъёсы пичиысен гожтӥськи. Сценкаос пуктылӥ, гитараен шудӥ, гравюраос лэсьтылӥ. Нялтас вераса, гитара отӥяз но мыным улонам туж юрттӥз. Армиын монэ кутӥзы вокально-инструментальной ансамбле — вань быгатонлыкъёсме возьматъяй. Огаз концерт-вожвылъяськонын ансамблен вормеммы частьлы азвесь кубок утыны юрттӥз. Нош армиысь берытскеме бере эшъёсын гитараен Советской урамын шудыкумы, огез сиез пезьдӥз. Мар кароно? Библиотека азьысь ӟус вылын нылъёс вераськыса пуко. Йырси тэчондэс сётӥды ке, тӥледлы гитараен шудо, шуи. Огез йырси кутонзэ сётӥз ик, соин мон быгатӥ сиез интыяз пуктыны. Соку ик Оляен ог-огмылы синмаськимы кадь. 50 ар ӵоже ог-огмылы кужым но мылкыд сётӥськомы. Со бурдъямен, мон быгатӥ та улонын ӝутӥськыны, асме шедьтыны. Со зэмос эш. Мукетыз, оло, ӧй но чидасал: монэн гань-гань уд улы — мыным соку ик ваньзэ ӝог но рос-прос лэсьтоно. Ужея но троссэ вераны уг быгатӥськы вал ук. Кин но со юа: КГБ-ын ужасьлэн кышноез луыны секыт-а? Секыт, дыр. Улонэз монэн йырин вень вылын кадь ортчиз. Со оскымон, туж чебер нылкышно. Ольга Михайловналы нуналлы быдэ тау карисько монэ чидамезлы. Мае но адӟоно ӧз луы со! Пимес но огназ сямен будэтӥз. 1970-тӥ арын Андреймы вордӥськиз. (Нялтас вераса, со мынам сюрестӥм кошкиз — юрист, ФСБ-ысь подполковник.) Со аре монэ кутӥзы Пермьысь кун университетэ правоведение факультетэ. Уждун ӧжыт, ялан сессие ветлоно, улон интымы ӧвӧл…

Анай-атайеныз но сузэреныз

1974-тӥ арын, сессиысь берытскыса вуи гинэ, монэ КГБ-е ӧтизы. Кытын мар янгышаськем ни? Асьсэ дорын ужаны ӵектӥзы. Песятае репрессировать каремын, атае штрафбатэ сюрылэмын, ачим студент. Мон кадьёслы КГБ-е сюрес котьку пытсамын вал. Соглаш кариськи, тодӥ ке но, югдурез утён понна кыл кутыса, семьяме кышкыт адӟонэ вуттыны быгато шуыса. КГБ-ын ужасьёсты угось бандитъёс чаклалляса возизы. Одӥг кивалтӥсьлэсь нылзэ жаг куян мульдаысь шедьтӥзы. Асме но 1977-тӥ арын юзырес адӟон возьма вал. 4 часын ӵукна Ижысь квартирае йыгаськись луиз. Умой адямиос таӵе вазь куноетӥ уг ветло. Кузпалы соку ик укное учкиз: таксиысь мычиськыса, кӧня ке пиос дыртӥд-вуттӥд тамак пурккето, пе. Ӧс вамен юасько, кин отын шуыса. Пукем адямилэсь куаразэ тодмай — алигес гинэ солэсь свидетельлэсь сямен юалляськи. Оля ӧс азе султӥз но шуиз: мон тонэ нокытчы уг лэзьы. Ӧсэз усьятэк ик, кури ӵуказе ӵукна 8 часлы уж доры лыктыны. Ӧз вуы — пуртэн бышкаллям, больницае вуттӥллям. Больницае лыктыкум, со улэп на вал. Соку со шуиз: тӥледыз квартираысьтыды поттыны, быдтыны косэмын вал. Соку мон шаерысьтымы тюрьмаосын пукисьёсын ужалляй, олокӧня йыр вандӥсьёсын пумиськылӥ. Олокинлэн сюрес вылаз султӥськем…

Ар ортчыса, уж доры жингыртӥсь луиз. Кин кулэ, юай. Вазизы: малы, пе, нимтулдэс уд вераське? Валэктӥ: инструкцияя нимез шараяны уг яра. Генерал вылэм. КГБ-лэн Сарапулысь ёзэныз кивалтыны оскемзэ вераз.

Нылпиос понна нюръяськон

— 1981-тӥ арын 17-тӥ декабре тужгес юзырес учыр пуромиз, — мур лулӟыса ик, тодаз вае Владимир Викторович. — 14 час котырын ужан доры куалекъясь куараен жингыртӥзы: Сарапулысь 12 номеро школаысь 10-тӥ В классысь нылпиосты 2 кузя автоматъёсын солдатъёс заложнике кутӥзы, соос тӥледын гинэ вераськом шуо. Школае вуыкум, тодӥсько ни вал: солдатъёслэн сьӧразы сюлэсь ятыр патрон, пуртъёс. Америкае кошкыны малпало, ӧм юрттэ ке, нылпиосты ыбылонэн кышкато. Пегӟемын солдатъёс Уральской военной округысь 248-тӥ мотострелковой дивизиысь. Школае вуэмын соос, частьсылэн командирезлэсь пизэ утчаса, классэ кутозы но, командирзы соослы кунгож сьӧры лобӟыны юрттоз шуыса. Пизэ шедьтымтэен, Казахстанысь Ахмеджан Колпакбаев но Челябинск улосысь Александр Мельников пыриллям мукет классэ. Мугзэс валэктӥллям: частьысь минаос ышемын. Танкъёслы пумит минаос зэмен ик ышемын вал. Вагонэз бушатыкузы, ыштӥллям. Но соосты ми шедьтӥмы ни вал: Сарапулысь нылпиос шудыса ватӥллям. Котькудаз 9,5 килограмм тротил. Нылпиос валало шат кышканы? Шудом кожаса, кутӥллям, огаз парке ватӥллям. Шедьтэммы сярысь ми гинэ тодылӥм, школаын уг тодо вал. Военной часть Сарапуллы матын бере, солдатъёслэн вуэмзылы паймиллямтэ, кышкатскиллямтэ, соосты уроке капчиен лэзиллям.

Кузпалыныз но пиеныз

Вуисько но, школаез котыртэмын милиция, тылпу кысӥсьёс. Нош мар кароно азьланяз, нокин уг тоды. Террористъёсын нюръяськонъя соку угось учебникъёс но, специалистъёс но ӧй вал. Но со вакытэ котькуд класс герӟамын вал радиоузелэн. Со пыр дезертиръёслы кин луэмме ивортӥ, нимме-тулме верай. Но соос пумитам вазьыны ӧз быгатэ — герӟет огласянь гинэ вал. СССР-ысь КГБ-лэн кивалтӥсез Юрий Андропов ыстӥз террористъёсты быдтонъя А группаез (али «Альфа»). Но сое возьмано на. Вуэмзы но ӝог уз луы — туж зол пелляське, номыре адӟыны уг луы. Озьыен, вуытозязы нылпиосын оломар но луыны быгатоз. Сыӵе дыръя ачид сярысь кышкан ӧвӧл — нылпиос понна. Соин ик классэ пырон амал шедьтӥ. Малпай: солдатъёсын огкыл шедьтыны кулэ. Соос мыным оскизы ке, мон соослы тушмон ӧвӧл шуыса, гань-гань кариськозы, нылпиосты уз исалэ. Монэ адӟыса, нылпиос но буйгазы. Соин валче оскытӥ террористъёсты но: Америкае лобӟон понна загранпаспорт лэсьтоно, со понна документъёс кулэ, трос бумагаос гожъяно. Со бумагаосты гожъян сяменызы нош дырез кыскыны луиз. Нылпиос но та учырын асьсэды валаса возизы. Кин ке бӧрдыны кутскысал ке, террористъёс керӟегъяськыны ӧдъясалзы. Огзы но ӧз бӧрдэ. Сьӧросэ нырысь оген-оген нылъёсты, собере пиосты поттай. Асьсэды дезертиръёсты но озьы ик оген-оген поттамы. Коридоретӥ нуон сямен огзэс ке но кырмыны луэ вал. Но озьы карысалмы ке, классэ кылемез нылпиосты быдтыны быгатысал. Бератаз нылъёсты лэзьыны кури. Соглаш луизы. Спецназ вуиз но террористъёсты быдтыны дась луэмзэ ивортӥз. Валай созэ но: кабинетэ кылем пиосты ӧй потты ке, соос пуля улын бырыны быгатозы. Соин ик террористъёслы шуи: пияшъёс мед кошкозы, соосын тӥледыз самолётэ тубыны уз лэзе, нош монэ сьӧрады кутэ. Нылпиослы вази: потэ… Террористъёс мазэ-созэ валатэк ик кылизы. Нош солдатъёслы шуи: мон паспортъёстэс ваё. Мын шуыса, кырмыштӥзы. Потӥ. Соку ни спецназ кырмиз соосты. Бератаз А группаысь веразы: классысь потӥды гинэ, террористъёс чабкиськизы, трибуналлы сяна, таос нокинлы кулэ ӧвӧл ни шуыса. Мыным орден сётӥзы. Но солэсь но дуно мон понна вал нылпиослэн тодэ ваёнъёсынызы, туспуктэмъёсынызы, таукаронъёсынызы альбом. Пиналъёс сое мукет нуналаз ик кузьмазы мыным. Асме Иже, Центральной аппаратэ, ужаны выжтӥзы. Татын мон тырши 1987-тӥ арозь.

Тае ваньзэ али одӥг-кык кылын верасько. Нош соку быдэс операция кыстӥськиз 16 час. Нылпиос но кемалась будӥзы ни. Соос монэ али ке но семьязы чот каро. Мон но котькудӥз­лэсь улон сюрессэ тодӥсько, быгатэмея юрттӥсько. Котькуд учыре со нуналъёсты тодам вайисько, али вакытэз малпасько. Вань террористъёслэн школаын дышетскем сяна тодон-валанзы ӧвӧл. 1995-тӥ арын Ставропольысь Будённовскысь больницаез терро­ристъёс киултӥзы. Соку секытэн нылкышноосты укно дуре султытъязы, соос вискытӥ пулемётэн асьме солдатъёс шоры тачыр поттыса ыбылӥзы. Асьмелэнъёс кема номыр карыны ӧз быгатэ. Террористъёс Коран вылэ чӧлско, но отын нылпиосты виёно шуыса номыр гожтэмын ӧвӧл. Асьсэлэн но улонзы умой уг йылпумъяськы.

Лушкаськисьёсты кырмон

— Огпол шаерысьтымы КГБ-лэн тӧроез кабинетаз ӧтиз, — тодаз вае Владимир Викторович. — Таджикистанысь ёзэн кивалтыны ӵектӥз. Семьяен кенешыса, соглаш луэмме верай. Пумитъяськемез угось умоен уг лыдъяло. Но Таджикистанозь ӧй вуы — шуак келязы Сахалинэ. Быдэс улон-вылонмес Удмуртие кельтыса, дунне пыдсы кошкимы. 3 ар интые, татын 7 ар службаме нуи. 1990-тӥ аръёс. Югдур секыт. Йыртэмасьёс ашкынэмын. Сахалинлэн экономикаез зарезен герӟаськемын: Япониысь татчы дуно машинаос, бытовой техника вуттылӥзы. Кин ке вуж машинаоссэ но вузаны ӧдъяз — кылдӥз бизнес. Таин валче аспӧртэм пиратъёс кылдӥзы. Япониысь вузэн бертӥсь сухогрузъёсты качаны кутскизы. Син куспын холодильник, видеотехника, телевизор ышылӥзы. Морякъёс кышкатскизы ярдуре кылем семьяоссы понна, бандитъёс быдтонэн курдатъязы угось. Озьы зарезе потамысь дугдӥзы. Ужпум пуктэмын вал: бандитъёсты кутоно, югдурез тупатоно. Огзэ группировкаез кырмимы ик. Главарьзы туж кескич но шаян вал. УВД-ын ужасьёс кие со группировкаез сётыкумы, та сярысь ивортӥ, чаклаське, шуи. Пелязы понӥллямтэ. Висисько шуыса, главарьзы больницае куриськем. Сое чакланы егит сержантэз пуктӥллям. Югдурез утисез пуртъяса, бандит пегӟиз. Сое нош ик милемлы кутоно луиз.

Пётр Великийлэсь нырысетӥ степенё ордензэ сётон дыръя

Со учыр бере «Советский Сахалин» газетын ми сярысь «Крутые ребята» бадӟым статья потӥз. Трос гожтэтъёс вуизы соку. Бандитъёс но гожтӥллям: выросъёссэс шонере поттыны турттыса, асьсэды Робин Гуд нималлям, ми, пе, узыръёслэсь ваньбурзэс таласькомы. Соку ӵектӥ газетэ со гожтэтсэс печатланы. Нош вӧзаз вазиськимы: качам-лушкам интые, юрттэ, кылсярысь, сӧсыръёслы чаклам нылпи садлы. Соку садэ кинъёс ке лушкем вуттыны ӧдъязы йӧл, емышъёс, бакча сиён. Нош морякъёс выльысь зарезе потаны кутскизы.

Контрабандаен но нюръяськон выламы усиз. Япониысь огез ужбергатӥсь ӵемысь вуылыны кутскиз Сахалинэ. Олокыӵе но акциос радъяны ӧдъяз. Законэз тӥяса, кунгож сьӧры уксё поттыны кутскем. Кырмимы. Кусказ 3 миллион иена но 1 сюрс доллар биням, огез но декларация пыр поттэмын ӧвӧл. Россие солы сюрес пытсаськиз. Юрттӥсьёссэ но кырмимы. Кунгож сьӧрысь контрабандалы пум вуиз. Японецез мозмытыны курыса, бадӟым кивалтӥсьёс пӧлысь жингыръясьёс сюризы. Но мон юай: тӥ но соин ӵош вораськиды шат? Соку жингыръямысь дугдӥзы.

Югдур тупатскем берегес пенсие потоно кариськи. Ӵапак сокугес Иже ӧтись сюриз, мыным ӵектӥзы налоговой полициын ужаны. Эскероно вал, налоговой преступлениос медам луэ шуыса. Но департаментын 3 ар сяна ужаны ӧз кылды. Удмуртилэн Президентэз Александр Волков Вытъёсъя валтӥсь управлениез валтыны куриз. Мон юрист, уголовной ужъёсты сэрттыны-пертчыны дышемын. Москва кандидатураме умоен лыдъяз ке но, мар умойзэ мон татын карыны быгато? Департаментын ужаса, нюръяськоно луиз куд-ог шӧртчиосын. Куд-огез предприятиосты юромо банкрот карылӥз, лушкаськиз, сыӵеосын нюръяськон туж секытэн мынӥз. Соин, лэся, управление пуктэмзэс тодыса, мон вылэ Москвае олокыӵе но пӧяськыса гожтэм чагиськонъёс вуыны кутскизы. Александр Починок министр огпол Удмуртие вуэмез бере мыным шуиз: тӥ бизнесменъёсын чурыт вераськиськоды, шуо. Пумитаз вази: яра-а ачим сярысь ачим тӥледлы верало? Соку уже шоры учконме, югдур сярысь ватытэк верай. Шаерамы министр, одӥг нуналлы интые, кыклы ӝегатскиз. Кошкыкуз шуиз: улыны маза ӧз сётэ ке, мон тӥледыз Москвае министерствое басьто. Москвае монэ огпол гинэ кыскыны ӧз выре ни, но шаере понна ик ужаме потэ на, шуи. Нош кескич ужасьёс зэмен ик сюрылӥзы. Соосты сак эскероно вал. Огез бадӟымез предприятие выт ӧз тырылы. Сыӵеосты зуркатъяно луылӥз. Арбитражной судлэн решениезъя огез ӝыны миллиард манет бюджетэ уксё берыктӥз.

Калыклы юрттон

— Та гинэ монэ ӧз сюлмаськыты, — вера Владимир Орехов. — Вытъёсъя управление вуыкум, со Правительствоын интыяськылӥз, специалистъёс 8 кабинетын пукизы. Одӥг юрт но управление киын ӧвӧл — ваньмыз арендае кутэмын. 10 ар ӵоже кивалтытозям, ёросъёсын 18 юрт пуктӥмы, выльдӥмы. Со понна кӧня ке миллион манет кыскыны быгатӥ федерал центрысь. Валтӥсь управленилэсь юртсэ но ӝутыны быгатӥмы. Соку ик ужпум пуктӥ: сизьым пӧсям ву потытозь ужаны гинэ чакламын медам луы со. Соин ик юртэ столовой лэсьтӥмы, гостиница усьтӥмы, кылдытӥмы спортъя комплекс, бассейн. Со сяна, больница усьтӥмы, городысь но кабинетъёс сыӵеесь ӧй вал кадь. Больничное потасьёс шуак кулэсмизы. Штатэ кутӥ психологез. Таӵеез Россиын ӧй вал на. Нош кызьы сотэк? Адямиослы ӟеч лэсьтыны луэ ке, одно ик лэсьтӥсько. Соин магазинлы но инты шедьтӥмы. Уже лыкты но, малпаськыса мед пукод ай, кытысь йӧл, нянь басьтыны. Управлениын 20 отдел, 200-лэсь трос ужась аппаратын гинэ. 2 автобус басьтӥмы, ужасьёсмес городлэн пӧртэм сэрегъёсаз ӵукна но ӝыт нуллыны рейс усьтӥмы. Эсьма, нокин урамын кынмыса ӧз сылы ни. Адямиослэсь улонзэс капчиятыны выри. Парикмахер гинэ но дорамы вуылэ вал. Пичи государство вал со шуыса али ке но тодазы ваё. Жаляса верано, туннэ номыр со ӧвӧл ни — кошкеме бере ӧз уте, ӧз азинтэ.

Нош макем секыт вал ужасьёсты утьыны. Огвакытэ потӥз распоряжение, ваньзылэн вылӥ образованизы мед луоз шуыса. Тросэз ужасьёс соку ужтэк кыльыны быгато вал. Мар кароно? Кенеши Удмурт кун университетысь Экономикая институтэн. Отын усьтӥмы вытъёсъя но выт тыронъя кафедра. 1988-тӥ арысен 600-лэсь ятыр ужасьёсы отын тодон-валанзэс будэтӥзы. Ушъяськон понна сое ӧй лэсьты — сое, калык сярысь сюлмаськыса, кылдытӥ. Мыным со кулэ вал шат? Со калыклы кулэ. Пуктӥськыны но нокин ӧз косы — сюлэм куриз. О деле суди по исходу, шуо. Мыным туннэ нокин азьын возьыт ӧвӧл. Со тужгес дуноез, дыр.

Егит дыръяз

Но тужгес сюлэмме шунтэ тани мар. Ижысь Вормонлы 30 ар ульчаысь нылпи юртлы юрттылӥ. Коллективмылы но ӵектӥ пиналъёс понна кыл кутыны. Соглаш кариськизы, вуж книгаосмы, нылпиосмылэн пичи кылем дӥськутъёссы вань, пе. Воже потыса юай: вуж арбериостэс кытчы интыяны ёрмиськоды шат? Нылпиос доры мынӥськомы, соослэн анай-атайёссы ӧвӧл! 1-тӥ сентябрьлы вань выпускникъёсты йырысенызы пыдозязы дӥсяны кутскимы. Выль арлы кузьымъёс вайылӥ, ачим Тол бабай кариськылӥ. Огпол дорам директор лыктэ но шуэ: нылпиосты нош ик мунчое ӧз лэзе, тэйӟемъёсты вайиды-а, пе, шуо. Душевойёс лэсьтӥмы. Кызьы мисьтӥськытэк улозы?

Управлениысь ас мылкыдыя 2007-тӥ арын кошки. Вотка ёросысь Болгуры гуртэ музъем басьтӥмы, корка пуктӥмы. Музъемен ужаны туж яратӥсько. Пичи тракторе вань. Котькыӵе техникаен эшъяськисько. Картошка мерттонэз но нокинлы уг оскиськы. Кузпалы помидоръёсын выре. Кедръёс мерттӥ. Али ӵыжинъёссы кисьмало ни. Пие, внучкае, правнучкае берталляло. Но ганяк кариськыны ӧй быгаты. Кылдытӥ «Статский советникъ» компания. Отын мон директор но, бухгалтер но, визь-кенеш сётӥсь но… Налоговойын ужасьёс но янгышало ук. Соослэсь ужзэс эскероно, вазиськисьёслы юрттоно. Юрттэтлы кулэяськись ужбергатӥсьёс но трос. Огезлы 11 миллион манет выт тырон юнматӥллям. Налоговикъёс янгышаса сыӵе лыдпус пуктӥллям. Бизнесэ кельтыны луиз ни 400 миллионлэсь трос уксё. Дасо ужбергатӥсьёслэсь ужзэс быронлэсь утимы. Адямиослы шумпотон вайыны луэ ке, аслым шудолэсь но шудо потӥсько.

Елена Сараматова

Ангелина Снигирева
By Ангелина Снигирева Сентябрь 5, 2019 17:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<