Йырыз тӧдьы, ымнырыз — помидор. Кин со?

Ангелина Снигирева
By Ангелина Снигирева Сентябрь 14, 2019 09:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
В. Цветной

Удмурт маскарчи Вячеслав Цветной 14-тӥ сентябре 50 арессэ пусъе. Сое вань сюлмысьтызы ӟечкылало эшъёсыз, удмурт эстрадаысь кырӟасьёс но маскарчиос.

И. Филимонова

Ури-бери Орина (Ирина Филимонова):

— Цветноез нырысьсэ адӟи, сцена вылын варманаез сярысь юмореска веракуз. Остэ, мар гыж-гаж эмеспи та, ачиз но нием коньы кадь — амалтэк таӵе воргоронэз семьяяз пачкатыса возё, дыр, малпай. Соку ик дотово тодэме потӥз солэн варманаез сярысь. Нош та юанме кылем арын гинэ сётыны дӥсьтӥ — валля арын сцена вылын огаз концертын ӵош шудыны учырамы но. Варманаез, юморескаын верам йӧспӧртэм кышномуртлы матын но уг тупа, пе, со туж ӟеч — ӟег нянь кадь лякыт кышномурт.

Йыр компьютер ӧвӧл, куддыръя гожтэм кылъёс йырысь тӧлӟо. Концертын сценарийлэсь кырыж кошкыны кутскисько ке, Цветной мон интые гордэктэ, сигнал сётэ. Соку валасько: аха, янгышаськем. Нош собере катанчи мышкын со монэ кыштыр гинэ, ас понназ гырдалляса, серекъя.

Славик агай огшоры ӧвӧл ук. Йырыз тӧдьы, нош ымнырыз — помидор. Телефон пыр жингыртэ ке, гужем ӟечкыла Выль арен, куддыръя «Христос воскрес», шуэ.

Славик агай, азьлань улонэд чики-брики мед луоз! Йырсиедлэсь тросгес уксёед мед шальтыртоз, бамысьтыд ӵыжытэз медаз быры.

Михаил Ворончихин.

Михаил Ворончихин, Россиысь дано артист:

— Слава сярысь огзэ верам потэ: со бадӟым талантэн адями. Ачиз малпа, ачиз гожтэ, ачиз ик калыклы вера. Милемыз матысь эшъёс уд шуы: одӥг ӝӧк сьӧрын пукеммы но ӧвӧл. Ӵемгес адӟиськиськомы катанчи сьӧрын. Озьы ке но мон син азям возисько солэсь творчествозэ, шумпотӥсько, артистмы азинске, будэ шуыса.

Слава — туж востэм адями, адямиосты донгаса, азьпала потыны ноку уз выры. Тани 70 аресэ тырмиз, нош со вунэтымтэ. Огаз концертын пумиським но кузьым сётэ: туала басмалэсь вурем удмурт дэрем. Вождэ эн вайы, пе, мугез ӧй вал пумиськыны. Нош вордскем нуналме вунэтымтэ. Сыӵе со бадӟым но шырыт сюлэмо адями.

Капчи сямыд, адямиослы юрттон мылкыдыд ноку медам кысы, Слава!

В. Мальцев

Владимир Мальцев, Удмуртиысь дано артист:

— Славаен артэ ужамы «Шулдыр ӝыт» ансамбльын. Соку со егит вал, тунсыко учыръёсы шедьылӥз, ачиз но мукет адямиослы юмокъёс кылдытъяз.

Шарканэ гастроле ветлыкумы, монэ но таӵе «уже» кыскиз: ойдо, пе, автобус водительмылэн сумкаяз кирпич тыромы. Бертон азямы озьы ик карим: сумка пыдэсаз 2 кирпич понӥм, вылаз — дӥськутсэ.

Концертъёс сётыса, Иже вуимы уйшор бере гинэ. Водитель милемыз дорозямы ик келяз. Нош аслыз автобуссэ автобазае пуктоно. Коньдонзэ таксилы жалям но дорозяз — ӝыны городэз — пыдын вамышъяно кариськем, сумказэ тыбыраз ошыса. Ӵукна водительмес кышноез сайкатэ, пе: тон мар-о, уйжомид-а, мар-а, малы сумкаяд кирпич нуллӥськод?

Со учыр бере водительмы Славалы мыжыксэ кыдёкысен ик возьматъя вал.

Удмурт дунне

Ангелина Снигирева
By Ангелина Снигирева Сентябрь 14, 2019 09:55 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<