Инты ваньзылы тырмоз!

Ангелина Снигирева
By Ангелина Снигирева 6 сентября, 2019 15:19

Ижысь Ленин ёросын 20 номеро «Шундыё город» нылпи сад усьтӥськиз.

«Шундыё город» нылпи сад 220 пиналлы чакламын
Фото: udmurt.ru

Нылпи садэз сӥё-дано усьтонэ, анай-атайёс но пиналъёс сяна, пыриськизы Правительстволэн Тӧроезлэн воштӥсез Анастасия Муталенко, Иж городлэн йырыз Олег Бекмеметьев, дышетонъя но наукая министр Светлана Болотникова, Кун Кенешысь но Иж город Думаысь депутатъёс.

Нылпи садлэсь юртсэ пуктыны кутскизы вал 2013-тӥ арын декабре. Лэсьтӥськон ужъёс, уксё тырмымтэен, мырдэм кыстӥськизы 2016-тӥ арозь. Уж выльысь вырӟиз 2017-тӥ арын гинэ: соку Удмурт Республикалэн Тӧроез Александр Бречалов, юрттэт курыса, вазиськиз Россиысь Правительстволы. Тӧролэсь куронзэ санэ басьтӥзы — нылпи садэз йылозяз-пумозяз вуттонлы уксё сётэмын кунмылэн резервъя фондысьтыз. Озьы сое пуктыны улосмылэн, кунмылэн но Ленин ёрослэн бюджетъёсысьтызы ваньмыз-ӧвӧлэз 210 миллион манет висъяськиз. Озьы 220 нылпилы чаклам юрт туж чебер пӧрмиз: 12 группа пӧлысь 4-яз ясли луоз.

— Татчы пырыса, мылкыд бурдъяське, — шуиз А. Муталенко. — Со выль куронъёсъя, ваньзэ чакласа, пуктэмын. Интыез вӧл-вӧл, пиналъёсты кышкытлыклэсь утён вылысь но ваньмыз чакламын-радъямын. Шумпотто шудонъёс но: соос лачак, ваньмыз поттэмын кунамы.

Правительстволэн Тӧро-езлэн воштӥсез А. Муталенко ватсаз на: туэ ар пумозь «Демография» нацпроект чотын шаермылэн пӧртэм сэрегъёсаз ӧсъёссэс вӧлъялозы эшшо 27 яслиос. Озьы 3 аресозь нылпиослы чаклам 2 сюрслэсь ятыр интыос усьтӥськозы. Пусйыны кулэ: яслиослэсь проектъёссэс кылдытыку, лыдэ басьтэмын вал анай-атайёслэн ӵектонъёссы-куронъёссы.

Елена Никитина

Ангелина Снигирева
By Ангелина Снигирева 6 сентября, 2019 15:19